Ra ngʉrpa ꞌyomtꞌɛ̨ni xisu
17
Nɛ nuꞌa nꞌda ʉ yʉ́m ꞌbɛhni Oją mahɛ̨tsꞌi gueꞌa mí ja nꞌda ra ximbo, bi xicä: “Ba ɛ̨hɛ ga utꞌa i rán juąnbi Oją da nu ra ꞌyomtꞌɛ̨ni xisu i hupʉ ja yʉ dehe ꞌdahma ꞌdanꞌyo bʉ gätho ra ximhäi. 2 Nuꞌʉ yʉ tsꞌʉtꞌabi bʉ ja ra ximhäi bi ꞌyøthʉ ran tsꞌo a ra ꞌyomtꞌɛ̨ni xisu. Nɛ yʉ jąꞌi ꞌbʉcua ja ra ximhäi bi xänba bʉ gue da ꞌyøtꞌ ran tsꞌo guepʉ ꞌbʉ a ra ꞌyomtꞌɛ̨ni xisu. Gätho mi øtꞌ ran tsꞌo tenguꞌbʉ įti thoho,” bi ꞌyɛ̨m ꞌbʉ mi xiqui. 3 Nɛ nubʉya nu rám ꞌbɛhni Oją bi zixcä bʉ ja nꞌda ra huɛnhäi maꞌueni njon mi ꞌbʉpʉ. Nɛ nu rá Hogandąhi Oją bi jaqui gue dá handi, nɛ dá nugä a ra xisu i huxꞌa nꞌda ra zate xʉn thɛni. Nu ra zate mi ja yoto yʉ́ yą nɛ ꞌdɛtꞌa yʉ́ dąni, nɛ ntꞌoꞌtꞌi bʉ ja rá jąꞌi ɛ̨na jasɛ rá tsꞌɛdi, gue rá thuhu ɛ̨na guesɛ Oją. 4 Nu ra xisu mi he nꞌda ra hocꞌbøꞌtꞌe xʉn jʉpoi nɛ xʉn thɛni. Nɛ ɛ̨mmɛ madín ꞌyøtꞌe xʉn ho nangue yʉ thebe nɛ yʉm foꞌyɛ ra oro nɛ yʉ tsꞌʉngu ɛ̨mmɛ xʉm hmadi thoho, nɛ høntꞌa go mi cuat rá pahni. Nɛ mi thɛ nꞌda ra tasa ra oro. Pɛ gätho ꞌbɛꞌa mi po ra tasa ra hmɛpya nangue gätho yʉn tsꞌo mi øtꞌ ra xisu. 5 Nɛ nubʉ ja rá dɛ̨ ntꞌoꞌtꞌi bʉ rá thuhu: “Ra dąhnini Babilonia, ngue ja rá tsꞌɛdi tenguꞌbʉ rá mbe gätho yʉ ꞌyomtꞌɛ̨ni nɛ tenguꞌbʉ rá mbe gätho i øtꞌ ran tsꞌo hønbʉ go hapʉ i ja ra ximhäi,” bi ꞌyɛ̨nꞌa ra tꞌohni. Pɛ hin da bąsɛ nꞌda ꞌbɛꞌa ním bønꞌa. 6 Nɛ dá hantꞌa ra xisu, tengu ꞌbʉ įti thoho nangue yʉ́ ji ʉ gätho bi hyo ꞌbʉ mi dɛn Oją nɛꞌbʉ mi mampꞌa rám hman ra Jesús. Nɛ nugä drá Xuuagä, dadí hyonya thoho ꞌbʉ má nugä a nꞌda ran tꞌuti. 7 Nɛ nu rám ꞌbɛhni Oją mahɛ̨tsꞌi bi xiqui: “O gadí hyonya thoho, nguetho ga xi a ya ꞌbɛꞌa ni hmɛpya a ra xisu, nɛ ꞌbɛꞌa ni hmɛpya a ra zate i huxꞌa ra xisu, gue i ja yoto yʉ́ yą nɛ i ja ꞌdɛtꞌa yʉ́ dąni. 8 Nuꞌa ran tꞌuti ngue ra zate gá nu, pɛ gueꞌa nꞌda mi ꞌbʉi, nɛ hingui ꞌbʉh ya, pɛ him ma yaꞌa ba ɛ̨hɛ mahønꞌa, da bøm bʉ ja ra hyąhäi ɛ̨mmɛ xʉn hɛ̨. Nɛ mꞌbɛjua da nu ran dąte xʉn ho hin dim ꞌbʉh mahønꞌa. Nɛ gätho yʉ jąꞌi ngue hinga ntꞌoꞌtꞌi yʉ́ thuhu bʉ ja ra søcuą mahɛ̨tsꞌi, gue bi tꞌorpʉ ꞌbʉ ma hinꞌyʉ ra ximhäi, di hyonya thoho ꞌbʉ bi nu mahønꞌa tengu bʉ í hnu ra zate. Nguetho mi ꞌbʉi, nɛ njoꞌo ya, pɛ dim ꞌbʉi mahønꞌa. 9 Nuꞌʉ toꞌo i ja yʉ́n ꞌyomfɛ̨ni xʉn ho, sä da bądi ꞌbɛꞌa nim bøn a ra hmɛpya. Nu yoto yʉ́ yą ra zate ra hmɛpya ngue ʉ yoto yʉ nyuni guepʉ i hu a ra xisu. 10 Nɛ ra hmɛpya gueꞌʉ yoto yʉ tsꞌʉtꞌabi, ngue yʉ tsꞌomꞌbäi thoho. Bi du ʉ cʉtꞌa nɛ nu ná ꞌdato i ꞌbʉpʉ ya, nɛ ná yoto dim ꞌbʉi, pɛ hingan yaꞌa din tsꞌʉtꞌabi. 11 Nɛ nuꞌa nꞌda, ná hyąto ra tsꞌʉtꞌabi bʉya, gueꞌa gue mi ꞌbʉi, pɛ njoꞌo ya. Nuꞌbʉ bá ɛ̨h mahønꞌa, di manda tengu ʉ yoto yʉ tsꞌomꞌbäi tsꞌʉtꞌabi, pɛ mꞌbɛjua da mba da nu ran ʉnbi maząi. 12 Nɛ nuꞌʉ yʉ́ dąni ra zate gá nu, yʉ hmɛpya ngue ꞌdɛtꞌa yʉ tsꞌʉtꞌabi din ja yʉ́ tsꞌɛdi ꞌda yʉ tꞌʉ ora tho nɛ da gomhbʉ rá tsꞌɛdi ra zate. 13 Nɛ gätho yʉ tsꞌʉtꞌabi ꞌdatꞌa da bɛ̨ni ngue di un ra tsꞌɛdi di manda ra zate. 14 Nɛ gätho yʉ tsꞌʉtꞌabi da zʉꞌa ra Jesús ra Dɛꞌyo. Pɛ nuꞌa ra Jesús da dąha, nguetho ra Hmu a nangue gätho miꞌda yʉ hmu, nɛ ra hmutsꞌʉtꞌabi nangue gätho miꞌda yʉ tsꞌʉtꞌabi. Nɛ nuꞌʉ gätho din ꞌyohʉ ra Jesús ꞌbʉ bi dąhą, gueꞌʉ bi zon Oją ʉ, nɛ bi huahni, nɛ him bi ꞌyɛꞌtsꞌa ní dɛnni,” bi ꞌyɛ̨nꞌa ram ꞌbɛhni. 15 Nɛ nu rám ꞌbɛhni Oją mahɛ̨tsꞌi xø bi xicä mahønꞌa dra Xuuagä: “Nu yʉ dehe gá nu guepʉ mi huh ra xisu, ra hmɛpya a nangue gätho miꞌda yʉ jąꞌi i ꞌbʉh nangʉni ra ximhäi, gätho yʉ häi gätho yʉ nde ꞌdahma ꞌdanꞌyo bʉ na yą. 16 Nɛ nu yʉ dąni gá nu, ngue yʉ́ hmɛpya yʉ tsꞌʉtꞌabi, nɛꞌa ra zate, mꞌbɛjua da zʉ a ra ꞌyomtꞌɛ̨ni xisu ʉ. Nɛ nuꞌʉ da hyącpi ꞌbɛꞌa gätho mi ja a ra xisu, nɛ da zap rá ngøcꞌyɛi a, nɛ da ꞌyuꞌma ra xisu nangue ra sibi. 17 Nguetho Oją bi bɛ̨nba yʉ tsꞌʉtꞌabi da ꞌyøtꞌe tengu mim bɛ̨n Oją, ngue nꞌda ngu nꞌda ʉ di un rá tsꞌɛdi ra zate di manda, asta gueꞌbʉ go bin ja ꞌbɛꞌa bi man Oją ngue din ja. 18 Nɛ nuꞌa ra xisu gá nu bʉ, rá hmɛpya ra dąhnini gueꞌa di manda yʉ tsꞌʉtꞌabi a, nangue gätho yʉ häi i ja ua ja ra ximhäi,” bi ꞌyɛ̨nꞌa ram ꞌbɛhni.