1 XUUA
Ná nꞌda ra søcuą bi ꞌyoꞌtꞌa rá ꞌbäiui ra Jesucristo ra Xuua
Ram Hma ngue di ꞌdajʉ ra ꞌdaꞌyote
1
Nuꞌa mí ꞌbʉ ꞌbʉ rá mbʉdi thoho, gueꞌa dá hɛ̨the ma dähe, nɛ dá øhmbe a bi ma, nɛ dá nuhe xʉn ho, nɛ dá thähmbe ma ꞌyɛ̨he. Nɛ gueꞌa ra Jesucristo a, rám Hma Oją ngue bi ma di ꞌdajʉ ra ꞌdaꞌyote. 2 Nguetho nuꞌa di ꞌdajʉ ra ꞌdaꞌyote bin ꞌyusɛ gue bin jąꞌi, nɛ dá nuhe, janangueꞌa dí mamhbe majuąni a bin ja, nɛ dí xi ahʉ ya gue ząi xmí ꞌbʉi nɛ ząi dim ꞌbʉi. Mam bí ꞌbʉhmi rá Ta nguetho nꞌdatꞌ Oją a, nɛ bin ꞌyusɛ ua dí ꞌbʉhmbʉ. 3 Nɛ nuꞌa dá nuhe nɛ dá øhmbe a bi ma, gueꞌa dí xi ahe a ya, nꞌdahma nɛꞌahʉ gui pąhmhʉ a, nɛ gätho dan yąmanhohʉ a ra Ta nɛ rá Tsꞌʉntꞌʉ ra Jesucristo. 4 Guehna dí otꞌahʉ na ya, nꞌdamhma nɛꞌahʉ din ja ahʉ ran johya xʉn ho.Nu Oją ran Nɛqui a
5 Nuꞌa Oją ran Nɛqui a, nde da ma xʉn hotho a, nɛ hinꞌyʉ ra ꞌbɛxui nangueꞌa. Nɛ gueꞌa ram hma bi xije ra Jesucristo, nɛ gueꞌa dí xiꞌahʉ a ya. 6 Sä dí ɛ̨mhbʉ dí yąmanhohʉ ra Jesús, pɛ nuꞌbʉ guextaꞌa dí ꞌyohʉ bʉ ja ra ꞌbɛxui, dí fɛhnihʉ ꞌbʉ, nguetho hín dí øthʉ a rán säui a majuąni. 7 Pɛ nuꞌbʉ majuąni dí ꞌyohʉ bʉ ja ran nɛqui guepʉ ꞌbʉ Oją, hinꞌyʉ ꞌbɛꞌa ga ąhmbʉ bʉ, nɛ dí yąmanhohʉ a ꞌbʉ, nɛ nu rá ji ra Jesús rá Tsꞌʉntꞌʉ Oją, thocpa thoho i thugahʉ gätho ma tsꞌoquihʉ a. 8 Pɛ nuꞌbʉ sä dí ɛ̨mhbʉ hinꞌyʉ gahʉ ra tsꞌoqui, dadín hyäzɛhɛhʉ ꞌbʉ, nguetho hin dá cʉꞌtꞌ ma mbʉihʉ a majuąni. 9 Pɛ nuꞌbʉ ga mamhbʉ ma tsꞌoquihʉ, gue hingui ho dá øthʉ, da zä di pungahʉ Oją nangue ra Cristo bi gutꞌi, nɛ da mbercahʉ gätho ran tsꞌo, tengu mím ma. 10 Pɛ nuꞌbʉ sä dí ɛ̨mhbʉ hin te dá øthʉ yʉ tsꞌoqui, dí nubɛthąnihʉ Oją ꞌbʉ, nguetho bi ꞌyɛ̨n Oją gätho bi ꞌyøtꞌ yʉ tsꞌoqui. Pɛ xíngui tsꞌʉ dí cʉꞌtꞌ ma mbʉihʉ rám hman a ꞌbʉ.