Bi man ra Jesús ꞌbɛꞌa nam bønꞌa øtꞌʉ yʉ fariseo nɛ yʉ xänbate niją
23
Nɛ nu ra Jesús bi xi ʉ yʉ jąꞌi, nɛcähe bʉya: 2 ―I ja yʉ́n tꞌɛ̨di da xänꞌnahʉ ʉ yʉ́n tꞌɛ̨di ra Moisés ʉ yʉ xänbate niją nɛ yʉ fariseo. 3 Dami ꞌyøhmbʉ ꞌbʉ i xänꞌnahʉ ʉ, pɛ hin gui ꞌyøthʉ tengu yʉ́n tꞌøtꞌe i sänzɛhɛ, nguetho ꞌdanꞌyo thoho gä miꞌda i øtꞌe. 4 Nɛ xʉn hɛ̨i i xi ahʉ gui ꞌyøthʉ, tenguꞌbʉ nꞌda ra ꞌbɛni xʉn hyʉ i xi ahʉ gui tuxhʉ, pɛ nusɛꞌʉ xíngui tsꞌʉ in nde da ꞌyøtꞌa i sän zɛhɛ. 5 Nɛ høntꞌa i honi da hnumanho yʉ́n tꞌøtꞌe i ørpʉ ꞌbʉh yʉ jąꞌi. Janangueꞌa di cuat yʉ́ dɛ̨ yʉ́n tꞌɛ̨di Oją ngue xʉn ndoho nɛ i pätꞌ yʉ́ ꞌyɛ, nɛ ɛ̨mmɛ di ho di hoc yʉ́n zʉdi yʉ́ nyąmpahni. 6 Nɛ ɛ̨mmɛ di ho rá mbʉdi din sihmɛ bʉ i tꞌøtꞌ yʉn tsꞌihmɛ; nɛ di ho da mipʉ ja ran thutsꞌi mahoqui bʉ ja ra niją. 7 Nɛ ɛ̨mmɛ di ho da tꞌɛ̨spa ꞌbʉ din zɛnguate. Nɛ i honi da tꞌɛ̨mbi yʉ́ xänbate ʉ. Høntho in nde da hnumansu.
8 Pɛ nu ahʉ o guí ndehʉ da tꞌɛ̨n ahʉ gyʉ xänbatehʉ, nguetho høngdä ni Xänbatejʉ ngue drá Thahnigä, nɛ nuꞌahʉ guidín cuhʉ, bi ꞌyɛ̨ngähe ra Jesús. 9 Nɛ hin gui ꞌyɛ̨mfʉ ni tahʉ ꞌda ʉ i ꞌbʉcua ja ra häi, nguetho nuꞌa ni Tahʉ bí ꞌbʉpʉ mahɛ̨tsꞌi a. 10 Nɛ xín gui ndehʉ ngue da tꞌɛ̨n ahʉ gyʉ hmuhʉ, nguetho guecä drá Thahni Oją ngue ra Cristo, ni Hmujʉ. 11 Nuꞌa toꞌo din ꞌyɛ̨hɛ thoho nangue yʉ́ mijąꞌihʉ, pɛ gueꞌa manꞌda xtán hɛ̨tsꞌi bʉ dá nu Oją a. 12 Nguetho nuꞌa i øtꞌe ngue xʉn hɛ̨tsꞌi, manꞌda zi cuɛ bʉ dá nu Oją a, pɛ nuꞌa i øtꞌe ngue hingui hɛ̨tsꞌi, pɛ manꞌda xtán hɛ̨tsꞌi bʉ dá nu Oją a, bi ꞌyɛ̨nꞌa ra Jesús.
13 Nɛ nubʉya bi ꞌyɛ̨mpꞌʉ yʉ xänbate niją nɛ yʉ fariseo:
―Huɛ̨hi maha ahʉ, gyʉ xänbatehʉ bʉ ja ra niją, nɛ gyʉ fariseohʉ, ɛ̨mmɛ guidí yorpahʉ a guím bɛ̨mhbʉ, nguetho gá xihmbʉ ʉ mín nde xtán yʉrpʉ di manda rá tsꞌɛdi Oją, ngue xquí ꞌyuthʉ ra ꞌyu, pɛ nɛ tenguꞌbʉ gá corpa zɛhɛhʉ ra goxthi, nguetho ꞌdanꞌyo thoho gá xänbahʉ. Nɛsɛ ahʉ hin da zä gui cʉthʉ bʉ, bi ꞌyɛ̨nꞌa ra Jesús.
14 Huɛ̨hi maha ahʉ, gyʉ xänbatehʉ nɛ gyʉ fariseohʉ, ɛ̨mmɛ guidí yorpahʉ a guí øthʉ. Sä nyaꞌa guí yąhʉ Oją bʉ ja yʉ́ ngun yʉ xisu xøn du yʉ́ ndø, ngue guí ɛ̨mhbʉ guí äfʉ rám fätsꞌi Oją ʉ, pɛ nɛ guí hąspahʉ ꞌbɛꞌa bi zopa yʉ́ ndø. Janangueꞌa manꞌda xʉn ʉtho ran ʉnbi gui nuhʉ.
15 Huɛ̨hi maha ahʉ, gyʉ xänbatehʉ nɛ gyʉ fariseohʉ, ɛ̨mmɛ guidí yorpahʉ a guí øthʉ. Säti thoho gán ꞌyohʉ hønbʉ go hapʉ nɛ yatho gá mbähä, ngue gá sømhbʉ bʉ ꞌbʉ ʉ i thąnde yʉ́ oją zɛhɛ, ngue gá xihmbʉ da dɛnꞌna nin xädihʉ. Pɛ nuꞌa toꞌo bi dɛnꞌnahʉ manꞌda gá jafʉ bim ꞌbɛdi, nɛ ꞌda gdí mbähä bʉ ja ran ʉnbi maząi, bi ꞌyɛ̨mpꞌʉ.
16 Huɛ̨hi maha ahʉ, gyʉ ngʉrpihʉ, pɛgue tenguꞌbʉ gyʉ xädähʉ nɛ guí xihmbʉ ʉ guí xänbahʉ: “Nuꞌbʉ ja ꞌbɛꞌa bi ma nꞌda ra jąꞌi, nɛ bi ndønba rá thuhu ra niją, hingui jatho di jąꞌtsꞌa,” guí ɛ̨mfʉ. “Pɛ nuꞌbʉ bi ndønba a rá oro i ja bʉ ja ra niją, i jatho di jąꞌtsꞌa bi ma,” guí ɛ̨mhbʉ. 17 Gyʉ ꞌyąmbʉihʉ nɛ gyʉ xädähʉ. Guí ɛ̨mhbʉ manꞌda di muui ra oro xinda gue ra niją, pɛgue hinꞌna maha nguetho gueꞌa ra niją ní tꞌɛ̨mbi xʉn ho a ra oro i ja bʉ, bi ꞌyɛ̨nꞌa ra Jesús. 18 Nɛ guí ɛ̨mhbʉ: “Nuꞌbʉ ja ꞌbɛꞌa bi man a nꞌda ra jąꞌi, nɛ bi ndønba rá thuhu ran tsꞌäya bʉ ja ra niją, guí ɛ̨mhbʉ hingui jatho di jąꞌtsꞌi. Pɛ nuꞌbʉ bi ndønba rá thuhu ran tꞌunni i høxpʉ ja ran tsꞌäya, ya ra tsꞌoqui a bʉya ꞌbʉ him bi jąꞌtsꞌi,” guí ɛ̨mhbʉ. 19 Gyʉ ꞌyąmbʉihʉ, tenguꞌbʉ gyʉ xädähʉ. Guí ɛ̨mhbʉ manꞌda di muui ʉ yʉ ꞌbøtsꞌe i ja bʉ xinda gue ran tsꞌäya. Pɛgue hinꞌna maha, gueꞌa ran tsꞌäya ní tꞌɛ̨mbi xʉn ho ʉ yʉ ꞌbøtsꞌe bí ja bʉ. 20 Nguetho nuꞌa bi ndønba rá thuhu ran tsꞌäya bʉ ja ra niją, hinga høntꞌa ran tsꞌäya, pɛ gätho í ndønba rá thuhu ꞌbɛꞌa gätho høxpʉ. 21 Nɛ nuꞌa toꞌo bi ndønba rá thuhu ra niją, hinga høntꞌa ra niją bi ndønba rá thuhu, pɛ nɛ a rá thuhu Oją bi ndønbi, nguetho rá ngu Oją a ra niją. 22 Nɛꞌbʉ nꞌda bi ndønba rá thuhu mahɛ̨tsꞌi, pɛ hinga høn bʉ mahɛ̨tsꞌi bi ndøni, pɛ nɛ a rá thuhu Oją bi ndønbi, nguetho bí ꞌbʉpʉ Oją bʉ mahɛ̨tsꞌi.
23 Huɛ̨hi maha ahʉ gyʉ xänbatehʉ nɛ gyʉ fariseohʉ, ɛ̨mmɛ guidí yorpahʉ a guí øthʉ. Hin njąmꞌbʉ gá pumbɛ̨nihʉ gá hyąxhʉ bʉ ja ra niją a ná ꞌdɛtꞌa yʉ́ ꞌyɛ̨thi yʉ tʉhʉ bi bøxpʉ ja ni huąhihʉ, tengu bi man ra Moisés, pɛ gá pumbɛ̨nihʉ ʉ yʉn tꞌɛ̨di manꞌda mahyoni, ngue i ɛ̨na: “ꞌDa gdí numanhohʉ ni mijąꞌihʉ, nɛ din ja nin huɛ̨catehʉ, nɛ gui ꞌyɛ̨cꞌyɛihʉ Oją.” Guehya ndeꞌbʉ manꞌda gan ɛ̨hya gui ꞌyøthʉ, madagueꞌbʉ gui thoqui gui ꞌyøthʉ ʉ miꞌda. 24 Pɛ gá ꞌyøthʉ tenguꞌbʉ gám fähmbʉ ngue xínga nꞌda ra ꞌuɛ̨ i sä di uąshʉ ꞌbʉ ja a guí sihʉ, pɛ nuꞌa go ra fani nɛ manꞌda go hin gá nuhʉ ꞌbʉ gmí tuthʉ a, nguetho hin guí pąhmbʉ ndaꞌa nín tꞌɛ̨di manꞌda xʉn ndoho.
25 Huɛ̨hi maha ahʉ gyʉ xänbatehʉ nɛ gyʉ fariseohʉ, ɛ̨mmɛ guidí yorpahʉ a guím bɛ̨mhbʉ. Gá ꞌyɛ̨mhbʉ xʉn hotho ahʉ, pɛ gá ꞌyøthʉ tenguꞌbʉ nꞌda ra baso bi mba mꞌberpe bʉ maxøtsꞌe, pɛ hinga nɛpʉ mbo. Nɛ tenguꞌbʉ nꞌda ra mbohi høn bʉ ní ndi a häi bi ꞌberpe, nɛ guín jahʉ bʉ nguetho ɛ̨mmɛ i yuh ni mbʉihʉ nangue ram fɛ̨ nɛ ran tsꞌiyate. 26 Gyʉ xädähʉ, ndeꞌbʉ gui ꞌyøthʉ tenguꞌbʉ nɛpʉ mbo bin sʉtꞌi nꞌda ra mbohi, nɛ majuąni xtán ho ahʉ bʉya, bi ꞌyɛ̨nꞌa ra Jesús.
27 Huɛ̨hi maha ahʉ gyʉ xänbatehʉ nɛ gyʉ fariseohʉ, ɛ̨mmɛ guidí yorpahʉ a guím bɛ̨mhbʉ. Nɛ guín jahʉ tenguꞌbʉ ra jądo bʉ ja ran ꞌyägui ngue xʉn tꞌaxi maxøtsꞌe, nɛ mahotho, pɛ nubʉ mbo, yupʉ yʉ doꞌyodu nɛ gä miꞌda xʉn xątho. 28 Guín jahʉ bʉ. Nubʉ na nu ahʉ yʉ jąꞌi, ɛ̨na xʉn ho ahʉ. Ɛ̨mmɛ guidí yorpahʉ a guím bɛ̨mhbʉ nɛ ɛ̨mmɛ yuh ran tsꞌo ni mbʉihʉ, bi ꞌyɛ̨nꞌa ra Jesús.
29 Pɛ í huɛ̨hi maha ahʉ gyʉ xänbatehʉ nɛ gyʉ fariseohʉ. Guidí yorpahʉ a guí øthʉ. Gá hocpahʉ yʉ́ jądonꞌyägui ʉ yʉ́ pøngahyą Oją mayaꞌbʉ bi hyo nim bombøtahʉ, nɛꞌʉ yʉ́ jądonꞌyägui ʉ guí ɛ̨mfʉ yʉ hocjąꞌi gá hocpahʉ. 30 Nɛ sä guí ɛ̨mhbʉ: “Nuꞌbʉ di ꞌbʉhmbʉ ʉ ꞌbʉ mi hyo yʉ́ pøngahyą Oją ʉ mam bombøtahʉ, nɛ xcá uthʉ ngue hingui ho a bi ꞌyøtꞌe, nɛ xcá ꞌuethohʉ,” guidín ꞌyɛ̨mfʉ. 31 Janangueꞌa gadín juąnzɛhɛhʉ ya ngue yʉ́ ꞌyʉ ahʉ yʉ hyote. 32 Dami juahmbʉ a ra ꞌbɛfi bi ꞌyutꞌahʉ nim bombøtahʉ, bi ꞌyɛ̨nꞌa ra Jesús.
33 Tenguꞌbʉ gyʉ pozʉhʉ. Hin da zä gui ꞌdahmbʉ bʉ ja ra sibi njąmꞌbʉ i huɛ̨tꞌi. 34 Nguetho, nuꞌbʉ ba pɛnꞌnahʉ ma pøngahyą nɛ ma xänbate, hin gui simanhohʉ ʉ, gui hyohʉ ʉ ꞌda, nɛ gui cuathʉ bʉ ja ra za ʉ ꞌda, nɛ gui fɛhmbʉ ʉ ꞌda bʉ ja ni nijąhʉ. Nɛ ɛ̨mmɛ gui ʉcpadahʉ ʉ ꞌda ꞌbʉ i ꞌyo bʉ ja ni hninihʉ. 35 Nɛ nangue a gui ꞌyøthʉ, tenguꞌbʉ gá hyosɛhʉ ʉ gä yʉn hocjąꞌi bi tho gueꞌbʉ go rá mbʉdi ra ximhäi, ꞌbʉ mí tho ra Abel ngue man ra hocjąꞌi nɛ asta gueꞌbʉ mi tho a ra Zacarías, rá tsꞌʉntꞌʉ ra Berequías, gá hyohʉ bʉ ja rá goxthi ra niją. 36 Majuąni dí xi ahʉ, tenguꞌbʉ ni tsꞌoqui zɛhɛhʉ ʉ gä yʉn thote i jatho ya, nɛ da tsꞌänꞌnahʉ ran ʉnbi nangue ʉ, bi ꞌyɛ̨nꞌa ra Jesús, bi tꞌɛ̨mpꞌʉ yʉ xänbate niją nɛ yʉ fariseo.
Bi huɛ̨cꞌʉ yʉ mɛngu Jerusalén ra Jesús
37 Nɛ nubʉya bi xi a nꞌda ram hma ʉ yʉ mɛngu bʉ Jerusalén, bi ꞌyɛ̨mbi:
―Ɛ̨mmɛ dím bɛ̨n ahʉ gyʉ mɛnguhʉ Jerusalén. Nząi guí hohʉ yʉ pøngahyą, nɛ guidí batꞌadohʉ ʉ miꞌda ba pɛnꞌnahʉ Oją. Nɛ xʉn ngu yʉ nidi dím bɛ̨ngä xcá pɛtꞌahʉ xcá jamansu ahʉ, tenguꞌbʉ nꞌda ra sumfø di pɛt yʉ́ tꞌʉhni nɛ i compꞌ rá hua, pɛ nuꞌahʉ, hin gá ndehʉ xcá ja ahʉ bʉ, bi ꞌyɛ̨nꞌa ra Jesús. 38 Dami nuhʉ ya, nu ni hninihʉ tenguꞌbʉ ya njongui ꞌbʉpʉ ya, 39 nguetho hin gui nujʉ mahønꞌa jaqueꞌbʉ bi zøn ra ora ba pengä ua nɛ gui ꞌyɛ̨scahʉ. “Mająpi a ba ɛ̨hɛ nangue rá thuhu ma Hmuhʉ Oją,” gui ꞌyɛ̨njʉ, bi ꞌyɛ̨nꞌa ra Jesús.