Yʉ ximbo i po yʉn ʉnbi ngue rá cuɛ Oją
16
Nɛ dá øcä nꞌda ra nde gue bi bøm bʉ ja rá dąniją Oją. Nɛ nuꞌa ra nde bi xi ʉ yʉm ꞌbɛhni: “Dami fämhbʉ bʉ ja ra ximhäi rán ʉnbi Oją ntsꞌutho i po ʉ yoto ni ximbohʉ,” bi ꞌyɛ̨na. 2 Nu rá mbʉdi ram ꞌbɛhni bi mbäm bʉ ja ra ximhäi rá cuɛ Oją mí po bʉ ja rá ximbo. Nɛ gätho yʉ jąꞌi gue bin ja rá hmɛpya a ra zate xí bøxpʉ ja ra dehe, nɛꞌa ra nyoguido ngue i thąnde ʉ, bi nu ran ʉ ngue yʉ sąsi xʉn tsꞌotho. 3 Nubʉya ná yoho ram ꞌbɛhni mahɛ̨tsꞌi bi mbän a rá cuɛ Oją mi po bʉ ja rá ximbo, bʉ ja ra dądeją. Nuꞌa ra dehe bʉya bin ja tengu rá ji nꞌda ra jąꞌi xʉn du. Nɛ gätho mi ꞌbʉpʉ mbo ra deją bi du. 4 Nɛ ná hyu ram ꞌbɛhni mahɛ̨tsꞌi bi mbänꞌa rá cuɛ Oją mi po bʉ ja rá ximbo hapʉ ja gätho yʉ dąthe nɛ gätho yʉ mbøthe. Gätho ra dehe mi po bʉ bin ji. 5 ꞌBex dá øcä rá nde rám ꞌbɛhni Oją gueꞌa bi ʉnba yʉ dehe bi ꞌyɛ̨na: “Nuꞌi ma hoga Hmu, ma Oją i, ząi guí ꞌbʉi nɛ gmí ꞌbʉi, xʉn hotho gätho nin juąnbi, nguetho rán säui ʉ gá ʉnbi. 6 Ya gá un ra ji da zi ʉ, nguetho bi hyo ʉ nim ꞌbɛhni bʉ häi nɛ ni pøngahyą. Nuya gá cospa ra pengui nangue ꞌbɛꞌa bi ꞌyøtꞌʉ,” bi ꞌyɛ̨na. 7 Nɛ dá øcä nꞌda ra nde bi bøm bʉ ja ra mɛxa guepʉ mí ja yʉ́n tꞌunni Oją, i ɛ̨na: “Ma Hmu i Oją nuįxte ni tsꞌɛdi xʉn ho, njuąntho a nin juąnbi, ngue rán säui ʉ,” bi ꞌyɛ̨na. 8 Nɛ nuꞌa ná goho rám ꞌbɛhni bi mbäm bʉ ja ra hyadi a rá cuɛ Oją mi po bʉ ja rá ximbo. Nɛ ɛ̨mmɛ bin ja rá tsꞌɛdi ra hyadi ngue bin zø ʉ mi ꞌbʉpʉ ja ra ximhäi nangue nam pa ra hyadi. 9 Nɛ nuꞌʉ gue bi nu ran ʉnbi nangue rá tsꞌɛdi ra hyadi, bi ndømantsꞌo rá thuhu Oją, gueꞌa bi manda yʉn ʉnbi, pɛ guextaꞌa him bi ꞌyɛ̨spa Oją, him bi päh yʉ́n ꞌyomfɛ̨ni ʉ. 10 Nuya ná cʉtꞌa ram ꞌbɛhni bi mbäm bʉ rá cuɛ Oją mi po bʉ ja rá ximbo, nɛ bi mbäm bʉ hapʉ i ja rá tsꞌɛdi ra zate xí bøxpʉ ja ra dehe. Nɛ nupʉ hapʉ ja rá tsꞌɛdi, gätho xʉm ꞌbɛxui thoho bʉ. Nɛ nuꞌʉ yʉ jąꞌi gue i ꞌbʉpʉ bi zasɛ yʉ́ jąni nangue ran ʉnbi bi nu. 11 Nɛ bi cꞌąmantsꞌotho Oją nangue yʉn ʉ, nɛ nangue yʉ sąsi mi ja. Pɛ guextaꞌa him bi ꞌyɛꞌtsꞌa ran tsꞌo mi øtꞌe, him bi päh yʉ́n ꞌyomfɛ̨ni. 12 Nɛ nuꞌa ná ꞌdato ram ꞌbɛhni bi mbäm bʉ rá cuɛ Oją mi po bʉ ja rá ximbo, bi mbäm bʉ ja ra dąthe xʉn ndoho tꞌɛ̨mbi Eufrates. Nɛ bi xä ra dehe nɛ ꞌbex bi ꞌyoꞌtꞌ ra dąthe ngue da zä da thopʉ yʉ tsꞌʉtꞌabi gue ní ꞌyɛ̨pʉ ní bøx ra hyadi. 13 Nɛ nugä dra Xuuagä, dá nu hyu yʉ tsꞌonthį di nɛqui tengu yʉ ꞌuɛ, ngue bi bøm bʉ ja rá nde ra jąrga zįthu, nɛpʉ ja rá nde ra zate xí bøxpʉ ja ra deją, nɛ bi bøm bʉ ja rá nde ran tꞌuti xí bøxpʉ ja ra häi, gue ra hyäte pøngahyą. 14 Nguetho nuꞌʉ, gueꞌʉ yʉ́ tsꞌonthį ra zįthu ʉ i ja yʉ́ tsꞌɛdi ngue da ꞌyøtꞌ yʉ hyonya ntꞌøtꞌe. Nɛ nuꞌʉ bi mba bʉ gätho ná ngʉni ra ximhäi, hønbʉ go hapʉ ꞌbʉh yʉ tsꞌʉtꞌabi, ngue bi japi di pɛt yʉ jąꞌi. Ngue din ja ra dąsʉi din sʉhmbʉ Oją. Nɛ nuꞌa ra pa din ja ra sʉi gätho da nu rá tsꞌɛdi Oją nuįxte. 15 Nɛ dá øcä rá nde ra Jesucristo ngue bi ꞌyɛ̨na: “Gui ꞌyøhmbʉ ya, nugä ba ɛ̨cä tengu nꞌda ra bɛ̨. Hinga mfądi njąmꞌbʉ ga søhø. Din johya thoho ʉ gue him bin ąhą pɛ bi jamansu yʉ he dá unni, janangueꞌa hin din ꞌyąhe nɛ hin din ꞌyąsä bʉya, ngue im bɛ̨ntho a ran hoqui dá ørpa ʉ, janangueꞌa hin di nɛqui yʉ́ tsꞌoqui, nɛ hin da mbɛꞌtsꞌ yʉ́ sä,” bi ꞌyɛ̨na. 16 Nɛ gätho bim pɛti bʉ yʉ tsꞌʉtꞌabi nɛ yʉ jąꞌi bʉ ja ra xɛqui tꞌɛ̨mbi Armagedón, ngue yʉ́ nde yʉ hebreo a. 17 Nuya ná yoto ram ꞌbɛhni bi mbäm bʉ rá cuɛ Oją mi po bʉ ja rá ximbo, bi huic ran dąhi ꞌbɛꞌa mi po bʉ. ꞌBex bi tꞌø a nꞌda ra nde bi bøm bʉ ja rá niją Oją mahɛ̨tsꞌi, guepʉ i hu inde Oją. Nɛ nuꞌa ra nde bi ꞌyɛ̨na: “Ya da guadi gätho man tsꞌɛmbi,” bi ꞌyɛ̨na. 18 Nɛ ꞌbex bi hyätꞌi ntsꞌɛdi yʉ huɛi, nɛ ntsꞌɛdi bin thoni yʉ ngäni. Nɛ bin ja nꞌda ra ꞌyąnhäi ntsꞌɛdi hin jąmꞌbʉ bi nu nꞌda ra jąꞌi tengu na, asta gueꞌbʉ go mim ꞌbʉ ʉ yʉ mbʉdi thoho yʉ jąꞌi. 19 Nu ra ꞌyąnhäi bi xɛnꞌa ra dąhnini Babilonia, hyu xɛqui bi bøni. Nɛ gätho miꞌda yʉ hnini hønbʉ go hapʉ mi ja bi guadi. Nɛ bi bɛ̨n Oją gue xʉn tsꞌotho mi øtꞌ yʉ jąꞌi ꞌbʉpʉ ja ra dąhnini Babilonia, nɛ ntsꞌɛdi bi ʉnba ʉ, nangue rá cuɛ ntsꞌɛdi a, asta gueꞌbʉ go min theh rá cuɛ Oją. 20 Nɛ gätho yʉ tꞌʉhäi i ja bʉ ja yʉ deją bim ꞌbɛdi. Nɛ gätho yʉ nyuni nɛ yʉ tꞌøhø bim ꞌbɛdi, hinꞌyʉ bʉya. 21 Nɛ ꞌbex bi däpʉ mahɛ̨tsꞌi yʉn do ɛ̨mmɛ ntsꞌutho nguetho yote kilo nán hyʉ nꞌda ran do, bi zʉ i ꞌda yʉ jąꞌi. Pɛ nu ʉ yʉ jąꞌi bi cꞌąmantsꞌo Oją nangue ran ʉnbi ntsꞌɛdi bi nu nangue yʉn do.