2 XUUA
Ná yoho ra søcuą bi ꞌyoꞌtꞌa rá ꞌbäiui ra Jesucristo ra Xuua
Ran zɛngua
1
Nugä dra dącꞌyɛi ngʉrpigä, dí pɛnhꞌna ra søcuą jaua, grá xisu, nthahni nangue Oją, nɛ guí ꞌbʉhmbʉ bʉ ni tꞌʉhni. Dadí huɛ̨cꞌahʉ ngueꞌa nꞌdatꞌa dí tɛnhdʉ ram Hma majuąni. Nɛ hinga høngdä dadí huɛ̨cꞌahʉ pɛ nɛꞌʉ gätho miꞌda ngue i pą a Majuąni. 2 Dadí huɛ̨cꞌahʉ, nangueꞌa ram Hma majuąni bin ząm bʉ ja ma mbʉihʉ nɛ njąmꞌbʉ dim ꞌbɛpʉ a. 3 Ma zi cu ahʉ, ꞌdaꞌangu dím bɛ̨mhbʉ a ram hma majuąni, nɛ dadín huɛ̨jʉ. Janangueꞌa dí äp Oją ma Tahʉ nɛꞌa rá Tsꞌʉntꞌʉ ra Jesucristo da gopʉ ni mbʉihʉ a rá mate, nɛ rán huɛ̨cate, nɛ thocpa thoho da hyutꞌa ni mbʉihʉ.Ga cohmbʉ bʉ ja rán xädi ra Cristo
4 Nugä ɛ̨mmɛ dán johyagä ꞌbʉ má øcä ngue i tɛnꞌna ram Hman ʉ ꞌda ʉ ni tꞌʉhni, tengu i xijʉ ra Ta. 5 Nɛ nuya, grá xisu, nthahni nangue Oją, nꞌda ran tꞌɛ̨di dín nde ga bɛ̨nꞌni i. Nɛ him maꞌdaꞌyo na ran tꞌɛ̨di gue ga xi i, pɛ tengu thoho bi sijʉ rá mbʉdi dá pąhmbʉ ra Cristo, ngue dan huɛ̨jʉ nꞌda ngu nꞌdajʉ. 6 Nuꞌa ran huɛ̨cate nam bøni, gätho ga øthʉ yʉ́n tꞌɛ̨di Oją. Nɛ gueꞌa rán tꞌɛ̨di bi sijʉ rá mbʉdi gue thocpa thoho dan huɛ̨jʉ. 7 Guehna dí xi ahʉ na, nguetho xʉn ngu yʉ hyäte i ꞌyoua ja ra ximhäi, ngue i ɛ̨na him bin jąꞌi a ra Jesucristo. Pɛ nuꞌʉ häte ʉ, nɛ i tɛn rán sʉiui Oją ʉ. 8 Pɛ jatho gam fähmbʉ njon da hyä ahʉ, janangueꞌa hin dim ꞌbɛ a xtá pɛhmbʉ. Pɛ dami thojʉ xʉn ho ni ꞌbɛfihʉ, janangueꞌa gätho gui tąhmbʉ ꞌbɛꞌa in nde Oją di ꞌda ahʉ mꞌbɛjua. 9 Pɛ nuꞌa toꞌo in nde da mispa rán xädi ra Cristo, nuꞌa hinguin ꞌyoui Oją ꞌbʉ. Pɛ nuꞌa toꞌo copʉ ja rán xädi ra Cristo, nuꞌa din ꞌyoui ra Ta nɛ rá Tsꞌʉntꞌʉ a bʉya. 10 Nuꞌbʉ da zøm bʉ nꞌda ɛ̨na im man rám Hman Oją, pɛ nuꞌbʉ hin din thɛui rám hman ra Cristo, hin ga säyabahʉ bʉ ma ngumhbʉ, xín ga äfʉ rám fätsꞌi Oją nangue a. 11 Nguetho nuꞌa to i äp rám fätsꞌi Oją nangue a, tengu thoho ꞌbʉ i fäxꞌʉ yʉ́n tꞌøtꞌe gue hingui ho.
Dím bɛ̨ni ga mba bʉ