Ram hma da hmam bʉ ra hnini Sardis
3
Nɛ xø bi ꞌyɛ̨ng mahønꞌa: “Nuya gui ꞌyorpa ra søcuą ram ꞌbɛhni i fäx ʉ yʉ ꞌyɛ̨cꞌyɛi ꞌbʉpʉ ja ra hnini Sardis. Nɛ gui xih mam hmangä, ngue dí ꞌbʉꞌbe rá Hogandąhi Oją i juadi xʉn ho yʉ́ tsꞌɛdi. Nɛ i o ma ꞌyɛ ʉ yoto yʉ sø. Nɛ nuna mam hma da hmam bʉ ꞌbʉh yʉ ꞌyɛ̨cꞌyɛi. Nugä dí pącä ꞌbɛꞌa gätho guí øthʉ bʉ. Nu ahʉ guí mamhbʉ maxøtsꞌe thoho, nɛ sä guí ɛ̨mhbʉ guí ꞌbʉhmbʉ nangue Oją, pɛ dí pącä, nu ahʉ, tenguꞌbʉ ya xʉn du ni tehʉ. 2 Pɛ daman nuhmbʉ ya, nɛ dami zacuahʉ a zʉ tsꞌʉ ni tꞌɛ̨cꞌyɛihʉ bi bongui, nꞌdamhma him majuąni da du ni tehʉ ngue gan ʉnbahʉ mazä. Nguetho dí pącä gue hin guí øthʉ in nde Oją gui ꞌyøthʉ. 3 Dami bɛ̨mhbʉ ya ꞌbɛꞌa bi sänꞌnahʉ. Nuya dami päh nin ꞌyomfɛ̨nihʉ, nɛ dami tɛnhdʉ ꞌbɛꞌa gá pąhmbʉ rá mbʉdi. Pɛ nuꞌbʉ hin gui päh nin ꞌyomfɛ̨nihʉ, ga mbagä bʉ tengu nꞌda ra bɛ̨, nɛ hin gui pąhmbʉ ꞌbɛꞌa má ora ga søngä bʉ, nɛ ga ʉnꞌnahʉ. 4 Pɛ i ꞌbʉꞌi ꞌda ahʉ gue him bi tsꞌon yʉ́ mbʉi. Nɛ nuꞌʉ dan ꞌyohe ʉ, nɛ da hye ʉ yʉ pahni xʉn tꞌaxi nguetho yʉ́n sähʉ dan ꞌyohe,” bi ꞌyɛ̨nꞌa ra nde bí ꞌyɛ̨h mahɛ̨tsꞌi. 5 Nɛ bi thoqui bi xic ra nde, bi ꞌyɛ̨na: “Nɛ nuꞌʉ toꞌo hin da thąpi nangue ran tsꞌo, da hye yʉ pahni xʉn tꞌaxi. Nɛ hin ga tsꞌonba yʉ́ thuhu i huxpʉ ja ra søcuą i ma toꞌo i ja ra temaząi. Nɛ gam mangä gue ma mbɛtigä ʉ, guepʉ ja rá hmi ma Ta, guepʉ i ꞌbäh yʉ́m ꞌbɛhni mahɛ̨tsꞌi. 6 Nɛ nuꞌbʉ i ja ni zaguhʉ, dami ꞌyøhmbʉ ꞌbɛꞌa i xih rá Hogandąhi Oją ʉ yʉ ꞌyɛ̨cꞌyɛi,” ɛ̨nꞌa ra nde.Ram hma da hmam bʉ ra hnini Filadelfia
7 Nɛ bi xiqui mahønꞌa: “Nuya gui ꞌyoꞌtꞌ manꞌda ra søcuą, gui unꞌna ram ꞌbɛhni i fäxꞌʉ yʉ ꞌyɛ̨cꞌyɛi ꞌbʉpʉ ja ra hnini Filadelfia, gue da hmam bʉ ꞌbʉh yʉ ꞌyɛ̨cꞌyɛi. Nɛ gui xih mam hmangä gue xʉn hothogä, hinꞌyʉ ma tsꞌoqui, nɛ høntꞌa majuąni dím mangä. Nɛ dí hą ran sogui ngue ra hmɛpya i jagä ra tsꞌɛdi tengu ra hmɛpya bi ꞌyuꞌa ra David. Nɛ nuꞌbʉ ga xocpa nꞌda bʉ ja ma tsꞌɛdi, njoꞌo nꞌda da zä da gurpi, nɛ nuꞌbʉ ga jurpa nꞌda, njon da zä da xocpi. 8 Nugä dí pącä ꞌbɛꞌa gätho guí øthʉ bʉ, nɛ dá xocꞌahʉ rá ꞌyu Oją manꞌda da zä gui ꞌyørcahʉ ma ꞌbɛfi, nɛ hingui sä nꞌda ra jąꞌi da got ra ꞌyu. Nɛ dí pącä ngue hinguin zaqui ni tꞌɛ̨cꞌyɛihʉ, pɛ i ja ahʉ tsꞌʉ. Thocua thoho gá tɛn man xädigä, xíngui tsꞌʉ gá hyɛgahʉ. 9 Pɛ nuya dami ꞌyøhmbʉ tsꞌʉ ya ꞌbɛꞌa din ja yʉ jąꞌi bʉ gue i tɛn ra zįthu, nuꞌʉ im ma gue yʉ hogajudío ʉ, pɛ him majuąni yʉ hogajudío, ngue hingui tɛn Oją ʉ. Nugä ga japi din dąnyahmu bʉ ja ni guahʉ toꞌo i tɛnꞌna ra zįthu, nꞌdahma da bą ʉ ɛ̨mmɛ ngue dádí huɛ̨cꞌahʉ gyʉ ꞌyɛ̨cꞌyɛihʉ. 10 Nɛ nangue a dá xi ahʉ, nɛ hin gán xømbʉihʉ ꞌbʉ mi mba ma ʉnꞌni ahʉ, tengugä, janangueꞌa ga jamansu ahʉ nuꞌbʉ bi zøn ra pa din ja ran ʉnbi ntsꞌutho ua ja ra ximhäi, ngue da tsꞌä gätho yʉ jąꞌi i ꞌbʉcua ja ra ximhäi. 11 Nuya him mayaꞌa ga mbagä bʉ. Ndeꞌbʉ gan jamansuhʉ gue hin gui jafʉ nꞌda di tsꞌonꞌna ni tꞌɛ̨cꞌyɛihʉ, ngue hin da zä gui hyąmhbʉ ꞌbɛꞌa gá tąhmbʉ. 12 Nɛ nuꞌʉ toꞌo hin da thąpi nangue ran tsꞌo, ga japi da hyąn a ra ꞌbɛfi nuįxte thoho, ngue tengu nꞌda ra guangu bʉ ja rá ngu ma Ojąhʉ mahɛ̨tsꞌi, nɛ njąmꞌbʉ da bøm bʉ. Nɛ ga oꞌtꞌä rá thuhu ma Oją bʉ ja rá jąꞌi, nɛ ga orpʉ rá thuhu rá hnini ma Oją, Jerusalén maꞌdaꞌyo, guetꞌa ra hnini ba cąpʉ bí ꞌbʉ Oją mahɛ̨tsꞌi. Nɛꞌa ma thuhu maꞌdaꞌyo ga oꞌtꞌä bʉ ja rá jąꞌi ʉ. 13 Nɛ toꞌo i ja yʉ́ zagu, dami ꞌyøhmbʉ ꞌbɛꞌa i xih rá Hogandąhi Oją ʉ yʉ ꞌyɛ̨cꞌyɛi,” bi ꞌyɛ̨na.
Ram hma da hmam bʉ ra hnini Laodicea
14 Nɛ bi xiqui mahønꞌa, bi ꞌyɛ̨na: “Nuya gui ꞌyorpa ra søcuą ram ꞌbɛhni i fäxꞌʉ yʉ ꞌyɛ̨cꞌyɛi ꞌbʉpʉ ja ra hnini Laodicea, da hmam bʉ a. Nɛ gui xih mam hmangä guecä ząi dím mam majuąni. Nugä dá øtꞌä ꞌbɛꞌa gätho i ja ua ya gue bi zänd Oją. 15 Nugä dí pącä ꞌbɛꞌa gätho gá ꞌyøthʉ bʉ, xøgue guí ꞌyo indethʉ, yoho nin ꞌyomfɛ̨nihʉ, nɛ ꞌda xni hothʉ. Manꞌda xcá numanho ahʉ ꞌbʉ nꞌdatꞌa ni tꞌɛ̨cꞌyɛihʉ xquí ꞌyøthʉ, xtán ho ogue hin di ho. 16 Pɛ nugä dí sanꞌnahʉ a gá ꞌyøthʉ, nɛ ga sox ahʉ. 17 Guetho nu ahʉ sä guí ɛ̨mhbʉ gyʉ mɛmbɛtihʉ ꞌbɛꞌa gätho guí homhbʉ, nɛ guí ɛ̨mhbʉ hinꞌyʉ ꞌbɛꞌa manꞌda guí homhbʉ. Pɛ nugä dí pącä gue hinꞌyʉ ꞌbɛꞌa i ja ahʉ di muui. Pɛ huɛ̨cate ahʉ, xøgue ndumbʉi thoho ahʉ, tenguꞌbʉ gyʉ ꞌyąhehʉ nɛ guí xädähʉ,” ɛ̨nꞌa ra nde bí ꞌyɛ̨h mahɛ̨tsꞌi. 18 Nɛ xø bi ꞌyɛ̨na: “Nugä gan zo ahʉ tsꞌʉ, gua ɛ̨hmbʉ ga ꞌda ahʉ ra temaząi, tenguꞌbʉ gui tämhbʉ ra oro mahoqui ngue ra sibi, janangueꞌa majuąni gam mɛmbɛtihʉ. Nɛ ga ꞌda ahʉ ran ho ni mbʉihʉ, tenguꞌbʉ gui tän yʉ pahni xʉn tꞌaxi gui hyehʉ, janangueꞌa hin gui pɛꞌtsꞌ ni sähʉ ngue hinꞌyʉ ꞌbɛꞌa gdí compꞌ ni jąꞌihʉ. Nɛ ga xocꞌa ni dähʉ, tenguꞌbʉ gui tämhbʉ ra ꞌyɛ̨thį gui cospa ni dähʉ, janangueꞌa da zä gui nuhʉ xʉn ho. 19 Nugä ga dąmhyą ahʉ tsꞌʉ, nɛ ga ꞌda ahʉ tsꞌʉ ran ʉnbi gätho toꞌo dadí huɛ̨cä, nꞌdamhma di hocꞌa ni mbʉihʉ. Janangueꞌa daman ɛ̨hyahʉ gui päh nin ꞌyomfɛ̨nihʉ. 20 Nuya gui ꞌyøhmbʉ tsꞌʉ, nguetho dí ꞌbäcä bʉ ja ra goxthi, dín zo ahʉ. Nɛ toꞌo da ꞌyøh ma ndegä nɛ da xogui, ga cʉrpʉ, dam ꞌbʉꞌbe bʉ nɛ dam pąꞌbe. 21 Nɛ toꞌo hin da thąpi nangue ran tsꞌo, ga japi ga huxhe bʉ mahɛ̨tsꞌi, guepʉ i ja ma tsꞌɛdi, tenguthoho ꞌbʉ má tąpä ran tsꞌo nɛ dí huxꞌbe ma Ta bʉ mahɛ̨tsꞌi. 22 Nɛ toꞌo i ja yʉ́ zagu, da ꞌyøꞌa i xi a rá Hogandąhi Oją ʉ yʉ ꞌyɛ̨cꞌyɛi,” bi ꞌyɛ̨nꞌa ra nde bi xiqui.