19
Nɛ nubʉya, dra Xuuagä dá øcä yʉ́ nde nꞌda muntsꞌi yʉ jąꞌi i ꞌbʉpʉ mahɛ̨tsꞌi. Nɛ bi ꞌyɛ̨nꞌʉ: “Dí ɛ̨spahʉ Oją, nguetho ma pørpątehʉ a, nɛ hønsɛ ma Ojąhʉ i ja rá nuįxte nɛ tąte thoho rá tsꞌɛdi. 2 Xʉn ho rán tsꞌɛmbi Oją, nguetho rán säui bi tꞌørpa ra dąhnini, tenguꞌbʉ ra ꞌyomtꞌɛ̨ni xisu, gue bi tsꞌonba yʉ́ mbʉi gätho yʉ jąꞌi ra ximhäi. Nɛ nuya Oją bi cospa ʉ gätho toꞌo bi hyo yʉ́ ꞌyɛ̨hɛ,” bi ꞌyɛ̨na. 3 Nɛ ntsꞌɛdi bi mam mahønꞌa yʉ nde dá øcä: “Dí ɛ̨spahʉ Oją nguetho ya bi juah ra sibi a ra dąhnini, nɛ hin din hɛ̨ a nín ꞌyo rá ꞌbifi,” bi ꞌyɛ̨nꞌʉ yʉ jąꞌi. 4 Nubʉya gätho ꞌdäte magoho yʉ dącꞌyɛi ngue ząi di mbäꞌtsꞌa Oją, nɛꞌʉ goho yʉn tꞌuti i ꞌbʉi, bin dąnyahmu bʉ i hu a Oją, nɛ bi dąnde. Nɛ gätho bi ma bi ꞌyɛ̨nꞌʉ: “Nɛcähe, ngubʉ dím bɛ̨mhbe dí ɛ̨spahe Oją,” ɛ̨nꞌʉ.Bi zin rá xisu ra Dɛꞌyo
5 Nɛ dá øcä manꞌda ra nde bi bøm bʉ guepʉ i hu a Oją, ngue bi ma: “Dami ꞌyɛ̨spa ma Ojąhʉ gätho ʉ yʉ́ ꞌyɛ̨hɛ. Dami ꞌyɛ̨spahʉ gätho toꞌo i numansu Oją, nɛꞌʉ i ja yʉ́ tsꞌɛdi nɛꞌʉ hinꞌna,” bi ꞌyɛ̨nꞌa ra nde. 6 Nɛ dá øcä yʉ́ nde yʉ jąꞌi xʉn ngu, ngue di hį tenguꞌbʉ xʉn ngu yʉ dehe, nɛ tenguꞌbʉ bi thoni yʉn gäni. Nɛ bi ꞌyɛ̨m ꞌbʉ mi yą: “Dí ɛ̨spahʉ Oją, nguetho di manda ya ra Hmu, ma Ojąhʉ tąte thoho rá tsꞌɛdi. 7 Gätho dan johyahʉ, nɛ da hyu ma mbʉihʉ, nɛ ga ɛ̨spahʉ Oją ngue i ja rá tsꞌɛdi. Nguetho bi zøn ra ora da zin yʉ ꞌyɛ̨cꞌyɛi ra Jesús, ra Dɛꞌyo, tengu thoho nꞌda ran ꞌyohʉ din thątꞌui rá xisu. Nɛ mahøntho da mba ra xisu, mahoqui thoho. 8 Nɛ bin tꞌun ran tꞌɛ̨di da hye ra pahni di fɛxni, gue ra lino xíngui tsꞌʉ tsꞌo. Nuꞌa ra pahni xʉn tꞌaxi nam bøni ngue bi mba mahoqui yʉ́ tsꞌoqui ʉ yʉ́ tꞌʉhni Oją nɛ nubʉya i øtꞌ yʉ́n thɛhʉ.” 9 Nɛ nuna ram ꞌbɛhni mahɛ̨tsꞌi bi xicä ꞌbɛꞌa ga oꞌtꞌ ya: “Din johya gätho toꞌo ʉ bi tsꞌon bʉ ja ran sihmɛ nangue rán thąti ra Dɛꞌyo. Majuąni rám hman Oją na dí xi a ya,” bi ꞌyɛ̨ng rám ꞌbɛhni Oją mahɛ̨tsꞌi. 10 Nɛ nubʉya dán dąnyahmu bʉ ja rá gua ram ꞌbɛhni mahɛ̨tsꞌi. Pɛ nuꞌa bi xicä: “O guín jabʉ, nguetho nugä rá ꞌyɛ̨hɛ thohogä Oją tengu thoho i, nɛ tengu ni cuhʉ, gätho ʉ i mampꞌa rám hman Oją nangue ra Jesús, gätho dadí jafʉ da fąh ra Jesús,” bi ꞌyɛ̨ng ꞌbʉ mi xiqui.
Nuꞌa nꞌda bi hyux ra tꞌaxca ndøfani
11 Nɛ nubʉya, dra Xuuagä, dá nugä nsoqui mahɛ̨tsꞌi. Nɛ mi ꞌbäpʉ nꞌda ra tꞌaxca ndøfani pa nthutsꞌi. Nɛ nuꞌa i hutsꞌi, Majuąni a rá thuhu, nguetho ząi im mam majuąni a. Nɛ di Jąꞌtsꞌa rá thuhu, janangueꞌa nꞌda ngu nꞌda di unꞌna rán säui ꞌbʉ bi juąnbi, nɛ xʉn ho ꞌbʉ i øtꞌ ran sʉi a. 12 Nɛ nuꞌʉ yʉ́ dä a mi huxpʉ, mi zø tengu ra sibi, nɛ mi jabʉ xʉn ngu yʉ corona bʉ ja rá yą. Nɛ nu rá thuhu ntꞌoꞌtꞌi bʉ, hønsɛ mi pądi ꞌbɛꞌa rá thuhu. 13 Nɛ nu rá pahni mi he, bi zinni gätho ra ji, nɛ nu rá thuhu, ngue rám Hman Oją a. 14 Nɛ nuꞌʉ yʉ dofʉi mahɛ̨tsꞌi, gätho mi he ra tꞌaxca lino mahotho, xíngui tsꞌʉ xʉn tsꞌo. Nɛ gätho mi hux yʉ tꞌaxca ndøfani, nɛ bi dɛnꞌna ra mbʉdi mi huxpʉ ja ra ndøfani. 15 Nɛ nuꞌa ra ngʉrbi i pøxpʉ ja rá nde nꞌda ra espada ɛ̨mmɛ hɛtꞌi, ngue da dąp yʉ́n sʉihʉ ꞌbʉpʉ gätho yʉ häi bʉ ja ra ximhäi. Nɛ gätho di manda ʉ bʉya, nɛ njon di japi da mbɛstaꞌa da ma. Nɛ tengutho ra jąꞌi bʉ ja ran thɛꞌma guiꞌuva, i nɛn yʉ uva, nɛ ngutho da ꞌyørpa ʉ to da zɛmbi, di un rá cuɛ Oją ntsꞌutho, ngue nuꞌa nte hɛ̨mbi da ꞌyøtꞌe. 16 Nɛ ntꞌoꞌtꞌi bʉ ja rá pahni nɛ rá xįnthe rá thuhu, ngue ra Hmutsꞌʉtꞌabi a ngue di manda gätho yʉ tsꞌʉtꞌabi, nɛ rá thuhu, ngue ra Ngʉrpa Hmu a ngue di manda gätho yʉ hmu. 17 Nɛ dá nugä nꞌda rám ꞌbɛhni Oją mahɛ̨tsꞌi mi ꞌbäpʉ ja ra hyadi, nɛ ntsꞌɛdi bi mbaꞌtꞌʉ gätho yʉ doja mi ꞌyo bʉ magątsꞌi, bi ꞌyɛ̨mbi: “Gätho ahʉ gyʉ dojahʉ, ba ɛ̨hmbʉ ya, nguetho Oją bi ꞌyøtꞌahʉ nꞌda ra dąntsꞌihmɛ. 18 Ba ɛ̨hmbʉ ya gui sihʉ yʉ́ ngøcꞌyɛi yʉ tsꞌʉtꞌabi nɛ yʉ hmudofʉi, nɛꞌʉ gätho mi ja yʉ́ tsꞌɛdi. Nɛ yʉ ndøfani nɛ gätho mi hutsꞌi, nɛ gätho yʉ jąꞌi yʉ ꞌyɛ̨hɛ nɛ gätho hing yʉ ꞌyɛ̨hɛ, nɛ yʉ hmu uague yʉ́ mbɛfi,” bi ꞌyɛ̨m ꞌbʉ mi mbaꞌtꞌ yʉ doja. 19 Nɛ dá nugä ra zate gue xí bøxpʉ ja ra dądeją, nɛ ꞌdarbʉ bim pɛtihʉ gätho yʉ tsꞌʉtꞌabi ngue gätho yʉ häi, ngue da ꞌyørpa nꞌda ra dąsʉi a mi huxpʉ ja ra tꞌaxca ndøfani, nɛꞌʉ gätho mi tɛnni. 20 Nɛ nu ra zate bʉya bi mba mfɛntꞌi a, nɛꞌa ra hyäte pøngahyą bi fɛntꞌi, gueꞌa ran tꞌuti í bøx ra häi nɛ xí ꞌyøtꞌ yʉ hyonya ntꞌøtꞌe bʉ ja rá hmi ra zate. Nɛ gueꞌa mi hät yʉ jąꞌi gätho toꞌo mi ja rá thuhu bʉ ja rá dɛ̨. Gätho yoho bi tꞌɛntpʉ ja ra sibi ra azufre, tengu nꞌda ra deją na ndoho a ra sibi. 21 Nɛ gätho yʉ jąꞌi mi tɛnꞌna ra zate, bi tho nangue ra espada mi pøxpʉ ja rá nde a mi huxpʉ ja ra tꞌaxca ndøfani. Nɛ nuꞌʉ yʉ doja bʉya bin niyą thoho nangue yʉ ngøcꞌyɛi.