Ra xisu nɛ ra jąrga
12
Nɛ dá hantꞌa nꞌda ran tꞌuti xʉn ndoho bʉ magątsꞌi, ngue nꞌda ra xisu mi he ra hyadi ngue rá pahni, nɛ mi tøpʉ ja ra ząna. Nɛ mi huꞌtsꞌa nꞌda ra corona gue min ꞌyoui ꞌdɛꞌmayoho yʉ sø. 2 Nɛ nuꞌa ra xisu mi hątꞌʉhni a, nɛ ɛ̨mmɛ mi mbafi ngue xʉn ʉ, ngue nde dim ꞌbʉh rá tꞌʉhni. 3 Nɛ bi nɛqui bʉ manꞌda ran tꞌuti tengu nꞌda ra jąrga xʉn ndoho nɛ xʉn thɛni, ɛ̨mmɛ ntsꞌutho. Nɛ nuꞌa ra jąrga mi ja yoto yʉ́ yą, nɛ nꞌda ngu nꞌda yʉ́ yą mi huꞌtsꞌ yʉ corona. Nɛ mi ja ꞌdɛtꞌa yʉ́ dąni. 4 Nɛ nuꞌbʉ mi uąnꞌna rá ꞌyozʉ, bi hyøm bʉ häi ná hyu nɛtsꞌi yʉ sø mi ja bʉ mahɛ̨tsꞌi. Nɛ nu ra jąrga ꞌdarbʉ mi ꞌbähmi ra xisu, i nde da zapꞌa rá tꞌʉhni ꞌbʉ bim ꞌbʉi. 5 Nɛ bim ꞌbʉꞌa nꞌda ra tsꞌʉntꞌʉ, rá tꞌʉhni ra xisu bʉya. Nɛ guehna ra tsꞌʉntꞌʉ din tsꞌʉtꞌabi gätho yʉ häi, nɛ njon di japi da mbɛstaꞌa da ma. Pɛ nuꞌbʉ mim ꞌbʉi, bi jamansu Oją, nɛ ꞌbex bi zixpʉ mahɛ̨tsꞌi bí ja rá tsꞌɛdi. 6 Pɛ nu ra xisu bi ꞌdagui, bi mba bʉ maꞌueni guepʉ bi hocua Oją dim ꞌbʉi nꞌda mahuąhi nɛ yociɛnto nɛ hyąte pa. Nɛ din ja bʉ ꞌbɛꞌa gätho da hyoni. 7 Nɛ nu bʉ mahɛ̨tsꞌi bin ja nꞌda ra dąsʉi, nuꞌa rá ngʉrba mꞌbɛhni Oją mahɛ̨tsꞌi ngue ra Miguel nɛ gätho ʉ miꞌda yʉ́m ꞌbɛhni Oją mahɛ̨tsꞌi, bin sʉhmbʉ a ra jąrga nɛꞌʉ gätho yʉ́ ꞌyɛ̨hɛ a ra jąrga. 8 Pɛ nuꞌa ra jąrga him bi dąha, nɛ Oją him bi japi dim ꞌbʉpʉ mahɛ̨tsꞌi bʉya. 9 Nɛ bi thønꞌa thi bʉ mahɛ̨tsꞌi a ra jąrga, guetꞌa ra cꞌɛ̨yą, ra zįthu a, rá thuhu ra Satanás, gue i häte gätho ua ja ra ximhäi gueꞌbʉ rá mbʉdi thoho. 10 Nɛ nubʉya nugä dra Xuuagä dá øcä nꞌda ra nde mahɛ̨tsꞌi ntsꞌɛdi bin yą bi ꞌyɛ̨na: “Ya bi zøn ra pa da yąnꞌʉ yʉ ꞌyɛ̨cꞌyɛi, nɛ da nu a rá tsꞌɛdi Oją, di manda rá tsꞌɛdi Oją ʉ, nɛ a ra Cristo. Nguetho ya bi thønꞌa thi bʉ mahɛ̨tsꞌi ra zįthu ngue nząi madi yąpꞌʉ ma cuhʉ bʉ ja rá hmi Oją ma pa nɛ ra xui. 11 Pɛ gueꞌa rá ji ra Jesús, tenguꞌbʉ ra Dɛꞌyo, ní dąpꞌa ra zįthu ʉ yʉ ꞌyɛ̨cꞌyɛi, nɛꞌbʉ i ma ngue ɛ̨cꞌyɛi ra Jesús, nɛꞌbʉ hingui su da du. 12 Janangueꞌa dan johyahʉ gätho dí ꞌbʉhmbʉ mahɛ̨tsꞌi. Pɛ ndumbʉi thoho ahʉ gue guí ꞌbʉhmbʉ bʉ ja ra häi, nɛpʉ ja ra deją, nguetho bi zøm bʉ ja ra ximhäi ra zįthu, nɛ ɛ̨mmɛ in cuɛ. I pądi him mayaꞌa yʉ pa din ja rá tsꞌɛdi bʉ,” bi ꞌyɛ̨nꞌa ra nde dá øcä bin yą bʉ mahɛ̨tsꞌi. 13 Nɛ nuꞌbʉ mi nu ra jąrga zįthu ngue bá tꞌɛntꞌua häi, bi guꞌa ra xisu gue bim ꞌbʉh rá tsꞌʉntꞌʉ. 14 Pɛ nuꞌa ra xisu bi mba ntꞌunni yoho yʉ zahua tengu nꞌda ra pɛntsꞌʉ xʉn ndoho, nɛ bi zägui bi mba maꞌueni guepʉ him bi zä bi bɛntꞌa ra jąrga. Nɛ bi mba ma jamansu bʉ hyu jɛya made. 15 Nu ra jąrga bʉya bi bøn ra dehe rá nde, tenguꞌbʉ nꞌda ra dąthe xʉn ndoho, ɛ̨na xtán duxꞌa ra xisu ra dehe. 16 Pɛ Oją bi xocꞌa nꞌda ra hyąhäi guepʉ bi yʉꞌa ra dehe bi bøm bʉ rá nde ra jąrga. 17 Pɛ nu ra jąrga bʉya ɛ̨mmɛ bi dɛ ra cuɛ nangueꞌa ra xisu, nɛ bi mba bi zʉꞌʉ gätho miꞌda ngue rá ꞌyʉꞌa ra xisu, gätho ʉ gue bi ꞌyøtꞌa bi man Oją nɛ bi dɛnꞌdʉ ꞌbɛꞌa bi manꞌa ra Jesús.