Ma hocpatehʉ a ra Jesucristo
2
Ma zi tꞌʉhni ahʉ gue dyʉ ꞌyɛ̨cꞌyɛihʉ, dí otꞌahʉ ra søcuą i ja ua, dadí hɛcꞌahʉ hin gui ꞌyøthʉ yʉ tsꞌoqui. Pɛ nuꞌbʉ ga øthʉ nꞌda ra tsꞌoqui, gue him majuąni dí numanhohʉ, pɛ dí ꞌbähmbʉ ma Hocpatehʉ din hocpaui bʉ ꞌbʉh ra Ta, ra Jesucristo, ra Hocjąꞌi a. 2 Nguetho guesɛ a ran tꞌunni a di hoga ma tsꞌoquihʉ. Nɛ hinga høngdahʉ in nde di hogahʉ, pɛ gätho yʉ tsꞌoqui ja ua ja ra ximhäi in nde di hoqui nangue bi du ra Cristo. 3 Nuꞌbʉ majuąni dí øthʉ ʉ yʉ́n tꞌɛ̨di Oją, da zä ga pąhmbʉ gue dí yąmanhohʉ a bʉya. 4 Pɛ sä ɛ̨n i ꞌda: “Dí pącä Oją,” ɛ̨n ʉ, pɛ fɛhni ʉ nɛ hingui ørpa yʉ́n tꞌɛ̨di, nɛ hin di cʉꞌtꞌ rá mbʉi a majuąni. 5 Pɛ nuꞌbʉ i øtꞌa man Oją nꞌda, hinga ndetho bi huɛ̨c Oją nꞌda ꞌbʉ, pɛ bi bømanho a bi ꞌyørpe. Ga xi ahʉ ya ꞌbɛpʉ dán zä ga pąhmbʉ ꞌbʉ majuąni dí ꞌbʉhmbʉ a ra Cristo. 6 Nguetho nuꞌbʉ ɛ̨nꞌa nꞌda gue i ꞌbʉhmi ra Cristo, “jatho ga øtꞌä tengu bi ꞌyøtꞌ ra Cristo,” da ꞌyɛ̨nsɛ ꞌbʉ. 7 Ma zi cu ahʉ, nu ran tꞌɛ̨di dí otꞌahʉ gue dan huɛ̨jʉ, him maꞌdaꞌyo a, pɛgue guetꞌa ram hma mbʉdi bi sijʉ mayaꞌbʉ, ꞌbʉ ra mbʉdi thoho dá pąhmbʉ ra Cristo. 8 Pɛgue tengu ꞌbʉ maꞌdaꞌyo a, nguetho janaguehya dí øthʉ ya tengu bi ꞌyøtꞌ ra Cristo. Nguetho bi dʉꞌmi di ꞌuegahʉ ra ꞌbɛxui ma mbʉihʉ ra nyotꞌi majuąni. 9 Nuꞌbʉ sä ɛ̨nꞌa nꞌda i ꞌbʉpʉ ja ran nɛqui, nɛ i san rá cu, pɛ guexta bʉ ja ra ꞌbɛxui i ꞌbʉ ꞌbʉ. 10 Nɛ nuꞌa toꞌo di huɛ̨c rá cu, bin ząm bʉ ja ran nɛqui a, nɛ nuꞌa hin hapʉ da dąncꞌa. 11 Pɛ nuꞌa toꞌo san rá cu, i ꞌbʉpʉ ja ra ꞌbɛxui a, nɛ i ząm bʉ. Hingui sä da bądi ndaꞌa xʉn ho, nguetho bi ꞌbɛrpa ran ꞌyomfɛ̨ni a ra ꞌbɛxui. 12 Dí otꞌahʉ ma zi tꞌʉhni ahʉ, nguetho dí pądi xʉ punꞌna ni tsꞌoquihʉ, bi hocꞌahʉ ra Cristo. 13 Nɛ nuya ꞌda ahʉ dyʉ dącꞌyɛihʉ, dí otꞌahʉ nguetho dí pądi guí pąhmbʉ a mí ꞌbʉi gueꞌbʉ rá mbʉdi thoho. Nɛ ꞌda ahʉ gyʉ tsꞌʉntꞌʉhʉ, dí otꞌahʉ nguetho dí pądi gá tąfʉ ra zįthu. Nɛ xø dí otꞌahʉ ya gätho ahʉ ma zi tꞌʉhni ahʉ, nguetho gätho gahʉ dá pąhmbʉ ra Ta. 14 Nɛ xø dí otꞌahʉ, dyʉ dącꞌyɛihʉ, nguetho dí pądi gá pąhmbʉ a mí ꞌbʉi gueꞌbʉ rá mbʉdi thoho. Nɛ xø dí otꞌahʉ gyʉ tsꞌʉntꞌʉhʉ, nguetho dí pądi i ja ni tsꞌɛdihʉ gá tąfʉ ra zįthu, nangue rám hman Oją thocpa thoho guím bɛ̨mhbʉ. 15 O guídí hohʉ rá pähä ra ximhäi, gue hin gui ꞌyøtꞌ ni pähä zɛhɛhʉ. Nguetho nuꞌbʉ dadí ho ma pähä zɛhɛhʉ, hin dadi hohʉ Oją ꞌbʉ. 16 Nguetho nuꞌʉ yʉ́ pähä ra ximhäi, gätho him bi zän Oją ʉ, ꞌbɛꞌa gä di ho ní ngøcꞌyɛi nꞌda, nɛ ní dä nꞌda di ho ꞌbɛꞌa gätho in nu nde da mbɛzɛhɛ, nɛꞌbʉ im bɛ̨ni jasɛ rán ꞌyomfɛ̨ni nꞌda. Pɛ nuꞌʉ bi nɛquidą ua ja ra ximhäi ʉ tengu ʉ. 17 Pɛ nu ra ximhäi ní mba bʉ da guadi, nɛꞌʉ yʉ́n ꞌyomfɛ̨ni ra ximhäi da guaꞌʉ. Pɛ nuꞌʉ ørpa rá pähä Oją, dim ꞌbʉmanho gätho yʉ pa maząi.Ba ɛ̨h rán sʉiui ra Cristo
18 Ma zi tꞌʉhni ahʉ, rán zɛgui ya. Nɛ xtá øhmbʉ ngue di nɛqui nꞌda rán sʉiui ra Cristo. Nɛ nuya bi mbʉdi bi nɛqui xʉn ngu yʉ́ mfätsꞌihʉ a rán sʉiui ra Cristo. Janangueꞌa dí pąhmbʉ mbɛ rán zɛgui ya. 19 Nɛ gueꞌʉ ꞌda xʉm bøngua dí ꞌbʉhmbʉ. Pɛ him majuąni ma miꞌyɛ̨cꞌyɛihʉ ʉ, nguetho nuꞌbʉ majuąni ma cuhʉ ʉ, hin xtá ꞌue ʉ ꞌbʉ. Pɛ bi bønꞌʉ janangueꞌa bi ꞌyusɛ gue him majuąni ma cuhʉ ʉ gätho ʉ bi bøni. 20 Pɛ nu ahʉ bi ꞌdajʉ rá Hogandąhi Oją a ra Cristo. Janangueꞌa gätho gahʉ dí pąhmbʉ ndaꞌa majuąni. 21 Dí otꞌahʉ na, pɛ hin dí ɛ̨nꞌi hin guí pąhmbʉ a majuąni. Pɛ guí pąhmbʉ a, nɛ guí pąhmbʉ hinguin ꞌyoui ra fɛhni a majuąni. 22 Nuꞌa gue ɛ̨na hing ra Cristo a ra Jesús, ɛ gueꞌa ra ngʉrpa fɛhni a, nɛ rán sʉiui Oją a, nguetho i ɛ̨na hing rá Tsꞌʉntꞌʉ Oją a ra Jesucristo, nɛ xíngui ɛ̨cꞌyɛiba a rá Ta bʉya. 23 Nguetho nuꞌa toꞌo hingui ɛ̨cꞌyɛi ra Cristo rá Tsꞌʉntꞌʉ Oją xínga gueꞌa Oją rá Ta i pądi. Pɛ nuꞌa toꞌo ɛ̨cꞌyɛi rá Tsꞌʉntꞌʉ nɛꞌa rá Ta i pąrpa a bʉya. 24 Nɛ nuꞌa ꞌbɛꞌa gätho dá øhmbʉ ra mbʉdi dá pąhmbʉ ra Cristo, ga thoqui gam bɛ̨mhbʉ a. Nguetho nuꞌbʉ dí thoqui dím bɛ̨mhbʉ a, ząi dí ꞌbʉhmbʉ a ra Tsꞌʉntꞌʉ nɛꞌa rá Ta bʉya. 25 Nɛ bi xijʉ majuąni di ꞌdajʉ ra ꞌdaꞌyote gue i ja ya nɛ njąmꞌbʉ da guadi. 26 Guehna dí otꞌahʉ na, nguetho ꞌbʉ i ꞌda in nde da hyä ahʉ. 27 Pɛ nu ahʉ, nuꞌa rá Hogandąhi bi ꞌdajʉ ra Jesucristo bin ząm bʉ ma mbʉihʉ a, nɛ guesɛ a i xängahʉ gätho ꞌbɛꞌa man Oją. Janangueꞌa him mahyoni toꞌo da xängahʉ yʉ́n thɛhʉ. Nɛ nuꞌa i xängahʉ rá Hogandąhi Oją majuąni a, hing ra fɛhni a. Nɛ di bɛ̨ngahʉ dan ząmhbʉ bʉ ꞌbʉh ra Cristo. 28 Nɛ nuya ma zi tꞌʉhni ahʉ, damin ząmhbʉ bʉ ꞌbʉh ra Cristo, nꞌdamhma dan johyahʉ ꞌbʉ dá nuhʉ nɛ hin ga pɛsꞌ ma sähʉ. 29 Nuꞌbʉ dí pąhmbʉ gue xʉn ho Oją, ngutho ga pąhmbʉ gue bim ꞌbʉi maꞌdaꞌyo nangue Oją ʉ toꞌo gätho i øtꞌ ran ho.