32
Jako sa sol book lo uz, zolo ŋiili Uzi bi jik na lo. 2 Jako iin ŋolo jaa: "Baña uki bo o kzoŋ bogutun Uzi. Ka du ktiim zun ze minzun Maanaiŋ.Jako ka uhido na Esau
3 Jako hil baña bo ya zurun na nkuni lo phya pzuup amak lo Esau zosaak Seir zojir Edoŋ. 4 Ka jak boko bo ya lado na Esau jeink: "Hunkran ndeun phya pjak nyeek ni Esau: nthiun nu Jako jaa, aya zoo na Laboŋ injaka nya, duko dolo te hankri. 5 Nji ka ŋiit, ŋhuru, ŋmpalalu na ŋmpi, na bojuuk nu bompili na boiinz. Ahilan nkuni antom piin kñago zurun nyeek ni.
6 Kero baña bominzkun boki ahilkunk kak ze Jako, jak lo: "Ndo ya ze amaku Esau; a o ze book bi phir na wi, na boiinz 400 na lo. 7 Jako siink mnkalo, liinki; hai baña bonhili o na lo, uzuuz na ŋmpalalu na ŋiit, na ŋnsuntukluŋ, ze inzoŋ ipugz. 8 Zonkont ajaŋzan ze Esau ya pjet knzoŋ kloŋ ogut, indaayun kbur.
9 Ka Jako buur na Uzi jaa: "Uzi usi nliini Abroŋ na Uzi usi nliini Jaaki, NYEEK, anjaki nji nkak osaak ni na bowkoliini, njo pdolu na mnjona. 10 Mbazi ir ze mi udomunk nji na mnjona, ze mi wazumi ze nji. Kero nji año krik Jordoŋ na plaŋra nji bupna, ze krankanki njo inzoŋ ipugz. 11 Ñagonan nji ñaun nu uliprin ziñen nmakin Esau, nji kalo zonkont akikbi kfiŋin, na boniin bopoz na bowk woko. 12 Ujakun: wo pzu ŋun yain na mnjona; wo pzu kiiñ ni ksum injaka pihi ze kfaar, pnsumpi pozi hilun pfino.
13 Jako fur zurim uminzun zun ze minzun, antom dat un aiphal amak lo Esau ze psoof ŋnsaam akaŋi. 14 Ŋmpalalu ŋhiinz 200, na ŋmpi nkal 20, ŋmpalalu 200 ŋhaz na ŋmpalalu nkal 20. 15 Ŋnsuntukluŋ 30 ŋi kmbootuŋi na ŋhuk ŋolo, ŋwai nkal 40 na ŋiit ŋmpozŋi ŋhaz 10, ŋhuru 20 ŋhaz na ŋhuru 10 ŋhinz ŋmpozŋi. 16 Ka azu ŋnsaam ŋminzŋun ze kñen botihun lo, inzoŋ inditihi. Jak botihun lo: "Nde zipun zurun nde zu wal ze psoof inzoŋ inditii. 17 Ka jak ntihun anhounk zurun: "Zoyar nmakin Esau jikna wi antom yepu: "Wo noon? Ka wo phya zoon? Noon ka ŋnsaam ŋndaŋi uzuuz ŋhoŋink zurun nu? 18 Uksemb lo: "Ŋho ŋnsi nthiun nu Jako; ahilani phal nyeek ni Esau. Azbi ze kfez ndo. 19 Sapot hul prim ze ntihun nmpugzan na nhajzan na boko uzuuz bo knzonki ŋnsaam: "Hunkran ndeun pjak Esau zoyar nde anjik na lo. 20 Nde sa pot opjaka ntihun nu Jako ze bi ze kfez ndo. Jako jaŋzan apzu uhido ze psoof lo na Esau, ze haal lo ŋun ŋminzŋi, antom pten men apdigzan uhido ze psoof boko. 21 Hunkran ahilanun phal lo ŋun ŋminzŋun antom fur urim uminzun zoku lo.
Jako tikro na Oiili
22 Zurim uminzun, ka a nazo jek bohar bopugz, na bojuuk lo bohaz, na bopoz 11 bosilo, año krik ksi Jaboki zun ze ntifzi. 23 Kero ka añan boko krik; hilan ŋun akaŋi uzuuz . 24 Jako duko nkolo. Ñiinz aloŋ bi tikro na lo ank onu jiinzi. 25 Ñiinz aminzun bi hikran ja azo pka kpe, ka kob Jako ze ptiil ka pzezo kero bo ka gutun. 26 Ñiinz jak lo: "Hutnan nsol unu o ze dailo. Ka Jako jak lo: "Mbazo phutnu usol zwam pzu mnjona ze nji. 27 Ñiinz yep lo ktiim nu? "Ka jak lo Jako . 28 Ñiinz jaklo: "Ktiimnu kozi pot opdwo Jako, wo pdwo Israel, zonkont ugut na Uzi na boiinz uz, ka kpe. 29 Jako jak lo: Ka Jako jaa, Nji ñau nu zuupan ktiim nu? Ka semb lo: Ezi kaa, ka ujeu pme ktiim ni? A zwa mnjona za. 30 Hunkran Jako zudun ktiim zun ze minzun Penyel, zonkont ajaki: "Nji iin Uzi kil na kil ka phila ni lawoo." 31 Kero onu ka mai, aka zip ze penyel; a ze jiink zonkont ptiil lo. 32 Un ominzun kaun anjau hankri, bowk Israel bozi doh iŋau isi ptiil, zonkont ñiinz aminzun junka ziŋau isi ptiil Jako.