Bin tuhu ʉ bim pøhø
14
Nɛ nubʉya dá nugä ra Jesús ra Tꞌʉdɛꞌyo i ꞌbäpʉ ja ra nyuni tꞌɛ̨mbi Sión. Nɛ mi ꞌbähmbʉ ra Jesús nꞌda ciɛnto nɛ yote ma goho mahuąhi yʉ jąꞌi ngue gätho i ja bʉ ja yʉ́ dɛ rá thuhu ra Jesús nɛ rá thuhu rá Ta. 2 Nɛ dá øcä nꞌda ra nde bʉ mahɛ̨tsꞌi ntꞌøde tengu yʉ dehe xʉn ngu ɛ̨mmɛ di hį nɛ tengu ran gäni ntsꞌɛdi di thoni. Nɛ dá øcä tenguꞌbʉ yʉ arpaꞌbida xʉn ngu i pɛi. 3 Nɛ nuꞌʉ nꞌda ciɛnto nɛ yote ma goho mahuąhi bi yąn Oją bʉ ja ra ximhäi, nɛ bin tupʉ nꞌda ra thuhu maꞌdaꞌyo bʉ ja rá hmi Oją gueꞌa i huxpʉ ja rán thutsꞌi, nɛ guepʉ ꞌbäh yʉn tꞌuti i ꞌbʉi, nɛ yʉ dącꞌyɛi. Nɛ njoꞌo miꞌda bi zä bi bą a ra thuhu. 4 Nɛ nuꞌʉ, gätho xʉn hotho ʉ, gue høntꞌa Oją mbɛ̨ni. Nɛ i tɛnꞌna ra Dɛꞌyo hønbʉ go hapʉ da mba. Nɛ nuꞌʉ gue bi yąm bʉ ja ra ximhäi bʉ ꞌbʉh miꞌda yʉ jąꞌi, yʉn tꞌunni manꞌda xʉn ho bin tꞌun Oją nɛ ra Dɛꞌyo. 5 Nɛ xinga nꞌda ra fɛhni bi thįnba ʉ, xøgue xingui tsꞌʉ yʉ́ tsꞌoqui bʉ na nu Oją.Nuꞌa bi manꞌʉ hyu yʉ́m ꞌbɛhni Oją mahɛ̨tsꞌi
6 Nɛ nubʉya dá nugä manꞌda ram ꞌbɛhni mahɛ̨tsꞌi mi ꞌyo inde bʉ mahɛ̨tsꞌi, nɛ i cą ra søcuą ntꞌoꞌtꞌi bʉ ran ho maꞌdaꞌyo hin njąmꞌbʉ da guadi nɛ da mba gätho nangʉni ra ximhäi. Da mba bʉ gätho yʉ häi nɛ nu yʉ jąꞌi ꞌdahma ꞌdanꞌyo bʉ na yą da ꞌyøde høntꞌa go toꞌo ní jąꞌi. 7 Nɛ nuꞌa ram ꞌbɛhni mahɛ̨tsꞌi ntsꞌɛdi bi ꞌyɛ̨na: “Dami numansuhʉ Oją nɛ gui ꞌyɛ̨spahʉ rá tsꞌɛdi nuįxte a, nguetho ya bi zøn ra ora da ꞌyøtꞌ rán juąnbi Oją. Dami thąndehʉ a ya, gueꞌa gue bi ꞌyøtꞌ mahɛ̨tsꞌi nɛ bi ꞌyøtꞌ ra ximhäi. Nɛ bi ꞌyøtꞌ yʉ deją nɛ bi ꞌyøtꞌ yʉ mbøthe,” bi ꞌyɛ̨na. 8 Nɛ nuꞌa manꞌda ram ꞌbɛhni mahɛ̨tsꞌi mahønꞌa bi dɛnꞌna rá mbʉdi mꞌbɛhni, nɛ bi ꞌyɛ̨na: “Ya bin theh rá tsꞌɛdi ra dąhnini Babilonia ngue ɛ̨mmɛ mi ja rá tsꞌɛdi. Nguetho nuꞌʉ yʉ jąꞌi mi ꞌbʉpʉ bi xąndi gätho ra ximhäi a ran ꞌyomtꞌɛ̨ni mí øzɛhɛ. Nɛ gätho ʉ bi ꞌyøtꞌ ran tsꞌo tengu nꞌda ra įti gue comꞌma rá sɛ̨i gätho miꞌda,” bi ꞌyɛ̨na. 9-10 Nɛ nuꞌa ná hyu ram ꞌbɛhni mahɛ̨tsꞌi bi dɛnꞌna ná yoho, nɛ ntsꞌɛdi bi ꞌyɛ̨na: “Toꞌo gue da dąnde ra zate gue bi bøxpʉ ja ra deją, nɛ ra nyoguido, ngue i ja rá hmɛpya bʉ ja rá dɛ̨ o guepʉ ja rá ꞌyɛ, da nu hangu nangu rá tsꞌɛdi rá cuɛ Oją. Nu Oją xíngui tsꞌʉ da ꞌyɛꞌtsꞌa ran ʉnbi di unꞌndʉ nangue rá cuɛ. Nɛ da nu a ra Jesús ra Dɛꞌyo nɛ yʉ́ hogam ꞌbɛhni mahɛ̨tsꞌi ꞌbʉ bin tꞌunꞌna, ngue ra sibi nꞌyoui ra dɛspi. 11 Nuꞌa ra ꞌbifi i pøm bʉ njąmꞌbʉ din hɛ̨ a høntꞌbʉ go njąmꞌbʉ maząi. Nɛ nuꞌʉ i ꞌbʉpʉ njąmꞌbʉ din hɛ̨ a ran ʉnbi i nu ʉ ma pa nɛ ra xui. Gueꞌʉ gätho bi dąnde ra zate xí bøxpʉ ja ra deją, nɛ ra nyoguido, gätho ʉ i ja bʉ ja rá jąꞌi rá hmɛpya nɛ rá thuhu ra zate. 12 Pɛ nu ahʉ gyʉ ꞌyɛ̨cꞌyɛihʉ pɛ ndeꞌbʉ manꞌda gui hyądumbʉihʉ gui thoc ni tꞌɛ̨cꞌyɛihʉ nɛ gui hyäthʉ yʉn ʉnbi. Nguetho yʉ́ tꞌʉhni Oją ʉ gätho di thoqui i øtꞌ yʉ́n tꞌɛ̨di nɛ di thoqui i ɛ̨cꞌyɛi ra Jesús,” bi ꞌyɛ̨nꞌa ná hyu rám ꞌbɛhni Oją mahɛ̨tsꞌi. 13 Nɛ nubʉya bi ꞌyɛ̨ngä manꞌda ra nde dá øcä mahɛ̨tsꞌi: “Dami ꞌyoꞌtꞌ ya ꞌbɛꞌa ga xi a i. Din johya thoho gätho ʉ xʉn du ꞌbʉ ya mí ɛ̨cꞌyɛi a ra Hmu Cristo mahɛ̨tsꞌi. Mająpi thoho, ɛ̨nꞌa rá Hogandąhi Oją, nguetho din säya a rá ꞌbɛfi mi øtꞌe. Nɛ nuꞌa ran ho mi øtꞌua ja ra ximhäi ʉ, nɛ nubʉ mahɛ̨tsꞌi da nu rá muui bʉ.”
Rán sofo ra ximhäi
14 Nɛ dá nu nꞌda ra güi xʉn tꞌaxi thoho nɛ mi hu inde bʉ ja ra güi a nꞌda tengu nꞌda ra jąꞌi. Nɛ mi huꞌtsꞌa nꞌda ra corona ra oro. Nɛ mi hą ra mbore thɛni ɛ̨mmɛ hɛtꞌi. 15 Nɛ bá pøm bʉ rá dąniją Oją mahɛ̨tsꞌi manꞌda rám ꞌbɛhni Oją, nɛ ntsꞌɛdi bi xi a mi hupʉ ja ra güi: “Dami ꞌyørpa yʉ jąꞌi bʉ häi tenguꞌbʉ da hyɛc yʉ uva xʉn yąxpʉ ja ra nuąndätꞌo. Nguetho ya bi zøn ra ora gue gui pɛꞌtsꞌʉ bin ja bʉ ni huąhi,” bi ꞌyɛ̨nꞌa rám ꞌbɛhni Oją. 16 Nɛ ꞌbex bi ꞌyøtꞌa mi hupʉ ja ra güi tengu xi sifi. 17 Nɛ manꞌda ram ꞌbɛhni bá pøm bʉ ja rá ngu Oją mahɛ̨tsꞌi nɛꞌa mi hą nꞌda ra mbore thɛni ɛ̨mmɛ i hɛtꞌi. 18 Nɛ xø bá pøm bʉ manꞌda rám ꞌbɛhni Oją bʉya guepʉ ja rá mɛxa yʉ́n tꞌunni Oją, nɛ nuꞌa di manda da dɛ ra sibi bʉ. Nɛ ntsꞌɛdi bi xi a ram ꞌbɛhni gue mi hą ra mbore thɛni: “Dami ꞌyøtꞌ ya tengu i øtꞌ yʉ jąꞌi ꞌbʉ i hɛc yʉ uva hingui ho nguetho bi zøn ra ora gue da nu ran ʉnbi ʉ nangue rán juąnbi Oją,” bi ꞌyɛ̨na. 19-20 Nɛ njabʉ bi ꞌyøtꞌ rám ꞌbɛhni Oją, tengutho ꞌbʉ di pɛt yʉ uva nɛ da ꞌyɛn bʉ ja ran thɛꞌmi da bøn rán gui bʉya. Nɛ tengutho ra jąꞌi i nɛꞌtꞌʉ yʉ uva da bøn yʉ́n gui, nɛ ngutho da ꞌyørpa ʉ to da zɛmbi, da nu rá cuɛ Oją ɛ̨mmɛ ntsꞌutho. Janangueꞌa ran tꞌuti ngue bi mbän rá ji. Nɛ bi ꞌyørpʉ ja ra ndehnini, nɛ ɛ̨mmɛ xʉn ngu ra ji bi mbäni, hyuciɛnto kilómetro nan jʉnni, nɛ nan hɛ̨ tengu ꞌbʉ da hyɛcpʉ ja yʉ́ nde yʉ fani a ra ji bi ꞌyugui.