Ndaꞌa rám Hman Oją, nɛ ndaꞌa rám hman a rán sʉiui Oją
4
Ma zi cu ahʉ, hingui sä ga ɛ̨cꞌyɛihʉ ꞌbɛꞌa gätho ním hma ɛ̨mbi rám hman Oją. Pɛ i jatho ga pąhmbʉ ꞌbʉ majuąni ngue gueꞌa rám hman Oją, uague hinꞌna. Nguetho xʉn ngu yʉ hyäte pøngahyą i ꞌyoua ja ra ximhäi. 2 Nɛ nuꞌa jatho ga pąhmbʉ ndaꞌa ním hma bi bɛ̨nba rá Hogandąhi Oją, nuꞌbʉ im ma ngue rá Thahni Oją ngue bin jąꞌi nɛ gueꞌa ra Jesucristo a, gueꞌa ram hma bi bɛ̨nba rá Hogandąhi Oją a bʉya. 3 Pɛ toꞌo gätho ngue ɛ̨na hin bin jąꞌi a rá Thahni Oją gue ra Jesucristo, pɛ nuꞌa ra hyäte a ꞌbʉ, nguetho bi thocpa rám hman a rán sʉiui ra Cristo. Xtá øhmbʉ ngue din ꞌyo ua rám hma, nɛ ya i ꞌyo ua rám hman a ya. 4 Ma zi tꞌʉhni ahʉ, yʉ́ tꞌʉhnigahʉ Oją. Ya dá tąfʉ ʉ yʉ hyäte pøngahyą, nguetho nuꞌa dí ꞌbʉhmbʉ, manꞌda ja rá tsꞌɛdi a xinda gueꞌa rán sʉiui Oją, ngue i ꞌbʉcua ja ra ximhäi. 5 Nu yʉ hyäte pøngahyą, yʉ́ mbɛfi ra ximhäi ʉ, nɛ guecua ja ra ximhäi bi nɛquidą yʉ́m hman ʉ, janangueꞌa i ømanho ra ximhäi ꞌbɛꞌa im man ʉ. 6 Pɛ nujʉ yʉ́ tꞌʉhnigahʉ Oją. Janangueꞌa høntꞌa toꞌo i pą a Oją i ømanho ma hmamhbʉ ʉ. Pɛ nuꞌʉ ngue hin yʉ́ tꞌʉhni Oją, hingui ømanho ma hmamhbʉ ʉ. Guepʉ na pąhmbʉ bʉya ndaꞌa i tɛnꞌna majuąni, nɛ ndaꞌa i tɛnꞌna him majuąni.Ran huɛ̨cate a Oją
7 Ma zi cu ahʉ, ndeꞌbʉ dan huɛ̨jʉ nꞌda ngu nꞌdajʉ. Nguetho nu ran huɛ̨cate bí ꞌyɛ̨pʉ ꞌbʉ Oją. Nɛ nuꞌa di huɛ̨c rá mijąꞌiui, gueꞌa bim ꞌbʉi maꞌdaꞌyo nangue Oją, nɛ dim pąhmi Oją a. 8 Pɛ nuꞌa hinꞌyʉ rán huɛ̨cate, hingui pą a Oją a, nguetho nuꞌa Oją ran huɛ̨cate a. 9 Oją bi ꞌyurcahʉ ran huɛ̨cate ꞌbʉ mambá pɛnhua ja ra ximhäi rá ꞌdatsꞌʉntꞌʉ bi yąnjʉ, nꞌdahma din jajʉ ra ꞌdaꞌyote. 10 Oją bi ꞌyurcahʉ ran huɛ̨cate ngue majuąni, nguetho bá pɛnhua rá Tsꞌʉntꞌʉ ngue bin däsɛ bi gurca ma tsꞌoquihʉ. Nɛ mada hangu gam bɛ̨mhbʉ Oją, pɛ njąmꞌbʉ da zä gam bɛ̨mhbʉ, tengu bʉ nam bɛ̨njʉ. 11 Ma zi cu ahʉ, nuꞌbʉ ɛmmɛ xʉn ngu rán huɛ̨cate bi ꞌyørgahʉ Oją, ndeꞌbʉ nɛjʉ dan huɛ̨jʉ nꞌda ngu nꞌdajʉ. 12 Hingui sä gan nuhʉ Oją nangue ma dähʉ. Pɛ mfądi bin ząm bʉ ja ma mbʉihʉ ꞌbʉ dadín huɛ̨jʉ. Nɛ bi bømanho rán huɛ̨cate i ørcahʉ bʉya. 13 Dí pąhmbʉ ngue dí ꞌbʉhmbʉ Oją, nɛ nu Oją bin ząm bʉ ja ma mbʉihʉ. Guehna dí pąhmbʉ, nguetho bi ꞌdajʉ rá Hogandąhi, 14 nɛje dí bɛ̨nꞌnahʉ nguetho dá nusɛhe rá Tsꞌʉntꞌʉ Oją, nɛ dí mamhbe majuąni bá pɛnh Oją ua ja ra ximhäi gue da yąnba yʉ́ te yʉ jąꞌi. 15 Nuꞌa toꞌo im ma ngue rá Tsꞌʉntꞌʉ Oją a ra Jesús, nuꞌa Oją bin ząm bʉ ja rá mbʉi, nɛ nuꞌa ra jąꞌi xim mi ꞌbʉhmi Oją a. 16 Dín nuhʉ rán huɛ̨cate Oją, nguetho dí ɛ̨cꞌyɛibahʉ a. Nu Oją ran huɛ̨cate a. Nuꞌa toꞌo ząi ɛ̨cꞌyɛi rán huɛ̨cate Oją, nɛꞌbʉ ząi di huɛ̨c rá mijąꞌiui, nuꞌa i ꞌbʉhmi Oją a, nɛ Oją bin ząm bʉ ja rá mbʉi a. 17 Nɛ nangue dí ꞌbʉhmbʉ Oją dí pąhmbʉ xʉn ho rán huɛ̨cate. Janangueꞌa dan johyahʉ ꞌbʉ bi zøn ra pa din ja ran juąnbi. Nguetho dí ꞌbʉhmbʉ tengutho ma Hmuhʉ ra Cristo i ꞌbʉhmi Oją, madagueꞌbʉ guexta dí ꞌbʉhmbʉ ua ja ra ximhäi. 18 Nuꞌa toꞌo i su ran juąnbi, i su nguetho hinga na pądi xʉn ho ran huɛ̨cate i ørpa Oją. Pɛ nu rán huɛ̨cate Oją di ꞌuecꞌa ra mbidi a. Pɛ nuꞌbʉ dín suhʉ, dí ɛ̨mhbʉ di ʉngahʉ Oją ꞌbʉ. 19 Dí øthʉ ran huɛ̨cate, nguetho mꞌbɛtꞌo bi huɛ̨gahʉ Oją. 20 “Dí numanho Oja,” sä dí ɛ̨mhbʉ, pɛ dadí ʉp ma cuhʉ. Dí fɛhnihʉ ꞌbʉ. Nguetho nuꞌbʉ hin dadí huɛ̨c ma cuhʉ gue ząntꞌa dín nuhʉ, hague dán zä ga numanhohʉ Oją gue njąmꞌbʉ dín nuhʉ. 21 Nɛ jaua rán tꞌɛ̨di Oją, bi xijʉ: “Nuꞌa toꞌo da numanho Oją, pɛ i jatho ngue nɛꞌa rá cu da numanho, nɛ di huɛ̨qui.”