Nꞌda ran tꞌuti nangue yʉ hmute xtí hyʉn yʉn thąti
25
Nɛ xø bi ꞌyɛ̨na:―Nuꞌbʉ bi ꞌyøtꞌ ran tsꞌʉtꞌabi Oją, din ja tengu bin ja ꞌbʉ min ja nꞌda ran thąti. Nuꞌa toꞌo gä bin sä, bi thopʉ mbo, pɛ nuꞌʉ him bin sä, bi gopʉ thi ʉ. Nuꞌbʉ min ja ran thąti, ꞌdɛtꞌa yʉ hmute bi mba, ɛ̨na xtín hyʉmhbʉ ʉ din thąti. Nɛ bá thɛ yʉ́ bombilla mi tømꞌma ran ꞌyohʉ din thąti. 2 Pɛ nuꞌʉ cʉtꞌa yʉ hmute yʉ ꞌyąmbʉi ʉ, nɛ nuꞌʉ mi cʉtꞌa bin ꞌyomfɛ̨ni ʉ. 3 Nɛ nuꞌʉ yʉ ꞌyąmbʉi him bi dux manꞌda ra sibi ngue xta xirpa yʉ́ bombilla ꞌbʉ bin the a po bʉ. 4 Pɛ nuꞌʉ bin ꞌyomfɛ̨ni, bi dux yʉ́ sibi ngue da xirba rá bombilla ꞌbʉ bin the a po bʉ. 5 Nɛ nuꞌa ran ꞌyohʉ him ꞌbe bi zøm bʉ. Nɛ nu yʉ døꞌmate bi zʉh ra tꞌąha ʉ. 6 Nuꞌbʉ made ra xui bi ꞌyø a nꞌda ra nde bi ꞌyɛ̨na: “Ya ba ɛ̨cua ran ꞌyohʉ, ndanshʉ, ba thąhmbʉ,” bi ꞌyɛ̨na. 7 Gätho bi ndang bʉya nɛ bi hoc yʉ́ sibi ʉ. 8 Pɛ nuꞌʉ yʉ ꞌyąmbʉi, bi ꞌyɛ̨mpꞌʉ bin ꞌyomfɛ̨ni: “ꞌDaje tsꞌʉ ni sibihʉ nguetho i nde da huɛ̨t ma bombillahe,” bi ꞌyɛ̨nꞌʉ. 9 Pɛ bi dą ʉ bi dux yʉ́ sibi: “Hin da zä, nguetho nuꞌbʉ ga ꞌda ahe go da huɛ̨tꞌ ma sibihʉ ꞌbʉ. Pɛ xʉn ho ꞌbʉ gui mbähä gba tämhbʉ.” 10 Pɛ nuꞌbʉ mi mba ba tän ra sibi, ꞌbexgue bi zøm bʉ a ran ꞌyohʉ din thąti. Nɛ nuꞌʉ yʉ hmute bi dux yʉ́ sibi bi yʉrpʉ mbo ngue da nu ra ngo ran thąti, nɛ ꞌbex bi mba njutꞌi ra goxthi bʉya. 11 Nɛ nuꞌbʉ mi zøm bʉ ʉ xí mba bá tän ra sibi, bi nu ngue njutꞌi tho ra goxthi, nɛ bi mba ʉ, bi ꞌyɛ̨nꞌʉ: “Gra hmu, grá hmu, dami xoqui,” bi ꞌyɛ̨nꞌʉ. 12 Pɛ nuꞌa ra hmu bi dątꞌʉ: “Hin dí padi toꞌo ahʉ,” bi ꞌyɛ̨mbi, nɛ him bi xocpi, bi ꞌyɛ̨nꞌa ra Jesús.
13 Nɛ bi ꞌyɛ̨nje ra Jesús bʉya:
―Gueꞌa dí xi ahʉ, ndeꞌbʉ gan äthąhʉ nguetho hin guí pąhmbʉ a ra pa ba pengä ua, guecä dán jąꞌigä ua ja ra ximhäi, bi ꞌyɛ̨nꞌa ra Jesús ꞌbʉ mí ꞌyɛ̨ngähe.
Nꞌda rán tꞌuti yʉ ꞌyɛ̨hɛ bi tsꞌocpa ra mbɛti
14 Nɛ manꞌda ran tꞌuti bi man ra Jesús, nɛ bi ꞌyɛ̨na:
―Nuꞌbʉ bi ꞌyøtꞌ ran tsꞌʉtꞌabi Oją, da ꞌyøtꞌe tengu bi ꞌyøtꞌa nꞌda ran ꞌyohʉ ꞌbʉ mi zonꞌndʉ yʉ́ ꞌyɛ̨hɛ, bi ꞌyänꞌna rá mbɛti xí zocpi. Nguetho nuꞌbʉ mí mba nꞌdanni nꞌda ra häi, bi zonꞌndʉ yʉ́ ꞌyɛ̨hɛ da zocpa rá mbɛti.
15 Nu nꞌda rá ꞌyɛ̨hɛ bi zocpa cʉtꞌa mahuąhi ngue di pɛpi; nɛ nu manꞌda, yo mahuąhi bi zocpa a; nɛ nu manꞌda bi zocpa nꞌda mahuąhi. Bi unni hangu xøtꞌa di pɛpi nꞌda ngu nꞌda. Nɛ bi mba bʉya. 16 Nɛ nuꞌa bi unni cʉtꞌa mahuąhi, bi pɛpi nɛ bi dąh mi cʉtꞌa mahuąhi. 17 Nɛꞌa bi unni yomahuąhi, yomahuąhi xø bi dąpi. 18 Pɛ nuꞌa bi unꞌna nꞌda mahuąhi, bi mba bá cätꞌa häi a rá mbɛti xi unꞌna rá hmu.
19 Nɛ him ꞌbe bá penc rá hmu. Pɛ nuꞌbʉ mi zøhø bi zonꞌndʉ yʉ́ ꞌyɛ̨hɛ mahønꞌa ngue da nu ꞌbɛꞌa xí ꞌyøtꞌʉ. 20 Mꞌbɛtꞌo bi zønꞌa xín tꞌunni cʉtꞌa mahuąhi, nɛ bi däpꞌa rá hmu cʉtꞌa mahuąhi ngue rá mbɛti zɛhɛ rá hmu. Nɛ xø bi unꞌna xí dąha ngue mi cʉtꞌa mahuąhi, nɛ bi ꞌyɛ̨mbi: “Grá hmu, i ja ua ni mbɛti, nɛhna cʉtꞌa mahuąhi dá tąha,” bi ꞌyɛ̨mbi. 21 “Xʉn ho,” bi ꞌyɛ̨nꞌa rá hmu. “Nuꞌi grá hogambɛfi,” bi tꞌɛ̨m bʉya. “Xʉn ho gá ꞌyørpa a tsꞌʉtho dá ꞌda i, janangueꞌa ga ꞌda i manꞌda xʉn ngu ya. Bá thocua mbo ꞌdatꞌua dan johyaui,” bi ꞌyɛ̨nꞌa rá hmu. 22 Nɛ xø bi zøm bʉ manꞌda xí unni yo mahuąhi, nɛ bi ꞌyɛ̨na: “Grá hmu, i ja ua ra mbɛti gá ꞌdaqui, nɛhna mi yomahuąhi dá tąha i ja ua,” bi ꞌyɛ̨mpꞌa rá hmu. 23 Nɛ nuꞌa rá hmu bʉya bi ꞌyɛ̨mbi: “Xʉn ho, grá hogambɛfi, xʉn ho gá ꞌyøtꞌe, madagueꞌbʉ hingui ngu dá ꞌda i, nuya manꞌda xʉn ngu ga ꞌda i. Bá thocua mbo ꞌdatꞌua dan johyaui,” bi ꞌyɛ̨mbi. 24 Pɛ nuꞌbʉ mí zøm bʉ a xi hyąnꞌa nꞌda mahuąhi, bi ꞌyɛ̨mpꞌa rá hmu: “Grá hmu, mí pącä ngue hinꞌyʉ nin huɛ̨cate nɛ nząi guí honi ꞌbɛpʉ gdí hyąnba rá mbɛti yʉ jąꞌi nɛ gui hyąnba yʉ́ huąhi ʉ ꞌda. 25 Janangueꞌa dá pɛsꞌ thoho a gá ꞌdaqui, dí su gui sʉqui ꞌbʉ xcá ꞌbɛtho, nɛ i ja ua ni mbɛti gá ꞌdac ya,” bi ꞌyɛ̨na. 26 Nɛ nuꞌa rá hmu bʉya bi ꞌyɛ̨mbi: “Gra ndødąnhyɛ̨i, hingui ho gá ꞌyøtꞌe ngue hin gá pɛpꞌa ra mbɛti. 27 Nuꞌbʉ guí pądi ngue dí numanhogä ga tącä, sä xquí hmi a ra mbɛti nɛ xtán dąh rán zäbi, nɛ hin xtím ꞌbɛh pʉya,” bi ꞌyɛ̨nꞌa rá hmu. 28 Nɛ bi ꞌyɛ̨mpꞌʉ miꞌda yʉ́ ꞌyɛ̨hɛ mí ꞌbäpʉ: “Hyąnba na ra mbɛti, dami unꞌna bin tꞌunni ꞌdɛtꞌa mahuąhi. 29 Nguetho nuꞌa bim pɛfi xʉn ho, manꞌda xʉn ngu din tꞌunni. Pɛ nuꞌa him bim pɛfi, pɛ da thąnba a zi tsꞌʉ mí pɛꞌtsꞌi. 30 Nɛ nuna ra tsꞌomꞌbäi mbɛfi na, bá høthʉ bʉ ja ra ꞌbɛxui guepʉ din zom bʉ nɛ din guxtpʉ yʉ́ tsꞌi,” bi ꞌyɛ̨nꞌa ra hmu bʉya, bi ꞌyɛ̨nꞌa ra Jesús ꞌbʉ mi man na ran tꞌuti. Nɛ njabʉ din ja ꞌbʉ bi ꞌyøtꞌa ran tsꞌʉtꞌabi Oją.
Ran tꞌuti nangue ran tsꞌɛmbi da tꞌørpa yʉ jąꞌi
31 Nɛ bi ꞌyɛ̨m mahønꞌa ra Jesús:
―Nuꞌbʉ bá pengä, nugä ngue dán jąꞌigä ua ja ra ximhäi, dam mixtegä, dan tsꞌʉtꞌabigä; dan ꞌyohe yʉ́m ꞌbɛhni Oją nɛ ga hupʉ ja ma mɛxa ngue din ja ma tsꞌɛdi xʉn ho. 32 Nɛ dim pɛti gätho yʉ jąꞌi gä na ndoho ra ximhäi bʉ ga hucä. Nɛ gätho ga huanꞌdʉ tengu øtꞌa nꞌda ra mbändɛꞌyo, ngue nꞌdanni ga fäꞌbʉ yʉ dɛꞌyo nɛ nꞌdanni ga fäꞌbʉ yʉ dɛnzu. 33 Nɛ nu yʉ dɛꞌyo ga fämpꞌʉ ja man ꞌyɛi nɛ nu yʉ dɛnzu ga fämpꞌʉ ja ma gąha. 34 Nɛ ga ɛ̨mpꞌʉ dim ꞌbäpʉ man ꞌyɛi: “Ba ɛ̨hmbʉ ua, bi jąpꞌahʉ Oją. Ga ꞌda ahʉ ra tsꞌɛdi án tsꞌänni ngue gui hyąmhbʉ gueꞌbʉ go rá mbʉdi ra ximhäi,” ga ɛ̨mpꞌʉ. 35 “Nguetho gá ꞌdajʉ ra hmɛ ꞌbʉ mán tumanthuhu; nɛ gá ꞌdajʉ ra dehe ꞌbʉ mán tuthe; nɛ gá säyagahʉ ꞌda ahʉ ꞌbʉ mán ꞌyo bʉ nꞌdanni ni hninihʉ. 36 Nɛ gá ꞌdajʉ ma he ꞌbʉ gmí nuhʉ hinꞌyʉ ma hegä; nɛ gá nuc ꞌbʉ mán hyɛ̨nni, nɛ gá zɛnguagahʉ ꞌbʉ mán ofädi,” ga ɛ̨mpꞌʉ, bi ꞌyɛ̨nꞌa ra Jesús. 37 Nɛ da ꞌyɛ̨ncꞌʉ: “Grá Hmu, ꞌbɛꞌa ní pa dá øtꞌahe a guím ma. Hin dím bɛ̨mhbe ngue gán tumanthuhu nꞌdandį nɛ gamá ꞌuįn ahe. Nɛ hin dím bɛ̨mhbe ngue gán tuthe nɛ xcá ꞌda ahe ra dehe. 38 Nɛ hin dím bɛ̨mhbe ꞌbʉ xcamá säya ahe, nɛ xcá ꞌda ahe ni he. 39 Nɛ hin dím bɛ̨mhbe ꞌbʉ gamán hyɛ̨nni o gue gamán ofädi ngue xcá nu ahe,” da ꞌyɛ̨ngui. 40 Nɛ nugä drá hmutsꞌʉtꞌabigä, ga ɛ̨mbä ʉ bʉya: “Majuąni dí xi ahʉ, nuꞌa ran ho gá ꞌyørpahʉ nꞌda ma cuhʉ, madagueꞌa nte di muui bʉ na hnu, pɛ guecä gá ꞌyørcä a,” ga ɛ̨mpꞌʉ bʉya, bi ꞌyɛnꞌa ra Jesús.
41 ―Nɛ nubʉya, nugä drá hmutsꞌʉtꞌabigä, ga ɛ̨mpꞌʉ ꞌbäpʉ ja ma gąha: “Dami ꞌuehmbʉ ua ja ma hmi, ní mbähä bʉ ja ra sibi njąmꞌbʉ da huɛ̨tꞌi, nguepʉ dá sänni din zø a ra zįthu nɛ ʉ yʉ́ mizįthuhʉ. 42 Nguetho dán tumanthuhu nɛ hin gá ꞌuįnjʉ, nɛ dán tuthe, nɛ hin gá sithegahʉ, 43 nɛ hin gá säyagahʉ ꞌbʉ mán ꞌyo bʉ nꞌdanni, nɛ hin te má he gá ꞌdajʉ ꞌbʉ gmín nuhʉ hinꞌyʉ ma hegä; nɛ hin gá nugui ꞌbʉ mán hyɛ̨nni, nɛ hin gbán nujʉ ꞌbʉ mán ofädi,” ga ɛ̨mpꞌʉ. 44 Nɛ nuꞌʉ da ꞌyɛ̨ngui: “Grá hmu, ꞌbɛꞌa ní pa dá nu ahe ngue gán tumanthuhu o gue gán tuthe o gue gán ꞌyo bʉ nꞌdanni ra hnini. Nɛ ꞌbɛꞌa ní pa dá nuhe hin mí he ni he; o gue xquín hyɛ̨nni o gue xcamín ofädi,” da ꞌyɛ̨nꞌʉ. 45 Pɛ nugä drá hmutsꞌʉtꞌabigä, ga ɛ̨mpꞌʉ bʉya: “Majuąni dí xi ahʉ, nꞌda ma cu madagueꞌa nte di muui bʉ na hnu, ꞌbʉ hin gá ꞌyørpahʉ ran ho, nɛcä hin gá ꞌyørcahʉ ran ho,” ga ɛ̨mpꞌʉ. 46 Nɛ nu ʉ bʉya da nu ran ʉnbi maząi. Pɛ nuꞌʉ bi ꞌyøtꞌ ran ho din ja ra te maząi ʉ, bi ꞌyɛ̨nꞌa ra Jesús.