Mi tsꞌʉtho ba ɛ̨h ra Jesucristo
22
Nɛ nuꞌa rám ꞌbɛhni Oją xø bi ꞌyurcä manꞌda mahønꞌa, dra Xuuagä. Ngue nꞌda ra dąthe mahoqui thoho ra dehe xʉn güe tengu ra xito, tꞌɛ̨mbi rá dehe ra temaząi. Nɛ bí nɛxpʉ ja rán thutsꞌi Oją nɛ ra Jesús ra Dɛꞌyo. 2 Nɛ bi thoꞌinde bʉ ja ra calle xʉn ndoho bʉ ja ra hnini. Nɛ nꞌda nꞌdanguadi mi ꞌbäpʉ yʉ za tꞌɛ̨mbi yʉ za gue di un ra te. Nɛ nuꞌʉ yʉ za din zʉdi, nꞌdazna ngu nꞌdazna maꞌdaꞌyo yʉn dätꞌo din zʉpʉ, janangueꞌa ꞌdɛmayo nidį din zʉdi nꞌdajɛya. Nɛ nuꞌʉ yʉ́ xi di un yʉ́n zaqui gätho yʉ jąꞌi. 3 Nɛ hinꞌyʉ ꞌbɛꞌa dí hnu rán tsꞌɛmbi Oją bʉ. Pɛ din ja bʉ rá tsꞌɛdi Oją nɛ rá tsꞌɛdi ra Jesús ra Dɛꞌyo. Nɛ gätho yʉ́ ꞌyɛ̨hɛ da dąnde ʉ nɛ da ꞌyørpa yʉ́ ꞌbɛfi. 4 Nɛ nuꞌʉ dim ꞌbʉpʉ da nu rá hmi Oją, nɛ gätho din ja rá thuhu Oją bʉ ja yʉ́ dɛ̨. 5 Nɛ hinꞌyʉ bʉ ra xui, janangueꞌa njon da hyom manꞌda ran nɛqui, xíng ra hyadi, nguetho guesɛ Oją ra Hmu di yozɛhɛ bʉ. Nɛ nuꞌʉ dim ꞌbʉpʉ din tsꞌʉtꞌabi gätho yʉ pa maząi. 6 Nɛ nuꞌa ram ꞌbɛhni bi xicä: “Gätho ram hma gá ꞌyøde, majuąni a, nɛ da zä da tꞌɛ̨cꞌyɛi gätho. Nuꞌa Oją ra Hmu, gueꞌa di un rá Hogandąhi yʉ́ pøngahyą, ya bá pɛncä ua drám ꞌbɛhnigä a, ngue ga xi ahʉ ꞌbɛꞌa din ja, gue yʉ́ ꞌyɛ̨hɛ ahʉ Oją. Nɛ him mayaꞌa din ja,” bi ꞌyɛ̨na. 7 “Dami ꞌyøhmbʉ ya,” ɛ̨nꞌa ra Jesús, “him mayaꞌa gue gua ɛ̨cä. Gan johyahʉ gätho ahʉ gue guí ɛ̨cꞌyɛ̨ihʉ ꞌbɛꞌa din ja, ntꞌoꞌtꞌi bʉ ja ra søcuą,” bi ꞌyɛ̨na. 8 Nɛ nugä dra Xuuagä, majuąni dá øde nɛ dá nugä ꞌbɛꞌa gätho bi tꞌurqui ngue dá oꞌtꞌä ua. Nɛ nuꞌbʉ mi guaꞌa ꞌbɛꞌa dá øcä nɛ ꞌbɛꞌa xí ꞌyurqui, dán dąnyahmu bʉ ja rá gua ram ꞌbɛhni mahɛ̨tsꞌi bi ꞌyurqui gätho, dí ɛ̨na gue ga thąnde. 9 Pɛ nu ram ꞌbɛhni bi xiqui: “O guí thąndegui, nguetho nugä dra ꞌyɛ̨hɛ̨gä tengu i, nɛ ni cuhʉ miꞌda yʉ pøngahyą, nɛ gätho miꞌda ʉ gue i ɛ̨cꞌyɛi ꞌbɛꞌa gá ꞌyorpʉ ja ra søcuą. Hønsɛ Oją gui thąnde,” bi ꞌyɛ̨na. 10 Nɛ xø bi xicä ram ꞌbɛhni bʉya: “O guí pɛsꞌ thoho na gá ꞌyoꞌtꞌi, ngue ꞌbɛꞌa din ja, nguetho him mayaꞌa din ja. 11 Nɛ nuꞌʉ toꞌo i øtꞌ ran tsꞌo, thocua thoho da ꞌyøtꞌ ran tsꞌo, nɛ gätho toꞌo i øtꞌ ran tsꞌomꞌbäi, thocua thoho da ꞌyøtꞌe. Pɛ nuꞌʉ toꞌo i øtꞌ ran ho, thocua thoho da ꞌyøtꞌ ran ho, nɛ toꞌo mahoqui thoho yʉ́ mbʉi thocua thoho gue xtán ho yʉ́ mbʉi,” bi ꞌyɛ̨nꞌa rám ꞌbɛhni Oją mahɛ̨tsꞌi ꞌbʉ mi xiqui. 12 Nɛ bi ꞌyɛ̨ngä ra Jesús bʉya: “Nɛ guehna dí xi ahʉ, him mayaꞌa ba ɛ̨cä. Nɛ nꞌda ngu nꞌda ga un rán thɛui ꞌbɛꞌa gätho bi ꞌyøtꞌe. 13 Nugä gätho dá dʉꞌmi nɛ ga juacä ra ꞌbɛfi dá dʉꞌmi, dra mbʉdigä nɛ dran zɛguigä, ząi dám ꞌbʉi nɛ dam ꞌbʉi maząi. 14 Mająpi thoho gätho mahoqui yʉ́ mbʉi nangue Oją, tenguꞌbʉ mꞌbeni yʉ́ pahni. Janangueꞌa i ja yʉ́n tꞌɛ̨di da yʉrpʉ ja yʉ́ goxthi ra hnini. Nɛ nuꞌʉ toꞌo da zä da yʉrpʉ, da zä da zi yʉ́n dätꞌo yʉ za gue tꞌɛ̨mbi yʉ za di un ra temaząi. 15 Pɛ hingui sä da yʉrpʉ gätho ʉ ngue bi ꞌuegue nangue Oją. Nɛ da gopʉ thi ʉ gätho i yąhʉ yʉ zįthu, nɛ gätho yʉ ꞌyomtꞌɛ̨ni, nɛ gätho yʉ hyodu, nɛ gätho i thąnde ꞌbɛꞌa him majuąni, nɛ gätho yʉ jąꞌi gue di ho da man yʉ fɛhni, hingui sä da yʉrpʉ ʉ. 16 Nugä dra Jesúsgä, dá pɛnhdä bʉ mam ꞌbɛhnigä gue da xi ahʉ gyʉ ꞌyɛ̨cꞌyɛihʉ, gue ꞌbɛꞌa gá ꞌyorpʉ ja ra søcuą. Nugä dram bomꞌbɛtogä ra David, nɛ tenguꞌbʉ dra Dąsø dín ꞌyoꞌbe ran nɛqui,” bi ꞌyɛ̨nꞌa ra Jesús. 17 “Ba ɛ̨hmbʉ gätho ahʉ,” ɛ̨nꞌa rá Hogandąhi Oją, nɛꞌa rá xisu ra Dɛꞌyo ɛ̨na. Nɛꞌʉ gätho gue i øde, da ma: “Ba ɛ̨hmbʉ.” Nɛ ba ɛ̨cua gätho i tuthe, nɛ gui sihʉ ra dehe gue di un ra temaząi, nɛ hin gui juthʉ a.Ran zofo ran zɛgui
18 Nɛ nuya dí xi ahʉ, gätho ahʉ guí nuhʉ ya yʉm hma i jaua, ngue i ma ꞌbɛꞌa din ja, o gue ahʉ guí øhmbʉ ꞌbʉ i hman ya yʉm hma ntꞌoꞌtꞌi ua, pɛ nuꞌbʉ guí ɛ̨na gui hyuspahʉ miꞌda yʉm hma, pɛ da hyusꞌahʉ Oją ʉ yʉn ʉnbi im mangua ja ra søcuą ꞌbʉ. 19 O nuꞌbʉ guí ɛ̨mhbʉ him majuąni ꞌda yʉm hma ntꞌoꞌtꞌi ua, ɛ̨na gueꞌbʉ gdí ꞌuejʉ ʉ, pɛ Oją di ꞌuecꞌahʉ yʉn jąpi im mangua ngue hin di ja ahʉ gui cʉrpʉ ja ra hogahnini, nɛ hin di ja ahʉ gui sifʉ yʉ́n dätꞌo a ra za di un ra temaząi. 20 Nɛ nuꞌa ra Jesús gue bi man ya yʉm hma gätho i jaua, i ɛ̨m bʉya, “Majuąni ba ɛ̨cä nꞌdihi,” bi ꞌyɛ̨na. Nɛ gueꞌa dín ndeꞌe, nɛ dí xi a i, ba ɛ̨hɛ ma Hmu i Jesús. 21 Nɛ gätho ahʉ dín nde guin nuhʉ rán jąpi a ma Hmuhʉ ra Jesús. Nɛ høntꞌa dí xi ahʉ ya.