Maꞌdaꞌyo mahɛ̨tsꞌi nɛ ra ximhäi
21
Nɛ nubʉya, dra Xuuagä, dá nugä manꞌda bi tꞌurcä, ngue maꞌdaꞌyo mahɛ̨tsꞌi nɛ maꞌdaꞌyo ra ximhäi. Nguetho ya bim ꞌbɛdi ꞌbɛꞌa gätho mi ja bʉ mahɛ̨tsꞌi nɛ ra ximhäi. Nɛ hinꞌyʉ ra deją bʉ ja ra ꞌdaꞌyo ximhäi. 2 Nɛ dá nugä bá cąh mahɛ̨tsꞌi guepʉ bí ꞌbʉ Oją nꞌda ra hogahnini, gueꞌa ra Jerusalén maꞌdaꞌyo, mahotho, mahoqui, tengu nꞌda ra hmute i he ra pahni mahotho da mba dín thątꞌui rá ndø. 3 Nɛ dá øcä nꞌda ra nde ntsꞌɛdi bin yą, gue bá nɛxpʉ ja ran thutsꞌi bʉ bí hu Oją, bi ꞌyɛ̨na: “Dami hyand ya, bi gącua mahɛ̨tsꞌi rá ngu Oją,” bi ꞌyɛ̨na, nɛ nuya ząi dim ꞌbʉhmbʉ yʉ jąꞌi a. 4 Nɛ guesɛ Oją di un ran johya, nɛ him man ja yʉ guidä yʉ jąꞌi, nɛ hin din ja ran dąte mahønꞌa bʉ, nɛ hin din ja yʉ dumbʉi bʉ. Nguetho gätho ꞌbɛꞌa mán ʉnbi mi ja, ya bi thogui. 5 Nɛ nu Oją ngue i hupʉ ja ran thutsꞌi, bi ꞌyɛ̨na: “Gätho maꞌdaꞌyo dá øtꞌä ya.” Nɛ bi xiqui, dra Xuuagä: “Dami ꞌyoꞌtꞌ ya ꞌbɛꞌa dí xi a i, nɛ sä da tꞌɛ̨cꞌyɛi nguetho majuąni a.” 6 Nɛ bi xiqui mahønꞌa: “Ya bi guadi ꞌbɛꞌa gätho dá øtꞌä ya. Gätho dá dʉꞌmi, nɛ ga juacä ra ꞌbɛfi dá dʉꞌmi. Ząi dám ꞌbʉcä nɛ dam ꞌbʉi maząi. Nɛ nuꞌʉ toꞌo i sä ngue di ꞌbɛ a ra te mahyoni thoho, tenguꞌbʉ i tuthe, ga undä ra te i juadi, tenguꞌbʉ ra mbøthe im fontsꞌa ra dehe ga unni, nɛ hin da gurqui. 7 Nɛ toꞌo da dąha, ga comhbe ꞌbɛꞌa gätho i jagä, nɛ ga øtꞌe ma tꞌʉhnigä ʉ, nɛ dyʉ Ojągä ʉ. 8 Pɛ ga ɛntpʉ ja ra sibi ʉ toꞌo i su yʉn ʉnbi ꞌbʉ da dɛngui, nɛꞌʉ toꞌo yoho yʉ́n ꞌyomfɛ̨ni, nɛ gätho ʉ xʉn tsꞌo yʉ́ mbʉi, nɛ gätho yʉ hyodu, nɛ gätho yʉ ꞌyomtꞌɛ̨ni, nɛ gätho ʉ in yąhʉ yʉ zįthu, nɛ gätho ʉ i thąnde høntꞌa go ꞌbɛꞌa gue him majuąni, nɛ gätho ʉ i man yʉ fɛhni. Gätho ya da nu na yoho ran dąte, da tꞌɛntpʉ i zø ra sibi ra azufre, tengu ra deją na ndoho,” bi ꞌyɛ̨n Oją.Maꞌdaꞌyo ra hnini Jerusalén
9 Nɛ xø dá nugä manꞌda ra hmɛpya bi tꞌurcä. Nuꞌa nꞌda ʉ yʉ́m ꞌbɛhni Oją mahɛ̨tsꞌi gue min ꞌyohʉ ꞌdato yʉm ꞌbɛhni, gueꞌʉ mi thɛ yʉ ximbo gue bi un yʉn ʉnbi bʉ ja ra häi, nɛ nuꞌa bi xiqui: “Ba ɛ̨hɛ, ga utꞌa ra hnini, tenguꞌbʉ ra hmute bin thątꞌui ra Dɛꞌyo.” 10 Nɛ nuꞌa rá Hogandąhi Oją bi bɛ̨ngä manꞌda mahønꞌa, tenguꞌbʉ bi zixcä a rám ꞌbɛhni Oją bʉ ja nꞌda ra tꞌøhø xʉn hɛ̨tsꞌi, nɛ bi ꞌyurca ra hogahnini Jerusalén maꞌdaꞌyo, bi gąh mahɛ̨tsꞌi guepʉ bí ꞌbʉ Oją. 11 Nɛ nuꞌa ra hnini ɛ̨mmɛ di yoxni nangue rán hosɛ Oją i ꞌbʉpʉ mbo. Nɛ di yoxni tengu ra do ra jaspe i pømhyatsꞌi. 12 Nɛ nuꞌa ra hnini mi ja bʉ ra mbäꞌtꞌi, ra jądo xʉn hɛ̨tsꞌi, goho yʉ́ tsꞌątꞌi. Nɛ nuꞌa ra mbäꞌtꞌi, mi ja bʉ ꞌdɛꞌmagoho yʉ dąjutꞌi, nɛ nꞌda ngu nꞌda yʉ jutꞌi mi ꞌbäpʉ nꞌda rám ꞌbɛhni Oją mahɛ̨tsꞌi, da mbäh ra goxthi. Nɛ nuꞌʉ ꞌdɛꞌmayoho yʉ jutꞌi, nꞌda a nꞌda ntꞌoꞌtꞌi yʉ́ thuhu ʉ ꞌdɛꞌma yoho yʉ́ tsꞌʉntꞌʉ ra Israel. 13 Nɛ nꞌda nguadi min ja hyu yʉ jutꞌi, hyu i xopʉ ní bøx ra hyadi, nɛ hyu i xopʉ ní yʉh ra hyadi, nɛ hyu i xopʉ ra norte, nɛ hyu i xopʉ ra sur. 14 Nɛ nuꞌa ra hnini mi faꞌtsꞌi ꞌdɛꞌmayoho yʉ do, nꞌdaꞌa nꞌda ntꞌoꞌtꞌi yʉ́ thuhu ʉ ꞌdɛꞌmayoho yʉn ꞌyohʉ gue yʉ́ ꞌbäihʉ ra Jesús, ngue ra Dɛꞌyo. 15 Nɛ nuꞌa rám ꞌbɛhni Oją mahɛ̨tsꞌi gue dán yąꞌbe, mi hą nꞌda ra tꞌɛni ra oro, tenguꞌbʉ ra metro, gue da ꞌyɛn ra hnini, hangu na ndoho yʉ jutꞌi, nɛ yʉ føꞌtꞌe. 16 Nuꞌa ra hnini xʉn zantꞌma ndoho, ꞌdaꞌangu ná mba, nɛ ꞌdaꞌangu nán jʉnni. Nɛ nuꞌa ram ꞌbɛhni mahɛ̨tsꞌi bi ꞌyɛn ra hnini, nɛ bi ꞌyʉꞌ ra güɛnda ngue yo mahuąhi nɛ yo ciɛnto kilómetro ná ndoho, ꞌdaꞌangu ná mba, ꞌdaꞌangu nán jʉnni, nɛ ꞌdaꞌangu nán hɛ̨tsꞌi. 17 Nɛ nuꞌa ram ꞌbɛhni bi ꞌyɛni hangu nán hɛ̨tsꞌi rá mbäꞌtꞌi ra hnini, nɛ bi ꞌyʉꞌ ra güɛnda ngue hyąte ma goho metro. Nɛ bi ꞌyɛni tengutho i øtꞌ yʉ jąꞌi. 18 Nɛ nuꞌa ra mbäꞌtꞌi ntꞌøtꞌe nangue yʉ do ra jaspe, pɛ nu ra hnini ntꞌøtꞌe nangue ra oro, tenguꞌbʉ ra xito a ra oro. 19 Nɛ nuꞌʉ ꞌdɛꞌmayoho yʉ dądo mi faꞌtsꞌa ra mbäꞌtꞌi, xʉn ngu ntꞌʉtꞌi yʉ tꞌʉdo ꞌdahma ꞌdanꞌyo, ngue di fɛxni, xʉm hmadi di muui. Nuꞌa rá mbʉdi ra dądo ntꞌʉtꞌi yʉ tꞌʉdo ra jaspe, nuꞌa ná yoho ra dądo ntꞌʉtꞌi yʉ tꞌʉdo ra zafiro, nuꞌa ná hyu ra dądo ntꞌʉtꞌi yʉ ágata, nu ná goho ra dądo ntꞌʉtꞌi yʉ esmeralda. 20 Nɛ nuꞌa ná cʉtꞌa ra dądo ntꞌʉtꞌi yʉ ónice, ná ꞌdato ra dądo ntꞌʉtꞌi yʉ cornalina, ná yoto ra dądo ntꞌʉtꞌi yʉ crisólita, ná hyąto ra dądo ntꞌʉtꞌi yʉ berilo, ná gʉto ra dądo ntꞌʉtꞌi yʉ topacio, ná ꞌdɛtꞌa ra dądo ntꞌʉtꞌi yʉ crisoprasa, ná ꞌdɛꞌmaꞌda ra dądo ntꞌʉtꞌi yʉ jacinto, ná ꞌdɛꞌmayoho ra dądo ntꞌʉtꞌi yʉ amatista. 21 Nɛ gätho ꞌdɛꞌmayoho yʉ́ jutꞌi rá mbäꞌtꞌi ra hnini ntꞌøtꞌe nangue yʉ perla gue xʉn tꞌaxi, nɛ nꞌdaꞌa nꞌda yʉ perla gue bi tꞌøtꞌe nꞌda ngu nꞌda ra jutꞌi. Nɛ nuꞌa ra calle xʉn ndoho bʉ mbo ra hnini ntꞌøtꞌe nangue ra oro xʉn ho, tenguꞌbʉ ra xito a ra oro. 22 Nɛ hin dá nugä nꞌda ra niją bʉ, nguetho gätho rá ngusɛ Oją a ra hnini, ngue ra Hmu tątetho rá tsꞌɛdi, nɛ ra Dɛꞌyo, nɛ ꞌdarpʉ i ꞌbʉhmbʉ ʉ i ꞌbʉpʉ ja ra hnini. 23 Nɛ nuꞌa ra hnini, him mahyoni ra hyadi di yorpʉ, ogue ra ząna, nguetho guesɛ Oją nɛ ra Dɛꞌyo di yorpʉ. 24 Nɛ nangueꞌa ra nyotꞌi i ja bʉ, gätho di yotꞌʉ nɛ dim ꞌbʉmanho ʉ yʉ jąꞌi dim ꞌbʉpʉ gätho yʉ häi ua ja ra ximhäi. Nɛ yʉ tsꞌʉtꞌabi gätho yʉ häi dim ꞌbʉi di dä bʉ ʉ yʉn ho xʉ ꞌyøtꞌe, tenguꞌbʉ di um bʉ yʉn tꞌunni xʉn ngu di muui. 25 Nɛ nsoquitho yʉ jutꞌi gätho ra pa, nɛ njąmꞌbʉ da mba njutꞌi, nguetho njąmꞌbʉ din xui bʉ. 26 Nɛ høntꞌa go ꞌbɛꞌa gätho di muui, gue bi zän Oją bi ꞌyøtꞌ yʉ jąꞌi ꞌdahma ꞌdanꞌyo yʉ häi ua ja ra ximhäi, nɛ gueꞌa da hyąxpʉ ʉ, ní thįm bʉ mbo ra hnini. 27 Pɛ hin da yʉrpʉ ja ra hnini ꞌbɛꞌa xʉn tsꞌo, xíng yʉ tsꞌomꞌbäi da yʉrpʉ, xíng yʉ hyäte. Pɛ høntꞌʉ toꞌo bi ꞌyorpa rá thuhu ra Dɛꞌyo bʉ ja rá søcuą, gue toꞌo gätho bi un ra temaząi, høntꞌʉ da zä da yʉrpʉ.