30
Kero Rakel hikran jaa azi buk nmpoz na Jako, atajr amaka. Jak Jako: "Ulan bopoz! Zoampho molo njo pkez! 2 Jako deuzar Rakel jaklo: "Njoun Uzi uneni wi buk? 3 Rakel jak Jako tenun, Nnjuuk ni Bila alei. Pinzun na ya, antom nka nmpoz njoi pdet. Ol nji kau kiiñ zonkonta lo. 4 Ka hul lo Bila nnjuuk lo antom a o har. Jako nim lo. 5 Ka Bila leempo bukr Jako nmpoz. 6 Rakel jaa: "Uzi dol olado Zojirni antom tein ibuur halin nmpoz un ominzi kaun ka dulo Daŋ 7 Bila nnjuuk Rakel pot leempo bukr Jako nmpoz nmpugzan. 8 Ka Rakel jaa: "Nji gut na nmakin ogut Uzi pe lo, un ominzi kaun ka du lo Naftali.9 Kero Leya iin ja azi pot ze buk, ka jek nnjuuk lo Zilpa, hul Jako antom a o ahar. 10 Zilpa nnjuuk Leya buk na Jako. 11 Leya jaa: "Nji ka oneejo, un ominzun kaun ka dulo ktiim Gad. 12 Zilpa nnjuuk Leya bukr Jako nmpoz nmpugzan. 13 Leya jaa: "Nji liilni ampenpeni! Bohaz uzuuz bo pjakin nji ka mnlinan myeek. Hunkran aduun ktiim nmpoz aminzun Aser.
14 Ze ikit trigu, Rubeŋ ya pgof sinz mbuk mun mikndwomi mandragora, ya hul aniin lo Leya. Rakel jak Leya: "halan mandragora mnsi awku biinmunk. 15 Leya yepa: "Ozi liŋu ze mi usehmunk nji nhinin? Upot jeu psehin mandragora nmbukin? Rakel jak lo: "ona mnjona. A pfur na wi hankri antom hulin mandragora awku. 16 Kero Jako pun ze pgof ze montna, Leya ya ir na lo jak lo: "wo bi pneej na nji hankri, zonkont nji ganzi wi na mandragora nmbukin. Ka piinz na lo zurim uminzun. 17 Uzi te Leya; ka leempo, bukr Jako nmpoz nñenzan. 18 Leya jaa: "Uzi lukin, zonkont nji hulunk nnjuuk nihini. Ka du ktiim nmpoz Isakar. 19 Leya pot leempo bukr Jako nmpoz nmpajun. 20 Leya jaa: "Uzi halin un omagi, onee: "bopoz. Ze krankanki nhini o bi pzoo na nji, zonkont nji bukra bopoz 6. Adu ktiim lo Zebuloŋ. 21 Zurun abi buk nmpoz nmpili, zulo ktiim Dina. 22 Uzi bi lel Rakel seemb lo: "Haul lo khuki 23 Rakel leempo, buk nmpoz, jaa: "Uzi punin ze mmol. 24 Du ktiim lo Jose, jaa: "NYEEK o pbundarin nmpoz aloŋ.
25 Kero Rakel buk Jose, Jako jak Laboŋ: "Hutnan nkak osaak ni. 26 Hulan boharin na bowkin nji tihunari wi; Antom nsol book ni zonkont umei nji tihunaru maakrin.
Phuuz Laboŋ na Jako
27 Laboŋ seemb lo: "Ze nji iin mnjona zurunu, ñagonan, udukon na nji, zonkont myeenk nji domi, nji me ja NYEEK zuin mnjona, zonkont nu." 28 Sa pot jak lo: "Zuupan prez ujeupi antom nluku." 29 Ume jaa nji tihunaru un onsumi; sa pot me mi ŋnsaam nu oŋi, kero nji umka yafun ŋolo. 30 Ŋmpozŋi ukaŋunk kero mbazo bili, ŋmbundar un onsumi maakrin. NYEEK zu mnjona ze wi zonkont utihun ni. Zokil on njou ptep ptihunar boharin na bowkin? 31 Laboŋ yep lo: "Ye njoun phulu?" Jako jak lo: "Uzo phulin un oloŋ. Njoto phyafun ŋnsaam nu, zudolin un ominzi. 32 Hankri njo pten ŋnsaam nu uzuuz , njo pdiitun ŋmpalalu ŋntaplaŋi na ŋhuk ŋmpalalu uzuuz nkaŋi mbau mnsinsin, na ŋmpi ŋhaz uzuuz ŋntaplaŋi. Ondai oun pho uluk ni. 33 Hunkran oun psoond kjaali ni zonu osi faan zurun, zonkont nji jaal zurun nu, zojauru ze plukin. Ŋmpi ŋhaz uzuuz ŋani ptaplan, na ŋhuk ŋmpalalu uzuuz ŋani pka mbau mnsinsin, ŋho pho injaka nkijo. 34 Laboŋ jaa: "Opho injaka mi ujakmunk. 35 Zonu ominzun, Laboŋ diitun ŋmpi nkal na ŋhaz, uzuuz ŋntaplaŋi, na ŋnloŋo uzuuz nkaŋi mbau mfaasla, na ŋhuk ŋmpalalu mnsinsin, azu ŋa ze iñen bowk. 36 Bo taslori ka yaanz ŋnu 3 ze psoof boko na Jako . Jako duko na ŋnsaam Laboŋ.
Jako niiri
37 Jako jek inah ifulamul isi munu mikndwomi alamu, aveleira na jaka. Zonkont ifitr yolo ya kfaas, ka fit yolo ika mbau nfasla. 38 Azu inah isi afithi, zun ŋnsaam ai ka daan na. Adola zonkont ŋmpalalu akpairo ŋnsinz ŋolo zoyar ŋolo pdaan. 39 Ŋnsaam ŋhaz akleempo kbuk zurun ilaankun, ŋmpalalu kbuk ŋhuk ŋolo ŋntaplaŋi, ŋnsinsin . 40 Jako diitun ŋmpalalu nkal, hutun ŋhaz ŋntaplaŋi na ŋnfulful ze psoof ŋnsaam ŋnsi Laboŋ. Hunkran adiitnun knzoŋ ŋnsaam ŋnsi oleef lo, azi boflan ŋa na ŋnsi Laboŋ. 41 Zoyar ŋmpalalu ŋhaz ŋmpeŋi pmag jeu upairo na ŋiinz, Jako akzu inah iminzyun zurun ŋolo zodaani, antom ŋpairo zurun yolo. 42 Ka oyaar ŋnsaam ŋnboŋunk ya pdaan, aza kzu inah. Hunkran ŋndafŋunk oŋu ŋnsi Laboŋ, ŋnjijŋunk o ŋnsi Jako . 43 Priza Jako bi bundar un onsumi; a ka bojuuk bohaz na boiinz, ŋnsaam; ŋnpalalu, na ŋmpi, na ŋnsuntukluŋ na ŋhuru.