Ram hma da hmam bʉ ja ra hnini Éfeso
2
Nuꞌa ra nde bi xicä ngue ga oꞌtꞌa nꞌda ra søcuą, ga undä a ram ꞌbɛhni ngue i fäx ʉ yʉ ꞌyɛ̨cꞌyɛi bʉ ja ra hnini Éfeso. Nɛ nuꞌa ra søcuą da hmam bʉ ꞌbʉh yʉ ꞌyɛ̨cꞌyɛi. Nu yʉ́m hmansɛ a gue i ꞌyo inde bʉ ja yoto yʉ lámpara, nɛ i o rán ꞌyɛi yoto yʉ sø. 2 Nɛ nuꞌa ra nde bi xiꞌʉ yʉ ꞌyɛ̨cꞌyɛi bʉ, bi ꞌyɛ̨na: “Dí pącä ꞌbɛꞌa gätho gá ꞌyøthʉ bʉ, nɛ dí pącä hangu nangu ra ꞌbɛfi gá ꞌyøthʉ. Nɛ dí pącä gue hin gán xømbʉi nangue ni ꞌbɛfihʉ. Nɛ dí pącä ngue xingui tsꞌʉ gadí jafʉ da ꞌyøtꞌ ran tsꞌomꞌbäi nꞌda. Nɛ gá ꞌyänhdʉ ꞌda yʉm hman ʉ toꞌo ɛ̨na yʉ́ ꞌbäihʉ ra Cristo, nɛ gá pąhmbʉ yʉ hyäte thoho ʉ. 3 Nɛ dí pącä gue hin gán xømbʉihʉ ran ʉnbi gá nuhʉ, nɛ ra ꞌbɛfi gá ꞌyøthʉ nangue gá ꞌyɛ̨cꞌyɛigahʉ, nɛ xingui tsꞌʉ gá ꞌyɛꞌtsꞌ ni tꞌɛ̨cꞌyɛihʉ. 4 Pɛ i ja ahʉ tsꞌʉ gue hin dí numanhogä, ngue gá ꞌyɛsꞌhʉ tsꞌʉ a guí bɛ̨njʉ ya nɛ hín gadín huɛ̨jʉ. Nɛ hin guín jahʉ bʉ ꞌbʉ ra mbʉdi thoho gá ꞌyɛ̨cꞌyɛigahʉ. 5 Dami bɛ̨mhbʉ ya hangu na ngu bi gąꞌa ni tꞌɛ̨cꞌyɛihʉ ꞌbʉ gmí ꞌyɛsꞌhʉ a gní bɛ̨njʉ nɛ gá ꞌyɛꞌtsꞌ nin huɛ̨catehʉ. Dami päh nin ꞌyomfɛ̨nihʉ ya. Dami thojʉ a gmí øthʉ rá mbʉdi thoho. Pɛ nuꞌbʉ guextaꞌa guí øthʉ, ga ꞌuecä nꞌda ra lámpara ꞌbʉ, nɛ him man ga ja ahʉ tenguꞌbʉ ra lámpara bʉ guí ꞌbʉhmbʉ, ꞌbʉ hin gui hoc nin ꞌyomfɛ̨nihʉ. 6 Pɛ i ja ahʉ ꞌbɛꞌa xʉn ho tsꞌʉ, nguetho nꞌdatꞌa dím bɛ̨mhbʉ gue hin dín numanhohʉ a i øtꞌʉ yʉ nicolaítas. 7 Nuꞌbʉ i ja ni zaguhʉ, gui ꞌyøhmbʉ ꞌbɛꞌa da xi ahʉ a rá Hogandąhi Oją gätho gyʉ ꞌyɛ̨cꞌyɛihʉ. Nɛ nuꞌʉ toꞌo hin da thąpi nangue ran tsꞌo, ga undä ran tꞌɛ̨di da za yʉn dätꞌo bʉ ja ra za tꞌɛ̨mbi rá za ra temaząi, gue i ꞌbäpʉ ꞌbʉ Oją,” bi ꞌyɛ̨nꞌa ra nde bi zoqui.Ram hma da hmam bʉ ra hnini Esmirna
8 Nɛ xø bi ꞌyɛ̨ngui: “Nuya gui ꞌyorpa ra søcuą ram ꞌbɛhni gue i fäx yʉ ꞌyɛ̨cꞌyɛi bʉ ja ra hnini Esmirna. Nɛ gui xifi gue mam hmangä, guecä mi ꞌbʉcä ꞌbʉ ra mbʉdi thoho nɛ dam ꞌbʉcä maząi, nugä dá tugä nɛ dá ndantsꞌ mahønꞌa nɛ dí ꞌbʉhya, gui ꞌyɛ̨na. Nɛ nuꞌa ra søcuą da hmam bʉ ꞌbʉh yʉ ꞌyɛ̨cꞌyɛi bʉ ra hnini Esmirna.” 9 Nɛ ɛ̨nꞌa ra nde: “Dí pącä ꞌbɛꞌa gätho nín ʉnbi guí sähʉ nanguecä. Nɛ dí pącä gue gyʉ hyoyahʉ bʉ ja ra häi, pɛ xʉn ngu i ja ahʉ nangue Oją. Nugä dí pącä gue di cꞌąmanꞌʉ ahʉ ꞌda yʉ judío gue ɛ̨nsɛ majuąni yʉ judío ʉ, gue nde da ma yʉ́ tꞌʉhni Oją ʉ. Pɛ him majuąni yʉ́ tꞌʉhni Oją ʉ, pɛgue rám pɛti ra zįthu a i øtꞌʉ. 10 Nɛ ꞌyo guí suhʉ ran ʉnbi gue mi tsꞌʉtho din ja ahʉ. Gui ꞌyøhmbʉ ya ꞌbɛꞌa din ja ahʉ, ngue gui nuhʉ rán tsꞌäte ra zįthu nuꞌbʉ da jo ahʉ ꞌda ahʉ. Nɛ ꞌdɛtꞌapa guin nuhʉ yʉn ʉnbi. Nɛ nuꞌbʉ hin gui ꞌyɛꞌtsꞌ ni tꞌɛ̨cꞌyɛihʉ madagueꞌa gui tuhʉ, gá tąhmbʉ xʉn ho a ra te ꞌbʉ. 11 Nuꞌbʉ i ja ni zaguhʉ, gui ꞌyøhmbʉ ya ꞌbɛꞌa i xi ahʉ rá Hogandąhi Oją gyʉ ꞌyɛ̨cꞌyɛihʉ. Nɛ nuꞌʉ toꞌo hin da thąpi nangue ran tsꞌo, hin da mba bʉ ja ran ʉnbi maząi, nɛ hin di ʉnba a ná yoho ran dąte,” bi ꞌyɛ̨nꞌa ra nde bi xiqui.
Ram hma da hmam bʉ ra hnini Pérgamo
12 Nɛ bi xic mahønꞌa ra nde, bi ꞌyɛ̨na: “Nuya gui ꞌyorpa ra søcuą ram ꞌbɛhni ngue i fäx ʉ yʉ ꞌyɛ̨cꞌyɛi bʉ ja ra hnini Pérgamo, gue da mam bʉ ꞌbʉh yʉ ꞌyɛ̨cꞌyɛi. Nɛ gui ꞌyoꞌtꞌi ꞌbɛꞌa dí mangä gue i jagä ra espada yoho yʉ́ hɛtꞌi. 13 Nugä dí pącä ꞌbɛꞌa guí øthʉ hapʉ guí ꞌbʉhmbʉ, guepʉ di manda ra zįthu. Nɛ dí pącä gue hin gá hyɛhmbʉ ni tꞌɛ̨cꞌyɛihʉ, xíngui tsꞌʉ gá cønjʉ nuꞌbʉ mi mba ntho bʉ a ma hogaꞌyɛ̨hɛ̨ ra Antipas, guepʉ ꞌbʉh ra zįthu. 14 Pɛ i ja ahʉ tsꞌʉ a gue hin dí numanhogä, nguetho i ꞌbʉ i ꞌda ahʉ i tɛn rán xädi ra Balaam, nuꞌa ran ꞌyohʉ gue bi xänba ra Balac ꞌbɛꞌa da ꞌyøtꞌe gue da hyätꞌʉ yʉ israel. Nu ra Balac bi xih yʉ jąꞌi da dɛn yʉ́n gopa yʉ hmite, ngue da zi ꞌbɛꞌa bi mbøspa ʉ, nɛ da ꞌyøtꞌ ran ꞌyomtꞌɛ̨ni. 15 Nɛ i ꞌbʉ i ꞌda ahʉ gue hingui nde da ꞌyɛꞌtsꞌ yʉ́n xädi yʉ nicolaítas, nɛ hin dí numanho ꞌbɛꞌa øtꞌʉ. 16 Janangueꞌa dami päh nin ꞌyomfɛ̨nihʉ. Nɛ nuꞌbʉ hinꞌna, ga mbagä bʉ nꞌdihi nɛ ga sʉꞌʉ nangue mam hmangä, tengu ra espada gue i pøm bʉ ma ndegä,” bi ꞌyɛ̨nꞌa ra nde gue bí ꞌyɛ̨h mahɛ̨tsꞌi. 17 Nɛ bi thoqui bi xiqui, bi ꞌyɛ̨na: “Nɛ toꞌo i ja yʉ́ zagu, da ꞌyøde ꞌbɛꞌa xiꞌa rá Hogandąhi Oją yʉ ꞌyɛ̨cꞌyɛi. Nɛ toꞌo hin da thąpi nangue ran tsꞌo, ga undä ra maná mahɛ̨tsꞌi gue ntꞌągui. Nɛ ga undä nꞌda a nꞌda ra do xʉn tꞌaxi guepʉ ntꞌoꞌtꞌi maꞌdaꞌyo rá thuhu zɛhɛ. Nɛ xínga gueꞌʉ miꞌda yʉ jąꞌi da bądi ꞌbɛꞌa ntꞌoꞌtꞌi bʉ, høntꞌa toꞌo da hyąni,” ɛ̨nꞌa ra nde bí ꞌyɛ̨h mahɛ̨tsꞌi.
Ram hma da hmam bʉ ra hnini Tiatira
18 Nɛ bi xic mahønꞌa, bi ꞌyɛ̨na: “Nuya gui ꞌyorpa ra søcuą ram ꞌbɛhni gue i fäx ʉ yʉ ꞌyɛ̨cꞌyɛi bʉ ja ra hnini Tiatira, gue da hmam bʉ ꞌbʉh yʉ ꞌyɛ̨cꞌyɛi. Gui ꞌyorpi ꞌbɛꞌa dí mangä rá Tsꞌʉntꞌʉgä Oją, gue i sø ma dä tengu ra sibi i thɛ, nɛ nuꞌʉ ma gua di fɛxni tengu nꞌda ra bronce ra xitꞌɛgui gue i pa nthąmmi xʉn ho. 19 Dí pącä ꞌbɛꞌa gätho guí øthʉ nɛ dí pącä gue i ja nin huɛ̨catehʉ nɛ majuąni guím bɛ̨njʉ, nɛ ja a ni tꞌɛ̨cꞌyɛihʉ xʉn ho. Nɛ dí pącä gue guí øthʉ xʉn ho rá ꞌbɛfi Oją, nɛ hin gán xømbʉihʉ. Nɛ manꞌda xʉn ho guí øthʉ ya xinda gueꞌbʉ ra mbʉdi tho gá ꞌyɛ̨cꞌyɛihʉ. 20 Pɛ i ja ahʉ tsꞌʉ a hin dí numanhogä, nguetho gadí jafʉ in xänbate bʉ nꞌda ra xisu, ra Jezabel, gueꞌa i ɛ̨nsɛ rá pøngahyą Oją. Pɛ nuꞌa i xänba yʉ ꞌyɛ̨cꞌyɛi bʉ da dɛn yʉ́n tsꞌihmɛ yʉ hmite, nɛ i xänba ran ꞌyomtꞌɛ̨ni. 21 Nugä dá tøꞌmi a ra xisu ngue xtí päh rán ꞌyomfɛ̨ni, pɛ hingui nde, i nde di thocta a ra tsꞌonꞌyomfɛ̨ni. 22 Janangueꞌa ga un ran ʉnbi ntsꞌɛdi, gue din hyɛ̨nꞌna ra xisu, nɛꞌʉ gätho toꞌo i tɛnni da nu ran ʉnbi ntsꞌɛdi gue ga undä. Nɛ din jabʉ ga øtꞌä nuꞌbʉ hin di päh yʉ́n ꞌyomfɛ̨ni ʉ nɛ hin da hyɛh ran tsꞌo i øthʉ a ra xisu. 23 Nɛ nugä ga ho gätho yʉ́ tꞌʉhni a ra xisu, guepʉ da bą ʉ gätho yʉ ꞌyɛ̨cꞌyɛi gue dí pącä yʉ́n ꞌyomfɛ̨ni yʉ jąꞌi, nɛ dí pącä ꞌbɛꞌa gätho in nde yʉ́ mbʉi ʉ. Nɛ ga cosꞌahʉ ꞌbɛꞌa gá ꞌyøthʉ nꞌda ngu nꞌda ahʉ. 24 Pɛ miꞌda ahʉ bʉ ja ra hnini Tiatira gue hin gá tɛnhdʉ rán xädi ra xisu, nɛ hin guí pąhmbʉ rán xädi ra zįthu tengu i man ʉ ꞌda gue ɛ̨na pądi xʉn ho rán xädi ra zįthu. Nɛ nugä hin ga ꞌda ahʉ manꞌda xʉn hɛ̨i gui ꞌyøthʉ. 25 Pɛ høntꞌa ga xi ahʉ, guim bɛnthʉ xʉn ho ni tꞌɛ̨cꞌyɛihʉ asta gueꞌbʉ go bá ɛ̨cä mahønꞌa. 26 Nɛ nuꞌʉ toꞌo hin da thąpi nangue ran tsꞌo, nɛꞌbʉ di thoqui da ꞌyøtꞌe ꞌbɛꞌa gätho dí ndegä asta gueꞌbʉ go rán zɛgui ra pa, ga undä ran tꞌɛ̨di di manda ꞌda yʉ xɛqui ra häi, ngue ga comhbe ra tsꞌɛdi bi ꞌdacä ma Ta. 27 Nɛꞌʉ di manda gätho ʉ yʉ jąꞌi ngue ꞌdahma ꞌdanꞌyo bʉ na yą. Nɛ da ꞌyut ram fɛtꞌɛgui ʉ man sʉihe, tenguꞌbʉ da xɛn ra jąhäi a ra bareta ngue din tɛ̨xtꞌi. Nɛ gueꞌa ra tsꞌɛdi bi ꞌdacä ma Ta. 28 Nugä tenguꞌbʉ dra Dąsø. Nɛ toꞌo da ꞌyøtꞌe ꞌbɛꞌa xʉn ho, dam ꞌbʉhmbe ꞌbʉ guá pengä. 29 Nɛ nuꞌbʉ i ja ni zaguhʉ, gui ꞌyøhmbʉ ꞌbɛꞌa i xih rá Hogandąhi Oją yʉ ꞌyɛ̨cꞌyɛi,” ɛ̨nꞌa rá Tsꞌʉntꞌʉ Oją.