Ran thąnde bʉ mahɛ̨tsꞌi
4
Nɛ nuꞌbʉ mi jua a bi mam bʉya, dá ndøtsꞌe, nɛ dá nugä nsoqui nꞌda ra jutꞌi mahɛ̨tsꞌi. Nɛ nuꞌa ra nde dá øcä tengu thoho nꞌda ra thʉxi i yą ntsꞌɛdi, bi ꞌyɛ̨ngui: “Ba ɛ̨cua nɛ ga utꞌaꞌi ꞌbɛꞌa jatho din ja mꞌbɛjua.” 2 ꞌBex bi ꞌdacä ra tsꞌɛdi rá Hogandąhi Oją gue bi zä dá nugä bʉ. Nɛ dá nugä bʉ mahɛ̨tsꞌi nꞌda ran thutsꞌi mahoqui xʉn ho, tengutho bʉ hux yʉ hmutsꞌʉtꞌabi. Nɛ mí huxpʉ nꞌda. 3 Nɛ nuꞌa toꞌo mi hupʉ, di fɛxni tengu yʉ fɛxna sødo ra jaspe ogue ra cornalina. Nɛ bi goꞌma ra ꞌbɛjʉni di fɛxni tengu ra fɛxna sødo ra esmeralda. 4 Nɛ bi mbäsꞌ pʉ ja ran thutsꞌi mi ꞌdäte ma goho yʉn thutsꞌi, guepʉ mi hupʉ ꞌdäte ma goho yʉ dącꞌyɛi. Gätho mi he yʉ pahni xʉn tꞌaxi nɛ mi huꞌtsꞌ yʉ́ corona ra oro. 5 Nɛ guepʉ ja ran thutsꞌi mi hø inde, bi bøm bʉ ra huɛi ntsꞌɛdi, nɛ ran gäni ɛ̨mmɛ di thoni, nɛ yʉ nde. Nɛ nubʉ mi hu a nꞌda, mi ja bʉ yoto yʉ sibi gue mi xɛh yʉ tꞌʉsibi, rá hmɛpya rá Hogandąhi Oją ʉ, gue í juadi xʉn ho yʉ́ tsꞌɛdi. 6 Nɛ nubʉ mi hu a nꞌda, mi ja bʉ nꞌda ɛ̨na ra deją, nɛ ɛ̨na ra xito. Nɛ dá nugä goho yʉn tꞌuti gue madim ꞌbäꞌtꞌa ran thutsꞌi, gue i ꞌbʉi. Nɛ gätho goho yʉn tꞌuti mi ja yʉ́ dä bʉ yʉ́ hmi nɛ yʉ́ xʉthä, nɛ gätho yʉ́ jąꞌi. 7 Nuꞌa nꞌda ran tꞌuti bi nɛqui tengu nꞌda ra zate ra león, ná yoho bʉya bi nɛqui tengu nꞌda ra toro, nɛ ná hyu bʉya bi nɛqui tengu rá hmi ran ꞌyohʉ, nɛ ná goho bi nɛqui tengu nꞌda ra dąpɛntsꞌʉ madí tʉntsꞌ yʉ́ zahua, tenguꞌbʉ ꞌyo. 8 Nɛ gätho goho yʉn tꞌuti i ꞌbʉi, ja nꞌda ngu nꞌda ꞌdato yʉ́ hua. Nɛ gätho yʉ́ hua i ja xʉn ngu yʉ́ dä maxøtsꞌe nɛpʉ mbo. Nɛ ma pa nɛ ra xui bi dąnde Oją, xíngui tsꞌʉ bin hɛ̨ꞌa nán tuhu, nɛ bi ꞌyɛ̨m ꞌbʉ min tuhu:Xʉn ho, xʉn ho, xʉn hotho Oją
nuįxte rá tsꞌɛdi,
gueꞌa mi ꞌbʉi nɛ i ꞌbʉhya, nɛ guetꞌa i ꞌbʉi maząi.
9 Nɛ gätho goho yʉn tꞌuti bi dąnde a gue mi hu inde bʉ, bi ꞌyɛ̨spa a Oją nɛ bi xifi jamadi Oją gue i ꞌbʉhya nɛ dim ꞌbʉi maząi hønꞌbʉ go njąmꞌbʉ. 10 Nɛ nuꞌbʉ mi dąnde Oją yʉn tꞌuti, gätho ꞌdäte ma goho yʉ dącꞌyɛi bin dąnyahmu bʉ ja rá hmi a i hu inde bʉ, nɛ bi unꞌndʉ yʉ́ corona ra oro gue mi huꞌtsꞌi. 11 Nɛ bi ꞌyɛ̨na:
Nuꞌi ma Hmu ahe, ma Oją ahe,
hønꞌa thoho nin säui din ja ni nuįxte nɛ ni tsꞌɛdi, nɛ hønꞌa thoho nin säui da numansu a ʉ gätho i ꞌbʉi.
Nguetho gätho gá ꞌyøtꞌe ꞌbɛꞌa i ja ya,
nangue ni pähä zɛhɛ, nɛ gueꞌa ni pähä án jaꞌʉ ꞌbɛꞌa i ja ya.