Ra Tꞌʉdɛꞌyo rán säui di tʉntsꞌa ra søcuą
5
Nɛ nugä dra Xuuagä dá nugä a mi huxpʉ ja ran thutsꞌi mi cą bʉ rán ꞌyɛi nꞌda ra søcuą mꞌbantsꞌi nɛ ntꞌoꞌtꞌi maxøtsꞌe nɛpʉ mbo. Nɛ mi ja yoto yʉ́n cuahmi bʉ ja ra søcuą. 2 Nɛ dá nugä nꞌda ram ꞌbɛhni mahɛ̨tsꞌi xʉn zaqui, nɛ ntsꞌɛdi bi ma: “Ha ꞌbʉ a nꞌda rán säui da xøcꞌʉ yʉ́n cuahmi i ja ua ja ra søcuą, ngue di tʉntsꞌi,” bi ꞌyɛ̨na. 3 Nɛ xínga nꞌda mi ꞌbʉpʉ mahɛ̨tsꞌi, xínga nꞌda mi ꞌbʉpʉ ja ra häi, nɛ xínga nꞌda mi ꞌbʉpʉ i ꞌbʉ ʉ xʉn du rán säui da xøc yʉ́n cuahmi ra søcuą ngue da bądi ꞌbɛꞌa ntꞌoꞌtꞌi bʉ. 4 Nɛ nugä dra Xuuagä ɛ̨mmɛ dán zongä nguetho njongui ꞌbʉi rán säui di tʉntsꞌa ra søcuą ngue da nu ꞌbɛꞌa ntꞌoꞌtꞌi bʉ. 5 Nɛ nu nꞌda ra dącꞌyɛi bi ꞌyɛ̨ngui: “O guí zoni,” bi ꞌyɛ̨ngui, “nguetho ꞌbʉꞌa nꞌda tꞌɛ̨mbi ra León nangue rá ꞌyʉ ra Judá, nɛ rá ꞌyʉ ra tsꞌʉtꞌabi ra David, nuꞌa him bi thąpi nangue ran tsꞌo, nɛ da zä da xøcꞌʉ yʉ́n cuahmi ra søcuą.” 6 Nɛ ꞌbex dá nugä nꞌda i ꞌbä inde bʉ ꞌbʉh yʉn tꞌuti, nɛꞌʉ ꞌdäte magoho yʉ dącꞌyɛi. Nɛ nuꞌa bi nɛqui tengu nꞌda ra Tꞌʉdɛꞌyo bi mba ntho. Nuꞌa ra Tꞌʉdɛꞌyo mi ja yoto yʉ́ dąni nɛ mi ja yoto yʉ́ dä, gueꞌa ra hmɛpya rá Hogandąhi Oją gue í juadi xʉn ho yʉ́ tsꞌɛdi, bá ꞌbɛhni gätho ná ngʉni ra ximhäi. 7 Nɛ bi mba bʉ nɛ bi gąnba ra søcuą gue mi ja bʉ rán ꞌyɛi nꞌda gue mi hupʉ ja ran thutsꞌi. 8 Nɛ nuꞌbʉ mi gąnba ra søcuą, nuꞌʉ ꞌdäte magoho yʉ dącꞌyɛi bin dąnyahmu bʉ ja rá gua ra Tꞌʉdɛꞌyo. Nɛ nꞌda ngu nꞌda mi hą yʉ́ arpaꞌbida, nɛ gätho mi ja yʉ́ ximbo ra oro mayuh rán dɛga ra za i yʉmanho, ra hmɛpya gue ní mba ntꞌɛ̨spi Oją, gue i ɛ̨spa Oją ʉ yʉ́ tꞌʉhni. 9 Nɛ gätho bin tu a nꞌda ra thuhu maꞌdaꞌyo, ɛ̨nꞌʉ:Hønꞌa zɛhɛ i nin säui gui xøcua yʉ́n cuahmi ra søcuą,
nguetho ya bi tho i, nɛ nangue ni ji guí jutꞌʉ yʉ jąꞌi, ngue gá ꞌyørpa yʉ́ mbɛti Oją ʉ
gätho ʉ ꞌda gue ꞌdahma ꞌdanꞌyo bʉ na yą, nɛ gätho ʉ ꞌda gue ꞌdahma ꞌdanꞌyo yʉ́ ꞌyʉ, nɛ gätho ʉ ꞌda gue ꞌdahma ꞌdanꞌyo yʉ́ häi mi ꞌbʉi.
10 Nɛ gá un ni tsꞌɛdi din tsꞌʉtꞌabi, nɛ dim mbäją bʉ di manda rá tsꞌɛdi Oją,
nɛ di manda bʉ ja ra häi, bi ꞌyɛ̨m ꞌbʉ min tuhu.
11 Nɛ nugä dra Xuuagä, ꞌbex dá nugä nɛ dá øcä yʉ́ nde yʉm ꞌbɛhni mahɛ̨tsꞌi ɛ̨mmɛ xʉn ngu yʉ muntsꞌi, ngue yʉ millone thoho madím ꞌbäꞌtꞌa mi hupʉ ja ran thutsꞌi, nɛ yʉn tꞌuti nɛ yʉ dącꞌyɛi. 12 Nɛ gätho yʉm ꞌbɛhni mahɛ̨tsꞌi ntsꞌɛdi bin tuhu, nɛ bi ꞌyɛ̨m ꞌbʉ min tuhu:
Nangue bi du ra Jesús ra Tꞌʉdɛꞌyo,
rán säui din tꞌun rá tsꞌɛdi, nɛ ꞌbɛꞌa gätho di muui,
nɛ ran ꞌyomfɛ̨ni nuįxte, nɛ ra tsꞌɛdi nuįxte,
nɛ da hyąnba yʉ́m hman ʉ i numansu. Nɛ da tꞌɛ̨spi nɛ ɛ̨mmɛ da hnumanho.
13 Nɛ ꞌbex dá øcä bi mba ntꞌɛ̨spi a huxpʉ ja ran thutsꞌi, nɛ ra Jesús ra Tꞌʉdɛꞌyo. Gätho i ꞌbʉi bi manꞌʉ tengu nꞌdare thoho:
Mająpi thoho nɛ i hnumansu ngue nuįxte thoho. Nɛ din ja rá tsꞌɛdi xʉn ho,
nɛ gätho i ꞌbʉi da ꞌyɛ̨spi hønꞌbʉ go njąmꞌbʉ maząi. Njabʉ bi ma gätho i ꞌbʉpʉ mahɛ̨tsꞌi, nɛpʉ ja ra häi, nɛꞌʉ xʉn du, nɛꞌʉ ꞌbʉpʉ ja yʉ deją, ngue nꞌdatꞌa bi manꞌʉ.
14 Nɛ gätho goho yʉn tꞌuti i ꞌbäpʉ mahɛ̨tsꞌi bi ꞌyɛ̨na: “Nɛcähe nꞌdatꞌa dím bɛ̨mhbe a,” bi ꞌyɛ̨nꞌʉ. Nɛ gätho ꞌdäte magoho yʉ dącꞌyɛi mi ꞌbʉpʉ bin dąnyahmu i thąnde a huꞌinde bʉ mahɛ̨tsꞌi, nɛ ra Tꞌʉdɛꞌyo.