Yoho yʉ pøngahyą
11
Nɛ nugä dra Xuuagä, bin ꞌdacä nꞌda ra tꞌɛni gue ra za, nɛ bi tꞌɛ̨ngui: “Ní mba bʉ ja ra dąniją nɛ gui ꞌyɛni hangu na ndoho ra ngu. Nɛpʉ ja ra mɛxa i pøx yʉn tꞌunni yʉ jąꞌi.” Nɛ bi siqui ga pede hangu na ngu yʉ jąꞌi i thąnde Oją bʉ. 2 Pɛ bi sicä: “O guí ɛni hangu na ndoho ra häi ma mbäꞌtꞌi bʉ thi ja ra dąniją, nguetho bin tꞌunꞌdʉ yʉ jąꞌi ꞌdahma ꞌdanꞌyo bʉ na yą, gueꞌʉ hingui pą Oją. Nɛ yote ma yozna din ꞌyo bʉ nɛ di ʉnꞌna rá hogahnini Oją.” 3 Nɛ bi ꞌyɛ̨ngui: “Ga pɛnhdä bʉ yoho ma pøngahyą, nɛ da hye yʉ he tenguꞌbʉ i tu yʉ́ mbʉi. Nɛ nꞌda mahuąhi yo ciɛnto nɛ hyąte pa da manꞌa mam hmangä bʉ ʉ,” ɛ̨n Oją. 4 Nɛ nuꞌʉ yoho yʉ́ pøngahyą Oją, gueꞌʉ mí uꞌʉ yoho yʉ za ngue yʉ olivo, nɛꞌʉ yoho bʉ tøh yʉ lámpara gue i ꞌbäpʉ ja rá hmi ra Hmu mahɛ̨tsꞌi, gueꞌa di manda gätho ra ximhäi. 5 Nɛ toꞌo im bɛ̨ni di ʉnba ʉ yoho yʉn ꞌyohʉ gue yʉ́ pøngahyą Oją, da bøn ra sibi bʉ yʉ́ nde ngueꞌa í zøꞌʉ. Nɛ gueꞌa dí duꞌʉ gätho yʉ́n sʉihʉ ʉ yoho yʉ́ pøngahyą Oją. 6 Nɛ nuꞌʉ yoho yʉ pøngahyą, din ja yʉ́ tsꞌɛdi ngue di japi hin din ꞌye gätho yʉ pa gue dim pøngahyą bʉ. Nɛ din ja rá tsꞌɛdi gue gätho yʉ dehe di japi ngue din ji. Nɛ din ja yʉ́ tsꞌɛdi høntꞌa go ꞌbɛꞌa man ʉnbi di ʉnba ra ximhäi, høntꞌa go ní pa i nde. 7 Nɛ nuꞌbʉ mi guaꞌa rá ꞌbɛfi Oją ʉ, ꞌbex bi bøm bʉ ja ra hyąhäi ɛ̨mmɛ xʉn hɛ̨ tengu nꞌda ran dątezate, rám ꞌbɛhni ra zįthu ɛ̨mmɛ ntsꞌutho. Nɛ bi mba bʉ, bi zʉꞌʉ yoho yʉ́ pøngahyą Oją, nɛ bi dąha bi hyo ʉ. 8 Nɛ nuꞌʉ yʉ́ ngøcꞌyɛi ʉ yoho bi du, mi ꞌbɛm bʉ ja ra calle made ra dąhnini, gue nꞌdatꞌa ra hnini guepʉ bi du ra Hmu mahɛ̨tsꞌi bʉ ja ra pontꞌi. Nɛ nuꞌa ran tsꞌo bin ja bʉ ja ra dąhnini ꞌdaꞌangu nan tsꞌoui bin ja bʉ ja ra hnini Sodoma, nɛpʉ ja ra häi Egipto. 9 Nɛ nhyupa made bi mba yʉ jąꞌi gätho ꞌdahma ꞌdanꞌyo bʉ na yą gue bi nɛxpʉ gätho yʉ häi, bi hyɛ̨tꞌʉ ꞌbom bʉ xí du. Nɛ him bi japi bi mba ntꞌägui. 10 Nɛ gätho yʉ jąꞌi i ꞌbʉcua ja ra ximhäi bin johya ꞌbʉ mi du ʉ, nɛ nangue ran johya, bi un yʉn tꞌunni nꞌda ngu nꞌda, nɛ bi hyu yʉ́ mbʉi ngue hin di paha mahønꞌa ʉ yʉ́ pøngahyą Oją, nguetho bi nu ran ʉnbi nangue ꞌbɛꞌa bi ꞌyørpa ʉ. 11 Pɛ nuꞌbʉ mi tho a nhyupa made mi ꞌbom bʉ, pɛ Oją bi un ra xɛhyą mahønꞌa, nɛ ꞌbex bi ndantsꞌʉ, nɛ gätho toꞌo bi nu, ɛ̨mmɛ bin su ʉ. 12 ꞌBex bá ɛ̨ꞌa nꞌda ra nde mahɛ̨tsꞌi ntsꞌɛdi bin yą, bi ꞌyɛ̨mpꞌʉ: “Ba ɛ̨cua ya,” bi ꞌyɛ̨na. Nɛ bi ndex mahɛ̨tsꞌi ʉ, in ꞌyohʉ nꞌda ra güi. Nɛ gätho yʉ́n sʉihʉ mi ꞌbäpʉ bi nu ꞌbɛꞌa bin ja. 13 Nɛ nuꞌbʉ mi mba ʉ yʉ́ pøngahyą Oją, ꞌbex bi ꞌyąn ra häi bʉ ja ra dąhnini, ɛ̨mmɛ ntsꞌutho. Nɛ ná ꞌdɛtꞌa ra xɛqui ra hnini bin tsꞌoni, yoto mahuąhi yʉ jąꞌi bi du nangue ntsꞌɛdi ra ꞌyąnhäi. Nɛ nuꞌʉ yʉ jąꞌi gue him bi du, ɛ̨mmɛ bin su, nɛ bi ꞌyɛ̨spa Oją mahɛ̨tsꞌi bʉya. 14 Nuya ná yoho yʉn ʉnbi bi thogui, nɛ ꞌbex ba ɛ̨ꞌa ná hyu ran ʉnbi.Ná yoto ra thʉxi
15 Nɛ nuꞌbʉ mi huixtꞌ rá thʉxi a ná yoto ram ꞌbɛhni mahɛ̨tsꞌi gue mi ꞌbäpʉ, ꞌbexque ntꞌøde bʉ mahɛ̨tsꞌi xʉn ngu yʉ nde ntsꞌɛdi bin yą, bi ꞌyɛ̨na:
Nuya gätho ra ximhäi bi dą Oją ma Hmuhʉ,
nɛꞌa ra Cristo bi huahni,
nɛ høntꞌʉ di manda bʉ hønꞌbʉ go njąmꞌbʉ maząi, bi ꞌyɛ̨nꞌʉ yʉ nde i yą mahɛ̨tsꞌi.
16 Nɛ nuꞌʉ ꞌdäte magoho yʉ dącꞌyɛi ngue mi hupʉ ja yʉ́n thutsꞌi di mbäꞌtꞌa Oją bʉ mi hudi, bin dąnyahmu nɛ bi dąnde Oją. 17 Nɛ bi ꞌyɛ̨m ꞌbʉ mi dąnde:
Nuꞌi ma Oją ahe nte guí hɛ̨mbi,
Nuꞌi ząi guí ꞌbʉi, nɛ ząi gmi ꞌbʉi,
nuya gá dʉꞌmi gá ꞌbɛrpa yʉ́ tsꞌɛdi gätho miꞌda,
nɛ da zä gui manda xʉn ho ꞌbɛꞌa gätho i ja.
Dí xi ahe jamadi, ngue ya gá ꞌyuh ni tsꞌɛdi tąte thoho.
18 Nuꞌʉ yʉ jąꞌi i ꞌbʉpʉ hønbʉ go hapʉ i ja yʉ häi ɛ̨mmɛ bin cuɛ
ngue ya bi zøn ra ora da nu ran ʉnbi.
Nuya bi zøn ra ora da nu nin juąnbi, nɛ gätho ʉ xʉn du.
Bi zøn ra ora gue gui unꞌdʉ ya ꞌbɛꞌa bi dąꞌʉ ni ꞌyɛ̨hɛ nɛ ni pøngahyą.
Nɛ bi zøn ra ora gue gui unꞌdʉ yʉn tꞌunni gätho bi ꞌyɛ̨cꞌyɛi,
høntꞌa go toꞌo i ja yʉ́ tsꞌɛdi, nɛꞌʉ hinꞌyʉ yʉ́ tsꞌɛdi.
Nɛ bi zøn ra ora, gue gui juaꞌʉ gätho toꞌo di ʉnba yʉ́ mijąꞌihʉ, bi ꞌyɛ̨nꞌʉ.
19 Nɛ nuꞌbʉ mi guaꞌa bi manꞌʉ yʉ dącꞌyɛ̨i, dra Xuuagä dá nugä nsoqui ra dąniją mahɛ̨tsꞌi. Nɛ dá nugä ra huada i høpʉ mbo, guepʉ mꞌbɛꞌtsꞌi ran hoqui bi ꞌyøtꞌui Oją ʉ yʉ́ ꞌyɛ̨cꞌyɛi. Nɛ bin ja ntsꞌɛdi ra huɛi, nɛ bin thoni, nɛ yʉn gäni, nɛ bin ja nꞌda ra ꞌyąmhäi, nɛ bi hyøh yʉn do.