Nꞌda mahuąhi njɛya
20
Nɛ nubʉya, dra Xuuagä dá nugä manꞌda rám ꞌbɛhni Oją mahɛ̨tsꞌi bá cąi nɛ bá hyą rán sogui ra hyąhäi ɛ̨mmɛ xʉn hɛ̨ nɛ ntsꞌutho, guepʉ i ꞌbʉh yʉ zįthu. Nɛ nuꞌa rám ꞌbɛhni Oją mi cą nꞌda ra cadena xʉn ndoho. 2 Nɛ bi bɛntꞌa ra jąrga, nɛ tꞌɛ̨mbi ra cꞌɛ̨yą, pɛ guetꞌa ra zįthu, rá thuhu í Satanás. Nɛ bi mba nthątꞌi nꞌda mahuąhi njɛya nangue ra cadena. 3 Nɛ nuꞌa rám ꞌbɛhni Oją bʉya, bi ꞌyɛntpʉ ja ra hyąhäi a ra zįthu. Nɛ bi goꞌmi, nɛ bi hyʉtꞌa ran sogui, nɛ bi cuahmi xʉn ho, ngue hin da zä da bøm bʉ da hyät yʉ jąꞌi, asta gueꞌbʉ bi guaꞌa nꞌda mahuąhi njɛya. Mꞌbɛjua da mba nsoꞌtsꞌi ꞌda yʉ pa. 4 Nɛ dá nugä manꞌda ra hmɛpya mahɛ̨tsꞌi, xʉn ngu yʉn thutsꞌi, nɛ nu toꞌo mi huxpʉ bin tꞌun ran tꞌɛ̨di da ꞌyøtꞌ ran juąnbate, gätho min ꞌyohʉ ʉ bi tho ꞌbʉ mi ma i ɛ̨cꞌyɛ̨i ra Jesús, nɛꞌbʉ mi mampꞌa rám hman Oją. Gue nuꞌʉ gätho him mi thąnde ra zate xí bøxpʉ ja ra deją nɛ rá nyoguido. Nɛ nte mi ja bʉ yʉ́ dɛ̨ rá thuhu ra zate, xínga guepʉ ja yʉ́ ꞌyɛ. Nuꞌʉ bi ndantsꞌ mahønꞌa ꞌbʉ mi du, nɛ bin ꞌyohʉ ra Jesús bin tsꞌʉtꞌabi nꞌda mahuąhi njɛya. 5 Nɛ guehya yʉ́ mbʉdi bi xox Oją bi tꞌurcä. Pɛ nuꞌʉ miꞌda gue bi du, hin da dąmbɛ̨ni asta gueꞌbʉ bi guaꞌa nꞌda mahuąhi njɛya. 6 Nɛ di johya nɛ mająpi ʉ gätho ʉ ra mbʉdi da xox Oją, nɛ hin da nu a na yoho ran dąte ngue ra sibi maząi. Nɛ dim mbäją nangue ra Cristo bʉ bí ja rá tsꞌɛdi Oją, nɛ din ꞌyohʉ ra Cristo ngue din tsꞌʉtꞌabi nꞌda mahuąhi njɛya.Da mba nthąpi ra zįthu
7 Nɛ nuꞌbʉ bi guaꞌa nꞌda mahuąhi njɛya, da mba nsocui a ra zįthu mi ofädi. 8 Nɛ nuꞌa ra zįthu bʉya da bøm bʉ, xø da hyät mahønꞌa yʉ jąꞌi gätho na ngʉni ra ximhäi. Da mba bʉ ja ra häi Gog nɛ ra häi Magog nɛ di japi dim pɛti gätho nangue din ja ra dąsʉi. Nɛ xʉn ngu da dɛnni hingui sä da ꞌbede, tengu ra ꞌbomu ꞌbom bʉ ndendeją, njon da hyätꞌi da mbede. 9 Nɛ din ꞌyɛ̨rpa thoho bʉ ní mba bi mbäꞌtsꞌi hapʉ mi ꞌbʉ ʉ min ꞌyohʉ Oją, guepʉ ja ra dąhnini di huɛ̨c Oją. Pɛ bá cąh mahɛ̨tsꞌi ra sibi bi juadi gätho yʉ́n sʉihʉ. 10 Nɛ nuꞌa ra zįthu ngue bi hyätꞌʉ, bi tꞌɛntpʉ ja ra sibi i thɛ ra azufre, tengu nꞌda ra deją na ndoho, guepʉ xí tꞌɛntpʉ ra zate xí bøxpʉ ja ra dądeją, nɛꞌa ra hyäte pøngahyą gue ran tꞌuti xí bøxpʉ ja ra häi. Nɛ gätho hyu da nu ran ʉnbi nangue ra sibi, ma pa nɛ ra xui hønꞌbʉ go njąmꞌbʉ gätho yʉ pa maząi.
Ran zɛgui ran juąnbi
11 Nɛ drá Xuuagä dá nugä mahønꞌa, gue nꞌda ran thutsꞌi xʉn ndoho xʉn tꞌaxi, nɛ mi hupʉ Oją. Nɛ nu ra ximhäi nɛ mahɛ̨tsꞌi bim ꞌbɛ ꞌbʉ mi hyantꞌa mi hupʉ, nɛ him man ja bʉya. 12 Nɛ dá nugä gätho ʉ xʉn du, høntꞌa go ꞌbɛꞌa ní jąꞌi, mi ꞌbäpʉ ja rá hmi Oją i hupʉ. Nɛ bi mba ma tʉntsꞌi yʉ søcuą bʉ, nɛꞌa ra søcuą im ma toꞌo i ja ra temaząi. Nɛ gätho bi mba ma juąnbi nangueꞌa ntꞌoꞌtꞌi bʉ ꞌbɛꞌa gätho bi ꞌyøtꞌa, nuꞌbʉ mi ꞌbʉi. 13 Nɛ gätho ʉ gue bi du bʉ ja ra deją, nɛ gätho ʉ miꞌda bi du hønbʉ go hapʉ, ngue gätho i ꞌbʉpʉ ꞌbʉꞌʉ xʉn du, bi bøm bʉ, nɛ bim ꞌbäpʉ ja rá hmi Oją. Nɛ bi mba ma juąnbi nangue ꞌbɛꞌa gätho bi ꞌyøtꞌ ꞌbʉ mi ꞌbʉi. 14 Nɛ nuꞌa ra xɛqui mi ꞌbʉꞌʉ xʉn du, bi tꞌɛntpʉ ja ra sibi, tengu ra deją na ndoho. Gueꞌa na yoho ran dąte a. 15 Nɛ nubʉ ja ra søcuą gue im ma toꞌo i ja ra temaząi, nɛ nuꞌʉ gätho him man tꞌoꞌtꞌi yʉ́ thuhu bʉ, bi tꞌɛntpʉ ja ra sibi.