Ra tꞌʉsøcuą i cą nꞌda rám ꞌbɛhni Oją
10
Nɛ nugä dra Xuuagä dá nugä manꞌda rám ꞌbɛhni Oją bá cąh mahɛ̨tsꞌi, mi ja rá tsꞌɛdi. Nɛ bán ꞌyoui nꞌda ra güi, nɛ mi comba ra ꞌbɛjʉni rá yą. Nɛ nuꞌa rá hmi bi yoxni tengu ra hyadi, nɛ nuꞌʉ yʉ́ gua madi nɛqui tenguꞌbʉ nꞌda ra sibi. 2 Nɛ mi cą nꞌda ra tꞌʉsøcuą ma tʉntsꞌi. Nɛ nuꞌa rán ꞌyɛigua mí nɛmpꞌʉ ja ra dądeją, nɛ nuꞌa rá gąhągua mi nɛmpꞌʉ ja ra häi. 3 Nɛ nuꞌa ram ꞌbɛhni ntsꞌɛdi bi mbafi, tenguꞌbʉ i mba a ra dązate. 4 Nɛ nuꞌbʉ mi mbafi, ꞌbex dá øcä yoto yʉn gäni. Nɛ mí ɛ̨ngä xcá oꞌtꞌä ra søcuą ꞌbɛꞌa dá nugä, pɛ ꞌbex dá øcä nꞌda ra nde mahɛ̨tsꞌi bi ꞌyɛ̨ngui: “ꞌYo guí oꞌtꞌya ꞌbɛꞌa bi ma yʉn gäni, nguetho hingui sä gui ma ꞌbɛꞌa bi manꞌʉ.” 5 Nɛ dá nugä rám ꞌbɛhni Oją mahɛ̨tsꞌi gue i ꞌbäpʉ ja ra deją nɛpʉ ja ra häi, bi ꞌuąꞌtsꞌ rán ꞌyɛi bʉ mahɛ̨tsꞌi. 6 Nɛ bi ndønba rá thuhu Oją i ꞌbʉi nɛ dim ꞌbʉi maząi, gue bi ꞌyøtꞌ mahɛ̨tsꞌi nɛ ra ximhäi nɛ ra deją nɛ gätho ꞌbɛꞌa i jabʉ. Bi ndønba rá thuhu, gue majuąni hin da døꞌmi miꞌda yʉ pa ꞌbɛꞌa din ja. 7 Nɛ ɛ̨na, nuꞌbʉ bi huixtꞌ rá thʉxi a ná yoto rám ꞌbɛhni Oją gue mi ꞌbʉhnʉ, ꞌbex din ja bʉya ꞌbɛꞌa bi xi Oją yʉ́ pøngahyą mayaꞌbʉ gue din ja, gue him mám fądi. 8 Nɛ nuꞌa ra nde mahɛ̨tsꞌi bi ꞌyɛ̨ngä mahønꞌa: “Nuꞌi, ní mba bʉ, bá cąnꞌa ra søcuą gue i cąꞌa rám ꞌbɛhni Oją mahɛ̨tsꞌi i ꞌbähnʉ ja ra deją nɛ ra häi.” 9 Janangueꞌa dá mbagä bʉ mi ꞌbäꞌa ram ꞌbɛhni mahɛ̨tsꞌi, nɛ dá xifi gue di ꞌdacꞌa ra søcuą. Nɛ nuꞌa ram ꞌbɛhni bi ꞌyɛ̨ngui: “Cąni, nɛ gui sa. Nɛ nuꞌbʉ gá sa, tenguꞌbʉ ra tꞌafitꞌasa bʉ dán zä ni nde, pɛ nuꞌbʉ bi mba bʉ ni foho ɛ̨mmɛ xtán ju bʉya.” 10 Nɛ dá cąngä ra søcuą bʉya, nɛ dá sagä a. Nɛ bin ja tengu bi xicä ram ꞌbɛhni, xʉ cʉhi ꞌbʉ má sagä, ɛ̨mmɛ xʉn ų, pɛ guepʉ ma foho, ɛ̨mmɛ xʉn ju. 11 Nɛ bi xiqui: “Jatho gui mampꞌa rám hma Oją mahønꞌa, hønbʉ go hapʉ ꞌbʉh yʉ jąꞌi ꞌdahma ꞌdanꞌyo bʉ na yą nɛ ꞌda nꞌdanni yʉ́ häi, nɛpʉ ꞌbʉh yʉ tsꞌʉtꞌabi.” Nɛ gueꞌa bi sicä a dra Xuuagä.