3 XUUA
Ná hyu ra søcuą bi ꞌyoꞌtꞌa rá ꞌbäiui ra Jesucristo ra Xuua
Ran zɛngua
1
Nugä dra dącꞌyɛi ngʉrpigä, dí pɛnhꞌna ra søcuą ma zi cu i Gayo, mahuɛ̨qui i. Dadí huɛ̨cꞌi i nangue ram Hma majuąni dí ɛ̨cꞌyɛiui. 2 Dí äp Oją di ja i gui pømmanho, nɛ di zac ni jąꞌi, tengu nán zaqui ni mbʉi. 3 Ɛ̨mmɛ dán johyagä nangueꞌe, nguetho bi xicä ꞌda yʉ cu bá peng bʉ guí ꞌbʉi, ngue guí tɛnꞌna ram Hma majuąni, nɛ nuꞌʉ gätho guí øtꞌe din thɛui a ram Hma. 4 Hinꞌyʉ manꞌda dán johyagä ꞌbʉ dí øde i tɛnꞌna ram hma majuąni ʉ dá xänbi.Xʉn ngu rá mate ra Gayo
5 Ma zi cu i, xʉn ngu ni mate ngueꞌa gadí jamansu ni cuhʉ, madagueꞌbʉ hin guí pą ʉ. 6 Nuꞌʉ ꞌda yʉ cu gue bá peng bʉ guí ꞌbʉi bi ma nangueꞌe. Nuꞌbʉ mám pɛtihe bi xije ngue i ja nin huɛ̨cate. ꞌYørqui tsꞌʉ ra mate gui fäxꞌʉ ꞌbʉ bi zøm bʉ mahønꞌa, nguetho yʉ́n sähʉ da ꞌbäxꞌʉ yʉ́m ꞌbɛhni Oją. 7 Nguetho nuꞌʉ ꞌda bi ꞌbɛhni da mba nꞌdanni da ma nangue ra Jesucristo, nɛ hin te da ꞌyäpꞌʉ hingui ɛ̨cꞌyɛi. 8 Janangueꞌa jatho ga jamansuhʉ ʉ. Nɛ nuꞌbʉ dí fäxhʉ ʉ, dí comhbʉ ra ꞌbɛfi nangue rám Hman Oją bʉya.
Nu ra Diótrefes in hɛcpate
9 Dá pɛnhꞌna nꞌda ra søcuą bʉ ja nim pɛtihʉ. Pɛ nu ra Diótrefes hinguin nde da ꞌyøde ꞌbɛꞌa dí mamhbe, nguetho in nde dim ꞌbɛtꞌo nanguesɛ. 10 Janangueꞌa, nuꞌbʉ dá mbagä bʉ, ga xi ahʉ ꞌbʉ dám pɛtihʉ, ꞌbɛꞌa i øtꞌa ra Diótrefes, ngue di cꞌąmanꞌʉje. Nɛ hinga høntꞌa, nɛ hingui sinꞌʉ yʉm ꞌbɛhni ya ní nɛtsꞌi, nɛ di hɛcpa ʉ toꞌo ɛ̨na da zin ʉ, nɛ i høn a thi bʉya.
Im mamanho nangue ra Demetrio
11 Ma zi cuꞌi, dí xi i, hin ga tɛnhdʉ ʉ yʉ́n tꞌøtꞌe yʉ tsꞌomꞌbäi, pɛ ga humbi ga tɛnhdʉ yʉ́n tꞌøtꞌe yʉ hocjąꞌi. Nuꞌʉ toꞌo ząi øtꞌ ran ho, bim ꞌbʉi maꞌdaꞌyo nangue Oją. Pɛ nuꞌʉ toꞌo ząi øtꞌ ran tsꞌo hingui pą Oją ʉ. 12 Pɛ nu ra Demetrio gätho im mamanho yʉ cu nangueꞌa. Nɛ nu yʉ́n tꞌøtꞌe gätho din thɛui a ram Hma majuąni. Nɛcä nꞌdatꞌa dím mangä ngue xʉn ho a ra Demetrio. Nɛ guí pądi ngue majuąni dím mangä.
Rán zɛgui ran zɛngua