JUDAS
Ra søcuą bi ꞌyoꞌtꞌa rá ꞌbäiui ra Jesucristo ra Judas
Ran zɛngua
1
Nugä drá Judascä, drá ꞌyɛ̨hɛgä ra Jesucristo, nɛ man ꞌyohʉgä a ra Jacobo Santiago. Dí oꞌtꞌahʉ ra søcuą hønbʉ go hapʉ i ꞌbʉh yʉ ꞌyɛ̨cꞌyɛi, gätho ahʉ ngue Oją bi huahnꞌnahʉ nɛ ɛ̨mmɛ di huɛ̨cꞌahʉ, nɛ ra Jesucristo di jamansu ahʉ. 2 Nɛ Oją dí ndepe di ꞌda ahʉ rá mate xʉn ngu, nɛ da hyutꞌa ni mbʉihʉ. Nɛ thocpa tho manꞌda gui hyąmhbʉ rán huɛ̨cate Oją.Yʉ hyäte xänbate
3 Nuꞌahʉ ma zʉ cu ahʉ dadí huɛ̨cꞌahʉ, mí ndegä ga oꞌtꞌahʉ nangue ꞌbɛꞌa í pøjʉ Oją gätho gahʉ. Pɛ dím bɛ̨ngä ngue nꞌdanꞌyo jatho ga xi ahʉ. Jatho gui hyuthʉ nzambʉi guin yąmhbʉ a rám hma ma tꞌɛ̨cꞌyɛihʉ ngue bi ꞌdajʉ Oją, dyʉ ꞌyɛ̨cꞌyɛihʉ, nꞌdamhma njon da zä di pätꞌahʉ ꞌbɛꞌa guí ɛ̨cꞌyɛihʉ. 4 Dí xi ahʉ na, nguetho i ꞌbʉ i ꞌda ʉ yʉ hyäte xänbate, gueꞌʉ ꞌdarbʉ gadím pɛtihʉ, nɛ him bi xi ahʉ ngue xʉn tsꞌo im bɛ̨ni da ꞌyøtꞌe. Ɛ̨mmɛ xʉn tsꞌotho nɛ hinguin ꞌyohʉ Oją ʉ. Nguetho sä i ɛ̨n ʉ: “Sä gui ꞌyøthʉ ꞌbɛꞌa go guím bɛ̨nsɛhʉ, nɛ hin di ʉnꞌnahʉ Oją nguetho i ja rá mate,” sä i ɛ̨n ʉ yʉ hyäte. Him majuąni i man ʉ, nɛ nuꞌʉ hingui ɛ̨cꞌyɛi ma Hmuhʉ ra Jesucristo gueꞌa di mandagahʉ. Nɛ ntꞌoꞌtꞌi bʉ ja rám Hman Oją ꞌbɛꞌa ran ʉnbi da nu ʉ i ma tengu na. Nɛ Oją da ꞌyøtꞌe tengu bi ma. 5 Nuya dín nde ga bɛ̨nꞌnahʉ ꞌbɛꞌa gá pąhmbʉ mámꞌbɛtꞌo, ngue ꞌbɛꞌa bi ꞌyøtꞌ Oją mayaꞌbʉ. Nu Oją bi yąn ʉ yʉ jąꞌi israel gue bi gʉcpʉ ja ra häi Egipto, pɛ toꞌo gätho him bi ꞌyøtꞌe ꞌbɛꞌa nde Oją, gätho Oją bi japi bi du bʉ maꞌueni ʉ. 6 Nɛ nu ꞌda ʉ yʉm ꞌbɛhni mahɛ̨tsꞌi mí ja yʉ́ tsꞌɛdi. Pɛ mꞌbɛjua bi ꞌbɛh yʉ́ tsꞌɛdi ꞌbʉ mí tsꞌon yʉ́n ꞌyomfɛ̨ni. Janangueꞌa bá pøm bʉ mahɛ̨tsꞌi guepʉ mí ꞌbʉi. Nuya Oją hin di japi da bøm bʉ ja ra ꞌbɛxui guepʉ ꞌbʉhya. Nguetho nuꞌʉ tengu nthuꞌtꞌi yʉ cadena bʉ, nɛ da gopʉ asta gueꞌbʉ go da zøn ra pa din ja rán tsꞌɛmbi Oją ntsꞌutho. 7 Nɛꞌʉ yʉ jąꞌi mí ꞌbʉpʉ ja ra hnini Sodoma nɛ ra hnini Gomorra nɛ yʉ hnini mbɛ ꞌdarbʉ mí jahʉ, bi ꞌyøtꞌ ran tsꞌo. Bi ꞌyøtꞌ yʉn ꞌyomtꞌɛ̨ni, nɛ yʉn ꞌyohʉ bi ꞌyørpa ran tsꞌo yʉ́ min ꞌyohʉhʉ, tengu ꞌbʉ ra xisu i ꞌbʉhmi, nɛ yʉ xisu mí øtꞌe tengu a. Pɛ nu Oją bi juadi nangue ra sibi mahɛ̨tsꞌi. Nɛ nuꞌa ꞌbɛꞌa bi tꞌørpʉ, Oją bi ꞌyuh ra hmɛpya ꞌbɛꞌa da ꞌyørpa yʉ dąditsꞌoqui. 8 Pɛ madagueꞌbʉ i ja yʉ hmɛpya ꞌbɛꞌa da ꞌyøtꞌ Oją, pɛ nu yʉ hyäte xänbate guextaꞌa i øtꞌe tengu mí øtꞌ yʉ jąꞌi bʉ ja ra hnini Sodoma. I ma guesɛ Oją i uti ꞌbɛꞌa da ꞌyøtꞌe xʉn ho gueꞌbʉ i ꞌuį, nɛ i ørpa ran tsꞌo rá jąꞌizɛhɛ. Nɛ i fɛsthoho yʉ́n tꞌɛ̨di ra Hmu mahɛ̨tsꞌi, nɛ di cꞌąmanꞌʉ tho yʉm ꞌbɛhni mahɛ̨tsꞌi. 9 Pɛ nu ra Miguel rá hmu yʉm ꞌbɛhni mahɛ̨tsꞌi, hingui øtꞌe tengu i øtꞌʉ yʉ hyäte xänbate. Nguetho nuꞌbʉ mín juntꞌui ra zįthu nangue rá jąꞌi ra Moisés xʉn du, nuꞌa ra Miguel mí pądi ngue hingui ho ꞌbʉ dí yąpꞌa ra zįthu ram hma xʉn tsꞌo. Janangueꞌa bi tꞌɛ̨m thoho a ra zįthu: “Oją di hɛcꞌaꞌi.” 10 Pɛ nuꞌʉ yʉ hyäte i man ran tsꞌo nangue yʉm ꞌbɛhni mahɛ̨tsꞌi, nɛ nangue ꞌbɛꞌa gue majuąni. Pɛ nuꞌʉ hingui pądi ꞌbɛꞌa gue majuąni. Høntꞌa i pądi tengu yʉ xąꞌyo nɛ yʉ buru, nɛ i øtꞌe tengu ʉ. Pɛ Oją di un yʉn ʉnbi nɛ di jua ʉ nangue ran tsꞌo i øtꞌʉ. 11 Huɛ̨cate ʉ i øtꞌ yʉ́ pähä zɛhɛ tengutho bi ꞌyøtꞌa ra Caín. Nɛ nuꞌʉ i nde da xänba yʉ jąꞌi ꞌbɛꞌa gue him majuąni, tengu bi ꞌyøtꞌa ra Balaam, nꞌdamhma da dąh ra mbɛti. Nuꞌʉ i fɛsthoho yʉ́n tꞌɛ̨di a i ja rá tsꞌɛdi di mandagahʉ, tengu bi ꞌyøtꞌa ra Coré. Nɛꞌʉ da mba ma juadi, tengutho ra Coré. 12 Nɛ nuꞌbʉ guí øtꞌ nin tsꞌihmɛhʉ, gueꞌa ra hmɛpya gadín huɛ̨jʉ nꞌda ngu nꞌda ahʉ, nɛ i søm bʉ yʉ hyäte xänbate, nuꞌʉ tengu ꞌbʉ i pätꞌa xʉn tsꞌo bʉ ja ni pahnihʉ. Nɛ nuꞌʉ xingui tsꞌʉ i pɛꞌtsꞌ yʉ́ sä da zi nangue yʉ́n johya zɛhɛ, nɛ xinguim bɛ̨ni ꞌbɛꞌa nam bønꞌa ran tsꞌihmɛ. Pɛ nuꞌʉ yʉ hyäte hin te i ja a di muui, tengutho yʉ güi hinguin ꞌyoui ra ꞌye, nɛ ran dąhi i tutsꞌi. Nɛ nuꞌʉ tengu tho nꞌda ra za njąmꞌbʉ zʉh yʉ́n dätꞌo. Tengutho nꞌda ra za xʉ ꞌyotꞌi bi yøtꞌe. 13 Nɛ nuꞌʉ yʉ hyäte xänbate ꞌbʉ i yą, i mbafi tengu ꞌbʉ ɛ̨mmɛ mahyoni tho ʉ yʉ́m hma. Tengu ra dehe bʉ ja ra dądeją ngue ɛ̨mmɛ di hį ꞌbʉ i ɛn ran dąhi, pɛ høntꞌa ꞌbɛꞌa xʉn tsꞌo min ꞌyoui ra dehe bi zopʉ ndendeją. Nɛ nuꞌʉ hingui sä da ꞌyut ra ꞌyu nꞌda nguetho tengu yʉ sø bi dägui, hin din ja ran yotꞌi mahønꞌa, da gohi ra ꞌbɛxui maząi. 14 Nuꞌa ra Enoc bim pøngahyą mayaꞌbʉ ꞌbɛꞌa nín juąnbi da nu a nꞌda ngue i øtꞌe tengu i øtꞌʉ. Nuꞌa ra Enoc, ná cʉtꞌa a rám bomꞌbɛto ra Adán, bi ma: “Dami ꞌyøhmbʉ ya ꞌbɛꞌa da ꞌyøtꞌ ra Hmu mahɛ̨tsꞌi. Ba ɛ̨hɛ din ꞌyohʉ yʉ miyone thoho ʉ yʉ́m ꞌbɛhni mahɛ̨tsꞌi, 15 ngue di juąnba ʉ gätho ʉ i øtꞌ ran tsꞌo. Nɛ di ʉnbi nangue ꞌbɛꞌa hingui ho bi ꞌyøtꞌʉ, nɛ bi man ran tsꞌo nangue Oją gätho ʉ ngue him bi ꞌyɛ̨cꞌyɛi Oją.” 16 Nɛ nuꞌʉ yʉ hyäte xänbate i sani nangue dí øtꞌ mam ꞌbʉihʉ tengu i nde Oją. Nɛ i ma ɛ̨mbi ngueꞌa nꞌda ra jąꞌi rá tsꞌoqui a ꞌbɛꞌa nám ꞌbʉ ʉ. Nuꞌʉ i øtꞌ ran tsꞌo tengu i ndesɛ rá mbʉi ʉ, nɛ din ꞌyɛ̨zɛhɛ. Nɛ i xih rán ho ʉ miꞌda yʉ jąꞌi ngue i honi ꞌbɛꞌa i ndesɛ.
Nu ra Judas bi ząm yʉ ꞌyɛ̨cꞌyɛi nɛ bi xifi ꞌbɛꞌa da ꞌyøtꞌe
17 Pɛ nuꞌahʉ ma zʉ cu ahʉ, dadí huɛ̨cꞌahʉ, o guí pumbɛ̨nihʉ ꞌbɛꞌa bi man ʉ yʉ́ ꞌbäihʉ ma Hmuhʉ ra Jesucristo. 18 Ya bi xi ahʉ ngue dim ꞌbʉ i ꞌda, gueꞌbʉ rán zɛgui, ngue da denꞌnahʉ nɛ da ꞌyøtꞌ ran tsꞌo i ja bʉ mbo yʉ́ mbʉi ʉ nɛ gueꞌa bi si ahʉ. 19 Nɛ nuꞌʉ yʉ hyäte di dʉmp ʉ yʉ ꞌyɛ̨cꞌyɛi din juntꞌi. Pɛ i sänzɛhɛ ꞌbɛꞌa i øtꞌe, nɛ hinguin ꞌyohʉ rá Hogandąhi Oją ʉ. 20 Pɛ nuꞌahʉ ma zʉ cuꞌahʉ, o guí øthʉ tengu i øtꞌ yʉ hyäte, pɛ dami tɛnni xʉn ho ni tꞌɛ̨cꞌyɛihʉ him ma thąspi, nɛ gueꞌa dán te ni mbʉihʉ a bʉya. Nɛ dami japi di manda ahʉ rá Hogandąhi Oją ꞌbʉ guí yąhʉ Oją. 21 Dami ꞌyøthʉ ram ꞌbʉi xʉn ho ngue din thɛui rán huɛ̨cate Oją, nɛ dami tømhbʉ a ra pa ba ɛ̨h ra Jesucristo ma Hmuhʉ, din ja rá yembʉi nanguejʉ nɛ di ꞌdajʉ ra temaząi. 22 Dami japi da ꞌyɛ̨cꞌyɛi toꞌo di ꞌyon yʉ́ mbʉi nangue Oją. 23 Dami yąm bʉ ja ran tsꞌo, tengu tho ꞌbʉ gá yąm bʉ ja nꞌda ra sibi. Nɛ din ja ni yembʉi nangue ʉ ꞌda, pɛ damin jamansusɛ ngue hin gui ꞌyøthʉ yʉn tsꞌo tengu i øtꞌʉ. Dami samhbʉ ꞌbɛꞌa i øtꞌʉ gue bi tsꞌon yʉ́ mbʉi ʉ.
I ɛ̨spa Oją ra Judas
24 Nuꞌa Oją i ja rá tsꞌɛdi di jajʉ hin ga øthʉ yʉn tsꞌo, nɛ di däjʉ bʉ ja rá hmi mahoqui tho ma mbʉihʉ. Nɛ ɛ̨mmɛ din jajʉ ran johya bʉ. 25 Høntꞌa nꞌdatho Oją i ꞌbʉi, nɛ høntꞌa i pądi xʉn ho. Nɛ di pøjʉ nangue ꞌbɛꞌa bi ꞌyøtꞌa ra Jesucristo ma Hmuhʉ. Nɛ nuꞌa Oją i ja rá nuįxte thoho, nuꞌa ra Hmutsꞌʉtꞌabi, nɛ di manda ꞌbɛꞌa gätho i ja a rá tsꞌɛdi, nɛ gätho mí ja, nɛ i ja ya, nɛ din ja maząi. Nɛ høntꞌa dí xiꞌahʉ ya.