Ran tꞌuti bi bøxpʉ ja ra deją, nɛ ran tꞌuti bi bøxpʉ ja ra häi
13
Nɛ bi mba bim ꞌbäpʉ ja ndenthe a ra jąrga zįthu. Nɛ nugä dra Xuuagä dá nu manꞌda tengu nꞌda ra zate, bi bøxpʉ ja ra dądeją. Nɛ nuna ra zate mi ja yoto yʉ́ yą, nɛ ꞌdɛtꞌa yʉ́ dąni, guepʉ mi ja ꞌdɛtꞌa yʉ corona. Nɛ mán tꞌoꞌtꞌi bʉ yʉ́ yą yʉ́ thuhu zɛhɛ a ra zate ɛ̨mbi guesɛ Oją, nɛ bi ma mantsꞌo nangue Oją. 2 Nɛ nuna ra zate dá nu, gue bi bøxpʉ ja ra deją, tengu nꞌda ram hmasni, pɛ nu yʉ́ gua tengu yʉ́ gua yʉ oso, nɛ nu ʉ yʉ́ nde, tengu yʉ́ nde yʉ león. Nɛ nuꞌa ra jąrga bi un zɛhɛ rá tsꞌɛdi ná yoho ra zate gue xí bøxpʉ ja ra deją. Nɛ bi un ran tꞌɛ̨di di manda bʉ hapʉ i ja rá tsꞌɛdi ra jąrga zįthu, ɛ̨mmɛ xʉn ngu ra tsꞌɛdi mi ja a. 3 Nuꞌa nꞌda rá yą mi ja bʉ nꞌda ra sɛni ngue mí ɛ̨mbi dí du a, pɛ bi zä. Nɛ gätho yʉ jąꞌi mi ꞌbʉcua ja ra ximhäi, bi dɛnni, nɛ bi hyonya thoho nangue rá tsꞌɛdi mi ja. 4 Nɛ nu ʉ yʉ jąꞌi bi dąnde ra jąrga, nguetho ya xi un rá tsꞌɛdi ra zate xi bøxpʉ ja ra deją. Nɛ bi dąnde ra zate, nɛ bi ꞌyɛ̨na: “Njoꞌo manꞌda tengu na, nɛ njoꞌo toꞌo da zä din sʉhmi na.” 5 Nɛ bin tꞌun rán tꞌɛ̨di ra zate xí bøxpʉ ja ra deją, da man ra tsꞌore xʉn tsꞌo nangue Oją. Nɛ bin tꞌun ran tꞌɛ̨di din ja rá tsꞌɛdi yote ma yozna. 6 Nɛ nuꞌbʉ mí nyą, ɛ̨mmɛ xʉn tsꞌo bi ma nangue Oją. Bi ndøm mántsꞌo rá thuhu Oją, nɛpʉ bí ꞌbʉi, nɛ gätho ʉ i ꞌbʉpʉ mahɛ̨tsꞌi. 7 Nɛ bin tꞌun ran tꞌɛ̨di ngue din sʉhmbʉ yʉ́ tꞌʉhni Oją ngue di japi di ꞌbɛꞌʉ. Nɛ bin tꞌun ra tsꞌɛdi ngue di manda gätho ná ngu yʉ jąꞌi ꞌbʉcua ja ra ximhäi, gätho yʉ häi, nɛ gätho ꞌdahma ꞌdanꞌyo bʉ na yą yʉ jąꞌi, gätho yʉ hnini. 8 Nɛ gätho yʉ jąꞌi bi dąnde a. Pɛ him bi dąnde ʉ xmán tꞌoꞌtꞌi yʉ́ thuhu bʉ ja rá søcuą ra Jesús gue bi ꞌyoꞌtꞌa ra Tꞌʉdɛꞌyo gueꞌa bi tho. Nɛ ya mán tꞌoꞌtꞌi bʉ ʉ yʉ́ thuhu ʉ ꞌbʉ má hinꞌyʉ ra ximhäi, im ma toꞌo i ja ra temaząi. 9 Nuꞌʉ toꞌo i ja yʉ́ zagu, dami ꞌyøhmbʉ xʉn ho ya. 10 Nuꞌa toꞌo di un ran ʉnbi yʉ jąꞌi gue da gotꞌ ra fädi, nɛsɛ a da nu ran ʉnbi ngue da mba njotꞌi. Nɛ toꞌo din hote ngue di sɛnte, nɛsɛ a da nu ran dąte ngue da tsꞌɛni. Janangueꞌa toꞌo gätho ʉ yʉ́ tꞌʉhni Oją, jatho høntꞌa da bɛ̨ni gue yʉ́ yąnte Oją, nɛ hin din xømbʉi. 11 Nɛ nubʉya dá nu manꞌda ran tꞌuti gue bi bøxpʉ ja ra häi, nɛ mi ja yoho yʉ́ tꞌʉdąni tengu nꞌda ra tꞌʉdɛꞌyo. Pɛ nuꞌbʉ mín yą ɛ̨mmɛ ntsꞌutho tengutho ra jąrga zįthu. 12 Nɛ nuꞌa ran tꞌuti xí bøxpʉ ja ra häi bin ja rá tsꞌɛdi tengu ra zate ngue xí bøxpʉ ja ra dądeją ngue mi ja nꞌda ra sɛni a nꞌda rá yą gue xí zä. Nɛ bi japi gätho i ꞌbʉcua ja ra häi da dąnde ra mbʉdi ra zate. 13 Nɛ nuꞌa ran tꞌuti gue bi bøxpʉ ja ra häi, bi ꞌyøtꞌ yʉn tꞌuti ntsꞌutho, bi japi bá cąh mahɛ̨tsꞌi ra sibi ngue da nu yʉ jąꞌi. 14 Nɛ bi hyätꞌ yʉ jąꞌi gätho ꞌbʉcua ja ra ximhäi ꞌbʉ mi ꞌyøtꞌ yʉ hyonya ntꞌøtꞌe. Nɛ hønꞌbʉ i ꞌbäpʉ ja rá hmi ra zate xí bøxpʉ ja ra deją, bi zä bi ꞌyøtꞌʉ. Nɛ bi xih yʉ jąꞌi da ꞌyøtꞌa nꞌda ra nyoguido tengu ra zate xí bøxpʉ ja ra deją, gue mí ja ra sɛni bʉ ja nꞌda rá yą, ngue xí zä. 15 Nɛ nuꞌa ran tꞌuti gue bi bøxpʉ ja ra häi, bin tꞌun ran tꞌɛ̨di di japi dim ꞌbʉ a ra nyoguido ntꞌøtꞌe tengu ra zate bi bøxpʉ ja ra deją. Nɛ di japi din yą. Nɛ bi japi da mba ntho gätho toꞌo him bi dąnde a. 16 Nɛ bi manda ngue gätho yʉ jąꞌi din ja rá hmɛpya ra nyoguido bʉ ja rá dɛ̨ nɛpʉ ja rán ꞌyɛi, madagueꞌa høntꞌa go má jąꞌi, gätho i ja yʉ́ tsꞌɛdi nɛꞌʉ hinꞌyʉ yʉ́ tsꞌɛdi, gätho yʉ mɛmbɛti nɛ gätho yʉ hyoya, gätho yʉ ꞌyɛ̨hɛ nɛ gätho ngue hing yʉ ꞌyɛ̨hɛ, gätho yʉ jąꞌi jatho din ja ra hmɛpya. 17 Nɛ hingui sä nꞌda ra jąꞌi dim pä o gue din täi ꞌbʉ hin di nɛqui rá hmɛpya ra zate xí bøxpʉ ja ra deją, nu bʉ ja rá jąꞌi. Gätho jatho din ja ra hmɛpya ngue nam bøni rá thuhu, o rá número, rá hmɛpya rá thuhu ra zate. 18 Jatho gan ꞌyomfɛ̨nihʉ xʉn ho ngue gui pąhmbʉ ꞌbɛꞌa nam bønꞌa rá número ra zate, nguetho nu rá número, ꞌdato ciɛnto nɛ hyąte ma ꞌdato, rá número nꞌda ra jąꞌi.