Yoto yʉn cuahmi
6
Nɛ nugä dra Xuuagä dá nu ra Jesús ra Tꞌʉdɛꞌyo bi xøcꞌa rá mbʉdi rán cuahmi ra søcuą nɛ bi dʉꞌmi di tʉntsꞌa ra søcuą. Nɛ nꞌda ran tꞌuti bi xicä, nɛ ntꞌøde rá nde tengu ran gäni: “Ba ɛ̨cua gua nuua,” bi ꞌyɛ̨ngui. 2 Nɛ dá hɛ̨tä bʉ, nɛ dá nu nꞌda ra tꞌaxca ndøfani. Nɛ nuꞌa mi huxpʉ mi hą nꞌda ran są, nɛ bi mba ma unni nꞌda ra corona. Nɛ bi mba bʉ ząi da dąh yʉn sʉi din ja. 3 Nɛ nu ra Jesús ra Tꞌʉdɛꞌyo bi xøcꞌa ná yoho rán cuahmi ra søcuą. Nɛ dá øcä a bi mam manꞌda ran tꞌuti, bi xicä: “Ba ɛ̨hɛ, gua nu,” bi ꞌyɛ̨ngui. 4 Nɛ dá nugä, bi bøm bʉ nꞌda ra thɛnga ndøfani. Nɛ mi huxpʉ nꞌda, nɛ bi mba ma unni ra espada xʉm mba. Nɛ bin tꞌunꞌna ran tꞌɛ̨di gue di japi din sʉꞌʉ yʉ jąꞌi gätho ꞌbʉpʉ ja ra ximhäi, ngue din hyo nꞌda ngu nꞌda ʉ. 5 Nɛ nuꞌa ra Jesús ra Tꞌʉdɛꞌyo bi xøcua ná hyu ran cuahmi, nɛ xø dá øcä rá nde manꞌda ran tꞌuti bi xicä: “Ba ɛ̨hɛ, gua nu,” bi ꞌyɛ̨ngui. ꞌBex dá nugä bi bøm bʉ nꞌda ra ꞌbondøfani, nɛ mi huxpʉ nꞌda mi hą ra tꞌɛntꞌi. 6 Nɛ dá øcä nꞌda ra nde bi bøm bʉ mi ꞌbäh yʉn tꞌuti, bi ꞌyɛ̨na: “Høntꞌa nꞌda kilo ra trigo da dänꞌa nꞌdapa, nɛ høntꞌi hyu kilo ra cebada da dänꞌa nꞌdapa. Pɛ dami jamansuhʉ ra aceite nɛ ra vino, o gadí japi dim ꞌbɛdi.” 7 Nɛ nuꞌbʉ mi xøcꞌa ná goho ran cuahmi a ra Tꞌʉdɛꞌyo, dá øcä rá nde manꞌda ran tꞌuti, bi ꞌyɛ̨ngui: “Ba ɛ̨hɛ gua nu,” bi ꞌyɛ̨na. 8 Nɛ ꞌbex dá nugä bi bøm bʉ nꞌda ra ndøfani xʉn cꞌaxtꞌi tsꞌʉ. Nɛ mi huxpʉ a nꞌda tꞌɛ̨mbi ran dąte, nɛ mí tɛnꞌna ran dąte nꞌda gue xí bøm bʉ ꞌbʉ ʉ xʉn du. Nuꞌʉ bin tꞌun ra tsꞌɛdi di manda ʉ ná goho bʉ ꞌbʉh yʉ jąꞌi gätho ra ximhäi. Nɛ nuꞌʉ bin ja ra tsꞌɛdi gue da hyo yʉ jąꞌi nangue ra espada, nɛ nangue din tumanthuhu, nɛ nangue ra gɛ̨hɛ̨, nɛ yʉ zate da hyo yʉ jąꞌi. 9 Nɛ nuꞌbʉ mi xøcꞌa ná cʉtꞌa rán cuahmi ra søcuą a ra Tꞌʉdɛꞌyo, dá nugä bʉ nꞌda ra mɛxa guepʉ i pa mꞌbøspe Oją, gue bim ꞌbøtsꞌe zɛhɛ ʉ yʉ ꞌyɛ̨cꞌyɛi. Nɛ dá nugä bi hyupʉ ꞌbimɛxa yʉ́ te ʉ gätho í tho a rám hman Oją, nɛ bi ma nangue ra Cristo. 10 Nɛ gätho ʉ mi hupʉ ꞌbimɛxa ntsꞌɛdi bi ꞌyɛ̨na: “Ma Hmu tątethoho ni tsꞌɛdi, nɛ xʉn ho i, nɛ majuąni guím ma. Hamꞌmi pa gui tøꞌmi ngue gui ꞌyørpa ran juąnbi ʉ, nɛ gui cospa ʉ yʉ jąꞌi ꞌbʉpʉ ja ra ximhäi ꞌbɛꞌa bi ꞌyørcahe,” bi ꞌyɛ̨nꞌʉ. 11 Pɛ nuꞌʉ bin tꞌun yʉ́ pahni xʉn tꞌaxi, nɛ bi sifi da døꞌmi tsꞌʉ ꞌda yʉ pa, ja gueꞌbʉ bi guaꞌʉ dí du a rám hman Oją ʉ yʉ́ miꞌyɛ̨hɛhʉ, ngue tengu ʉ. 12 Nɛ nugä dra Xuuagä dá nugä ra Tꞌʉdɛꞌyo bi xøcꞌa ná ꞌdato rán cuahmi a ra søcuą. Nɛ ꞌbex bin ja nꞌda ra ꞌyąmhäi ntsꞌutho. Nɛ nuꞌa ra hyadi gätho ꞌbex bi boqui tengu nꞌda ra ꞌboꞌbøꞌtꞌe, nɛ nuꞌa ra ząna ꞌbex bi thɛngui tengu ra ji. 13 Nɛ gätho yʉ sø bi däpʉ häi, tengu nꞌda ra za i høh yʉ́n dätꞌo ꞌbʉ i huąn ran dąhi. 14 Nɛ nubʉ xʉn cꞌammi ra ximhäi, bi mba mꞌbantsꞌi tenguꞌbʉ ra søcuą, bim ꞌbɛdi. Nɛ gätho yʉ tꞌʉhäi mi ja bʉ ja ra dehe, pɛ nɛꞌʉ gätho yʉ tꞌøhø, bi mba ma pädi bʉ mi ja. 15 Nɛ gätho yʉ tsꞌʉtꞌabi bʉ ja ra häi, nɛ gätho yʉ́ ngʉrpi yʉ jąꞌi, nɛ gätho yʉ hmudofʉi, nɛ gätho yʉ mɛmbɛti, nɛ gätho i jasɛ yʉ́ tsꞌɛdi, nɛ gätho yʉ ꞌyɛ̨hɛ, nɛ gätho hing yʉ ꞌyɛ̨hɛ, bi mba bʉ dąpo, mi honi hapʉ din ꞌyąni guepʉ ja yʉ hyąnhäi, o guepʉ ja yʉ hyądo. 16 Nɛ gätho mi nde ʉ da zɛmba yʉ́ yą yʉ do ꞌbʉ bi xoꞌtꞌ yʉ tꞌøhø nɛ da goꞌmi, ngue i su da nu a rá cuɛ a i huxpʉ ja ran thutsꞌi mahɛ̨tsꞌi, nɛꞌa ra Tꞌʉdɛꞌyo. 17 Nguetho bi zøn ra pa ran ʉnbi ntsꞌutho, nɛ njon da zä da hyät ran ʉnbi.