Ra Cristo bi ma majuąni ba ɛ̨h mahønꞌa
3
Ná yoho na ra søcuą dí otꞌahʉ ya, ma zi cuꞌahʉ. Nɛ nu gätho yoho yʉ søcuą nꞌdatꞌa dím bɛ̨ni manꞌda ga bɛ̨nꞌna ni hogan ꞌyomfɛ̨nihʉ. 2 Nꞌdamhma guim bɛ̨mhbʉ ʉ yʉm hma mi ma mamꞌbɛtꞌo ʉ yʉ́ pøngahyą Oją. Nɛ guim bɛ̨mhbʉ mam hmamhbe dá xiꞌahe, ma ꞌbäi gähe ma Hmuhʉ ra Jesucristo, nɛ ma pørpatehʉ a. 3 Mꞌbɛtꞌo thoho ga pąhmbʉ ꞌbɛꞌa din ja ꞌbʉ rán zɛgui yʉ pa. Di nɛqui ꞌda yʉ ꞌyʉspate da denthoho ra ꞌyu majuąni, gueꞌʉ ząi øtꞌ yʉ́ pähä zɛhɛ. 4 Nɛ da ꞌyɛ̨na: “Hapʉ gán yąhʉ ngue bi xiꞌahʉ ra Jesucristo ba ɛ̨h mahønꞌa, nɛ hin jąmꞌbʉ i sä ba ɛ̨hɛ̨. Nɛ gueꞌbʉ go mi ꞌbʉ ʉ ndu ma ngʉrba bøtahʉ mayaꞌbʉ thoho, guextaꞌa i ja, gueꞌbʉ go rá mbʉdi ra ximhäi,” da ꞌyɛ̨na. 5 Pɛ nuꞌʉ ꞌda i ɛ̨na, i ɛ̨na nguetho di pumbɛ̨ni tho ꞌbɛꞌa bin ja mayaꞌbʉ, nɛ hinguin nde da bądi, ngue bi juah ra ximhäi Oją nangue ra dąmbʉntꞌi. Nguetho xí ꞌyøtꞌ Oją mahɛ̨tsꞌi nɛ ra ximhäi nangue rám hma. Nɛ bi japi bi bøx pʉ ja ra dehe a ra häi, nɛ gueꞌa ra dehe ín ꞌyøtꞌ ra häi. 6 Pɛ guetꞌa ra dehe bi juah ra ximhäi mi ja, ngue bi mbʉntꞌi. 7 Nɛ nuya mahɛ̨tsꞌi nɛ ra ximhäi ngue i ja ya, Oją i sänni di juadi mahønꞌa. Pɛ i tøꞌmi da zøn ra pa ngue bi ma ba pɛnh ra sibi ua ja ra häi, gueꞌa ran ʉnbi da ꞌyøtꞌa Oją a nangue yʉ tsꞌomꞌbäi. 8 Ma zi cuꞌahʉ, hin ga pumbɛ̨ni thohʉ ngue nuꞌa dí ɛ̨mfʉ nꞌda mahuąhi njɛya, da zä da ꞌyɛ̨n Oją nꞌdapa tho bʉ nam bɛ̨n a, nɛ nuꞌa dí ɛ̨mfʉ nꞌdapa thoho, da zä da ꞌyɛ̨n Oją nꞌda mahuąhi njɛya bʉ nam bɛ̨n a. 9 Nɛ hingui dąnhyɛ̨i Oją tengu im man i ꞌda, guemhma da ꞌyøtꞌe ꞌbɛꞌa bi ma da ꞌyøtꞌe. Pɛ i tøgbahʉ Oją da zøni ga coh ma mbʉihʉ, nguetho in nde xínga nꞌda dam ꞌbɛhmbʉ. 10 Pɛ nuꞌbʉ bá ɛ̨h ra Hmu, tenguꞌbʉ ba ɛ̨ꞌa nꞌda ra bɛ̨ ꞌbʉ bin xui, hinga mfądi ꞌbɛꞌa ma ora da zøhø. Nɛ di juadi gätho ʉ di nɛqui mahɛ̨tsꞌi, ɛ̨mmɛ din thoni ndøspi, nɛ gätho ꞌbɛꞌa i ja da mbʉntꞌi ngue nám pa. Nɛ gätho ra häi, nɛ gätho ꞌbɛꞌa bi ꞌyøtꞌ yʉ jąꞌi ua ja ra häi, gätho din zø ʉ. 11 Janangueꞌa nte man tsꞌo da bɛ̨n ma mbʉihʉ, nɛ thocpa thoho gan numansuhʉ Oją, nguetho dí pąhmbʉ da mbʉntꞌ ra ximhäi ra sibi. 12 Nɛ nuya dín dømdahʉ da zøn ra pa bi man Oją, ngue da ꞌyuh mahɛ̨tsꞌi, nɛ dim ꞌbɛdi gätho jabʉ. Nɛ din hyɛgui ꞌbɛꞌa gätho i ja nangue ra sibi. Nɛ dí xønhdʉ din ja nꞌdihi a. 13 Nguetho dí tømdahʉ maꞌdaꞌyo mahɛ̨tsꞌi nɛ ra ximhäi, tengu bi ma majuąni Oją, ngue din ząm bʉ ran ho. 14 Janangueꞌa, ma zi cuꞌahʉ, nuꞌbʉ dí tømhbʉ ngue din ja, ga humbi gan nde da numanhojʉ ra Cristo ꞌbʉ bá ɛ̨hɛ̨ da ꞌyøtꞌ ran tsꞌʉtꞌabi. Nɛ nte man tsꞌoni, nɛ nte man dupate da dįngahʉ ꞌbʉ bá ɛ̨h pʉya. 15 Nɛ gam bɛ̨mhbʉ ngue i sɛt rá mbʉi Oją, i tøꞌmi dim pøꞌʉ ꞌbʉcua ja ra ximhäi. Tengu thoho bi ꞌyotꞌahʉ ma zi cuhʉ ra Pablo nangue rán ꞌyomfɛ̨ni bi un Oją. 16 Nɛ mbɛ gätho yʉ́ søcuą bi ꞌyoꞌtꞌi im ma tengu dí otꞌahʉ ya. Pɛ xʉn hɛ̨i da fądi ꞌbɛꞌa nam bønꞌi ꞌda yʉm hma bi ꞌyoꞌtꞌa ra Pablo. Nɛ ꞌbʉꞌi ꞌda him bin xädi nɛ him bin ząm bʉ ja ram hma. Janangueꞌa nuꞌbʉ sä im manꞌa rá tꞌohni ra Pablo, ogue miꞌda yʉ́ tꞌohni Oją, pɛ hinga gueꞌa bʉ na hma. Nɛ gueꞌa ím ꞌbɛꞌi ꞌda a. 17 Pɛ nuꞌahʉ guí pąhmbʉ ngue ngubʉ da ꞌyøtꞌi ꞌda yʉ jąꞌi. Janangueꞌa gam fähmbʉ hin da zixꞌahʉ bʉ rá ꞌyu Oją gmí ząmhbʉ, guepʉ i yą ʉ yʉ jąꞌi i honsɛ yʉ́m hmansɛ. 18 Pɛ manꞌda damí pąhmbʉ rá mate ma Hmuhʉ ra Jesucristo, nɛ ma pørpatehʉ a. Nɛ nuꞌa ga ɛ̨spahʉ a ya, nɛ gätho yʉ pa maząi. Nɛ gueꞌa gam bɛ̨mhbʉ a ya. Høntꞌa dí xiꞌahʉ ya.