9
Nɛ ná cʉtꞌa yʉm ꞌbɛhni bi huixtꞌ rá thʉxi nɛ dá nu nꞌda ra sø tengu nꞌda ram ꞌbɛhni mahɛ̨tsꞌi ngue hingui ho, bi däpʉ mahɛ̨tsꞌi bi zøpʉ ja ra ximhäi. Nɛ bin tꞌunꞌna nꞌda ran sogui da xoc ra hyąhäi ngue ɛ̨mmɛ xʉn hɛ̨ nɛ ntsꞌutho, guepʉ i ꞌbʉ a ra zįthu. 2 Nɛ nuꞌbʉ mí xocꞌa, bi bøm bʉ ra ꞌbifi xʉm pothi tengu ꞌbʉ fʉn ra sibi xʉn ndoho. Nɛ ꞌbex bi goꞌma ra hyadi a ra ꞌbifi nɛ bin uąntsꞌui ran dąhi gätho ra ximhäi. 3 Nɛ xʉn ngu yʉ hɛꞌyąxi bi bøm bʉ ja ra ꞌbifi ngue bin ꞌyo gätho ra ximhäi. Nɛ bin tꞌun yʉ́ tsꞌɛdi da ꞌyøtꞌe tengu ran ʉnbi di un yʉ mbozʉ. 4 Nɛ bi sifi ngue hin di tsꞌon yʉ tꞌɛi o gue yʉ za o gue miꞌda i ja ua ja ra ximhäi, høntꞌʉ yʉ jąꞌi di ʉnbi gätho toꞌo him mi ja rá sello Oją bʉ ja yʉ́ dɛ̨. 5 Nɛ him bi japi da hyo yʉ jąꞌi, høntꞌa cʉtꞌa ząna di ʉnba yʉ jąꞌi, tengu i øtꞌ yʉ mbozʉ ꞌbʉ i sa nꞌda. 6 Nɛ nuꞌʉ yʉ pa gue i ꞌyo ua yʉ hɛꞌyąxi in nde yʉ jąꞌi da du pɛ hingui sä da du, høntꞌa ran ʉnbi thoho da nu. 7 Nɛ nu yʉ hɛꞌyąxi di nɛqui tengu yʉ fani ɛ̨na da mba ra sʉi, pɛ nu yʉ́ hmi tengu yʉ́ hmi yʉ jąꞌi, nɛ i huꞌtsꞌ yʉ corona yʉ oro. 8 Nɛ nu ʉ mi ja yʉ́ xtą tengu nꞌda ra xisu, nɛ mi ja yʉ́ tsꞌi tengu yʉ́ tsꞌi ra dązate. 9 Nɛ nu ʉ mi ja bʉ yʉ́ tįya tengu rá xi ra dąhuą, pɛ xʉm mɛ tengu ra tꞌɛgui. Nɛ di hį yʉ́ zahua tenguꞌbʉ yʉ carro i jʉt yʉ fani i tihi, ɛ̨mmɛ di thoni tenguꞌbʉ i pa bʉ ja ran sʉi. 10 Nɛ nu yʉ́ ꞌyozʉ tengu yʉ mbozʉ, nɛ cʉtꞌa ząna bin tꞌun ran tꞌɛ̨di di ʉnba yʉ jąꞌi, nangue yʉ́ ꞌbite i ja yʉ́ ꞌyozʉ. 11 Nɛ nuꞌa rá hmu ʉ yʉ hɛꞌyąxi ꞌbʉpʉ ja ra hyąhäi ngue ɛ̨mmɛ xʉn hɛ̨, nɛ nuꞌa rá thuhu ra Abadón ngue rá nde ra hebreo, nɛ nuꞌʉ yʉ griego ɛ̨mbi ra Apolión. Pɛ nu rá thuhu nde da ma, gue nde di tsꞌoni ꞌbɛꞌa gätho i ja. 12 Nuya rá mbʉdi ran ʉnbi bi thogui, pɛ ba ɛ̨h mi yoho yʉn ʉnbi. 13 Nɛ ná ꞌdato yʉm ꞌbɛhni bi huixtꞌ rá thʉxi. ꞌBex dá øcä nꞌda ra nde bi bøm bʉ ja yʉ́ dąni gueꞌʉ mi ja bʉ goho yʉ́ tsꞌątꞌi ra mɛxa ngue ra oro i høpʉ ja rá hmi Oją. 14 Nɛ nu a ra nde bi ꞌyɛ̨mpꞌa ná ꞌdato yʉm ꞌbɛhni mahɛ̨tsꞌi gue i ja bʉ rá thʉxi: “Dami xocꞌʉ goho yʉm ꞌbɛhni mahɛ̨tsꞌi ngue nthuꞌtꞌi bʉ ja ra dąthe Eufrates,” bi tꞌɛ̨mbi. 15 Nɛ bi mba nsoqui, nguetho bi døꞌmi da zøn ra ora, nɛ ra pa, nɛ ra ząna, nɛ ra jɛya da socꞌʉ. Nɛ da mba ʉ da hyo a ná hyu njąꞌi bʉ ꞌbʉh yʉ jąꞌi gätho ra ximhäi. 16 Nɛ yociɛnto millone yʉ dofʉi i hux yʉ ndøfani bi dɛnꞌndʉ. Nugä dra Xuuagä dá øcä hangu na ngu bi mba. 17 Nɛ in ja bʉ ꞌbʉ má nugä yʉ ndøfani, nɛ nuꞌʉ yʉ dofʉi madin tøgue bi däc yʉ́ tįya ra tꞌɛgui ma cʉhʉ xʉn thɛni, xʉn cꞌammi nɛ xʉn cꞌaxtꞌi. Nɛ nuꞌʉ yʉ́ yą yʉ ndøfani tengu yʉ́ yą yʉ dązate. Nɛ bi bøm bʉ ja yʉ́ nde yʉ ndøfani ra sibi nɛ ra ꞌbifi nɛ ra dɛspi. 18 Nɛ na hyu ram ꞌbede yʉ jąꞌi mi ꞌbʉcua ja ra ximhäi bi du nangue rán ʉnbi ra sibi, ra ꞌbifi nɛ ra dɛspi gue bi bøm bʉ yʉ́ nde yʉ ndøfani. 19 Nu yʉ ndøfani mi ja yʉ́ tsꞌɛdi nangue ꞌbɛꞌa bi bøm bʉ ja yʉ́ nde, nɛ mi ja ra tsꞌɛdi yʉ́ ꞌyozʉ, nguetho yʉ́ ꞌyozʉ i ja yʉ́ yą tengu yʉ pozʉ di ʉnba yʉ jąꞌi. 20 Nɛ gätho miꞌda yʉ jąꞌi gue him bi du, him bi päh yʉ́n ꞌyomfɛ̨ni, pɛ guextaꞌa bi dąnde yʉ zįthu nɛꞌʉ yʉ hmite bi ꞌyøzɛhɛ, yʉ́n tꞌøtꞌe ra oro nɛ ra tꞌaxi nɛ ra fɛxna tꞌɛgui, nɛ ra do, nɛ yʉ za, yʉ hmite ʉ gue hingui nute nɛ hingui øhnahyą, nɛ hingui sä din ꞌyo. 21 Nɛ xingui tsꞌʉ bi hyɛh yʉn tꞌøtꞌe xʉn tsꞌo. Guextaꞌa bin hyodu nɛ bim bądi nɛ bin ꞌyomtꞌɛ̨ni, nɛ bim pɛ̨.