Dí tąfʉ ra ximhäi nangue ma tꞌɛ̨cꞌyɛihʉ
5
Nuꞌʉ toꞌo gätho i ɛ̨cꞌyɛi gue bin jąꞌi Oją nɛ nꞌdatꞌa ra Jesucristo a, yʉ́ tꞌʉhni Oją ʉ. Nɛ gätho toꞌo i numanho Oją nɛꞌʉ yʉ́ tꞌʉhni Oją di huɛ̨cꞌʉ nguetho nꞌdatꞌa Oją yʉ́ Ta. 2 Nɛ nuꞌbʉ majuąni dín numanhohʉ Oją, nɛꞌbʉ dí øthʉ yʉ́n tꞌɛ̨di, dí pąhmbʉ bʉya ngue majuąni dadí huɛ̨c ma cuhʉ. 3 Nɛ nuꞌbʉ majuąni dín numanhohʉ Oją, ga øthʉ yʉ́n tꞌɛ̨di, nɛ nuꞌʉ yʉ́n tꞌɛ̨di hingui hɛ̨i. 4 Nguetho nuꞌʉ toꞌo bim ꞌbʉi maꞌdaꞌyo nangue Oją bin tꞌun ra tsꞌɛdi rá mbʉi gue da dąp ra ximhäi. Nɛ dí tąfʉ rá tsꞌɛdi ra ximhäi nangue dí ɛ̨cꞌyɛihʉ ra Cristo. 5 Toꞌo ngue i tąp rá tsꞌɛdi ra ximhäi. Nuꞌa gue i ɛ̨cꞌyɛi ngue rá Tsꞌʉntꞌʉ Oją a ra Jesús.Rá Hogandąhi Oją di bɛ̨ngahʉ rá Tsꞌʉntꞌʉ Oją a ra Jesús
6 Nu ra Jesucristo bi zøcua ja ra häi. Bin xixyą ra dehe a. Nɛ nꞌdatꞌa gue bi mbän rá ji ꞌbʉ mi du a. Nɛ hinga høntꞌa ngue bin xixyą ra dehe, pɛ nɛ bi mbän rá ji, ngue bi du. Nuꞌa ra Jesucristo, rá Thahni Oją a. Gueꞌa im ma majuąni rá Hogandąhi Oją nguetho hingui sä dim fɛhni a. 7 Hyu ʉ bí ꞌbʉh mahɛ̨tsꞌi im ma majuąni gue rá Tsꞌʉntꞌʉ Oją a ra Jesucristo. Nuꞌa nꞌda, ra Ta, nuꞌa nꞌda ram Hma, nuꞌa nꞌda rá Hogandąhi Oją, nɛ nꞌdatꞌa im manꞌʉ. 8 Nɛ hyu ʉ i urcahʉ majuąni ua ja ra ximhäi gue rá Tsꞌʉntꞌʉ Oją a ra Jesucristo. Nuꞌa nꞌda, rá Hogandąhi Oją, nuꞌa nꞌda rán xixyą ra Jesucristo, nuꞌa nꞌda, rán dąte ra Jesucristo. Nɛ gätho ʉ hyu nꞌdatꞌa i urcahʉ. 9 Dí ɛ̨cꞌyɛihʉ yʉ́m hman yʉ jąꞌi ꞌbʉ majuąni, pɛ manꞌda ja tsꞌɛdi tho ga ɛ̨cꞌyɛihʉ rám hman Oją. Nɛ bi man Oją gue rá Tsꞌʉntꞌʉ a ra Jesús. 10 Nuꞌa toꞌo ɛ̨cꞌyɛi rá Tsꞌʉntꞌʉ Oją, i pąsɛ mbo rá mbʉi gue majuąni a. Pɛ nuꞌa toꞌo hingui ɛ̨cꞌyɛi, i nubɛthąni Oją a ꞌbʉ, nguetho hingui ɛ̨cꞌyɛi a bi man Oją nangue rá Tsꞌʉntꞌʉ. 11 Nɛ i jaua a ram hma ngue bi ma, gue Oją bi ꞌdajʉ ra ꞌdaꞌyote maząi ꞌbʉ má ɛ̨cꞌyɛihʉ rá Tsꞌʉntꞌʉ. 12 Nuꞌa ꞌbʉhmi rá Tsꞌʉntꞌʉ Oją, i ja ra te maꞌdaꞌyo a, pɛ nuꞌa hingui ꞌbʉhmi rá Tsꞌʉntꞌʉ Oją, hingui ja ra te maꞌdaꞌyo a.
Dí pąhmbʉ dí pɛshʉ ra ꞌdaꞌyote maząi
13 Janangueꞌa dí otꞌahʉ gyʉ ꞌyɛ̨cꞌyɛihʉ a rá Tsꞌʉntꞌʉ Oją, nꞌdahma gui pąhmbʉ i jajʉ ra ꞌdaꞌyote. 14 Nɛ dadín johyahʉ gue dan yąhʉ Oją, dí pąhmbʉ i numanhojʉ. Nɛ nuꞌbʉ din thɛui rá pähä Oją a dí ähmbʉ, dí pąhmbʉ i ømanho ꞌbʉ dí yąhʉ a. 15 Nɛ nuꞌbʉ dí pąhmbʉ ngue ømanho, ga pąhmbʉ gue da ꞌyøtꞌa dí ähmbʉ ꞌbʉ. 16 Nuꞌbʉ dín nuhʉ nꞌda ma cuhʉ i øtꞌ ra tsꞌoqui, ngue him má zä bi hyąx ra tsꞌoꞌyu, ga äfʉ rá mate Oją nangue a. Nu Oją bʉya di japi ba pengui toꞌo bi ꞌyøtꞌ ra tsꞌoqui. Pɛ nuꞌbʉ ꞌboꞌo má zä bi hyąx ra tsꞌoꞌyu, pɛ hin dí ɛ̨n ahʉ ga äfʉ rá mate Oją nangue a. 17 Gätho ʉ hing yʉ́n thɛhʉ i øtꞌa nꞌda, ra tsꞌoqui a. Pɛ jaꞌbʉ øtꞌ ra tsꞌoqui nꞌda him má zä bi hyąx ra tsꞌoꞌyu, janangueꞌa ga äfʉ Oją bʉya. 18 Dí pąhmbʉ toꞌo gätho bim ꞌbʉi maꞌdaꞌyo nangue Oją, hin din ząm bʉ ja yʉ tsꞌoqui a. Nguetho i fäh rá Tsꞌʉntꞌʉ Oją a, nɛ hingui sä di ꞌuecꞌa ra zįthu bʉ ꞌbʉ Oją a. 19 Nɛ dí pąhmbʉ ngue yʉ́ tꞌʉhnigahʉ Oją. Nɛ dí pąhmbʉ i o rá tsꞌɛdi ra zįthu ʉ gätho miꞌda i ꞌbʉcua ja ra ximhäi. 20 Nujʉ dí pąhmbʉ bi zøcua ja ra ximhäi rá Tsꞌʉntꞌʉ Oją, nɛ nuꞌa bi jajʉ dá pąhmbʉ a majuąni. Nɛ dí ꞌbʉhmbʉ a majuąni nguetho dí ꞌbʉhmbʉ ra Jesucristo. Nɛ gueꞌa majuąni Oją a, nɛ gueꞌa di ꞌdajʉ ra ꞌdaꞌyote ma mbʉihʉ a gue njąmꞌbʉ da guadi. 21 Ma zi tꞌʉhni ahʉ, hin ga ɛ̨cꞌyɛihʉ yʉ hyäte oją. Nɛ høntꞌa dí xi ahʉ ya.