Jaaki hil Jako Padan-Araŋ
28
Jaaki du Jako zu lo mnjona antom jak lo: "Ika mar nmpili ze bompili bondaaki bosi Kanan. 2 Nazoon wya Padaŋ-Araŋ ze mez Betwel, aliin aniinu, uber aharu ze psoof bowk Laboŋ, amak aniinu. 3 Uzi unkawi philun bo pzu mnjona ze wi, pzuu ubuk bopoz bonsumki, kiiñ nu ko pmai maakrin, bi pho iiñ insumhi. 4 Bo phulu mnjona mnsi Abroŋ, wi na kiiñ nu, onzañi antom wiij osaak woi pzona injaka nya, osaak osi Uzi huli Abroŋ. 5 Hunkran Jaaki hildun Jako ka sol phya Padaŋ-Araŋ ze mez Laboŋ, awk Betwel, nrameu, amak Rebeka, aniin Jako na Esau.6 Kero Esau te Jaaki zu mnjona ze Jako, hil lo aya Padaŋ-Araŋ aya ber ñaaz dolo; sa pot te kero ka zu mnjona ze lo jaklo: "Ika mar ñaaz nnsi osaaki ze bowk Kanan. 7 Sa pot iin uz, mi Jako temi aliin na aniin, ya Padaŋ-Araŋ 8 Esau sa pot hikrani bohaz bosi Kanan bozi baliri zurun kil Jaaki aliin boko. 9 Hunkran Esau yadun zosaak Ismael, mado na ñaaz akndwoi Maalat, awk Ismael, awk Abroŋ, adit na bohaz bosi ahilunk o mari, aza Nebayoti.
Jako iin ozaafi Orir
10 Jako pun ze Berseba, ya ze Araŋ. 11 Ka jau zun ze loŋ, ŋoinz zolo zonkont onu hil o yowi. Ka jek plaak dekn weene. 12 Ka azaafi na orir ontepi zozee anjau duzu. Ŋiili Uzi ka payo, ot ze yeto ze olo. 13 NYEEK hil o duzu orir jaklo: "Nji oun NYEEK, Uzi usi aliinu Abroŋ, Uzi Jaaki. Ozee osi upiinznink, njo phulu a na kiiñ nu. 14 Kiiñ nu o psum injaka mbool zozee; osaak nu o ptep ze phyour onu ampkint pjau ze pmair, duzu osaak amphya zeu osaak. Ŋnrasa uzuuz zosaak ŋho pzwo mnjona zonkont kiiñ nu. 15 Njo pho na wi, njo bapu zun zi ukiazi. Njoto pkaknu zosaaki, zonkont mbazo phutnu ampkint plemp un nji jaki wi. 16 Jako lut zuŋoi jaa: "Zowadadi NYEEK o zunzi, ka mbazi mee. 17 Jako siink kliinki ja: "Zunzi liinkni! Zunzi zozi oko zun ze loŋ ze mbaza ku Uzi ka; plumun pndaapi o psi duzu.
Klinsi ksi Betel
18 Jako nazo ze nfa lis, jek plaak adeknpunk weene, zu polo injaka psap antom has mnsitidos duzu polo, antom piimnan polo ze Uzi. 19 Ka du ktiim zun ze minzun Betel. Kmbaau kminzku zoseke kdwo Lus. 20 Jako bisro jaa: "Ze Uzi o na nji, baapin zuyas nji onbink, hulin un ode, na yun itiimo, 21 ze nji kaki na phyooŋ ze mez nliini, NYEEK o pho Uzi ni. 22 Plaak pndaapi nji zuupink injaka psap, po pho ku Uzi. Ŋun hulŋi nji uzuuz , ŋozo pzil, nji ka 10, njo phulu oloŋ.