Kiiñ Abroŋ na Ketura
1 Kron 1.32-33
25
Abroŋ mar ñaaz aloŋ, akndwoi Ketura. 2 Ka abuk na lo bopoz: "Zinra, Joksan, Meda, Midyaŋ, Isbaki na Swa. 3 Joksan buk Seba na Dedan; bowk Dedan bo Asuriŋ, Letusin na Leumiŋ. 4 Bowk Midyaŋ dwo Efa, Efer, Enok, Abida, na Elda. Boko uzuuz bo o bowk Ketura. 5 Abroŋ dukr Jaaki ŋun akaŋi uzuuz. 6 Kero Abroŋ um hili ahul bowk lo bosi boahaz pzala, ŋun ŋdukloŋi ze priza lo. Ataslan baka ka bo ya zojir pmair onu, onloi awk lo Jaaki.Pkez Abroŋ
7 Abroŋ ze phila lo uzuuz a ka ŋnlur 175. 8 Abroŋ kez na pzafa na mnjona na ŋnlura ŋnsumŋi, ya koulor na baña lo bojonan. 9 Bowk Abroŋ, Jaaki na Ismael, bo moya zuir usi Makpela, ze ksaal ksi Efron, awk Zoar, anhoi nyeteu ze pñog Manre. 10 Ze ksaal Abroŋ ganzki ze kñen bowk Eti. Abroŋ moino za, na ahar lo Sara. 11 Kero Abroŋ kezi, Uzi zu mnjona duzu Jaaki awk; Jaaki zoorin ze pñog plik Beer-Laai-Roi.
Kiiñ Ismael
I Cr. 1:28-31
12 Uni oun itiim isi kiiñ Ismael, awk Abroŋ buki na Agar, ninsi Ejitu, ntihun Sara. 13 Itiim indai o isi bowk Ismael, ze kiiñ boko. Nnsek Ismael dwo Nebayoti; ka pot buk Kedar, Adbeel, Mibsan. 14 Misma, Duma, Masa. 15 Adad, Tema, Jetur, Nafis na Kedema. 16 Bañauki bo o bowk Ismael, bohuli 12 ze pzaro boko. Itiim boko hulo ze ŋntank boko. 17 Ŋnlura uzuuz ŋnsi Ismael ŋho 137. Akezi, ya koulor na baña lo. 18 Kiiñ lo zoo zosaak kmbaau ksi Avila na Sur pñog Ejitu, ze pmair onu, ze book unhyabi Asirya. Bo zoori antom looro na pzaro boko.
Kiiñ ksi Jaaki
19 Uni oun iiña Jaaki awk Abroŋ. Abroŋ buk Jaki. 20 Kero Jaaki ka ŋnlur 40, amar Rebeka, awk Betwel, amak Laboŋ. Betwel na Laboŋ, bo o borameu, bosi Padan-Araŋ. 21 Jaaki buur na NYEEK zonkont ahar azi ka khuk. NYEEK te ibuur lo ka Rebeka Leempoo. 22 Bopoz ika ze gutun ze mezu pu lo. Ka yepro ezi kaa, nji o jeink ? Ka yep NYEEK. 23 NYEEK jak lo: "Ŋrasa 2 ŋoŋu ze pu nu. Iiñ ipugz yoyun ze pu nu. Wo buk iiñ 2 yoi ptaaslor. Kiiña kloŋ o pe ksinz kolo pka ofooza. Anhoi nyeek optihunar ampozi.
24 Kero ka Rebeka jau ze kuuk, abuk ŋntantl. 25 Nsek lo jabl oyel zo leef uzuuz , un ominz kaun ka dwo Esau. 26 Antom aza bukoo bup ze ploñ Esau. Un ominz kaun bo du lo Jako. Jaaki ka ŋnlur 60 zobukro boko.
Esau hap kfa ksi nnseke
27 Bopoz ka haal. Esau bi ka ulipl ze pgoŋar; afundar utihun usi ksaal, ka Jako o nmpoz andagzoi, fundar pñog mez. 28 Jaaki fundar Esau zonkont a o ngoŋar, Rebeka sa fundar Jako zonkont akhonaya ze mez.
29 Onwan Jako juŋ pjuŋ pan psi oyemz. Kero Esau biin ksaal on dee lo. 30 Ka Esau jak Jako : "Ñagonan waalin un ukjuŋunk mpozmi ojeenkle antom nde zonkont nji nori! Un ominz kau bo dulo Edoŋ. 31 Jako seemb lo: "Hapan urun, kfa ksi nnsek mez. 32 Esau jak lo: "Njo ñog pkez, oye kfa ksi nnsek mez oun balirin? 33 Jako jak lo bisron ze krankanki. Ka bisro lo haap lo kfa ksi ninsek mez. 34 Ka Jako punun pjuŋ akjuŋpunk na ofisoŋ, hul Esau ka dee, daani, antom nazo soli. Hunkran abehrandun kfah ksi psek mez.