Yʉ́ tꞌʉhnigahʉ Oją
3
Dyʉ́ ꞌyɛ̨cꞌyɛihʉ, gam bɛ̨mhbʉ gue ɛ̨mmɛ xʉn ngu rán huɛ̨cate ra Ta, ngue bi ꞌyøtꞌe ngue yʉ́ tꞌʉhnigahʉ a. Janangueꞌa hingui pąjʉ ʉ i tɛn ra ximhäi, nguetho njąmꞌbʉ mi pą Oją. 2 Ma zi tꞌʉhni ahʉ, nuya yʉ́ tꞌʉhnigahʉ Oją. Nɛ hinga na urcahʉ hague dán jahʉ mꞌbɛjua. Pɛ nuꞌbʉ bi nɛqui ꞌbɛꞌa da ꞌyørcahʉ, dí pąhmbʉ dan jahʉ tengu ra Cristo, nguetho da zä ga pąhmbʉ hague majuąni in ja a ra Cristo. 3 Nɛ nꞌda ngu nꞌdajʉ ꞌbʉ dí tømhbʉ dan jahʉ tengu ra Cristo, janangueꞌa dadín hoc zɛhɛ ma mbʉihʉ, dín ndehʉ da gohi xʉn ho tengu ra Cristo. 4 Nuꞌa toꞌo øtꞌ ra tsꞌoqui i fɛsthoho rán tꞌɛ̨di Oją, nguetho nuꞌa ra tsꞌoqui nam bøni ram fɛꞌtsꞌi nangue yʉn tꞌɛ̨di. 5 Pɛ dí pąhmbʉ bi zøcua ra Cristo gue di ꞌbɛrca ma tsꞌoquihʉ. Nɛ nuꞌa ra Cristo hinꞌyʉ rá tsꞌoqui a. 6 Nuꞌbʉ ząi ꞌbʉhmi ra Cristo nꞌda, hingui nde da ꞌyøtꞌ yʉ tsꞌoqui a. Pɛ nuꞌbʉ bin ząm bʉ ja yʉ tsꞌoqui nꞌda, njąmꞌbʉ bi cʉꞌtꞌ rá mbʉi hague in ja a ra Cristo, nɛ njąmꞌbʉ bi ndepe di hocpa rá mbʉi. 7 Ma zi tꞌʉhni ahʉ, njon gui jafʉ da hyä ahʉ, nguetho høntꞌʉ gue ząi øtꞌ ran ho bi mba mahoqui ʉ nɛ xʉn ho ʉ tengu ra Cristo. 8 Pɛ nuꞌa ząi øtꞌ ran tsꞌo, rá ꞌyɛ̨hɛ ra zįthu a. Nguetho nu ra zįthu ząi øtꞌ ra tsꞌoqui gueꞌbʉ go rá mbʉdi thoho. Nɛ gueꞌa í zøcua ja ra ximhäi rá Tsꞌʉntꞌʉ Oją, gue di tsꞌonba rá ꞌbɛfi ra zįthu. 9 Nuꞌʉ toꞌo bim ꞌbʉi mahønꞌa nangue Oją, hingan ząi øt yʉ tsꞌoqui ʉ, nguetho í hyąxta Oją yʉ́ ta gue ra hogambʉi. Hingui sä din ząm bʉ ja yʉ tsꞌoqui nguetho bim ꞌbʉi mahønꞌa nangue Oją. 10 Da zä ga pąhmbʉ ndaꞌʉ yʉ́ tꞌʉhni Oją nɛ ndaꞌʉ yʉ́ tꞌʉhni ra zįthu. Nguetho nuꞌʉ toꞌo bin ząm bʉ ja ra tsꞌoqui, nɛ hin di huɛ̨c yʉ́ cu, hing yʉ́ tꞌʉhni Oją ʉ.Dan huɛ̨jʉ nꞌda ngu nꞌdajʉ
11 Nguetho guehna ran tꞌɛ̨di bi sijʉ ꞌbʉ rá mbʉdi dá pąhmbʉ ra Cristo, ngue dan huɛ̨jʉ nꞌda ngu nꞌdajʉ. 12 Nɛ hin ga øthʉ a bi ꞌyøtꞌa ra Caín gue í hyąxta a rám ꞌbäi ra zįthu nɛ bi hyo rán ꞌyohʉ. Hanja ngue bi hyo a. Nguetho hingui ho rá mbʉi a, janangueꞌa bi hyo rán ꞌyohʉ ngue xʉn ho rá mbʉi a. 13 Janangueꞌa, ma zi cu ahʉ, hin ga hyonya thohohʉ ngueꞌbʉ di ʉgahʉ yʉ jąꞌi i tɛn ra ximhäi. 14 Pɛ nujʉ dí pąhmbʉ dá sohmbʉ rá tsꞌɛdi ran dąte, nɛ dá sømhbʉ bʉ ja rá tsꞌɛdi ra te. Guehna dí pąhmbʉ nguetho dadí huɛ̨c ma miꞌyɛ̨cꞌyɛihʉ. Nuꞌa toꞌo hinꞌyʉ rán huɛ̨cate, bin ząm bʉ ja rá tsꞌɛdi ran dąte a. 15 Nuꞌa toꞌo di ʉp rá cu, ra hyodu a. Nɛ dí pąhmbʉ njoꞌo nꞌda ra hyodu i ja ra ꞌdaꞌyote maząi. 16 Pɛ nu ra Cristo bi ꞌyurcahʉ ꞌbɛꞌa njuąntho ran huɛ̨cate, ngue bi däsɛ rá te nanguejʉ. Nɛ jatho ngutho ga øthʉ, hin ga su ga dä ma tehʉ guepʉ da zä ga fäx ma cuhʉ. 17 Pɛ nuꞌa toꞌo i ja ꞌbɛꞌa i pɛꞌtsꞌi, nɛ i pądi hinꞌyʉ ꞌbɛꞌa da hyon a rá cu, nɛ nuꞌbʉ hingui ørpa ran huɛ̨cate, hinguim bɛ̨ni da numanho Oją a ꞌbʉ. 18 Ma zi tꞌʉhni ahʉ, hinga høntho gam manthohʉ ran huɛ̨cate, pɛ guemhma ga øthʉ a.
Dadín johyahʉ ꞌbʉ dí yąhʉ Oją
19 Nɛ nuꞌbʉ majuąni dí øthʉ ran huɛ̨cate, janangue dí pąhmbʉ yʉ́ tꞌʉhnigahʉ a Majuąni, nɛ gueꞌa nan johyahʉ bʉ ja rá hmi a. 20 Pɛ nuꞌbʉ ga juąnba zɛhɛ ma mbʉihʉ, pɛ da hyurca ma mbʉihʉ Oją, madagueꞌbʉ i pądi ꞌbɛꞌa gätho dá øthʉ, nguetho manꞌda ja rán huɛ̨cate xinda guejʉ. 21 Janangueꞌa ma zi cu ahʉ, nuꞌbʉ hin te dí tįmhbʉ ja ma mbʉihʉ a xʉn tsꞌo, dadín johyahʉ ngue dí pąhmbʉ dí yąmanhohʉ Oją, 22 nɛ di ꞌdajʉ ꞌbɛꞌa gätho dí äfʉ ꞌbʉ dí yąhʉ, nguetho dí ørpahʉ yʉ́n tꞌɛ̨di, nɛ dí ørpahʉ gätho i numanho. 23 Nɛ i ja ua yʉ́n tꞌɛ̨di Oją, gue ga ɛ̨cꞌyɛihʉ rá Tsꞌʉntꞌʉ, ra Jesucristo, nɛ dan huɛ̨jʉ nꞌda ngu nꞌdajʉ, tengu bi xijʉ. 24 Nɛ nuꞌa toꞌo i ørpa yʉ́n tꞌɛ̨di, i ꞌbʉhmi Oją nɛ bim ꞌbʉpʉ Oją bʉ rá mbʉi a bʉya. Nɛ dí pąhmbʉ dí ꞌbʉhmbʉ Oją, nguetho gueꞌa di bɛ̨ngahʉ rá Hogandąhi bi ꞌdajʉ.