Ná yoto ran cuahmi nɛ ra tꞌutsꞌi ra oro
8
Nɛ nuꞌbʉ mi xøcua na yoto yʉ́n cuahmi ra søcuą, made ora njom bin yą bʉ mahɛ̨tsꞌi nɛ nte bi ꞌyąni. 2 Nuꞌbʉ mí guaꞌa bʉya dá nugä yoto yʉm ꞌbɛhni mahɛ̨tsꞌi ząi i ꞌbäpʉ ja rá hmi Oją, nɛ bin tꞌun yʉ thʉxi nꞌda ngu nꞌda. 3 Nɛ dá nugä nꞌdanꞌyo ram ꞌbɛhni mahɛ̨tsꞌi, bi mba bim ꞌbäpʉ ja rá mɛxa yʉn tꞌunni, nɛ mi thɛ nꞌda ra tꞌutsꞌi ra oro nɛ bi mba ntꞌunni xʉn ngu rá ndɛga ra za din zø bʉ, i yʉmanꞌu, nɛ nuꞌa rá ꞌbifi da mba ma uąspi yʉ́m hma yʉ ꞌyɛ̨cꞌyɛi ꞌbʉ i ɛ̨spa Oją. Nɛ gätho i zø bʉ ja rá mɛxa ra oro gue i høpʉ ja rá hmi a Oją i hu inde bʉ. 4 Nɛ nuꞌa ra ꞌbifi i nɛxpʉ ja rá tꞌutsꞌi a ram ꞌbɛhni, mauątsꞌi yʉ́m hman yʉ ꞌyɛ̨cꞌyɛi ꞌbʉ i ɛ̨spa Oją, nɛ bi zøm bʉ bí ꞌbʉ Oją. 5 Nɛ nuꞌa ram ꞌbɛhni bi yusꞌ yʉ dɛspi bʉ ja ra tꞌutsꞌi ra oro gue mi zø bʉ ja ra mɛxa, nɛ bi ꞌyɛm bʉ ja ra ximhäi. Nɛ ꞌbex dá øcä ntsꞌɛdi yʉn gäni din thoni. Nɛ dá nu ntsꞌɛdi yʉ huɛi bi cꞌuɛ̨ti bʉ ja ra ximhäi, nɛ bin ja nꞌda ra ꞌyąmhäi bʉ.Yʉ thʉxi
6 Nuya bim ꞌbäpʉ yoto yʉm ꞌbɛhni mahɛ̨tsꞌi i tøꞌmi da huixtꞌ yʉ́ thʉxi. 7 Nɛ rá mbʉdi ram ꞌbɛhni bi huixtꞌ rá thʉxi, ꞌbex bi tꞌɛn bʉ häi yʉn do, nɛ ra sibi, mauąspi ra ji. Nɛ ná hyu xɛqui ra häi bin zø, bi gopʉ mi yoxɛqui ra häi. Nɛpʉ na hyu xɛqui bin zø yʉ za nɛ yʉ tꞌɛi xʉn cꞌammi. Pɛ bi gohi yo xɛqui ngue him bin zø. 8 Nɛ na yoho yʉm ꞌbɛhni bi huixtꞌ rá thʉxi, nɛ dá nu tengu nꞌda ra tꞌøhø xʉn ndoho, i sø nɛ ɛ̨mmɛ ndøspi, nɛ bi mba ntꞌɛntꞌi bʉ ja ra dądeją. 9 Nɛ na hyu xɛqui ra dądeją bi japi din ji. Nɛ gätho bi du ʉ mi ꞌbʉpʉ mbo ra dehe. Nɛ gätho yʉ dąmbosa gue mi ꞌyo bʉ bin tsꞌoni. Pɛ bi go ʉ yoxɛqui ra dądeją ngue him bin tsꞌoni. 10 Nɛ ná hyu yʉm ꞌbɛhni bi huixtꞌ rá thʉxi. Nɛ ꞌbex bi däh mahɛ̨tsꞌi nꞌda ra sø xʉn ndoho ngue i zø nɛ ɛ̨mmɛ xɛh yʉ tꞌʉsibi. Nɛ bi däpʉ ja ná hyu yʉ dąthe nɛ ná hyu yʉ mbøthe bʉ ja ra ximhäi. 11 Nu rá thuhu ra sø ngue bi dägui ra Ajenjo na. Nɛ guepʉ bi däh ra sø gätho ra dehe ɛ̨mmɛ bi juꞌtsꞌi. Nɛ xʉn ngu yʉ jąꞌi bi du ngue bi zi a ra dehe xʉn ju. 12 Nɛ nu ná goho ram ꞌbɛhni bi huixtꞌ rá thʉxi. Nɛ ꞌbex bi boqui ná hyu xɛqui ra hyadi, nɛꞌa ná hyu xɛqui ra ząna bi boqui. Nɛ a ná hyu nɛtsꞌi yʉ sø bi boqui. Nɛ mbɛ ngoho ora ra pa nɛ ra xui him bin ja ran nɛqui. 13 Nɛ drá Xuuagä dá nu nꞌda ram ꞌbɛhni mahɛ̨tsꞌi mi ꞌyo inde bʉ mahɛ̨tsꞌi, nɛ ɛ̨mmɛ ntsꞌɛdi mbafi, bi ꞌyɛ̨na: “Huɛ̨cate, huɛ̨cate, huɛ̨cate yʉ jąꞌi ꞌbʉpʉ ja ra ximhäi, nangue ꞌbɛꞌa din ja ꞌbʉ bi huixtꞌ yʉ́ thʉxi yʉ mi hyu yʉm ꞌbɛhni mahɛ̨tsꞌi gue i ꞌbähnʉ,” bi ꞌyɛ̨na.