Otepi 31

Jako zii Laboŋ

Jako te bowk Laboŋ ka lado jaa: "Jako seh ŋun uzuuz alii ndo kaŋi; a ka priza phili o psi aliin ndo. 2 Jako iin ja mkil Laboŋ mozi pot o na mnjona injaka urun. 3 NYEEK jak Jako: "Kakun zosaak aliinu, ze pzaro nu ze bowkoliin; njo pho na wi. 4 Jako hilan Rakel nkuni na Leya boya pgof zun azonzun uyafna ŋnsaam. 5 Ka jak boko: "Nji ten ja mnkil alii nde mozi o na mnjona na nji injaka urun, ma Uzi nliini o na nji. 6 Nde me nji tihunar aliin nde na ofoz ni uzuuz . 7 Ka adarin zimlan oluku ŋyas odisñene. Ka Uzi bozi digzani adoli khuzin. 8 Ze a ja: "ŋñoplaŋi ŋho pho uluk nu, ŋnsaam uzuuz njaka buk ŋñoplaŋi. A sa ja uz: "Ŋnsinsin opho oluku nu. Ŋnsaam uzuuz ŋnjaka buk ŋnsinsin. 9 Hunkran Uzi punundun ŋnsaam ze kñen aliin nde, ulin. 10 Wyas uloŋ, ŋnsaam jaunk ka pairo, nji zaafii. Iin ŋmpi nkal ka ŋi ka pairo ŋhaz ŋñoplaŋi na ŋnsinsin. 11 Oiili Uzi jaki zozaafi: "Jako nji yepno, jak wolo, njii. 12 Ka ujakin: "Tenun! Ŋmpi nkal uzuuz ŋnsaam ŋikmpairoŋunk ŋho ŋhaz ŋñoplani ba sinsini. Nji dol un ominzi zonkont Nji iin un Laboŋ doli wi uzuuz. 13 Njoun Uzi usi Betel, zun uzinzunzunk plaak zu polo ze ktiim nin antom has mnsitidos duzu polo, iimnan polo antom bisroo. Nazon ze krankanki upun zosaaki, ukak osaak bowkoliinu. 14 Rakel na Leya seemb lo ja: "Ndozi pot ka piij ze mez aliin ndo. 15 Aza kdo ndo injaka boya? A hap ndo, antom dee onsaam ndo uzuuz. 16 Priza uzuuz Uzi puni aliindo pho psi ndo na bowk ndo. Hunkran, dolun uzuuz un Uzi jaki wi.

17 Jako nazo, jek bohar na bowk zu boko duzu ŋnsuntukluŋ. 18 Azok book na ŋnsaam lo, na priza uzuuz akapi ze Padan-Araŋ; abup ze book phya pjik na Jaaki zosaak Kanan. 19 Kero Laboŋ pun phya ptih ŋmpalalu lo, Rakel kiij mnsoof, ŋnzi aliin kaŋi. 20 Jako uz dar Laboŋ, nrameu, ze mi anunk me psool lo. 21 Hunkran a soldun na ŋun uzuuz akaŋi; año krik Boeufrate, ya zojir onkuŋ Jileadi.

Labon ya ze kfez Jako

22 Zonu oajzan bo zuup Laboŋ, ja Jako zii. 23 Azoñun baña lo, ya ze kfez Jako zal lo ŋnu jaand, bup lo zonkuŋ Jileadi. 24 Uzi ya ze Laboŋ ze Araŋ, zo zafi zurim jak lo: "Bambu! Ika jak Jako un oloŋ, nin mnjona nin ouzi."

25 Jako zu nku lo zonkuŋ ominzun. Laboŋ bi iin lo; alo uz na baña lo sa zu nku boko zonkuŋ Jileadi. 26 Laboŋ yep Jako : "E udolink nji? Udarin, sol na bowkin injaka bojuuk bosi ogut. 27 Ezi ka udari, zii zi kmeno? Ezi ka uzi zupi, antom utnu na mnjona, na mliinan, na iz, insunden bombau? 28 Ka uzi hutni mbuz nhul bowkin obis, na bowai ni? Ze minzmi udoko injaka nnah. 29 Nji ka philun ze kñeni pdolu khuzin, ka Uzi aliinu lado na nji zurimbi, jakin: "Bambun! Ika jak Jako un oloŋ, nin mnjona nin khuzin. 30 Zu jeu psol, zonkont uzu khwaz ze ktoh aliinu ezi ka ku kij ŋnzi ni? 31 Jako semb Laboŋ jaa: "Nji ka klinki zonkont nji jaŋzan wo psehin bowku. 32 Ña asi uiini na ŋnzi nu a pkez. Bowkoliin nja ki, bohokun kmatr. Tenun un oi osinu nji disi antom ujekolo. Zonkont Jako azi me Rakel kijun ŋzi ŋminzŋu.

33 Laboŋ neej zoku Jako na osi Leia, na ŋnsi bojuuk lo bopugz ukun, azi in ŋzi za. Apun zoku Leia, nej zoku Rakel. 34 Rakel jek ŋnzi, zu ŋolo zolaaku onjai ka zwo duzu onsuntukluŋ, zoo duzu ŋolo. Laboŋ pomj oku lo azi in ŋa. 35 Rakel jak aliin: "Nyeek ika deuzarin ze mi njani philun pnazo zurun nu ze mi nji kñomi pli. Hunkran Laboŋ berdun ŋnzi ŋnmizŋu azi iin ŋa.

36 Jako deuzi, unso na Laboŋ, yep lo: "Ye o khuzin ni? Ezi o pjwa ni, onkai kudeuzari bi zi kfezin? 37 Zi mi ubermunk ze yun ni, ŋun ukaŋi, jekun ŋa uzu zurun bowkoliin nu; antom bo do nja olado, nja bopugz. 38 Ze ŋnlur 20 njoi na wi, ŋmpalalu nu, ŋmpi nkal nu, pu pozi pun na ŋa. Mbazi de ŋmpalalu ŋnsi kzoŋ nu. 39 Mbazi bina oloŋ osi ogoŋar falfalni; Nji akluku ŋa. Nkijoŋi ze pnak o urim wa ksigin ŋa. 40 Hunkran njilun o: "Oiki jaka fiŋi ze pnak, ojonz zurim. Mbaza khilun pŋoinz. 41 Njo ka ŋnlur 20, ze mez nu, nji tihunaru 14 zonkont bowku 2, tihunaru 6 ze kzoŋ ŋnsaam nu. Ŋyas 10 uzimlan oluku ni. 42 Zo hil ampho Uzi nliini, Uzi usi Abroŋ, na mnkalo mnsi Jaaki, zowadadi, uhil o ptaaslor na nji, utnin nkak iñene isil. Ma Uzi in kjozi ni, na utihun iñene ni; un ominzun kaun ulana wi zurimbi.

Laboŋ huuz na Jako

43 Laboŋ seembi jak Jako: "Bohaz uki bowkin ka, bopoz uki bowkin ka; Inzoŋ ŋnsaam indai isi ni ya. Ŋun uzuuz ukteŋin ŋnsini ŋa, yee njoun pdo hankri na bowkinuki, o na bowk boko. 44 Bir zi nja do phuuz, nji na wi, antom o mjaanzin ze psoof nja. 45 Jako jek plaak ploŋ zu polo injaka kzoŋ. 46 Ka Jako jak boza: "Nde zoñnan ilaak. Bo jek ilaak zu onkuŋ. Bo de ze pñog zolo. 47 Laboŋ du ktiim zun ze minzun Jegar Saaduta, Jako du zolo Galeed 48 Laboŋ jaa: "Onkuŋ ondai oun kmatr hankri ze psoof nja. Un ominz kau ze dwo Galeed. 49 A du za Mispa uz, zonkont Laboŋ jaa: "NYEEK o pho nhyeŋ ze psoof nja, ze nja looro. 50 Ze udo bowkin un onjozi, o ze ujek bohaz boloŋ, ze mbaza bowkin ka, nin ña ampho zolo antom pten, Uzi o pho ze psoof nja.

51 Laboŋ pot jak Jako: "Onkuŋ ulaak undai boi zun cliinsi ksi phuuz nji nazunpi ze psoof nja. 52 Onkuŋ ondai, o pho kmatr, zun ze zesi kilinsi zonkont mbazo phaño zojirun bi pdolu khuzina; wi uz uzo phaño zojir onkuŋi zun klinsi antom pdolin khuzin 53 Uzi Abroŋ, Uzi Naor, Uzi boliin boko bi kdo nja olado. Hunkran Jako bisro dun ze kitiim Uzi usi aliin lo Jaaki kalowi maakrin. 54 Ka Jako fiŋ onsaam zonkuŋ antom dol wojun, du bowkoliin bo bi de. Kero bo de, furi zurim uminzun zonkuŋ.

55 Laboŋ nazo ze khanan, hul bowai lo obis, Leia na Rakel zu mnjona ze boko antom kaki phya mez lo.