Pjet psi ñiinz
3
Osai opulo hil pe plip ze pdo khuzin duzu ngoŋar ŋnhilŋi ŋnsi pgof ŋnsi NYEEK, Uzi lempŋi. O yep ñaaz: "Owadadi hunkran Uzi jakun, nde ki kde mbuk uzuuz mnsi mun zuzaanz?" 2 Ka ñaaz seemb osai opulo: "Ndo hilun pde mbuk mun mhomi zuzaanz, 3 Ka mbuk mnsi bun wobi ze psoof uzaanz. Uzi ja ndo ki kde mbuk wolo, ka ndo zo pdapro wa, antom ndo ki kez." 4 Osai opulo jak ñaaz: "zowadadi nde zo pkez. 5 Zonkont Uzi me ja, onu nde dei buk pminzpun, kil nde o phaulo, nde pho injaka Uzi, nde pme un onuroi na un onhuzi." 6 Ñaaz iin bun uminzun ka wo na mnjona ze kil lo, bun unjewobi antom phul lo obambi. Ka tep phiutzar wolo, antom uhilun phulo obambi. Apunun buk wolo dee, sa hul ahina uz; ka aminzun sa de wolo. 7 Boko bopugz, ikil boko haulo, kabo bamb ja bo o urimu. Bo jek itoh uliimpun lut antom tiimoo:8 Ñiinz na ahar siink NYEEK-Uzi, ka aka lawar zuzaanz ze montna, bo meno zurun wolo ze psoof mun mnsi uzaanz. 9 Ka NYEEK, Uzi du ñiinz, yep lo: "Won zon?" 10 Ñiinz jak wa: "nji te prim nu zuzaanz, kalo, ze mi njomunk urimu, antom menoo." 11 Uzi yepa: "Nonzi soondu ja wo urimu? Ude buk psi bun usi nji jaki wi uki kde?" 12 Ka ñiinz jaa: "Ñaaz huli nji antom a o ahindu ni, ahulun nji mbuk bun uminzun: Ka nji dee." 13 Ka NYEEK, Uzi yep ñaaz: "Yezi kaa udol un ominzi?" Ñaz jak Uzi: "Osai opulo darun nji: Nji de polo." 14 NYEEK, Uzi jak osai opulo: "Ze mi udomunk un ominzun, upe pka khuzin uzuuz duzu ŋnsaam ŋnsi mez na ngoŋar uzuuz ŋnsi pgof. Wo pduka pulo zozee na pu un odee nu opho kdu ze ŋnu uzuuz ŋnsi phila nu 15 Njo pzu ubinkro ze psoof un na ñaz. A polu ze weene. Wi wo pduma ze ploñ." 16 Uzi jak ñaz: "Njo pbundaru omindo zoyaaru anjau ze buk. Na omindo olwoun pkaan nmpoz. Wo pka khyutzar ze ahinu; a pliho duzu nu." 17 Uzi jak Adoŋ: "Ze mi utemunk prim ahru, antom de buk bun nji jaki wi uki kde, ozee opka khuzin zonkont nu, zofoz utihun nu olwoun pden, ŋnu uzuuz ze phila nu. 18 Ozee o pbukru usumplu na ontikna; wo pde otun osi pgof. 19 Wo pde ode nu na oiki osi mnkil nu, anukint ukak zozee zun upunozi, zonkont ulempo na mbool wo to pkak pho mbool."
20 Ñiinz zu ahar ktiim Eva, zonkont a o aniin baña uzuuz bonkaaki phila. 21 NYEEK, Uzi lemp yun itiimo isi injand tiimun Adoŋ na ahar.
22 NYEEK, Uzi jaa: "Ña njina ze krankanki oko injaka ña ze nja, a me ŋjona na khuzin. Njazi hilun phutunaa a solun kñene antom a jek uz buk bun unjai ka hul phila, ze a de wolo a phil oloŋ." 23 Hunkran NYEEK, Uzi dookunk lo zuzaanz usi Edeŋ, a ya jaar ozee osi a hili puno. 24 Kero ka upunun ña njina zuri uzu oiili Uzi okndwoi okerubiŋ zuzaanz usi Edeŋ zojir pmair onu, na keej ksi uroo, o kayaanz ze foyo antom pyeeŋ book usi bun un jai ka hul phila.