Otepi 1

Oliuri oseke osi Moises dwo otepi

OTEPI

Otepi duzu na ozee

Zotepi, Uzi lemp duzu na ozee. 2 Ozee hil oko ozi ka digu na mezu, o hil oko osiil; ozi ka un oloŋ. Urimrim hil o duzu zun ze ndiilzi, Oyek Uzi hil zyaanz duzu mnzup.

3 Uzi jaa: "Knfasi o!" "Ka knfasi oo". 4 Ka Uzi iin ja knfasi o na mnjona, ka uditun knfasi na urimrim. 5 Uzi du knfasi pnak, du urimrim, urim. Montna na nfa zipi; uni oun onu oseke.

6 Uzi jaa: “Antom oka klil ze psoof mnzup, antom pdiitun mnzup, na mnsinz molo.” 7 Hunkran Uzi lempdun klil, diitun mnzup mhomunk zeu klil na mhomunk duzu klil. Hunkran odun. 8 Uzi du klil duzu. Montna minzmun na nfa o onu opugzan.

9 Uzi jaa: "Mnzup mhomi zeu duzu, antom mnkoulor zun ze loŋ, antom o hilun pka ojir onkai. "Hunkran odolodun. 10 Uzi du ojir onkai: "Ozee", uzoñnor usi mnzup udu wa irik; Uzi iin un ominzun ja ona mnjona. 11 Ka Uzi jaa: "Antom ozee mai otun, na mun mnkami osepe uz, na mun mi kbukmi mbuk molo, ze mi mnditmi zozee". Hunkran odolodun. 12 Ozee buk otun, mun mi kbukmi osepe ze mi mnditmi, na mun mi kbukmi mbuk molo, ze mi mnditmi. Hunkran Uzi iindun ŋun uzuuz Ulempŋi ŋho na mnjona. 13 Ze montn minzmun na nfa o onu oajzan.

14 Uzi jaa: "Antom oka infasi duzu, philun pkis pnak na urim, antom ŋhilun pho mnjaŋzin mnsi ŋnu, ŋnlura na nkil; 15 Infasi iminzyun zwo duzu antom hilun pfiiz osaak". Hunkran odolodun. 16 Uzi lemp infasi ipugz yeek, kmpekunk pmag antom kduka zoŋ pnak, kmpekunk ptiŋz kzoŋ urim. Ulemp ŋhuzu uz. 17 Uzi zu ya duzu antom ika fiiz osaak. 18 Antom ika zoŋ pnak na urim, psa pzu ukisro usi knfasi na urim-rim. Uzi iin un ominzun, ka o na mnjona. 19 Ze montn minzmun na nfa o onu owakna.

20 Uzi jaa: "Antom mnzup sum maakrin na ngoŋar ŋhilŋi; nkas iiz duzu na ozee." 21 Hunkran Uzi lempdun ngoŋar ŋyeek ŋhoŋi ze mnzup, na ŋikmpuloŋi, ze ŋolo, na ngoŋar ŋhoŋi ze mnzup ze mi mnditmi. Na nkas uzuuz ŋi khizŋi ze mi ŋnditŋi. Hunkran Uzi iindun ja un ominzun o na mnjona. 22 Uzi zu mnjona duzu ŋolo, antom jaa: "Nde bukun maakrin antom nde sum ze mnzup mnsi irik; nkas ŋmbuk ŋnsum zosaak." 23 Ze montn minzmun na nfa o onu oñenzan.

24 Uzi jaa "Osaak ka ngoŋar ŋhilŋi, oloŋ ze ptuut ŋolo, ŋnsaam ŋnsi mez, na ngoŋar, na ŋikmpuloŋi zozee, na ŋnsi pgof, kana oloŋ ze phyai olo. "Hunkran obilun doloo. 25 Uzi lemp ngoŋar ŋnsi pgof ze ptuut ŋolo, ŋnsaam ŋnsi mez ze phyai ŋolo, na ŋikmpuloŋi uzuuz zozee ze mi ŋnditŋi. Uzi iin jaa un ominzun o na mnjona.

26 Uzi pot jaa: "Nja lemp ña anjina anaam na nja, antom a liho duzu ŋrik, nkas ŋnsi duzu, duzu ngoŋar uzuuz ŋnsi pgof, na ŋnsaam ŋnsi mez, na ngoŋar uzuuz, na ŋikmpuloŋi zozee." 27 Hunkran Uzi lempdun ña anjina ka naam na wolo; ulemp baka ñiinz na ñaaz. 28 Uzi zu mnjona duzu boko, antom jak boko: "Nde bukun maakrin nde sum osaak! Nde liho duzu olo! Nde liho duzu ŋrik ŋnsi krik, nkas ŋhoŋi duzu na ngoŋar uzuuz, na ŋikmpuloŋi zozee.'' 29 Ka Uzi jaa: "Nji hul nde mun uzuuz mnkami osepe ze ŋjir uzuuz zosaak na mun uzuuz mi kbukmi ŋun ŋnde mnkami osepe; mo pho ŋun nde ŋnde. 30 Nji hul mun nfulamul mo kre ksi ngoŋar ŋnsi osaak, na nkas uzuuz ŋnsi duzu, na ngoŋar uzuuz ŋi kmpuloŋi zozee, nkaŋi oyefzar osi phila." Hunkran obilun doloo. 31 Uzi iin un ulempi liilun na olo. Montn minzmun na nfa o onu opaajun.