Otepi 29

Jako jau ze plik Araŋ

Hunkran Jako nazodun ya ze bopugi bonhoki zojir pmair osaak . 2 Ka iin plik ze pgof na inzoŋ 3 isi ŋmpalalu ŋmpiizŋi ze kwaŋ polo; zonkont popun pdaani ŋmpalalu; o hil ka plaak phyeek pikntuhnpi polo. 3 Inzoŋ uzuuz isi ŋmpalalu akzoñnor; boyafna bo akpunun plaak ze mntum plik antom phul ŋnsaam ŋndaan, antom ot kbotun plaak duzu plik.

4 Jako yep boko: "Bowkoliini, nde pun zoon? Bo seemblo: "ndo o bosi Araŋ. 5 Ka yep boko: "Nde me Laboŋ, awk Naor? Bo see mblo: "ndo mea. 6 Ka pot yep boko: "A o na mnjona? Bo seemblo: "A o na mnjona. Awk lo Rakel kbilunk na ŋnsaam. 7 Ka jak boko: "Onu um iki. Ozo jau zoori pzoñun ŋnsaam. Nde hulun ŋa mnzup ŋndaan, nde ya hutun ŋolo. 8 Bo jaklo: "Ndo zi hilni, ndo phyoŋ ŋnsaam ankint ŋnzoñnor uzuuz , baña bi punun plaak duzu plik antom bo daanun ŋmpalalu.

9 Kero aka lado na boko, Rakel jau na ŋnsaam ŋnsi aliin, zonkont a o nyafna. 10 Kero Jako iin Rakel, awk Laboŋ, amak aniin na ŋnsaam Laboŋ, ka jau punun plaak ze plik, daanun ŋmpalalu Laboŋ. 11 Jako hul Rakel obis deeŋ prim huri. 12 Ka Jako zuup Rakel jaklo, nji o awk aliin aliinu, awk Rebeka. Rakel zii ya zuup aliin.

13 Kero Laboŋ bi te olado ominzun osi Jako, awk aza, ka zii phya pjik na lo, hom lo, hul lo obis, yana lo mez. Ka Jako zuup Laboŋ ŋun ŋminzŋi uzuuz zuyas . 14 Laboŋ jak lo: "Zo owadadi woo imoo ni, na oyemz ni. Jako duko na lo pli uzindan.

15 Antom Laboŋ yep Jako: "Ze mi womunk nzain, wo ptihunarin klas? Zuupan un oi pho uluk nu. 16 Laboŋ buk bopoz bompili 2. Ktiim nyeek dwo Leya, ktiim aponzi dwo Rakel. 17 Leya ka ikil inziproi, ka Rakel yuk oleef na mnjona nuro mnkil. 18 Ka Jako hil fundar Rakel. Ka jak Laboŋ: "Njo ptihunaru zonkont Rakel ŋnlura7 awku ampozi." 19 Laboŋ seemb lo jaa: "Ope pho na mnjona nhulu lo mbez nhul ñiinz aloŋ lo. 20 Hunkran Jako tihunarun lo ŋnlura 7. Zonkont Rakel. Oko injaka ŋnu ŋmpozŋi ze ya zonkont ahil fundara.

Imar ipugz isi Jako

21 Jako jak Laboŋ: "ŋlura ni ptihunaru ŋntoomi; hulan nhari antom mmar. 22 Laboŋ zoñun baña osaak ominzun antom dol onah. 23 Zurim, ajek awk, nnsek lo Leya, hul Jako. Ka nim lo. 24 Laboŋ jek njuuk lo Zilpa hul awk lo Leya, abup lo. 25 Kero onu jiinzi, Jako hikran ja Leya aa. Ka yep Laboŋ: "Ezi kaa ku dolin jeink? Mbazi tihunaru zonkont Rakel? Ezi ka ku darin? 26 Laboŋ jak lo: "Mbaza hunkran ndo jaunk ka do zo saaki, nmpoz maro nyeek urun. 27 Toomlan ŋnu kmar Leya, antom ndo hulu antiikun uz; upot optihunarin ŋnlura 7. 28 Jako do mi bo jakmunk lo: "Tooml ŋnu ŋnsi Leya. Antom Laboŋ hul awk lo Rakel a o ahar. 29 Laboŋ hul Rakel nnjuuk lo Bila a o nmpili lo 30 Jako nim Rakel uz; Ka fundar lo ankint pempen Leya. Ka Jako pot tihunar Laboŋ ŋnlur 7.

Bowk Jako

31 NYEEK hikran jaa Jako azi fundar Leya, zulo ka aka bopoz, ka Rakel azi hilun buk. 32 Leya leempoo buk nmpoz du lo ktiim Rubeŋ, zonkont ajaki NYEEK iin kjoozi ni, ze krankanki nhini o pfundarin. 33 Ka pot leempo buk nmpoz du lo kitiim Symeoŋ, jaa: "NYEEK iin ja mbazi fundaro; un ominzi kaun ka hulin nmpozi uz. 34 Ka pot leempoo buk nmpoz, antom jaa: "Ze krankanki nhini o pkoulor na nji ze mi nji bukrmunk lo nmpoz nhajzan, un ominzun kaun ka dulo Levi. 35 ka Pot leempoo buk nmpoz jaa: "Ze krankanki njo pzah NYEEK. Un ominzi kaun ka adulo Juda. Sa tom khuk.