Bi ma ra Jesús da guah ra dąniją
24
Nɛ nubʉya, nu ra Jesús ꞌbʉ mi bøm bʉ ja ra dąniją, dá utähe ꞌbɛꞌa gä mí ja bʉ ja ra ngu.―Mahotho ua, dá ɛ̨mfe.
2 Pɛ nu ra Jesús bi ꞌyɛ̨nje:
―Guí nuhʉ ngue mahotho i ja ua, pɛ gätho da mba nsoꞌtꞌi, nɛ xínga nꞌda ra do din tøcua ngue hin da mba ma juadi, bi ꞌyɛ̨nꞌa ra Jesús.
Mꞌbɛtꞌo din ja yʉ hmɛpya ꞌbʉ ran zɛgui
3 Nɛ dá nɛxähe dá mbähmbe bʉ ja ra nyuni Olivos. Nɛ ní mipʉ ra Jesús dá ändähe ꞌbʉ njom mí øde, yʉ́ xädigähe:
―Dín ndehe gui xije ndaꞌa ní pa din ja a gám mam bʉ ja ra niją. ꞌBɛꞌa ní hmɛpya din ja ꞌbʉ guá pengui mahønꞌa nɛꞌbʉ ran zɛgui ra pa, dá ɛ̨mfe bʉya.
4 Nɛ bi ꞌyɛ̨ngähe ra Jesús:
―Damim fähmbʉ ꞌdahma njon da hyä ahʉ. 5 Nguetho xʉn ngu yʉ hyäte ba ɛ̨hɛ da ꞌyɛ̨na: “Nugä, guecä, rá thahnigä Oją, drá Cristogä,” da ꞌyɛ̨n ahʉ. Nɛ xʉn ngu da hyätꞌʉ nangue ra fɛhni da man ʉ. 6 Nɛ nuꞌbʉ gui ꞌyøhmbʉ ngue din ja yʉ sʉi, o gueꞌbʉ gui ꞌyøhmbʉ i ja bʉ ja ꞌda yʉ hnini ya, pɛ o guín suhʉ, nguetho jatho din ja ʉ. Nɛ nuꞌbʉ bin ja ʉ, xínga gueꞌbʉ rán zɛguiꞌbʉ. 7 Nguetho da ndantsꞌʉ ꞌda yʉ tsꞌʉtꞌabi din sʉhmbʉ ʉ yʉ́ mi tsꞌʉtꞌabihʉ, nɛ da ndancꞌʉ ꞌda yʉ hnini din sʉhmbʉ miꞌda yʉ hnini. Nɛ xʉn ngu yʉ nidį din ja ra thuhu, nɛ ra dągɛ̨hɛ̨, nɛ din ja yʉ ꞌyąmhäi bʉ ja yʉ xɛqui ua ja ra ximhäi. 8 Pɛ nuꞌʉ, yʉ́ mbʉdi thoho yʉn ʉnbi din ja ʉ.
9 Nɛ da mba ma dä ahʉ nɛ da tsꞌix ahʉ ngue din ʉnꞌnahʉ, nɛ da tho ahʉ ꞌda ahʉ. Nɛ gätho yʉ jąꞌi da zan ahʉ nguetho guí tɛngahʉ. 10 Nɛ nuꞌʉ ꞌda mí ɛ̨cꞌyɛigui, mꞌbɛjua da ꞌuesɛ. Nɛ guesɛ ʉ di dä ʉ ma ꞌyɛ̨cꞌyɛi da mba ma ʉnbi. 11 Nɛ dim ꞌbʉi xʉn ngu yʉ hyäte pøngahyą nɛ xʉn ngu yʉ jąꞌi da hyätꞌʉ. 12 Nɛ nangue a ran tsꞌo xtá ngu, him ma din ja yʉ́n huɛ̨cate ʉ ꞌda. 13 Pɛ nuꞌa da hyätꞌi gueꞌbʉ go ran zɛgui, da dąha dim pø a. 14 Nɛ gätho na ndoho ra ximhäi da hma ꞌbɛꞌa da zä dí yʉrpʉ di manda rá tsꞌɛdi Oją nꞌda. Nɛ gätho yʉ jąꞌi ꞌdahma ꞌdanꞌyo bʉ na yą da sifi, nɛ nubʉya, gueꞌa ra pa ran zɛgui a bʉya, bi ꞌyɛ̨nꞌa ra Jesús.
15-16 Nu ra pøngahyą Daniel mayaꞌbʉ bi ma ngue din ja nꞌda ran tsꞌo di tsꞌoni gätho. Janangueꞌa nuꞌbʉ gá nuhʉ da mbʉdi din ja bʉ ja ra dąniją a, dami ꞌdahmbʉ bʉ ra xɛqui Judea, ní mbähä bʉ ja yʉ dąpo. Nguetho ntsꞌutho ran ʉnbi din jabʉ. 17 ꞌBex gui mbähä. Nuꞌbʉ gdi tøhmbʉ bʉ maxøtsꞌe ra tøcangu, hin gui cʉthʉ mbo ra ngu ngue gui hyąxhʉ ꞌbɛꞌa di ja bʉ. Dami ꞌdathohʉ. 18 Nɛ nuꞌbʉ gdi ꞌbähmbʉ bʉ ja ni huąhihʉ, hin ꞌbɛ gui mbähä bʉ ni ngumhbʉ ngue gba cą ni xiꞌyohʉ. Dami ꞌdathohʉ. 19 Huɛ̨cate ʉ yʉ xisu in hątꞌʉhni ʉ yʉ pa ʉ, nɛꞌʉ i ꞌbʉh yʉ́ ꞌuɛre, nguetho xʉn hɛ̨i thoho da ꞌda ʉ. 20 ꞌYäfʉ rá mate Oją hinga gueꞌʉ yʉ pa xtan sɛ din ja ahʉ ran ꞌdagui, nɛ xínga gueꞌbʉ ra pa ran tsꞌäya, nguetho i man ʉ yʉn tꞌɛ̨di hinga yatho gan ꞌyohʉ a ra pa ran tsꞌäya. 21 Dami ꞌyäfʉ rá mate Oją, nguetho nuꞌa ran ʉnbi din ja, hin jąmꞌbʉ nꞌdandį xøn ja gueꞌbʉ go rá mbʉdi ra ximhäi. Nɛ nuꞌbʉ ya bin ja, hin manꞌdandį din ja a ran ʉnbi tengu a. 22 Nɛ nu Oją da zänba thoho ʉ yʉn ʉnbi din ja nangue a di huɛ̨cꞌʉ xí huahni. Nuꞌbʉ hinꞌna, njon da bongui.
23 Nuꞌʉ yʉ pa ʉ, “Dami nuhʉ ua, i ꞌbäcua ra Cristo,” da ꞌyɛ̨n ahʉ. Nɛ nuꞌʉ miꞌda da ꞌyɛ̨n ahʉ: “Dami nuhʉ i ꞌbähnʉ ra Cristo.” Pɛ o guí ɛ̨cꞌyɛihʉ ʉ. 24 Nguetho xʉn ngu yʉ hyäte dim ꞌbʉi, sä da ꞌyɛ̨nꞌʉ: “Guecä, rá thahni Oją, drá Cristogä,” sä da ꞌyɛ̨nꞌʉ. Nɛ xʉn ngu da ꞌyɛ̨na ngue dim pøngahyą nangue Oją, nɛ da ꞌyøtꞌ yʉ hyonya ntꞌøtꞌe nɛ yʉ hmɛpya ngue da nde da hyät yʉ jąꞌi. Nɛ da hyoni ꞌbɛꞌa da zä dí hyätꞌʉ xí huahn Oją. 25 Nuya gätho dá xi ahʉ guepʉ da zä gui pąhmbʉ ꞌbɛꞌa din ja. 26 Janangue nuꞌbʉ da ꞌyɛ̨n ahʉ: “Ní mbähä, bí ꞌbäpʉ maꞌueni a ra Cristo,” da ꞌyɛ̨nꞌahʉ, pɛ o guí pähä. O gue da ꞌyɛ̨nꞌahʉ: “Bá cʉthʉ ua, i ꞌbäcua ra Cristo,” da ꞌyɛ̨nꞌahʉ, pɛ o guí cʉthʉ bʉ. 27 Nguetho nuꞌbʉ bá pengä ua mahønꞌa, nugä ngue dán jąꞌigä ua ja ra ximhäi, dan jagä tengu rán nɛqui ra huɛi ngue dam ꞌbathogä gätho ra ximhäi. 28 Nɛ tengu i øtꞌ yʉ pada, ɛ̨mmɛ di pɛti bʉ ꞌbɛn ʉ xʉn du, din jabʉ a ran tsꞌɛmbi din ja bʉ ꞌbʉ ʉ yʉ tsꞌomꞌbäi.
ꞌBʉ bá peng ra Jesús
29 Nɛ xø bi thoqui bi man ra Jesús nɛ bi ꞌyɛ̨na:
―Nuꞌbʉ bin ja a ran ʉnbi bʉya, him man di nɛc ra hyadi nɛ ra ząna, nuꞌʉ yʉ sø ꞌbʉpʉ mahɛ̨tsꞌi da dägui. Gätho bí ja bʉ mahɛ̨tsꞌi gä di ꞌbɛh yʉ́ tsꞌɛdi ʉ. 30 Nɛ nubʉya di nɛqui bʉ mahɛ̨tsꞌi ra hmɛpya nanguecä ngue dán jąꞌigä ua ja ra ximhäi, nɛ gätho yʉ hnini ua ja ra ximhäi din su. Nɛ da nugui ba ɛ̨cä bʉ ja yʉ güi, dan ꞌyoꞌbe ma tsꞌɛdi tąte thoho, mixte thoho, bi ꞌyɛ̨nꞌa ra Jesús. 31 Nɛ ntsꞌɛdi din yą ra thʉxi. Nɛ ba pɛnhdä yʉ́m ꞌbɛhni Oją di pɛti gätho ʉ bi huahn Oją, gä na ndoho ra ximhäi.
32 Guim bɛ̨mhbʉ ꞌbɛꞌa dí øthʉ ua ma häihʉ dyʉ israelhʉ, ngue nuꞌbʉ dí nuhʉ bi mbʉdi dim pʉh yʉ́ mbʉi ꞌda yʉ za, ya dí pąhmbʉ mi tsꞌʉtho ba ɛ̨pʉ yʉ́ pa ra paꞌye. 33 Nɛ ngutho ꞌbʉ guín nuhʉ bin ja gätho ya yʉn ʉnbi dí xi ahʉ, gui pąhmbʉ bʉya ngue mbɛ rán zɛgui. 34 Nɛ majuąni dí xi ahʉ, di ꞌbʉtho ua ꞌda ahʉ ꞌbʉ bi mbʉdi din ja. 35 Nu ra ximhäi nɛ mahɛ̨tsꞌi da zøni da gua ʉ, pɛ nuꞌa mam hmangä njąmꞌbʉ da gua a.
36 Pɛ njongui pądi ndaꞌa ní pa din ja a dím mangä ya, xínga gueꞌʉ yʉ́m ꞌbɛhni Oją mahɛ̨tsꞌi nɛ xínga guengä rá Tsꞌʉntꞌʉgä Oją dí pądi, pɛ høntꞌa Oją ma Ta i pą a ra ora din ja.
37 Nɛ tengu thoho bin ja ꞌbʉ mí ꞌbʉh ra Noé, ngutho din ja ꞌbʉ bá pengä mahønꞌa, nugä ngue dán jąꞌigä ua ja ra ximhäi. 38 Nu yʉ pa ʉ ngueꞌbʉ mi tsꞌʉtho din ja ra dąmbʉntꞌi, nu yʉ jąꞌi mi ꞌbʉhmbʉ ra Noé høntꞌa ran tsꞌihmɛ mim bɛ̨ni nɛ høntꞌa ran thąti mí honi, gueꞌbʉ go mí yʉrpʉ ja ra mbosa ra Noé. 39 Nɛ him bi ꞌyʉrpa ra güɛnda a bi sifi ngue din ja ra ꞌye, jagueꞌbʉ mi mbʉh ra ꞌye, nɛ bi yuh ra dehe ua ja ra häi nɛ gätho bi gua ʉ. Nɛ din jabʉ ꞌbʉ bá pengä mahønꞌa, guecä dán jąꞌigä ua ja ra ximhäi. 40 Nɛ dim ꞌbʉ i yoho yʉn ꞌyohʉ bʉ ja a ra huąhi, nuꞌa nꞌda da mba ntsꞌitsꞌi nɛ manꞌda da tsꞌopʉ. 41 Nɛꞌbʉ di cʉm bʉ ja nꞌda ra ngu yoho yʉ xisu, nuꞌa nꞌda da mba ntsꞌitsꞌi nɛ nu manꞌda da tsꞌopʉ.
42 Janangueꞌa dí xi ahʉ, o guí tonspahʉ ra tꞌąha, nguetho hin guí pąhmbʉ ꞌbɛꞌa ní ora ba ɛ̨ a ni hmuhʉ. 43 Nuꞌbʉ nꞌda ran ꞌyohʉ xtám bądi ndaꞌa ní xui xtán yʉrpʉ yʉ bɛ̨ bʉ ja rá ngu, xtín äthą, xtán døꞌmi, nɛ hin xtá japi xtá nyʉrpʉ ja rá ngu ngue da bɛ̨pi ꞌbɛꞌa i ja bʉ. Pɛ hingui pądi ꞌbɛꞌa ní pa, janangueꞌa i tøꞌmi gätho yʉ pa. 44 Janangueꞌa dí xi ahʉ, damin sähʉ nguetho tsꞌʉrpʉ thoho ga søcä, guecä dán jąꞌigä ua ja ra ximhäi, ngue ra ora njongui tøcpä ga søcä, bi ꞌyɛ̨nꞌa ra Jesús.
Rán tꞌuti ra hogambɛfi nɛ ra tsꞌomꞌbäi mbɛfi
45-46 Nɛ xø bi ꞌyɛ̨na:
―Dami ꞌyøthʉ tenguꞌbʉ gyʉ hogambɛfihʉ. Nuꞌa ra ngʉrpambɛfi ꞌbʉ xʉn ho i øtꞌe, nɛ nuꞌbʉ da mba nꞌdanni rá hmu da zopʉ ja rá ngu, da ꞌyøtꞌe tenguꞌbʉ i ꞌbʉsɛ bʉ rá hmu. Nɛ nuꞌbʉ bá pencꞌa rá hmu, bi nu bi jamansu rá ꞌbɛfi, nɛ xʉn ngu ran jąpi da nu a bʉya. 47 Majuąni dí xi ahʉ, nuꞌa ra ngʉrpambɛfi, manꞌda din tꞌun ra tsꞌɛdi, nɛ ꞌbɛꞌa gätho i pɛꞌtsꞌa rá hmu di jamansu a. 48 Pɛ nuꞌbʉ ra tsꞌomꞌbäi a ra ngʉrpambɛfi, nɛ im bɛ̨ni ngue him ꞌbe ba pencꞌa rá hmu, 49 nɛ di ʉnba yʉ́ ꞌyɛ̨hɛ nɛ i tɛnthoho yʉ mihni, 50 tsꞌʉrpʉ thoho ba pencꞌa rá hmu nꞌda ra pa ngue hingui pą a ra ngʉrpambɛfi. 51 Nɛ nubʉya din tꞌunꞌna nꞌda ran ʉnbi xʉn ʉtho, nɛ nꞌdatꞌa ran ʉnbi da nuhʉ ʉ di yorpa a im bɛ̨ni. Nɛ din zom bʉya nɛ din guxtpʉ yʉ́ tsꞌi bʉ ja ran ʉnbi maząi, bi ꞌyɛ̨nꞌa ra Jesús.