Yoto yʉm ꞌbɛhni di manda yoto yʉn ʉnbi
15
Nɛ nugä dra Xuuagä dá nu manꞌda ran tꞌuti bʉ mahɛ̨tsꞌi, nɛ ɛ̨mmɛ dá hyonya thoho. Mi ꞌbähmbʉ bʉ yoto yʉ́m ꞌbɛhni Oją mahɛ̨tsꞌi, gue ʉ di manda yoto yʉn ʉnbi din ja ua ja ra ximhäi, nɛ nuꞌbʉ bi thoh yʉn ʉnbi, ya bi thoh rá cuɛ Oją bʉya. 2 Nɛ dá nu nꞌda ra xito di nɛqui tengu ra deją, rá cʉhʉ xʉn thɛni tengu ra sibi. Nɛ gätho mi ꞌbäpʉ ja ra xito, gueꞌʉ gue him bi dąnde ra zate xí bøxpʉ ja ra dehe, bi zɛdi, hím bi dąnde ra nyoguido ngue ra pøte a, nɛ xím bin japꞌa rá número o rá thuhu a. Nɛ nꞌda ngu nꞌda mi hą yʉ ꞌbida, ngue yʉ arpa xí unꞌna Oją ʉ. 3 Nɛ gätho mi ꞌbäpʉ bin tuh rá thuhu ra Moisés rá ꞌyɛ̨hɛ Oją, nɛ bin tuh rá thuhu ra Jesús ra Dɛꞌyo. Bi ꞌyɛ̨nꞌʉ:Nuꞌi ma Oją ahe, ma Hmu ahe, nuįxte thoho ni tsꞌɛdi, ɛ̨mmɛ xʉn ho i, nɛ ma hyonya thoho nin tꞌøtꞌe.
Majuąni nin tꞌøtꞌe xʉn hotho ʉ.
Nuꞌi grá hoga tsꞌʉtꞌabi maząi.
4 Xinga nꞌda dim ꞌbʉi gue hin da dąnde i,
gue hin da numansu ni thuhu, nuꞌi ma Hmu ahe.
Hønꞌa thoho i xʉn ho i, ma Oją ahe.
Gätho høntꞌa go ꞌbɛꞌa má nde da dąnde i,
nguetho gätho ya bi nu ngue xʉn ho ꞌbɛꞌa gätho guí øtꞌe, bi ꞌyɛ̨nꞌʉ.
5 Nɛ nubʉya dá nu nsoqui nꞌda ra jutꞌi i ja bʉ mbo rá dąniją Oją bʉ mahɛ̨tsꞌi, guepʉ mꞌbɛꞌtsꞌi yʉn tꞌɛ̨di bi ꞌyoꞌtꞌ ra Moisés. 6 Nɛ yoto yʉ́m ꞌbɛhni Oją ngue di manda yʉn ʉnbi bʉ ja ra häi bi bøm bʉ. Gätho i he yʉ́ pahni xʉn tꞌaxi ngue ra lino, nɛ gätho bi duꞌtꞌ yʉ́ tįya ra oro. 7 Nɛ nuꞌa nꞌda ran tꞌuti mí ꞌbäpʉ bi unꞌi yoto yʉ ximbo bi unꞌndʉ yʉ́m ꞌbɛhni Oją. Gätho ma yudi rá cuɛ Oją, nɛ nuꞌbʉ ꞌdah miꞌda da mbän ʉ mí po bʉ ja ra ximbo, gätho yʉ jąꞌi iꞌbʉcua ja ra ximhäi da nu rá cuɛ Oją, gue i ꞌbʉi maząi. 8 Nɛ gätho rá niją Oją bʉ mahɛ̨tsꞌi ma yudi rá tsꞌɛdi nɛ rá nuįxte Oją tengu ra ꞌbifi ꞌbʉ i yupʉ mbo ra ngu. Nɛ xinga nꞌda sä da yʉrpʉ asta gueꞌbʉ bi guaꞌa rá ꞌbɛfi ʉ yoto yʉm ꞌbɛhni gue di manda yoto yʉn ʉnbi ua ja ra ximhäi.