Nu yʉ ngʉrpi bi ma da bɛntꞌ ra Jesús
26
Nɛ nuꞌbʉ mi gua a bi man ra Jesús, bi ꞌyɛ̨ngähe:2 ―Nuya man yopa thoho di ꞌbɛdi ngue din ja ra dąmpɛti a ran dąbaxjua, nɛ nubʉya da mba ma dägä ngue da mba ma cuatigä bʉ ja ra za, guecä dán jąꞌigä ua ja ra ximhäi, bi ꞌyɛ̨ngähe ra Jesús.
3 Pɛ nuꞌʉ ma ngʉrpihe ngue yʉ hmumbäją, nɛ yʉ xänbate niją, nɛ yʉ dącꞌyɛi, bim pɛti bʉ mbo rá mbäꞌtꞌi rá ngu ra Caifás, nuꞌa mi hmumbäją a ra jɛya a. 4 Nɛ bi nyąsɛ ʉ, bi ma ndaꞌa ní fɛhni da xi a ra Jesús ngue da bɛntꞌi da hyo. 5 Nɛ bi ma, ꞌbɛ da gua a ra dąmpɛti, ja da tho a. Nguetho bi zu din junthʉ yʉ jąꞌi mi ꞌyo bʉ ja ram pɛti.
Nꞌda ra xisu bi hocpa rá ngøcꞌyɛi ra Jesús
6 Nɛ nuꞌbʉ mi mbeng bʉ ra hnini Betania a ra Jesús, bi zøm bʉ ja rá ngu a ra Simón mí hɛ̨mb ra tꞌaxcaꞌya mamꞌbɛtꞌo. 7 Nɛ bi hyupʉ mi ja a rá mɛxa a, ɛ̨na din sihmɛ. Bi zøm bʉ nꞌda ra xisu mí tu nꞌda ra xaro xʉm hmadi, án tꞌøtꞌe ra do ra alabastro. Nɛ mi po bʉ ra ꞌyɛ̨thi yʉmanꞌu, nɛꞌa ɛ̨mmɛ di muui a. Nɛ nuꞌbʉ mi zøm bʉ a ra xisu bʉ i hudi, bi xoꞌtsꞌa rá ꞌyɛ̨thi bi xispa rá yą ra Jesús. 8 Nɛ dán cuɛhe ꞌbʉ mán nuhe ꞌbɛꞌa bi tꞌørpa ra Jesús, nɛ dá ɛ̨mhbe:
―Ndetho bi xispa ra ꞌyɛ̨thi, 9 xʉn ho ꞌbʉ xta ꞌbä, xtá mba ma darpi yʉ hyoya a ra mbɛti, dá ɛ̨mhbe bʉya.
10 Nɛ bi bąꞌa ra Jesús ꞌbɛꞌa dá bɛ̨mhbe, nɛ bi ꞌyɛ̨nje:
―Hanja gní ʉnbahʉ rá mbʉi na ra xisu, nɛ xʉn ho ꞌbɛꞌa bi ꞌyørque. 11 Nu yʉ hyoya nząi gamꞌbʉhmbʉ ua ʉ, nɛ høntꞌa go má pa da zä gui fäxhʉ ʉ. Pɛ nugä hin dan ząngä ua, bi ꞌyɛ̨ngähe ra Jesús. 12 Nuna ra xisu bi hoga ma ngøcꞌyɛi ꞌbʉ mi xiscä ra ꞌyɛ̨thi, ngue da mba ntꞌäguigä bʉ ja ran ꞌyägui. 13 Nɛ majuąni dí xi ahʉ, hønbʉ go hapʉ da hman a rán ho maꞌdaꞌyo Oją, nɛhna da hman na bi ꞌyørcä na ra xisu, nꞌdahma hønbʉ go hapʉ da fɛ̨nꞌa, bi ꞌyɛ̨nꞌa ra Jesús.
Nu ra Judas bi ma di dä ra Jesús
―Hangu gui ꞌdajʉ ngue ga dä ahʉ ra Jesús, bi ꞌyɛ̨mpꞌʉ.
Nɛ ꞌbexgue bi unni ꞌdäte ma ꞌdɛtꞌa yʉ mbɛti ngue ra tꞌaxi bʉya. Nɛ xø bi mbeng bʉ ꞌbʉ a ra Jesús bʉya. 16 Pɛ ɛ̨mmɛ mí honi ꞌbɛꞌa ní ora da zä dí dä a ra Jesús.
Rán tsꞌihmɛ ra Hmu
17 Nɛ nuꞌa rá mbʉdi pa ra dąmpɛti nangue ran dąbaxjua ꞌbʉ ząi dí sihe a ra hmɛ hinguin ꞌyoui ra íxi, ngue dyʉ judíohe, dyʉ israelhe, dá änhde ra Jesús yʉ́ xädigähe:
―Hapʉ guín nde ga hoje a rán tsꞌihmɛ ram baxjua ga sihʉ ya, dá ɛ̨mfe.
18 Nɛ bi xi ʉ yoho ma mixädihe a ra Jesús, nɛ bi ꞌyɛ̨mpꞌʉ:
―Ní mbɛ bʉ ja ra hnini Jerusalén nɛ gui xihmi a ran ꞌyohʉ, gui ꞌyɛ̨nui: “Nugä, ya mi tsꞌʉtho da zøn ma ora, nɛ dí nde ga si rán sihmɛ ram baxjua bʉ ja ni ngu, nɛ ʉ ma xädigä, i ɛ̨nꞌa bá pɛngähe,” gui ꞌyɛ̨nui.
19 Nɛ bi ꞌyøtꞌa bi xi ʉ bʉya, nɛ bi hocꞌa rán zibde a ram baxjua ʉ bʉya. 20-21 Nuꞌbʉ mín de bʉya, dá sømhbe bʉ Jerusalén, ꞌdarpʉ dán sihmɛhe bʉ ja ra mɛxa ra Jesús, nɛ bi ꞌyɛ̨nje:
―Majuąni dí xi ahʉ, i ꞌbʉ a nꞌda ahʉ ngue gui däjʉ, bi ꞌyɛ̨nje.
22 Nɛ ɛ̨mmɛ bi du ma mbʉihe, nɛ nꞌda ngu nꞌdagähe dá ɛ̨mfe:
―Grá hmu, ha guengä ga dä i, dá ɛ̨mfe nꞌda ngu nꞌdaje.
23 Nɛ bi dą a ra Jesús:
―Gueꞌa dí comꞌbe ma mbohi ua dí sihmɛhʉ, gueꞌa di dägä a, bi ꞌyɛ̨m bʉya. 24 Guecä ngue dán jąꞌigä ua ja ra ximhäi, da tꞌørcä ꞌbɛꞌa gätho i mam bʉ ja rám hma Oją ya, pɛ í huɛ̨hi maha a ran ꞌyohʉ ngue nuꞌa di dägä. Manꞌda xʉn ho ꞌbʉ hin xtím ꞌbʉ a, bi ꞌyɛ̨nꞌa ra Jesús.
25 Nɛ bi dąꞌa ra Judas bʉya:
―Xänbate i, ha guecä.
―Hąha, gueꞌe, bi ꞌyɛ̨mpꞌa ra Jesús.
26 Nɛ nubʉya bi hyącꞌa ra hmɛ ra Jesús nɛ bi ꞌyäp rán jąpi Oją, bi xɛm bʉya, bi darcähe a.
―Dami sihʉ na, guehna nim bøni ma ngøcꞌyɛi na, bi ꞌyɛ̨nje.
27 Nɛ bi dɛcꞌa ra vaso mi po rán gui ra uva bʉya, bi un ra jamadi Oją mahønꞌa, nɛ bi ꞌdaje a ra vaso, bi ꞌyɛ̨nje:
―Gätho dami sihʉ, 28 guehna nam bøni, ma jigä ngue bi hocꞌa ra ꞌdaꞌyo ꞌyu bi ꞌyøtꞌahʉ Oją na. Nɛ dim fäni dí punba yʉ́ tsꞌoqui yʉ jąꞌi. 29 Nɛ dí xi ahʉ, him manꞌdandį ga sigä ra guindätꞌä jagueꞌbʉ bi zøn ra pa ga sihʉ maꞌdaꞌyo bʉ di manda rá tsꞌɛdi ma Ta, bi ꞌyɛ̨ngähe ra Jesús.
Ra Jesús bi bądi din cønꞌa ra Pedro
30 Nɛ dán tuhmbe a ra thuhu nɛ dá mbähmbe bʉ ja ra nyuni Olivos bʉya. 31 Nɛ bi ꞌyɛ̨ngähe ra Jesús mahønꞌa:
―Dí pądi, nuꞌbʉ ni xui, gätho gui soga thohohʉ, bi ꞌyɛ̨ngähe ra Jesús. Nɛ gueꞌa ntꞌoꞌtꞌi bʉ ja rám hman Oją, i ɛ̨na: “Ga ho ra mbändɛꞌyo nɛ din ꞌuɛ̨xtꞌʉ yʉ́ dɛꞌyo bʉya,” i ɛ̨n Oją, bi ꞌyɛ̨nꞌa ra Jesús. 32 Pɛ nuꞌbʉ dá thąmbɛ̨nigä, ga mbagä bʉ Galilea ní tįn ahʉ bʉ, bi ꞌyɛ̨ngähe ngue yʉ́ xädigähe.
33 Nɛ bi ꞌyɛ̨nꞌa ra Pedro:
―Madagueꞌbʉ gätho da ꞌuegue pɛ nugä, hinꞌnagä, bi ꞌyɛ̨nꞌa.
34 Bi dą a ra Jesús:
―Majuąni dí xi i, guetꞌa ra xui i jabʉya ná hyundį xquí cønc ꞌbʉ bi mbah ra øni.
35 Nu ra Pedro bi dąti mahønꞌa:
―Madagueꞌbʉ ꞌdarpʉ ga tuui, pɛ njąmꞌbʉ ga cønꞌi, bi ꞌyɛ̨na.
Nɛ nꞌdatꞌa gätho dá mamhbe ngue hin ga ꞌuehmbe ʉ ma mixädihe.
Ra Jesús bi du rá mbʉi bʉ ja ra nuąndätꞌä Getsemaní
36 Nɛ nuꞌbʉ má sømhbe bʉ ra nyuni Olivos, dá cʉthe a ra Jesús bʉ ja ra nuąndätꞌä mí ɛ̨mbi Getsemaní.
―Dami huhmbʉ ua ya, ga mbagä ua njongua tsꞌʉ, da nyąꞌbe Oją ma Ta, bi ꞌyɛ̨nje.
37 Nɛ hyu ʉ ma mixädihe bi zitsꞌi, bi zixꞌa ra Pedro nɛꞌʉ yoho yʉ́ tsꞌʉntꞌʉ ra Zebedeo. Nɛ ɛ̨mmɛ manꞌda bi du rá mbʉi a ra Jesús. 38 Nɛ bi ꞌyɛ̨mpꞌʉ ma mixädihe min ꞌyohʉ:
―Ɛ̨na da føh ma mbʉi a ra dumbʉi, ɛ̨na ga tugä. Dami tøcpahʉ, ꞌdatꞌa dan äthąhʉ, bi ꞌyɛ̨mpꞌʉ.
39 Nɛ xø bi dąm mi tsꞌʉ ra Jesús bʉ mi huhmbʉ ʉ, nɛ bin dąnyahmu bʉ, bi nyeꞌma häi, bi nyąui Oją, bi ꞌyɛ̨mbi:
―Ma Ta i, nuꞌbʉ da zä, dami japi hin gan nugä a ra mbohi xcá sänni; pɛ hin dín nde ma pähä zɛhɛ pɛ høntꞌa go ni pähä zɛhɛ gui ꞌyøtꞌe, bi ꞌyɛ̨mpꞌa Oją.
40 Nɛ bá peng bʉ mí hu ʉ xí zopʉ bʉya, nɛ mí ą ʉ. Nɛ bi ꞌyɛ̨mpꞌa ra Pedro:
―Ha xínga nꞌda zi ora xquí sɛthʉ a ra tꞌąha, ngue ꞌbɛ xcán hyʉmhbʉ tsꞌʉ. 41 Damin äthąhʉ nɛ gui nyąhʉ Oją, guepʉ da zä hin hapʉ gui tąnjʉ ꞌbʉ bi tsꞌä ahʉ ya, nguetho nu ní mbʉi nꞌda i ja ra pähä nangue Oją, pɛ nu ní ngøcꞌyɛi nꞌda xʉn güentꞌi thoho.
42 Nɛ ná yondį bʉya bi mba bi nyąui Oją mahønꞌa:
―Ma Ta i, nuꞌbʉ ya hin da zä ga socä a xcá sänni, pɛ høntꞌa ni pähä zɛhɛ gui ꞌyøtꞌe, bi ꞌyɛ̨nꞌa ra Jesús.
43 Nɛ xø bi mbeng bʉ mi ꞌbʉ ʉ ma mixädihe. Xø mí ątho ꞌbʉ xø mi zøm bʉ mahønꞌa, nguetho ɛ̨mmɛ mí nde tꞌąha ʉ. 44 Nɛ xø bi zopʉ ʉ mahønꞌa, ya ná hyundį bʉya bi mbengui di nyąui Oją, nɛ guextaꞌa bi ma. 45 Nɛ xø bi mbeng bʉ mí ꞌbʉh ma mixädihe mahønꞌa, nɛ bi ꞌyɛ̨mbi:
―Nuya, ꞌdaꞌangutho ꞌbʉ gán ąhmbʉ ya o hinꞌna, nguetho ya bi zøn ra ora da mba ma dägä bʉ ꞌbʉh yʉ tsꞌomꞌbäi, guecä dán jąꞌigä ua ja ra ximhäi. 46 Dami ndanshʉ, ga mbähä ba nuhʉ ya ba ɛ̨cua ngue di dägä, bi ꞌyɛ̨mpꞌʉ.
Bi fɛntꞌa ra Jesús
47 Nɛ guextaꞌa mí yąhʉ ʉ ma mixädihe ꞌbʉ mi zøm bʉ a ra Judas, nꞌda ma mixädihe dí ꞌdɛꞌmayoho gähe. Nɛ bán ꞌyohʉ xʉn ngu yʉ jąꞌi ba hyą yʉ́ juai nɛ yʉ tsꞌąza. Nɛ gueꞌʉ yʉ́m ꞌbɛhni yʉ hmumbäją nɛ yʉ dącꞌyɛi, ma ngʉrpa judíohe. 48 Nɛ nuꞌa di dä ra Jesús bi xi a nꞌda ran tꞌuti da ꞌyøtꞌ ꞌbʉ bi zøm bʉ: “ Nuꞌa ga sʉs ꞌbʉ dán zɛnguaꞌbe, gueꞌa guim bɛnthʉ a,” bi ꞌyɛ̨nꞌa ra Judas. 49 Janangueꞌa nuꞌbʉ mí zøm bʉ ꞌbä a ra Jesús, bi ꞌyɛ̨mbi:
―Xʉde ya ꞌbʉ, grá xänbate , bi ꞌyɛ̨mbi.
―Xiꞌe nꞌyø, ha gueꞌa gní ꞌyɛ̨ a.
Nɛ nuꞌʉ miꞌda bʉya bi hyäm bʉ ꞌbä a ra Jesús nɛ bi bɛntꞌi.
51 Nɛ nuꞌa nꞌda ma mixädihe min ꞌyohʉ ra Jesús, bi cꞌosꞌ rá juai nɛ bi zɛcpa rá gu a rá ꞌyɛ̨hɛ ra hmumbäją. 52 Nɛ bi ꞌyɛ̨nꞌa ra Jesús bʉya:
―Dami pɛꞌtsꞌa ni juai bʉ ja rán tꞌo. Nuꞌʉ din tuhni nangue ra juai, nɛꞌʉ dí du ra juai ʉ, bi ꞌyɛ̨mpꞌa. 53 Ha guí ɛ̨na hin xtan zä ga äpꞌa rám fätsꞌi Oją ma Ta nɛ ba pɛnhua ꞌdɛꞌmayo muntsꞌi yʉ́m ꞌbɛhni da yąngui, bi ꞌyɛ̨mpꞌa nꞌda ma mixädihe. 54 Pɛ nuꞌbʉ da gueꞌa xcá mangä a, hague dán zä ga jąꞌtsꞌä a bi man rá tꞌohni Oją, ngue ꞌbɛꞌa i jatho din ja, bi ꞌyɛ̨nꞌa ra Jesús.
55 Nɛ bi ꞌyɛ̨mpꞌʉ yʉ jąꞌi bʉya:
―ꞌBɛꞌa guí homhbʉ ua ngue guí hą ni juaihʉ nɛ ni zahʉ. Ha guí ɛ̨mhbʉ drá bɛ̨gä, nɛ nyaꞌa thoho dá xänꞌnahʉ bʉ ja ra dąniją nɛ njąmꞌbʉ gá bɛndgahʉ bʉ, bi ꞌyɛ̨mpꞌʉ. 56 Pɛ gueꞌa din ja a tengu bi manꞌʉ yʉ́ pøngahyą Oją ꞌbʉ mayaꞌbʉ, bi ꞌyɛ̨nꞌa ra Jesús.
Nɛ nugähe bʉya dyʉ xädigähe, ꞌbexgue dá ꞌdahmbe,dá sohmbe bʉ ra Hmu.
Bi juąnba a ra Jesús ʉ yʉ́ ngʉrpi yʉ judío
57 Nɛ bi bɛntꞌa ra Jesús, bá si bʉ ꞌbʉh ra Caifás, ngue ra ngʉrpa mbäją. Nɛ ya xím pɛti gätho ma xänbate nijąhe nɛ yʉ dącꞌyɛi, ma ngʉrpihe dyʉ judíohe. 58 Nɛ bi dɛnꞌna ra Pedro bʉya pɛgue a ná ꞌbɛjua thoho, bi zøm bʉ ja rá ngunꞌyu a ra hmumbäją bʉ hapʉ xí zønꞌa ra Jesús. Nɛ ꞌdarbʉ bi hyuhmbʉ ʉ yʉ asmayo, ngue in nde da nu a da tꞌørpa a ra Jesús.
59 Nɛ nuꞌʉ yʉ hmumbäją nɛ yʉ dącꞌyɛi nɛ gä miꞌda ma ngʉrpihe dyʉ judíohe, dyʉ israelhe, mi honꞌa nꞌda ra fɛhni ngue da zä dí yąpꞌa nɛ da hyo. 60 Pɛ guehma nte bi dįnbi, madagueꞌbʉ xʉn ngu ʉ bin juąnni, bi ꞌyɛ̨mbi majuąni ʉ yʉ́ fɛhni. Nɛ mꞌbɛjua bʉya, bi zøm bʉ yoho yʉn ꞌyohʉ din testigo, 61 nɛ bi ꞌyɛ̨nꞌʉ:
―Nuna ran ꞌyohʉ na bi ꞌyɛ̨na: “Nugä da zä ga xoꞌtꞌra dąniją nɛ man hyupa thoho da zä ga høe mahønꞌa,” bi ꞌyɛ̨na, bi ꞌyɛ̨nꞌʉ bin juąn bʉ.
62 Nɛ bi ndancꞌa ra hmumbäją bʉya bim ꞌbäi, bi tꞌɛ̨mpꞌa ra Jesús:
―Hanja hin guí thąti ꞌbɛꞌa i man ya yʉn ꞌyohʉ.
63 Pɛ nu ra Jesús bin hɛ̨tho. Nɛ bi ꞌyɛ̨nꞌa ra hmumbäją bʉya:
―Nangue rá thuhu Oją mahɛ̨tsꞌi, dami xije ꞌbʉ majuąni gueꞌe grá Thahni, grá Cristo, rá Tsꞌʉntꞌʉ i Oją, bi tꞌɛ̨mpꞌa ra Jesús.
64 Bi dą a ra Jesús bʉya:
―Gueꞌa gám ma. Nɛ dí xi ahʉ, guin nujʉ, guecä dán jąꞌigä ua ja ra ximhäi, dam mixtegä ga comꞌbe rá tsꞌɛdi Oją tąte thoho rá tsꞌɛdi. Nɛ guin nujʉ ꞌbʉ bá cącä mahɛ̨tsꞌi mahønꞌa, ba ɛ̨cä bʉ ja yʉ güi, bi tꞌɛ̨mpꞌa ra hmumbäją.
65 Nɛ nu ra hmumbäją bʉya, bi dʉnsɛ rá pahni. Nam bøni ɛ̨mbi hingui ɛ̨spa Oją ra Jesús nangueꞌa bi ma. Nɛ bi ꞌyɛ̨na:
―Nuna ran ꞌyohʉ na, bi man ra tsꞌore nangue Oją. Him man ga homhbʉ yʉ testigo. Nɛ gätho gahʉ dá øhmbʉ a bi ma. 66 ꞌBɛꞌa guí ndehʉ ga øthʉ ya, bi tꞌɛ̨mpꞌʉ yʉ́ mingʉrpihʉ.
Bi dą ʉ:
―Nuna i ja rá tsꞌoqui, i jatho da du, bi ꞌyɛ̨nꞌʉ.
67 Nɛ nubʉya, ꞌdahma ꞌdanꞌyo bi tꞌørpa ra Jesús. Bi zox ʉ ꞌda, bi mbɛꞌmi ʉ miꞌda , bi mbɛnpa rá hmi ʉ miꞌda, 68 bi ꞌyɛ̨mbi:
―Nuꞌbʉ majuąni grá Thahni i Oją, ngue ra Cristo, dami xije toꞌo bi mbɛpꞌi i.
Nɛ ɛ̨mmɛ bi denthoho.
Ra Pedro bi gønꞌa ra Jesús
69 Nɛ nu ra Pedro mi hupʉ thi bʉ ja ra ngunꞌyu, nɛ nu nꞌda ra xisu rá ꞌyɛ̨hɛ ra hmumbäją, bi mba bʉ hu a ra Pedro, bi ꞌyɛ̨mbi:
―Ɛ̨na nɛꞌe gmín ꞌyohʉ na ra Jesús ra mɛngu Galilea, bi ꞌyɛ̨mpꞌa ra Pedro.
70 Nɛ bi dąꞌa ra Pedro, bin cøni:
―Hin dí pądi, bi ꞌyɛ̨nꞌa.
Nɛ gätho ʉ mi ꞌbʉpʉ bi ꞌyø a bi man ra Pedro.
71 Nɛ nuꞌbʉ mi nde da bønꞌa ra Pedro, bi nu manꞌda ra xisu bʉya nɛ bi ꞌyɛ̨mpꞌʉ mí ꞌbʉpʉ:
―Nuna ran ꞌyohʉ na min ꞌyoui ra Jesús, ra mɛngu bʉ Nazaret, bi ꞌyɛ̨nꞌa ra xisu.
72 Nɛ xø bin cønꞌa ra Pedro:
―Majuąni dím mangä ngue hin dí pącä a ran ꞌyohʉ guím ma, bi ꞌyɛ̨mpꞌa ra xisu.
73 Mꞌbɛjua bʉya nu ʉ ꞌda mi ꞌyo bʉ, bi mba bʉ ꞌbäh ra Pedro, nɛ bi ꞌyɛ̨mbi:
―Majuąni maha, nɛꞌe gmín ꞌyohʉ a, mfądi thoho ni ndehʉ nɛ ꞌdaꞌangu bʉ gna yąhʉ a, bi ꞌyɛ̨mpꞌa.
74 Nɛ ntsꞌɛdi bi mam bʉya nɛ bin juąnni, bi ꞌyɛ̨na:
―Oją i pądi majuąni hin dí pącä a ran ꞌyohʉ guí mamhbʉ, bi ꞌyɛ̨nꞌa ra Pedro.