2
Hunkran duzu na ozee, na ŋun uzuuz ŋnsumŋi toomdun plempo. 2 Kero Uzi toom plemp utihun wolo, zonu ojaandun uyoŋi ze ŋun uzuuz ŋnsi uhili lempi. 3 Uzi zu mnjona zonu ojaandun antom diitun nolo, zonkont onu ominzun Uyooŋ utihun uzuuz usi plemp ŋunu.Uzaanz usi Edeŋ
4 Hunkran odolodun kero duzu na ozee lempoo. Kero NYEEK, Uzi lemp ozee na duzu, 5 mmun mozi hil o zosaak, ka otun ozi hil mai, zonkont NYEEK, Uzi azi hil o hutun olura duzu osaak, ka ozi ka ñiinz aipjar ozee, 6 o pool hil aknazo zozee ka tulun osaak uzuuz . 7 NYEEK, Uzi bi lemp ña anjina na mbool mnsi ozee, antom honzar lo zuil oyefzar osi phila, Ka ña njina bi o ña ankai phila. 8 NYEEK, Uzi zu uzaanz zosaak Okndwoi Edeŋ ze pmair onu, ka ujek ña anjina uhili lempi, zu lo zolo. 9 NYEEK, Uzi zu antom mun mai zosaak mi hili nuro pten, balir pde. Bun buk unhulbi phila hil o ze psoof uzaanz, na bun usi kme mnjona na khuzin.
10 Krik kloŋo pun ze Edeŋ antom ptulun uzaanz. Kbi airoo iteet iwakr isi irik intik. 11 Ktiim krik kseke kudwo Pisoŋ. Kfoyo osaak osi Avila uzuuz , zun ze nkazi mhuru. 12 Mhuru osaak ominzun mnuroo. Osa ka za uz purfumi na ilaak infiroi ikndwoi bdelyu na psi oniz. 13 Ktiim krik kpugzan dwo Jyoŋ. Krik kminzki kfoyo osaak osi Kus uzuuz. 14 Ktiim krik khajzan dwo Tigri. Krik kminzkun khya Asirya zojir pmair onu. Ktiim krik kwaknan dwo krik Efrati.
15 NYEEK, Uzi jek ña njina, zu zuzaanz usi Edeŋ antom ajar wolo abaap wolo. 16 NYEEK, Uzi zaŋ ña anjina jak lo: "Uhilun pde mbuk uzuuz mnsi mun uzuuz mhomi zuzaanz, 17 bun unjai ka hul kme ksi mnjona na khuzin ika de wa, zonkont onu udeei wolo zowadadi wo pkeza."
Uzi lemp ñaaz
18 NYEEK, Uzi jaa: "Ozi o na mnjona ñiinz duko nkona lo. Njo plemp ña anjina ai pzinkun lo, antom anaam na lo." 19 Kero NYEEK, Uzi jek mbool lemp ngoŋar ŋnsi pgof uzuuz , na nkas uzuuz ŋnsi duzu, ya na ŋolo ya hul ñiinz, antom pten mi ai pdu ŋolo. Ngoŋar ŋminzŋun uzuuz ŋihilŋi Adoŋ zui ktiim, khokun ktiim ŋolo. 20 Hunkran ñiinz zudun ŋnsaam ŋnsi mez, na nkas ŋnsi duzu na ngoŋar ŋnsi pgof. Ka azi ka ña ai pzinkun lo antom anaam na lo.
21 Hunkran NYEEK, Uzi zudun Ñiinz ka zip na uŋoi undizwi, ka punun pmoon psi kteeñ antom kakunk oyemz ze zun ze minzun.
22 Na kteeñ kminzkun ksi NYEEK, Uzi hili punun ze ñiinz, lemp ñaz, ya hul Adoŋ. 23 Adoŋ jaa: "Ñai ze krankanki a o pmoon ni na oyemz ni. Apdwo ñaaz zonkont a pun ze ñiinz."