Otepi 24

Abroŋ hilan bedr Jaaki ñaaz

Abroŋ il o zafi ka ŋnlur ŋnsumŋi NYEEK zu mnjona ze lo na ŋun lo uzuuz. 2 Abroŋ jak ntihun lo ampei pjon ze mez lo akmbaapi ŋun lo uzuuz. Zuun kñene ze psoof isou ni. 3 Nji jeu ubisro ni ze NYEEK, Uzi usi duzu na ozee, uzo ber ñaaz ninsi osaaki ze psoof bompili bokananeu zun nja zoonzin. 4 Wo phya zosaak ni ze bowkoliini, uber ñaaz phul Jaaki. 5 Ntihun lo yep lo, ze ñaaz ampjeu pbi na nji nkakun awku zosaak upuni? 6 Abroŋ seemb lo jaa: "Ika kakun nmbukin zosaak ndo. 7 NYEEK, Uzi usi duzu, umpunin nji ze mez oiili, zosaak bowkoliini, ulado na nji, bisro jaa: "Wo phulin osaak oduko o osi kiiñ ni, woun phil oiili Wolo o phya zurun nu pzoŋu uber ñaaz asi nmbukin oi pmar. 8 Ze ñhaz ampjeu bi na wi, ukbur ubisro woink bisro ni hankri, ka ika kakun nmbukin. 9 Hunkran ntihun lo zudun kñene zeu isowo Abroŋ ayeek lo bisro jaa, apdo un ajaki lo.

10 Hunkran ntihun Abroŋ ambupunk ŋun uzuuz ŋnsi priza psi Abroŋ, ajek ŋnsuntukluŋ 10 sol phya Mesopotamia ze kmbaau ksi Naor. 11 Azu ŋnsuntukluŋ ka ŋup pñog plik psi mnzup pnlopi kmbaau, ze montna ori bompili jaunk ka ya plik mnzup. 12 Ka jaa: "NYEEK-Uzi usi Abroŋ ayeek ni, nji ñaun nu utein hankri uzu mnjona ze duzu nyeek ni Abroŋ! 13 Nji nazink ze kwaŋ plik mnzup. Bompili kmbaau o bi plik mnzup. 14 Hunkran nji jeudun odolo jeink: "Nmpili njoi pja, yetna kmbaalu antom ndaan, ka jaki daanun antom nsa hul ŋnsuntukluŋ nu uzuuz , apho nmpili udati a o ahar nyeek ni Jaaki ol nji meu udata antom a o ahar Isak. Ze minzmu njo mee uzu mnjona ze ayeek ni .

Ujik Jaaki na Rebeka

15 Kero azo tom buur na NYEEK, Rebeka awk Betwel, nnsi Milka har Naor, aza Abroŋ ka bi kuŋo kmbaalu ze ksak lo. 16 Nmpili anuroi ampomee ñiinz ayeto ze plik, lik kmbaalu antom payoo. 17 Ntihun Abroŋ ya ir na lo jaklo: "Helna kmbaalu waalin ndaa. 18 Nmpili seemb lo daanun nyeek ni. Antom ka yelun kmbaalu hulo mnzup adaan. 19 Kero ka toom pdaan jak lo: "Nji sa pot oplikr ŋnsuntukluŋ nu mnzup antom ŋndaan uzuuz . 20 Ka sol osar, osar, na mnzup abupmi ze kmbaalu, zumolo zodaani ŋiit. Pot ziir plik, plik mnzup, hunkran alikrun ŋnsuntukluŋ uzuuz . 21 Ñiinz aminzun joou zik ze ten lo na mnjona antom, pme men NYEEK zuun book lo ya na mnjona.

22 Kero ka ŋnsuntukluŋ toom pdaan, ñiinz aminzun jek kmiun khuru kmpeki grama kñene khoki kjaaui ksi mhuru na insawan ihuru impei grama osent zu nmpili ze kñene.. 23 Ka hyep lo: "Noon buku? Ñagona uzuupin ze nde pka zun ze mez aliin nu. 24 Ka seemb lo jaa: "Njoo awk Betwel, awk Milka bukri Naor. 25 Ka pot jak lo: "Ndo ka otun onsumi na ŋun ŋnde ŋnsi ŋnsaam jai ka de na zun zefuri. 26 Ñiinz aminzun juzi zah NYEEK. 27 Ka jak lo: "Oneejo osi NYEEK, Uzi , usi ayeek ni Abroŋ, boze hutun pjaaŋ mnjona Bolo owadadi Bolo ze ayeek ni. Nji hilun pja NYEEK zoŋin ze book anjau ze mez bowkoliin ayeek ni.

28 Nmpili zii ya zuup ŋun ŋminzŋi ze mez aniin 29 Rebeka hil ka amaka akndwoi Laboŋ. Ka zii phya pjikna ñiinz ze plik. 30 Kero ka iin kmiu na knsanwaŋ ze kñene Rebeka antom siink un ajaki, Ka Laboŋ zii phya pjik na ntihun Abroŋ anhili nazi ka ŋnsuntukluŋ o ze kwaŋ ze pñog plik. 31 Ka jak lo neejun uhoo ñiinz NYEEK zui mnjona; ezi ka kuduko zu uri? Njo bamnu mez, na zun ŋnsuntukluŋ oi pneejna. 32 Ñiinz aminzun ya mez. Baña punun ŋun abiinŋi duzu ŋnsuntukluŋ hul ŋolo otun na ŋun nde ŋloŋo. Bina mnzup phul ñiinz na baña aoonki, antom bo ñoo. 33 Bo zu ŋun nde zurun ñiinz, ka jak boko: "Mbazo pde ze njaan pzuup nde un njikai plado. Laboŋ jak lo lado. 34 Ka jaa njoko ntihun Abroŋ. 35 NYEEK zu mnjona mmagmi duzu nyeek ni anka kint niiri. Hula ŋmpalalu, ŋiit, mhuru, praata, botihun bohaz na boiinz, ŋnsuntukluŋ na ŋhuru. 36 Sara har nyeek ni bukr a nmpoz ñiinz ze pzafa lo Abroŋ hulo priza pi akapi uzuuz . 37 Nyeek ni zuin bisro jaki: "Ika ber ñaaz par nmbukin ze psoof bokananeu zun nji zoonzi. 38 wo phya ze mez nliini, ze phwkpliini uber har nmbukin. 39 Ka nji yep nyeek ni: "Ze ñhaz ampjeu bi na nji? 40 Ka jaki: "NYEEK nji yaanzi zurun lo, aphil Oiili Lo na wi, oi pzu wyas nu ya na mnjona, antom uber ñhaz phul nmbukin ze psoof pzaro ni ze mez phwkpliini. 41 Hunkran uoun pbur ubisro ni. Oyaaru ze mez pzaro ni ze phwkpliini, ze boyeel phulu nmpili ol uburun ubisro ni.

42 Hankri nji jau ze plik jaa: "NYEEK-Uzi usi nyeek ni Abroŋ ze hulin khili knuroki, ze wyas bi nji onbink. 43 Antom odolo jaun. Nji jauink ze kwaŋ plik, ze nmpili bi plik mnzup, ze nji jaklo halan mnzup mpozmi ze kmbaalu lo. 44 Ze ajakin daanun antom sa pot nzu ŋnsuntukluŋ, ol nji meu nmpili aminzi ah pho har NYEEK jaki a o har awk nyeek ni.

45 Kero mbazo tom plado Rebeka ka bi na kmbaalu lo ze ksak. Ka yelo ze plik lik mnzup nji ñau lo mnzup pdaan, 46 Ka miinti yelun kmbaalu ze ksak jaki: "Daan nu nji sa o plikr ŋnsuntukluŋ un ŋndaan. 47 Nji yep lo nonzi buku? Ka seemb jaa: "Njoo awk Betwel, awk Naor buki na Milka, ze ori ominzun kan nji zu lo kmiu ze pkoño na ksawan ze kñene. 48 Nji ŋup zah Uzi. Nji zah NYEEK, Uzi usi nyeek ni Abroŋ, bunzoŋ bi nji na mnjona ze book unjaalbi antom mbed awk nyeek ni nmpili ze psoof pzaro boko. 49 Ze krankanki, ze nde pjaaŋi mnjona na owadadi zojir nyeek ni, nde kzui pme; ze nde ampo pdolin na mnjona, nde kzupin nji khya ojir oloŋ.

50 Laboŋ na Betwel seemb lo jaa: "Un ominzi biin ze NYEEK, ndozi hilun pjaku un onjozi nin un onliili. 51 Rebeka alei zurun nu, jek naa usona aya o ahar awk nyeek nu, ze mi NYEEK jakmi.

Kmar Jaaki na Rebeka

52 Kero ntihun Abroŋ te olado ominzun ajuuz zozee zurun NYEEK. 53 Ntihun Abroŋ hul Rebeka; ŋun ŋfiroŋi ŋhoŋi praata, mhuru, na yunu itiimo. Sa pot hul aniin na amaka ŋun ŋnifiroŋi. 54 Kero ka tom pdo utihun uminzun, na boiinz bonhyakunk na lo, bo dee, daani antom fur zolo. Bo nazo ze nfa ka jak boko: "Nde hutnan ndo, ndo sol nkak ze nyeek ni. 55 Ka amak nmpili na aniin seemb lo jaa: "Nde hutunan nmpili aduko na ndo ŋnu 10 antom nde hailun psol. 56 Ka jak boko: "Nde ika nenin psol zonkont NYEEK zu book ni ka bu yan na mnjona, nde utnan nsol antom nkak ze nyeek ni. 57 Ka bo jak lo: "Nja du nmpili nja hyep lo antom pme un ajaki. 58 Ka bo du Rebeka yep lo: "Ka ujeu psol na ñiinz andai? Ka seemb boko jaa: nji jeui. 59 Ka bo taaslor na Rebeka, aza boko na ñaaz ambupi lo ze poz, na botihun Abroŋ na bonhyakunk na lo. 60 Bo zu mnjona ze Rebeka jak lo: "Aza ndo, wo pho aniin baña bonsumki. Kiiña nu ka kpe ze bobir boko, antom boseh imbaau boko. 61 Rebeka nazo na bompili lo antom dapo ze ŋnsuntukluŋ sol na boiinz bominzkun na bompili lo na botihun Abroŋ.

62 Okakr Jaaki zo lik plik Beer-Laai-Roi zonkont a hil o zosaak osi Negebi. 63 Onwan zoyour onu ka Jaaki pun phya ksaal phya pbuur na Uzi. Odeŋr lo kil iin ŋnsuntukluŋ ka ŋi ka bi. 64 Rebeka uz deeŋ kil iin Jaaki, yeloo zonsuntukluŋ 65 Antom ka yep ntihun Abroŋ: "Nonzi o ñiinz akmbilunk ze book usi pgof bi pjik na nja? Ntihun seemb lo jaa: "Ñai oko nyeek ni. Rebeka jek kfasen ki kndwoki veu lern mnkil. 66 Antom ntihun zuup Jaaki mi bo zipmi. 67 Jaaki ya na Rebeka zoku aniin lo Sara; mar lo, fundar lo; hunkran Rebeka huldun lo kliinsi kero aniin kezi.