APOCALIPSIS
Rán tꞌuti ra Jesucristo bi nu ra Xuua
Rám hman ra Jesucristo bi sih ra Xuua
1
Nuꞌa Oją bi ꞌyut yʉ́ ꞌyɛ̨hɛ̨ i ꞌbʉcua ja ra häi. Janangueꞌa nu ra Jesucristo bá pɛhna nꞌda rám ꞌbɛhni mahɛ̨tsꞌi bi ꞌyurcä dra Xuuagä, rá ꞌyɛ̨hɛ̨gä, ꞌbɛꞌa din ja. 2 Nɛ nugä dra Xuuagä dí oꞌtꞌä ya ꞌbɛꞌa gätho dín nugä, nɛꞌa rám hman Oją nɛꞌa rám hman ra Jesucristo i xiqui. Gätho dí oꞌtꞌä ngue da fądi ꞌbɛꞌa majuąni din ja. 3 Din johya gätho toꞌo da manꞌa ꞌbɛꞌa ntꞌoꞌtꞌi ua ja ra søcuą. Nɛ din johya toꞌo gätho da ꞌyøde ꞌbɛꞌa din ja. Nɛ din johya ꞌbʉ da ꞌyøtꞌe ꞌbɛꞌa gätho i mangua ja ra søcuą, nguetho him mayaꞌa din ja ꞌbɛꞌa gätho ntꞌoꞌtꞌi ua.I tꞌorpa ra søcuą yʉ ꞌyɛ̨cꞌyɛ̨i bʉ ja yoto yʉ hnini
4 Nugä dra Xuuagä dí otꞌahʉ ra søcuą gätho yʉ ꞌyɛ̨cꞌyɛ̨i dim pɛti bʉ ja yoto yʉ hnini bʉ ja ra häi Asia. Oją di jąp ahʉ nɛ da hyutꞌa ni mbʉihʉ, guetꞌa Oją i ꞌbʉi nɛ mi ꞌbʉi, nɛ guetꞌa dim ꞌbʉi maząi. Nɛ rá Hogandąhi Oją i juadi xʉn ho rá tsꞌɛdi, gue i ꞌbʉpʉ hapʉ di manda rá tsꞌɛdi Oją, i pɛnꞌnahʉ rán jąpi. 5 Nɛ bí pɛnꞌnahʉ rán jąpi a ra Jesucristo, nɛ da hyutꞌa ni mbʉihʉ. Nuꞌa ra Jesucristo ząi i mam majuąni, nɛ rá mbʉdi bi dąmbɛ̨ni ꞌbʉ mi du, nɛ dim hmutsꞌʉtꞌabi nɛ di manda gätho yʉ tsꞌʉtꞌabi gue i ꞌbʉcua ja ra häi. Nuꞌa di huɛ̨gahʉ nɛ bi yąnjʉ nangue ma tsꞌoquihʉ, bi mberca ma mbʉihʉ nangue ran tsꞌo, nangue rá ji bi mbäm ꞌbʉ mi du bʉ ja ra pontꞌi. 6 Nu ra Jesucristo bi ꞌdajʉ ra tsꞌɛdi dan tsꞌʉtꞌabihʉ nɛ dam mbäjąhʉ ga ørpahʉ rá ꞌbɛfi bʉ i ja rá tsꞌɛdi Oją rá Ta. Nɛ nuꞌa ra Jesucristo din ja rá nuįxte nɛ rá tsꞌɛdi hønꞌbʉ go njąmꞌbʉ maząi. Nɛ høntꞌa gam bɛ̨mhbʉ a ya. 7 Nuna ra Jesucristo guetꞌa ba ɛ̨hɛ̨ ban ꞌyohʉ yʉ güi, nɛ gätho yʉ jąꞌi da nu. Nɛ gätho toꞌo bi ʉcpi da nu, nɛ gätho yʉ jąꞌi i ꞌbʉcua ja ra ximhäi ɛ̨mmɛ din ja ra dumbʉi ꞌbʉ bi nu a. Majuąni njabʉ din ja ꞌbʉ bá ɛ̨hɛ̨. Nɛ høntꞌa gam bɛ̨mhbʉ a ya. 8 Nu ra Cristo bi ꞌyɛ̨na: “Nugä ra mbʉdi dám ꞌbʉcä, nɛ njąmꞌbʉ him mi ꞌbʉcä,” ɛ̨nꞌa ra Hmu mahɛ̨tsꞌi nuįxte rá tsꞌɛdi, nuꞌa i ꞌbʉi nɛ mi ꞌbʉi, nɛ i ꞌbʉi maząi.
Ra Xuua bi nu madą rá tsꞌɛdi ra Cristo
9 Nugä dra Xuuagä, ni cujʉ nangue ra Cristo, dí otꞌahʉ ra søcuą ya. Nujʉ dí comhbʉ yʉn ʉnbi guín nuhʉ nangue dí ɛ̨cꞌyɛihʉ ra Hmu mahɛ̨tsꞌi. Nuꞌa Oją di manda bʉ ja ma mbʉihʉ, nɛ ra Jesucristo bi ꞌdajʉ ra tsꞌɛdi ngue hin dadí xømbʉihʉ ꞌbɛꞌa dí nuhʉ. Nɛ nugä dra Xuuagä dí ofädigä bʉ ja ra häi Patmos, nꞌda ra tꞌʉhäi i ja bʉ ja ra dehe nguetho dím mangä rám hman Oją nɛ dí mangä nangue ra Jesucristo. 10 Nuꞌa ra pa domingo dán yąꞌbe Oją, nɛ ꞌbex bi bɛ̨ngä a rá tsꞌɛdi rá Hogandąhi Oją. Nɛ dá øcä nꞌda ra nde bʉ ja ma xʉthä tenguꞌbʉ nꞌda ra thʉxi, ɛ̨mmɛ ntsꞌɛdi thoho. 11 Nɛ nu ra nde bi ꞌyɛ̨na: “Nugä dra mbʉdigä nɛ hinjąmꞌbʉ ngue him mi ꞌbʉcä, nɛ ząi dí ꞌbʉcä.” Nɛ nuꞌa ra nde bi xicä, bi ꞌyɛ̨na: “Gui ꞌyoꞌtꞌ ya ꞌbɛꞌa gätho gui nu, nɛ gui pɛnpʉ ꞌbʉh yʉ ꞌyɛ̨cꞌyɛ̨i, gueꞌʉ dim pɛti bʉ ja yoto yʉ hnini bʉ ja ra häi Asia, guepʉ ja ra hnini Efeso, nɛpʉ ja ra hnini Esmirna, nɛpʉ ja ra hnini Pérgamo, nɛpʉ ja ra hnini Tiatira, nɛpʉ ja ra hnini Sardis, nɛpʉ ja ra hnini Filadelfia, nɛpʉ ja ra hnini Laodicea.” 12 Nɛ nugä dra Xuuagä ꞌbex dá nyɛ̨gui ngue dín nde ga nugä toꞌo bin yą. Nɛ dá nugä yoto yʉ lámpara ngue ra oro yʉ́ gua. 13 Nɛ dá nugä i ꞌbä inde bʉ ja yʉ lámpara ra Cristo, ngueꞌa bin jąꞌi ua ja ra ximhäi, mi he ra pahni xʉm mba, i sørpʉ ja yʉ́ gua, nɛ man thuꞌtꞌi rá tįya nꞌda ran gʉtꞌi ngue ra oro. 14 Nuꞌʉ yʉ́ xtą tengu ra tꞌaxca xidɛꞌyo, ogue tengu ra tꞌaxcasɛ. Nɛ nu yʉ́ dä ɛ̨mmɛ bi hyätꞌi tenguꞌbʉ nꞌda ra sibi i sø. 15 Nɛ nuꞌʉ yʉ́ gua, ɛ̨mmɛ di fɛxni tengu ra xitꞌɛgui ra bronce di hoc ra sibi nɛ i pa nthąmmi xʉn ho. Nɛ nuꞌa rá nde tengu yʉ dąthe xʉn ngu nɛ ntsꞌɛdi di hį. 16 Nɛ mi o rán ꞌyɛi yoto yʉ sø, nɛ bi bøxpʉ ja rá nde tengu nꞌda ra espada i yoho yʉ́ hɛtꞌi ngue din juąnbate. Nɛ nuꞌa rá hmi ɛ̨mmɛ bi fɛxni tengu rá tsꞌɛdi ra hyadi ꞌbʉ bi hyuxyadi. 17 Nɛ nuꞌbʉ má nugä, dá tąngä bʉ ja rá gua tenguꞌbʉ ya xtá tugä. Pɛ nuna bi dosca rán ꞌyɛi nɛ bi xiqui: “ꞌYo guín su, nguetho nugä dra mbʉdigä nɛ dran zɛguigä, nɛ hinjąmꞌbʉ him mi ꞌbʉcä. 18 Nugä ząi dí ꞌbʉi, guecä dá tugä pɛ nuya guí nu dí ꞌbʉcä ya, nɛ dam ꞌbʉcä maząi hønꞌbʉ go njąmꞌbʉ. Nɛ i ja ma tsꞌɛdi gue dadí manda hapʉ i pa ʉ xʉn du. I jagä ran sogui ngue ga xocpa ʉ ꞌda, nɛ ga jurpa ʉ miꞌda.” 19 Nɛ bi xiqui, bi ꞌyɛ̨na: “Dami ꞌyoꞌtꞌ ya ꞌbɛꞌa gätho guí nu ya, ngue gätho i ja ya, nɛꞌʉ gätho din ja mꞌbɛjua. 20 Ga xi a ya ꞌbɛꞌa ní hmɛpya i ja bʉ man ꞌyɛi, ngue yoto yʉ sø nɛꞌʉ yoto yʉ lámpara ngue yʉ oro yʉ́ gua. Gue yoto yʉ sø, rá hmɛpya ʉ yoto yʉm ꞌbɛhni mahɛ̨tsꞌi, gue di zɛꞌʉ dim pɛti bʉ yoto yʉ hnini, ngue ꞌdaꞌa nꞌdanni yʉ hnini i ꞌbʉi. Nɛ nuꞌʉ yoto yʉ lámpara rá hmɛpya ʉ yoto yʉ́m pɛti yʉ ꞌyɛ̨cꞌyɛi hapʉ ząi dim pɛti.”