Jaaki zu mnjona duzu Jako
27
Kero Jaaki zafi azi pot ze ten na mnjona. Du ninsek lo Esau jak lo; Nmbukin. Ka yepno jaa: "Njii. 2 Jaaki jak lo tenun ze krankanki njo zafi mbazi me onu njoi pkez. 3 Jekun yun nu isi pgoŋar inhoi insaaŋi, kwel, na klisi insaaŋi, wyarin pgoŋar. 4 Antom ujuŋin un onliili ze mi nji jeumi, antom ubi na olo nde ol nji zuun mnjona ze wi nin po kezi. 5 Ka Rebeka ka siink un Jaaki kladoi na awk lo Esau. Esau sol phya pgoŋar ze pgof antom ahilun bup ogoŋar ai pjuŋ aliin. 6 Rebeka jak awk lo Jako: "Nji te aliinu ka lado na amaku Esau: 7 Bina ogoŋar pgof antom ulempin un onliili, antom nde nzu mnjona ze wi zurun NYEEK, nni po kezi. 8 Ze krankanki nmbukin siinkan un nji kjaki wi. 9 Yan ze kmeh ŋnsaam antom ujek ŋmpi nkal ŋmpozŋi 2 ŋnuroŋi; njo pjuŋ ŋha un onliili, antom wya hul aliinu ze mi ajeumi. 10 Uya hul aliinu ade antom azu mnjona ze wi. 11 Jako jak aniin lo Rebeka: "Nmakin Esau sum oyel zoleef, nji mbazi ka oyel onsumi. 12 Nliini hilun bi plagzin zoleef ol nji oun ndara zurun kil lo. Nji kbi na khuzina ze weene ni mbazo piin mnjona zurun lo. 13 Aniin seemb lo: "Hutnan khuzina jet ze ween ni; ten un nji jaki wi, uya jek opi ubina. 14 Aya jek opi ya hul aniin ka lemp lo un onliili ze mi aliin jeumi. 15 Rebeka jek yun itiimo isi Esau nnsek lo tiimun Jako awk lo ampozi. 16 Na injand ŋmpi nkal na ŋmpi ŋhaz atauyunk atan Jako ya ze iñene na kzuuz 17 Antom ka hul Jako un ode onliili aya hul aliin na poŋ alempi. 18 Ka ya zun aliin oonzi jaklo: "Nliini. Ka yepnolo njii nmbukin nona? 19 Jako jak aliin njyaa Esau nnsek nu. Nji do ze mi ujakmunk nji. Nazoon, uzoo, ude oyemz nji goŋari, antom uzu mnjona ze nji. 20 Jaaki yep awk udoko jan anhiin olo osar nmbukin? Ka aseemb lo: "NYEEK-Uzi nu bina a zojir nji oni. 21 Jaaki jak Jako ñogun ze nji nmbukin, antom nlaagzu ol nji hilnun pme amen wya nmbukin Esau. 22 Ka Jako ñog ze kwaŋ Jaaki aliin, ka laagz lo jaa: "Prim oko injaka psi Jako, ka Iñen o injaka isi Esau. 23 Hunkran anun phikran lo zonkont iñen lo ka oyel injaka isi amak lo Esau; ka azu lo mnjona. 24 Jaaki pot yep lo: "Zowadadi woun nmbukin Esau? Jako jaklo nji a. 25 Jaaki jak lo: "Ñogna oyemz ominzun osi pgoŋar hulin nde; antom nzu mnjona ze wi, ka ñogun lo oyemz ka dee; sa pot hul lo pkem ka daani. 26 Aliin lo Jaaki jak lo: "Ñogun zi nmbukin antom hulin obis. 27 Jako ya ze kwaŋ aliin hul lo obis. Aliin siink kñeeli yun lo, zu mnjona ze lo jaa: "Phyaaf nmbukin oko injaka phyaaf pgof, NYEEK zui mnjona. 28 Uzi ophulu opool osi duzu, ozu ksaal nu knir, antom uka ksepru ki kndwoki trigu ki knlempnki ifor opoŋ onsumi na pkem phalu.29 Ŋrasa optihunaru; ŋnsaak opŋup zurunu; wo pho nyeek duzu baña nu, bo pŋup zurunu. Bowkoniin nu o pŋup zurunu. Ña anzui khuzin ze wi khuzin opjet duzu lo. Bo knzuki mnjona ze wi, mnjona opho na baka.
30 Zo toomr Jaaki pzu mnjona ze Jako, ka aminzun toom pun zurun aliin, amak lo Esau sa biin pgoŋar. 31 Alo uz a sa juŋ un onliili, yah phul aliin jak lo: "Nliini nazoon ude oyemz pgoŋar ni antom uzuin mnjona. 32 Ka aliin lo Jaaki yep lo: nona? Ka jak lo: "Nji aa, awku Esau nnsek nu. 33 Oleef ki na Jaaki maakrin, ka yepro: "Noon yaunk pgoŋar bina oyemz? Nji de olo kero uzo bili ka nji zu lo mnjona; mnjona minzmu mozi hilun pzil. 34 Kero Esau te olado aliin, akiik maakrin, ñaun aliin jaa: "Nliini, zwan mnjona uz! 35 Jaaki jak lo: "Azau bi darin seh mnjona nu. 36 Esau jaklo: "Ktiim Jako liŋa! Uyaas lo upugzan bi akdari nji. A shein psek mez, ze krankanki apotink shein mnjona ni! Antom apot yeproo: "Uri bani mnjona mloŋ mnsini? 37 Jaaki seemb Esau: "Nji zwa phyeek duzu nu, na boza nde uzuuz . A pho duzu baka. Nji hula ksepru kndwoki trigu ki knlempnki ifor isi opoŋ na pkem phalu. Oye nji hilnun phulu nmbukin? 38 Esau jak aliin: "Uka ze mnjona mnloŋ Papa? Zwan mnjona uz! Sa tep phur maakrin. 39 Aliin lo Jaaki seemb lo jaa: "Wo pzoo pñog ksaal knirki plo opool osi duzu. 40 Keje nu kok woun pde na antom ptihunar azau, nkil obi pjau uzo ptea wo phintro ikorent lo ze kzuuz nu. 41 Esau siink khuzin zojir Jako, zonkont mnjona aliin hilunk hulo. Ka ja ze kwaz lo: "Onu pkez papa opjau. Zotoomi ŋolo njo pfiŋ nzain Jako. 42 Kero Rebeka zuupo un nnsek lo Esau ladoi ahilan pdu awk lo Jako jak lo: "Amaku ze ber pfiŋu. 43 Ze Krankanki nmbukin dolun un nji jaki wi. Nazoon uzi uya dun nmakin Laboŋ ze Araŋ. 44 Dukon da an oreu amaku kint ozip. 45 Zoorun da mpozmi an oreu amaku kint ozip, an ankint azimlo un udoli lo, njo philan pzuupu antom ukak. Mbazi jeu phaŋ nde uzuuz zonu oloŋ. 46 Rebeka jak Jaaki nji ka kjoozi zonkont bompili bosi Eti. Ze Jako sa mado uz na nmpili osaaki, injaka Esau, phila ni pozo pbalir.