Jaaki zosaak bofilisteu
26
O hil ka ono zosaak, onhani pho ono orunu, ono ounk zo kil Abroŋ. Jaaki ya ze mez Abimeleki nliin bofilisteu, ze Gerar. 2 NYEEK ya indo na Jaki, jak lo: "Ika kak Ejitu; dukon zosaak nji jaki wi. 3 Dukon zosaak ondai mpozmi; njo pho na wi, njo pzuu mnjona; njo phulu ŋnsaak ŋdaaŋi uzuuz ŋho ŋnsi kiiñ nu. Njo pnazun phuuz nji huuzpi na aliinu Abroŋ antom bisro lo. 4 Njo pbundar kiiña nu ksum injaka ŋhuzu duzu; Njo phul kiiña nu osaak ondai uzuuz . Ŋrasa uzuuz ŋho pho na mnjona zonkont kiiñ nu. 5 Zonkont Abroŋ hil aka tein, kdo ŋun nji jakŋi lo, kiili ni, plul ni, na ŋiimna. 6 Hunkran Jaaki dukodun ze Gerar. 7 Kero boiinz zosaak ominzun yep lo zonkont ahar, ka jak boko: "Nzain naa."Zonkont akaloi pjak boko nharin naa, bo kikbi kfiŋ lo zokont Rebeka oi ñaaz anuroi.8 Ka ajon zolo, anko onwan Abimeleki, nliin bofilisteu, naz zo jandel iin Jaaki aka noonz na ahar lo Rebeka. 9 Abimeleki du Jaaki jak lo: "Zo wadadi ahru aa, ezi kaa ku jak ndo azaw aa? Jaaki jak lo nji jaaŋzan njo pfiŋo zonkont lo. 10 Abimeleki yep lo: "Ezi ka ka udondo un ondai? Ñiiz aloŋo, ihilun piinz na aharu, Hunkran uhilundun pzu pjwa ze ndo. 11 Abimeleki zuup baña lo uzuuz jaa: "Ze ña zu kñene ze ñiinzi na ahar a pfiŋo." 12 Zolur ominzun Jaaki jaari zosaak ominzun; akit ŋyas 100 ampempen osi alaalunk, zonkont NYEEK zu mnjona ze yaa. 13 Ka aniiri. Priza lo tep ze pbundar ankint sum maakrin. 14 A hil ka ŋnsaam ŋnsumŋi, ŋmpalalu, na ŋiit na botihun bonsumki, anka bofilisteu taajr lo. 15 Un ominzun kaun ka bo tuh mnlik botihun Abroŋ hilunk jipi, kero Abroŋ um hili, bofilisteu tuh molo, sumun molo mbool. 16 Abimeleki jak Jaaki: "Punun ze psoof ndo zonkont upe ndo pka priza.
17 Hunkran Jaaki pundun zolo ya zoori zunjir Gerar duko zolo. 18 Jaaki jipl mnlik mnjipomi zo kil nliin, mi bofilisteu tuhmunk zokezr Abroŋ. Jaaki zu molo itiim aliin hilunk zumolo. 19 Botihun Jaaki hil jipi zunjir bi pundar ze plik pikmbulunkpi. 20 Boyafna gerar unso na boyafna Jaaki Jak boko: "Mnzup mndaami moo mnsindo! Un ominz kau bo du ktiim plik pminzpun Esek. 21 Bo pot jip plik ploŋo bo unsun duzu polo uz zonkont un ominzun kaun ka bo du polo ktiim Sitna. 22 Apun zolo pot jip plik ploŋ. Ña azi unsni zonkont polo. Hunkran bo dudun polo Reoboti jaa: "Ze krankanki NYEEK hul nja zunu; nja bundar zosaak. 23 Zolo ka ya ze Berseba. 24 Zurim uminzun NYEEK ya indo na lo jaklo: "Nji o Uzi aliinu Abroŋ. Ika liinki, zonkont nji o na wi. Njo pzu mnjona Ni ze wi pbundar kiiñ nu kmag, zonkont ntihun ni ze kfundar nji kaki ze Abroŋ. 25 Jaaki lemp pkak zolo du ktiim NYEEK. Hank oku lo zolo; botihun lo jip plik.
Jaaki huz na Abimelek
26 Abimeleki biin gerar pten lo, na Ausati nzaŋ lo, na Fikol nyeek bogutun lo. 27 Jaaki yep baka: "Ezi ka ka nde bi ptenin, nde sajzoni punin ze psoof nde. 28 Ka seemb lo: "Ndo hikran me NYEEK o na wi. Un ominzi kaun ndo hikran ja ohilun pka ubisro ze psoof nja, ndo na wi ndo jeu phuuz na wi. 29 Bisron uzo pdo ndo khuzina ze mi ndo anunk pdolu khuzin. Ndo ze dolu na mnjona, hutnu ka usol na phyoŋ. Ze krankanki mnjona NYEEK o na wi. 30 Jaaki do boko onah; bo dee, daani. 31 Bo deeŋo ze khanan do do ubisro; Jaaki hutun boko bo sol na phyooŋ. 32 Zonu ominzun, botihun Jaaki ya zuupa zonkont plik bojipi, bo jaka "pka mnzup." 33 Jaaki zu plik ktiim Seba; Onkanu Berseba o ktiim kmbaau kminzkun anjau hankri.