Bi ꞌbɛh rá tsꞌɛdi ra dąhnini Babilonia
18
Mꞌbɛjua dá nugä manꞌda ram ꞌbɛhni bá cąh mahɛ̨tsꞌi, nɛ ɛ̨mmɛ i ja rá tsꞌɛdi. Nɛ i ja rán nɛqui, bi hyät ra ximhäi ꞌbʉ mi gąi, tengu ra hyadi. 2 Nɛ ɛ̨mmɛ tsꞌɛdi bin yą, bi ꞌyɛ̨na: “Bi guahya, bi guahya rá tsꞌɛdi ra dąhnini Babilonia. Nɛ høntꞌʉ yʉ zįthu dim ꞌbʉpʉ, nɛ gätho yʉ tsꞌonthį. Nɛ i ꞌbʉpʉ høntꞌa go ꞌbɛꞌa mán tsꞌo, nɛ yʉ doja gue hingui ho øtꞌe, xʉn tsꞌotho. 3 Nguetho nu yʉ mɛngu bʉ bi xänba ran tsꞌo gätho yʉ jąꞌi mi søm bʉ gue i ꞌbʉh ná ngʉni ra ximhäi. Nɛ gätho yʉ tsꞌʉtꞌabi bi gomhbʉ ran tsꞌo ra hnini, ngue tenguꞌbʉ ra ꞌyomtꞌɛ̨ni xisu bʉ. Nɛ xʉn ngu yʉ jąꞌi ꞌda nꞌdanni yʉ́ häi, bim mɛmbɛti ꞌbʉ mí mbäpꞌʉ ꞌbɛꞌa gätho bi numanhosɛ yʉ mɛngu bʉ ja a ra hnini,” bi ꞌyɛ̨nꞌa ram ꞌbɛhni. 4 Nɛ dra Xuuagä dá øcä manꞌda ra nde bí ꞌyɛ̨h mahɛ̨tsꞌi, bi ꞌyɛ̨na: “Ba ɛ̨hɛ gätho yʉ jąꞌi ngue ma mbɛtigä, dami pøm bʉ ja ra dąhnini, gue hin gui cohma øtꞌehʉ ran tsꞌo i ja bʉ, nɛ hin guin nuhʉ ran ʉnbi gue da nu ʉ toꞌo da gopʉ. 5 Nguetho nuꞌbʉ sä da mba ma muntsꞌi yʉ́n tsꞌo i tꞌørpʉ, tenguꞌbʉ da zʉh nán hɛ̨tsꞌi ra ximhäi mahɛ̨tsꞌi. Nɛ nuꞌa Oją xíngui tsꞌʉ bi pumbɛ̨ni ran tsꞌo ꞌbɛꞌa bi tꞌørpʉ.” 6 Nɛ bi sih yʉ́m ꞌbɛhni Oją bʉya: “Nuya dami cospahʉ ra pengui tenguthoho bi ꞌyørpa miꞌda, dami cospahʉ ran ʉ gue gui yofʉ mahønꞌa. 7 Dami un ya ran ʉnbi nɛ ntsꞌɛdi ra dumbʉi ꞌbɛꞌa rán thɛui bi ꞌyøtꞌe. Nguetho bi bɛ̨ni maguesɛ, nɛ bi ꞌyøtꞌ yʉ tsꞌoqui bi numanhosɛ, nɛ xʉn ngu ꞌbɛꞌa gätho bi hyonsɛ. Tenguꞌbʉ nꞌda ra xisu da mansɛ mbo rá mbʉi, da ꞌyɛ̨na: “Nugä xʉn ngu ma tsꞌɛdigä, hingan tsꞌogui thohogä, nɛ njąmꞌbʉ din jagä ra dumbʉi,” ngubʉ bi ma. 8 Pɛ janangueꞌa da nu ran ʉnbi di und Oją, nɛ gätho ꞌbɛꞌa din ja, ꞌda huɛ̨tho án ja gätho yʉ ꞌyąnthį. Nɛ da nu ra gɛ̨hɛ nɛ ra dumbʉi, nɛ di juadi nangue ra sibi. Nguetho tąte thoho rá tsꞌɛdi Oją ra Hmu, gue di unꞌna rán thɛui bi ꞌyøtꞌe. 9 Nɛ nu yʉ́ tsꞌʉtꞌabi gätho yʉ häi gue ząi i comhbʉ ran tsꞌo, gätho din zoni nɛ dim mbafi ꞌbʉ i hand rá ꞌbifi ra dąhnini ngue i zø. 10 Nɛ gätho dim ꞌbämanhɛ̨ nguetho ɛ̨mmɛ i su da nu ran ʉnbi tengu in nu ʉ i ꞌbʉpʉ ja ra dąhnini. Nɛ da ma: “Huɛ̨cate, huɛ̨cate, nguetho mahotho ra dąhnini, nɛ ɛ̨mmɛ mi ja rá tsꞌɛdi, pɛ nꞌda huɛ̨tho gue bi tsꞌɛmbi,” da ꞌyɛ̨nꞌʉ. 11 Nɛ gätho yʉ mbä bʉ ja gätho ra ximhäi din zoni nɛ dim mbafi, nguetho njoꞌo da dämbi ꞌbɛꞌa da mbä. 12 Ngue yʉ oro, yʉ tꞌaxi, yʉn ꞌyøtꞌe, yʉ perla, nɛ ra ꞌbøꞌtꞌe ra lino xʉn ho, ra ꞌbøꞌtꞌe ra seda, ra ꞌbøꞌtꞌe xʉn tudi xʉn jʉpoi nɛ xʉn thɛni, nɛ gätho yʉ za gue mumanꞌu, nɛꞌʉ ntꞌøtꞌe yʉ doꞌyo, nɛ gätho ʉ yʉ za ntꞌøtꞌe ɛ̨mmɛ xʉm hmadi, nɛꞌʉ ntꞌøtꞌe ra bronce ngue ra thɛnga fɛxna tꞌɛgui, nɛꞌʉ ntꞌøtꞌe ra tꞌɛgui, nɛꞌʉ ntꞌøtꞌe ra ꞌyaxi. 13 Nɛ ząi mi ꞌbä bʉ yʉ canela, yʉ ꞌyɛ̨thi ngue in ꞌyohʉ yʉ tʉhʉ, ra tꞌʉza mumanꞌu, yʉ ꞌyɛ̨thi i yʉmanho, yʉ perfume, yʉ vino, yʉ aceite, ra hocjʉni, ra trigo, yʉn dąni, yʉ dɛꞌyo, yʉ fani, yʉ carro, nɛ yʉ ꞌyɛ̨hɛ mi ꞌbä bʉ, nguetho mi ꞌbäp yʉ́ te yʉ jąꞌi tenguꞌbʉ i ꞌbä yʉ fani. 14 Nɛ da ꞌyɛ̨nꞌʉ yʉ mbä: “Gätho gue xʉn ho gmi honi bin thegue. Nɛ gätho yʉ mbɛti nɛ gätho ꞌbɛꞌa mahotho ya bi mba. Him manꞌdandį guin nu mahønꞌa tengu mí ja bʉ,” da ꞌyɛ̨nꞌʉ. 15 Nɛ nuꞌʉ gue bim mɛmbɛti ngueꞌʉ mim pä bʉ ja ra dąhnini, dim ꞌbämanhɛ̨ tho, nguetho i su da nu ran ʉnbi, tengu in nuꞌʉ mi ꞌbʉpʉ. Nɛ ɛ̨mmɛ din zoni, i tu yʉ́ mbʉi, nguetho njoꞌo da däi ꞌbɛꞌa i ja da mbä. 16 Nɛ da ꞌyɛ̨na: “Dumbʉi thoho nangue ꞌbɛꞌa bin ja ra dąhnini, ɛ̨mmɛ mi ja bʉ mahotho, nɛ mi ja bʉ yʉ ꞌbøꞌtꞌe ra lino, nɛ yʉ ꞌbøꞌtꞌe xʉn jʉpoi, nɛ yʉ ꞌbøꞌtꞌe xʉn thɛni, nɛ madi nɛqui bʉ ꞌbɛꞌa mahotho gue yʉ oro nɛ yʉn ꞌyøtꞌe nɛ yʉ perla xʉm hmadi. 17 Nuya nte jabʉ ya, nꞌda oratho ám ꞌbɛdi gätho ɛ̨mmɛ xʉm hmadi mi ja bʉ,” da ꞌyɛ̨nꞌʉ mim pä bʉ. Nɛ gätho yʉ́ hmu yʉ barco nɛꞌʉ gätho i hu bʉ, nɛ gätho yʉ mbɛfi di ꞌyon yʉ barco, mi ꞌbämanhɛ̨tho. 18 Nɛ bi du yʉ́ mbʉi ꞌbʉ mi nu ra ꞌbifi i zø ra dąhnini, nɛ bi ꞌyɛ̨na: “Hinꞌyʉ manꞌda ra hnini mahotho tengu nʉ.” 19 Nɛ nuꞌʉ, bi ꞌyʉx yʉ́ yą yʉ fonthäi, ra hmɛpya gue tu yʉ́ mbʉi, nɛ bin zoni nɛ bi mbafi, ɛ̨na: “Huɛ̨cate ra dąhnini ɛ̨mmɛ mi ja rá tsꞌɛdi, nguetho gätho gahʉ dyʉ́ hmuhʉ yʉ barco dám mɛmbɛtihʉ nʉ, nɛ xøgue nꞌda oratho ám ꞌbɛdi gätho mi ja bʉ,” bi ꞌyɛ̨nꞌʉ. 20 Pɛ gan johyahʉ gätho ahʉ gue guí ꞌbʉhmbʉ ua mahɛ̨tsꞌi, gan johyahʉ nangue ꞌbɛꞌa bin ja ra dąhnini, bi tsꞌɛmbi. Nɛ dan johyahe gätho gahe ma ꞌbäihe ra Cristo ua ja ra häi, nɛ gätho gyʉ pøngahyąhʉ Oją, nɛ gätho gahʉ ngue dí tɛnhdʉ Oją, dan johyahʉ, nguetho ya bi cosꞌahʉ ꞌbɛꞌa bi ꞌyøtꞌahʉ yʉ jąꞌi mi ꞌbʉpʉ ja a ra dąhnini. 21 Nɛ nubʉya nꞌda rám ꞌbɛhni Oją mahɛ̨tsꞌi ngue xʉn ngu rá tsꞌɛdi, bi gʉꞌtsꞌa nꞌda ra do ɛ̨mmɛ xʉn ndoho, nɛ ntsꞌɛdi bi ꞌyɛm bʉ ja ra dądeją. Nɛ bi ꞌyɛ̨na: “Tengu thoho din ja ra dąhnini Babilonia ngue mi ja rá tsꞌɛdi, pɛ njąmꞌbʉ da hnu mahønꞌa, gätho nꞌda mꞌbɛdi thoho. 22 Nɛ hin da tꞌøpʉ mahønꞌa yʉ mbɛꞌbida, gätho ʉ i pɛ yʉ arpa, nɛ gätho ʉ i huixt yʉ thʉxi, xínga gueꞌʉ yʉ hyʉxi. Xinga nꞌda ran ꞌyohʉ dim pɛpʉ mahønꞌa, nɛ njon din cʉm bʉ mahønꞌa. 23 Nɛ din cąꞌbɛxui thoho, him manꞌdandį mahønꞌa di nɛqui bʉ yʉ sibi, nɛ njon da ꞌyøtꞌ ran thąti bʉ ngue din johya tengu mi øtꞌe. Nguetho manꞌda mi ja yʉ́ tsꞌɛdi ʉ mi øtꞌ yʉ́ ꞌbɛfi bʉ xínda gueꞌʉ miꞌda gätho ra ximhäi. Pɛ mi hät yʉ jąꞌi ꞌbʉ mi xänbi di ho yʉ́ pähä zɛhɛ ʉ gätho mi søm bʉ, bí nɛxpʉ ná ngʉni ra ximhäi. 24 Nɛ guepʉ bim fän yʉ́ ji ʉ yʉ́ pøngahyą Oją, nɛ ʉ gätho miꞌda yʉ́ tꞌʉhni Oją, gue bi tho. Pɛ guepʉ bi tho ʉ, nɛ gueꞌa í tsꞌɛmba a ra dąhnini,” bi ꞌyɛ̨nꞌa rám ꞌbɛhni Oją.