Kaiŋ na Abel
4
Adoŋ nim ahar. Eva leempoo, buk nmpoz akndwoi Kaiŋ, a jaa: "Na pzinkun NYEEK nji ka nmpoz ñiinz." 2 Zurun ka buk Abel aza Kaiŋ. Abel hil o nyafn ŋmpalalu; Kaiŋ o nnjaar. 3 Onwan ka Kaiŋ yana mbuk mun ozee mnsi ajaarmi mnsi un onhaloi phul NYEEK. 4 Abel sa yana ompalalu ze ŋmpalalu ŋmbukoŋi urun osi un onhaloi, na mnir olo, NYEEK digzan wojun Abel na mnliina. 5 Ka NYEEK azi digzan Kaiŋ na un onhaloi osi wojun lo. Kaiŋ deuzi anka mnkil lo kint hugloo. 6 NYEEK yep Kaiŋ: "Oyezi ka ka udeuzi? Zonkontee kaun ka mnkil nu hugloo? 7 Zu do un onhoi na mnjona mbaza ukdigzano? Zu do un onhani pho na mnjona, pjwa o pkujaru ze plumun. Pjeu pliho nu, uka pka kpe duzu pa."Knfiŋ Useke
8 Kaiŋ jak aza lo Abel: "Ñagona, nja saŋ nja ya pgof." Kero bo o ze pgof, Kaiŋ huglar aza lo Abel antom fiŋ lo. 9 NYEEK yep Kaiŋ: "Azau Abel aleyon?" Ka Kaiŋ seemb NYEEK jaklo: "Mbazi mee. Njo ko nyafna nzain?" 10 NYEEK yepa: "Oye ulempink? Siinkun! Pñak psi azau ze kiikrin zozee. 11 Ze krankanki khuzin o ze wi udoko zozee onhauli mntum olo antom pseh ze iñen nu pñaak azau. 12 Zoyaaru anjaar ozee ozo phulu philun olo. Wo pduka yaanz ŋnsaak uzo pka osaak woy pzañna." 13 Kaiŋ jak NYEEK: "Omindo ni omagi ampe pjwa ni nji hilni pmindo. 14 Hankri wo pdookin zosaak; njo pduka meno mnkil nu. Njo pduka yaanz ze ŋnsaak, mbazo pka zun njoi phona. Ña iin ni nji apfiŋi." 15 Ka NYEEK huglo jak lo: "Ña nfiŋi Kaiŋ a pnornorno ŋyas jaand." NYEEK, zu mnjaŋzin ze Kaiŋ ze ña anhiini lo akikfiŋ lo. 16 Hunkran Kaiŋ pundun zurun NYEEK, ya o zosaak osi Nodi, zojir osi Edeŋ ze pmair onu.
Kiiñ ksi Kaiŋ
17 Kaiŋ nim ahar. Ka leempoo, buk nmpoz, ka zu lo ktiim Inoki. Kaiŋ lemp kmbaau du ko lo ktiim awk lo Inoki. 18 Inoki buk Iradi, Iradi buk Meujael, Meujael buk Metusela, ka Metusael buk Lameki. 19 Lameki hil nim bohaz bopugz; ktiim aloŋ hil dwo Ada; ka aloŋ ktiim lo dwo Zila. 20 Ada buk Jabal, a hili o aliin bo hili o bo kul ŋnsaam. 21 Ktiim aza kdwo Jubal a ika o aliin baña uzuuz bo lal unsunden na bo luul ontilaz. 22 Zila uz, sa buk Tubal-Kaiŋ, aknlempi izij uzuuz isi kobre na iferu; Aza Tubal-Kaiŋ ñaaz a hil o Naamaŋ.
23 Onwan, Lameki jak bohar: "Ada na Zila, nde sinkan; nde bohar Lameki, nde siinkun kjoh ni. Nji fiŋ ñiinz aloŋ zonkont ayuin, nmpoz nzala zonkont apolin.
24 "Ze ok hilun pbotno pko ŋyaas 7, Lameki ka pbotno pko ŋyaas 7, ampjau ze ŋyaas 70."