Nꞌda ran tꞌuti ngue ran thąti
22
Nɛ xø bi thoqui bi xänba yʉ jąꞌi nangue yʉn tꞌuti thoho bi man a ra Jesús, nɛ bi ꞌyɛ̨mpꞌʉ:2 ―Nuꞌa ní manda rá tsꞌɛdi Oją, i tꞌøtꞌe tengu bi ꞌyøtꞌa nꞌda ra tsꞌʉtꞌabi. Nuꞌa ra tsꞌʉtꞌabi bi zänꞌna nꞌda ra ngo ꞌbʉ min thąta nꞌda rá tsꞌʉntꞌʉ. 3 Nɛ bi mbɛnꞌdʉ yʉ́m ꞌbɛhni ngue ba sinba yʉ́ amigo, pɛ him bi nde bá ɛ̨hɛ. 4 Nɛ xø bi mbɛhn miꞌda, bi ꞌyɛ̨mbi: “Dami xihmbʉ ma amigo ba ɛ̨hɛ, nguetho ya dá hoc ran tsꞌihmɛ. Dá manda bi tho ꞌda man dąni xʉn zaqui nɛ ya gätho mahoqui, i ɛ̨nꞌa ra hmu, gui ꞌyɛ̨mfʉ.” Nɛ gueꞌa bi man ʉ yʉ́m ꞌbɛhni. 5 Pɛ him bi ꞌyʉrpatho ra güɛnda ʉ yʉ́ amigo, nɛ bi mba da huąhi a nꞌda, nu manꞌda bi mba bám pätho, 6 nɛ nuꞌʉ miꞌda bi bɛnt thoho yʉ́m ꞌbɛhni nɛ i thenthoho nɛ bi hyo ʉ. 7 Nuꞌbʉ mí ꞌyø a bin ja, ɛ̨mmɛ bin cuɛ ra tsꞌʉtꞌabi bʉya, bi mbɛnh yʉ́ dofʉi bá ho ʉ yʉ hyote nɛ bi ꞌyumpꞌa yʉ́ hnini. 8 Nɛ bi xih mahønꞌa ʉ yʉ́m ꞌbɛhni: “Nuya him bá ɛ̨ꞌʉ ma amigo nguetho hing yʉ́n sähʉ ba ɛ̨hɛ. 9 Ní mbähä bʉ ja yʉ ꞌyu nɛ gbá sihʉ ua høntꞌa go má jąꞌi gba tįmhbʉ bʉ, nguetho ya ma hoqui ꞌbɛꞌa da zi ua ja ran thąti.” 10 Nu yʉ́m ꞌbɛhni bʉya bi mba bʉ ja yʉ ꞌyu nɛ bá pɛn bʉ ja ran thąti toꞌo gätho bin cꞌathʉ bʉ, pɛ hinga mfądi ꞌbʉ yʉ tsꞌomꞌbäi o gue yʉ hocjąꞌi ꞌda. Nɛ bi yupʉ ja rá ngu ra tsꞌʉtꞌabi yʉ jąꞌi.
11 Nɛ nu ra tsꞌʉtꞌabi bʉya bi yʉrpʉ mbo da nu ʉ yʉ jąꞌi bi zøm bʉ. Nɛ bi nu nꞌda ran ꞌyohʉ ngue him mi he ʉ yʉ́ he i the ꞌbʉ in ja nꞌda ran thąti. 12 Nɛ bi ꞌyɛ̨nꞌa ra tsꞌʉtꞌabi bʉya: “Xiꞌi grán ꞌyohʉ, hanja gá cʉtꞌua nɛ hin guí he yʉ́n säui da the ua ja ran thąti,” bi ꞌyɛ̨mbi. Pɛ nu ran ꞌyohʉ him bi zä bi dąti. 13 Nɛ bi ꞌyɛ̨mpꞌʉ yʉ́ ꞌyɛ̨hɛ ra tsꞌʉtꞌabi: “Dami turpahʉ yʉ́ gua na ran ꞌyohʉ nɛ yʉ́ ꞌyɛ, nɛ gui ꞌyɛnthʉ bʉ ja ra ꞌbɛxui. Din zom bʉ nɛ din guxpʉ yʉ́ tsꞌi ʉ,” bi ꞌyɛ̨nꞌa ra tsꞌʉtꞌabi, bi ꞌyɛ̨nꞌa ra Jesús. 14 Nguetho xʉn ngu i tsꞌohni pɛ hinga gä yʉ́n sähʉ ngue da yʉrpʉ, bi ꞌyɛ̨na.
Nꞌda ran tꞌänni nangue ra renta bi tꞌänꞌna ra Jesús
15 Nɛ nubʉya bi mba ʉ yʉ fariseo. Nꞌdanni bá nyąsɛ ʉ, bi hyoni ꞌbɛꞌa dí ʉcpa ra Jesús ngue di yąpi. 16 Janangue bi ꞌbɛhn pʉ ꞌbʉh ra Jesús ʉ miꞌda yʉ́ mifariseohʉ, nɛ miꞌda ma ngʉrpihe mi tɛnꞌna ra tsꞌʉtꞌabi Herodes. Nuꞌbʉ mi zøm bʉ, bi ꞌyɛ̨nꞌʉ:
―Grá xänbate, dí pąhmbe gätho majuąni guím ma, bi ꞌyɛ̨mpꞌa ra Jesús ʉ. Nɛ guí u a majuąni rá ꞌyu Oją, nɛ hin guí su ꞌbʉ da hnumanho i ogue hinꞌna, bi ꞌyɛ̨nꞌʉ. 17 Pɛ dín ndehe gui xije tsꞌʉ ꞌbɛꞌa guím bɛ̨ni. Ha din thɛui yʉ́n tꞌɛ̨di Oją ngue dí juthe ra renta a ra tsꞌʉtꞌabi Roma in tsꞌʉtꞌabi ua, uague hinꞌna.
18 Pɛ nu ra Jesús bi bądi ꞌbɛꞌa mim bɛ̨nꞌʉ ngue in nde da dįni ꞌbɛꞌa dí yąpi. Janangueꞌa bi ꞌyɛ̨mbi:
―Ɛ̨mmɛ guidí yorpahʉ a guím bɛ̨mhbʉ. Høntho guí nde gui sägdahʉ. 19 Xi ni mbɛti gní jut ni rentahʉ, ga nugä, bi ꞌyɛ̨nꞌa ra Jesús.
―Toꞌo rá hmi na i cuat na ra mbɛti, nɛ toꞌo rá thuhu mán tꞌoꞌtꞌi ua, bi ꞌyɛ̨nꞌa ra Jesús.
21 ―Rá hmi ra tsꞌʉtꞌabi Roma nɛ rá thuhu a, bi ꞌyɛ̨nꞌʉ.
Nu ra Jesús bʉya bi ꞌyɛ̨mpꞌʉ:
―Nuꞌa rá mbɛti ra tsꞌʉtꞌabi gui unhdʉ a. Nuꞌa xin rá mbɛti Oją, gui unhdʉ Oją a, bi ꞌyɛ̨nꞌa ra Jesús.
22 Nɛ nuꞌbʉ mí ꞌyø a bi man ra Jesús, bi hyonya thoho ʉ ngue mi nde xtí yąpi. Nɛ xø bi mbatho ʉ.
Nꞌda ran tꞌänni gueꞌbʉ bi dąmbɛ̨ni ʉ xøn du
23 Nɛ mꞌbɛjua bʉya xø bi zøm bʉ ꞌda ma ngʉrpihe ngue yʉ saduceo. Nuꞌʉ him mi ɛ̨cꞌyɛi ngue da dąmbɛ̨ni ʉ xøn du, nguetho mi ɛ̨nꞌʉ, nu rá mbʉi nꞌda, ma zä dim ꞌbɛ ꞌbʉ bi du. Nɛ nuꞌʉ bi ꞌyänꞌna ra Jesús, bi ꞌyɛ̨mbi:
24 ―Xänbate i, dím bɛ̨nthohe ran tꞌɛ̨di bi man ra Moisés, ngue nuꞌbʉ da du nꞌda ran ꞌyohʉ, ꞌbʉ ꞌbʉh rá xisu, nɛ hin ním ꞌbʉ a nꞌda rá tꞌʉhni ꞌbʉ mi du, nuꞌa rán ꞌyohʉ din thątui a rá xisu a ra du, nɛ nuꞌbʉ dim ꞌbʉh rá mbʉdi tꞌʉhni, da tꞌɛ̨mbi rá tꞌʉhni a xí du. 25 Pɛ mí ꞌbʉcua yoto yʉn ꞌyohʉ midín ꞌyohʉzɛhɛ ʉ. Nuꞌa ra mbʉdi nꞌyohʉ bin thątui nꞌda ra xisu, pɛgue bi du nꞌdihi a ran ꞌyohʉ. Nɛ hin ním ꞌbʉh yʉ́ tꞌʉhni ꞌbʉ mi du, janangueꞌa bi zinba rá xisu a rán ꞌyohʉzɛhɛ. 26 Pɛ nɛꞌa guextaꞌa bi du nꞌdihi, nɛ hin ní dįntho rá tꞌʉhni a ra xisu ꞌbʉ mi du. Janangueꞌa xø bim ꞌbʉhmi a manꞌda rá mbegue. Nɛ bin ja gueꞌbʉ go mi dätꞌi bim ꞌbʉhmi gätho ʉ yʉ́ mbegue a ra xisu. 27 Mꞌbɛjua bʉya nɛsɛ ra xisu bi du, bi ꞌyɛ̨nꞌʉ. 28 Nuya, dami xije ꞌbɛꞌa din ja ꞌbʉ majuąni da dąmbɛ̨ni ʉ xøn du, ngue guí mamhbʉ. Ndaꞌa nín ꞌyohʉ da ꞌyɛ̨mbi rá xisu a ra xisu, nguetho gätho yoto bim ꞌbʉhmi, bi ꞌyɛ̨mpꞌa ra Jesús ꞌbʉ mi denthoho ʉ.
29 Bi dątꞌa ra Jesús:
―Nu ahʉ guídí ꞌbɛthohʉ, nguetho hin guím bɛ̨mhbʉ ꞌbɛꞌa mam bʉ ja rá tꞌohni Oją, nɛ xín guí pąhmbʉ rá tsꞌɛdi Oją. 30 Nuꞌbʉ bi dąmbɛ̨ni ʉ xøn du, ya him man ja ran thąti, pɛgue dim ꞌbʉtho tengu yʉ́m ꞌbɛhni Oją mahɛ̨tsꞌi, bi ꞌyɛ̨nꞌa ra Jesús.
31-32 Nɛ nangueꞌa ram hma ngue da dąmbɛ̨ni ʉ xøn du. Ha hin gá nuhʉ bʉ ja rá tꞌohni Oją ꞌbɛꞌa bi ma nangue ʉ ma ndu mbombøtahʉ ꞌbʉ mi ꞌyɛ̨na: “Nugä drá Ojągä, nu ra Abraham nɛ ra Isaac nɛ ra Jacob, i ɛ̨cꞌyɛigui,” bi ꞌyɛ̨n Oją. Ngubʉ im ma nguetho guextaꞌa i ꞌbʉh yʉ́ mbʉi ʉ, bi ꞌyɛ̨nꞌa ra Jesús.
33 Nɛ nuꞌʉ yʉ jąꞌi ꞌbʉ mí ꞌyø a bi man ra Jesús, bi hyonya thoho a bi xifi ꞌbʉ mi xänbi.
Ra Jesús bi ma ndaꞌa nín tꞌɛ̨di manꞌda mahyoni
34 Nɛ nu miꞌda ma ngʉrpihe ngue yʉ fariseo, ꞌbʉ mi nu hinꞌyʉ manꞌda sä da manꞌʉ yʉ saduceo, bin ꞌyänzɛhɛ ꞌbɛꞌa mí sä ngue dí yąpꞌa ra Jesús. 35 Nuꞌa nꞌda ra xänbate nangue ʉ yʉ fariseo bʉya, bi ꞌyänꞌna ra Jesús:
36 ―Xänbate i, bi ꞌyɛ̨na, ndaꞌa rán tꞌɛ̨di Oją hnɛhi thoho ga øtꞌähe.
37 Bi dą a ra Jesús bʉya:
―Nuꞌa ran tꞌɛ̨di i ɛ̨na: “Gam bɛ̨mhbʉ Oją ngue gätho ma mbʉihʉ, nɛ gätho ma jąꞌihʉ , nɛ gätho man ꞌyomfɛ̨nihʉ.” 38 Guehna ran tꞌɛ̨di i ꞌbɛtꞌo na, nangue ʉ gä miꞌda yʉn tꞌɛ̨di. 39 Nɛꞌa ɛ̨na: “Dami huɛ̨c ni mijąꞌihʉ tengu bʉ gní huɛ̨czɛhɛ ni jąꞌihʉ.” Guehna ná yoho ran tꞌɛ̨di guextaꞌa mahyoni na. 40 Nɛ nuꞌbʉ gá ꞌyøthʉ ya yoho yʉn tꞌɛ̨di, tenguꞌbʉ gá jąshʉ gätho yʉ́n tꞌɛ̨di ra Moisés nɛ yʉ́m hman yʉ́ pøngahyą Oją, bi ꞌyɛ̨nꞌa ra Jesús.
Toꞌo rá ꞌyʉ a ra Cristo
―ꞌBɛꞌa guím bɛ̨mhbʉ, toꞌo rá ꞌyʉ a ra Cristo, rá Thahni Oją, bi ꞌyɛ̨mpꞌʉ, bi ꞌyɛ̨nꞌa ra Jesús.
Bi dą ʉ yʉ fariseo bʉya:
―Nu rá Thahni Oją, rám bomꞌbɛto ra David a, bi ꞌyɛ̨nꞌʉ.
43 Nɛ xø bi ꞌyɛ̨nꞌa ra Jesús:
―Pɛ nɛ guesɛ ra David bi ꞌyɛ̨mbi rá hmu a ra Cristo ꞌbʉ hin ním ꞌbʉi, nguetho bi ꞌyɛ̨na:
44 Nu Oją bi ꞌyɛ̨mpꞌa ma Hmu:
“Hyucua ja man ꞌyɛi ga conhui ma tsꞌɛdi gueꞌbʉ go dá tąpä gätho ʉ man sʉihʉ ngue gui manda ʉ bʉya,” bi tꞌɛ̨mpꞌa ma Hmu, bi ꞌyɛ̨nꞌa ra David, ꞌbʉ mi bɛ̨nba rá Hogandąhi Oją ꞌbɛꞌa bi ma.
45 Hanja i ɛ̨mbi rá hmu nɛ xin rám bomꞌbɛto a rá Thahni Oją, ngue ra Cristo, bi ꞌyɛ̨nꞌa ra Jesús, bi ꞌyɛ̨mpꞌʉ.
46 Nɛ hinꞌyʉ ꞌbɛꞌa bi zä dí dąti, janangueꞌa him manꞌdandį bi zä da ꞌyänꞌndʉ yʉ fariseo bʉya.