Rá ꞌbede ʉ yʉ israel bʉ mahɛ̨tsꞌi
7
Nɛ nubʉya dá nugä goho yʉm ꞌbɛhni mahɛ̨tsꞌi, nɛ ꞌda a nꞌdanni mi ꞌbäpʉ rá nyąni ra ximhäi i sąmꞌma ran dąhi i ꞌyo ua gue xíngui tsꞌʉ din ꞌyo bʉ ja ra häi, o guepʉ ja ra dądeją, nɛ xínga gue di ꞌyąn yʉ za. Nɛꞌʉ yʉ dądeją hin di ꞌyąni, di nɛqui tengu nꞌda ra xito xʉn juąni thoho. 2 Nɛ dá nugä nꞌda ram ꞌbɛhni mahɛ̨tsꞌi bí ꞌyɛ̨pʉ ní bøx ra hyadi, nɛ nuꞌa bá hyą a rá sello Oją ngue i ꞌbʉi, nɛ ntsꞌɛdi bi mbaꞌtꞌʉ goho yʉ́m ꞌbɛhni Oją gue i ꞌbäpʉ yʉ́ nyąni ra ximhäi. Gueꞌʉ mi ꞌbäpʉ bin tꞌun ra tsꞌɛdi di ʉnba ra häi nɛ ra dądeją. 3 Nɛ nuꞌa ram ꞌbɛhni mi hą ra sello, bi xi ʉ miꞌda gue da døꞌmi tsꞌʉ, him ꞌbex di ʉnba ra häi o gue ra dądeją o gue yʉ za, ja gueꞌbʉ di selloba bʉ ja yʉ́ dɛ̨ yʉ ꞌyɛ̨cꞌyɛi a rá sello Oją. 4 Nɛ dá øcä hangu bi ꞌbeh yʉ jąꞌi di jap ra sello yʉ́ dɛ̨, nꞌda ciɛnto nɛ yote ma goho mahuąhi, bi thąsta ʉ yʉ́m bomꞌbɛto yʉ́ tsꞌʉntꞌʉ ra Israel. 5 Bi thąsta ʉ ꞌdɛꞌmayo mahuąhi yʉ́m bomꞌbɛto ra Judá. Nɛ bi thąsta ʉ ꞌdɛꞌmayo mahuąhi yʉ́m bomꞌbɛto ra Rubén. Nɛ bi thąsta ʉ ꞌdɛꞌmayo mahuąhi yʉ́m bomꞌbɛto ra Gad. 6 Nɛ bi thąsta ʉ ꞌdɛꞌmayo mahuąhi yʉ́m bomꞌbɛto ra Aser. Nɛ bi thąsta ʉ ꞌdɛmayo mahuąhi yʉ́m bomꞌbɛto ra Neftalí. Nɛ bi thąsta ʉ ꞌdɛꞌmayo mahuąhi yʉ́m bomꞌbɛto ra Manasés. 7 Nɛ bi thąsta ʉ ꞌdɛꞌmayo mahuąhi ʉ yʉ́m bomꞌbɛto ra Simeón. Nɛ bi thąsta ʉ ꞌdɛꞌmayo mahuąhi yʉ́m bomꞌbɛto ra Leví. Nɛ bi thąsta ʉ ꞌdɛꞌmayo mahuąhi ʉ yʉ́m bomꞌbɛto ra Isacar. 8 Nɛ bi thąsta ʉ ꞌdɛꞌmayo mahuąhi ʉ yʉ́m bomꞌbɛto ra Zabulón. Nɛ bi thąsta ʉ ꞌdɛꞌmayo mahuąhi ʉ yʉ́m bomꞌbɛto ra José. Nɛ bi thąsta ʉ ꞌdɛꞌmayo mahuąhi ʉ yʉ́m bomꞌbɛto ra Benjamín.Yʉ jąꞌi mi he yʉ pahni xʉn tꞌaxi
9 Nɛ nugä dra Xuuagä, dá handi nɛ dá nugä xʉn ngu yʉ jąꞌi nɛ njon da zä da mbede hangu na ngu dá nugä. Dá nu ʉ i ꞌbäpʉ gätho ʉ ꞌda gue ꞌdahma ꞌdanꞌyo bʉ na yą, nɛ gätho ʉ ꞌda gue ꞌdahma ꞌdanꞌyo yʉ́ ꞌyʉ, nɛ gätho ʉ ꞌda gue ꞌdahma ꞌdanꞌyo yʉ́ häi mi ꞌbʉi. Nɛ gätho ʉ mi ꞌbäpʉ mí hɛ̨tꞌa mí huxpʉ ja ran thutsꞌi bʉ mahɛ̨tsꞌi, nɛ mi hɛ̨tꞌa ra Jesús ra Tꞌʉdɛꞌyo. Gätho mi ꞌbäpʉ mi he yʉ́ pahni xʉn tꞌaxi, nɛ mi cą yʉ xijamꞌboza. 10 Nɛ gätho ntsꞌɛdi bi ꞌyɛ̨na:
Ɛ̨mmɛ dín numanho ahe, ma Oją ahe,
tątetho ni tsꞌɛdi, nɛꞌe gra Jesús gra Tꞌʉdɛꞌyo, dí ɛ̨sꞌahe ngue gá pøje, bi ꞌyɛ̨n ʉ.
11 Nɛ gätho yʉm ꞌbɛhni mahɛ̨tsꞌi bi mbäꞌtsꞌa mi hupʉ made bʉ mahɛ̨tsꞌi, nɛ gätho ꞌdäte ma goho yʉ dącꞌyɛi nɛꞌʉ gätho goho yʉn tꞌuti bi mbäsꞌ thoho gätho mi ꞌbʉpʉ, bin dąnyahmu, bi nyeꞌmahäi, bi dąnde Oją i hu inde bʉ. 12 Gätho bi ꞌyɛ̨na:
Nɛcähe ꞌdatꞌa dím bɛ̨mhbe, dí ɛ̨sꞌahe, ma Oją ahe, nuįxte xʉn ho i.
Nɛ gätho guí pądi. Ząi dí xi ahe jamadi nangue ran ho guí ørcahe. Dín numansu ahe, nɛ nte guí hɛ̨mbi, pɛ i ja ni tsꞌɛdi xʉn ho, nɛ gam ꞌbʉi hønꞌbʉ go njąmꞌbʉ maząi.
Nɛ hønꞌa tho dím bɛ̨n ahe ya, bi ꞌyɛ̨nꞌʉ.
13 Nɛ nu nꞌda ra dącꞌyɛi bi ꞌyängä dra Xuuagä: “Ha guí pądi hapʉ bá nɛx yʉ.” 14 Nɛ dá ɛ̨mpꞌa ra dącꞌyɛi: “Nuꞌi guí pądi.” Nɛ nuꞌa ra dącꞌyɛi bi ꞌyɛ̨ngui: “Nuꞌʉ gueꞌʉ bi ꞌyɛ̨cꞌyɛi Oją ꞌbʉ mi ja ran ʉnbi ndumbʉi tho bʉ ja ra ximhäi. Nɛ nuꞌa rá ji ra Jesús gue a í bo yʉ́ pahni ʉ, bi japi xtan tꞌaxi. 15 Janangueꞌa i ꞌbähnʉ ja rá hmi Oją yʉ. Nɛ in ꞌyɛ̨hɛ ma pa nɛ ra xui ua ja rá niją Oją. Nɛ gueꞌa i huxpʉ ja ran thutsꞌi di jamansu yʉ. 16 Nɛ him manꞌdandį din tumanthuhu yʉ, nɛ him manꞌdandį din tuthe. Nɛ him manꞌdandį da nu ran ʉnbi nam pa ra hyadi, xinga gue ʉ miꞌda xʉm pa di ʉnbi. 17 Nguetho nu ra Jesús ra Tꞌʉdɛꞌyo gue i ꞌbʉ inde bʉ mahɛ̨tsꞌi da ꞌyøtꞌe tengu ꞌbʉ ra mbändɛꞌyo, nɛ da zixpʉ hapʉ i ja ra dehe gue di un ra te yʉ́ mbʉi. Nɛ nuꞌa Oją him manꞌdandį di japi din zoni.”