Yʉ jąꞌi bi ꞌyɛ̨spa a ra Jesús ꞌbʉ mí yʉrpʉ Jerusalén
21
Nɛ bi zøm bʉ ja ra ndehnini Betfagé, nubʉ ja ra nyuni Olivos, nɛ him ma yabʉ ra hnini Jerusalén. Nu ra Jesús bʉya bi mbɛnꞌndʉ yoho ma mixädihe, 2 nɛ bi ꞌyɛ̨mbi:―Ní mbɛ nʉ ja ra tꞌʉhnini, guehnʉ gua tįmmi nꞌda ra buru in ꞌyoui rá bąsi. Bá xocui, nɛ bá siui ua ʉ. 3 Nuꞌbʉ da tꞌɛ̨nꞌaui ꞌbɛꞌa gui jahui, “Nuꞌa ra hmu da hyonꞌi tsꞌʉ nɛ ꞌbexgue ba sinꞌa thohoꞌbe,” gui ꞌyɛ̨m thohoui, bi ꞌyɛ̨nꞌa ra Jesús.
4 Nɛ guehna bi man ra pøngahyą mayaꞌbʉ ngue din ja ꞌbʉ mi ꞌyɛ̨na:
5 Gui ꞌyɛ̨mfʉ yʉ mɛngu bʉ Jerusalén:
“Dami nuhʉ ya ba ɛ̨cua ni hmutsꞌʉtꞌabihʉ,
nɛ hin din ꞌyɛ̨tsꞌi, ba hyuxꞌa nꞌda zi buru thoho
bán ꞌyoui rá bąsi ,” gui ꞌyɛ̨mfʉ,
bi ꞌyɛ̨nꞌa ra pøngahyą mayaꞌbʉ.
6 Nu ma mixädihe bʉya bi mba nɛ bi ꞌyøtꞌa bi xih ra Jesús. 7 Nɛ bá si ra buru nɛꞌa rá bąsi, nɛ bi gąspa yʉ́ coto nɛ bi hyuxꞌa ra Jesús bʉya. 8 Nɛ nu yʉ jąꞌi ɛ̨mmɛ xʉn ngu ʉ bi dɛnni nɛ bi mbøh yʉ́ coto bʉ ja ra ꞌyu nɛ yʉ́ pahni, nɛ yʉ́ paxi yʉ za bi mbøcpa bʉ ngue da thopʉ ra Jesús. Nɛ bi ꞌyɛ̨tꞌinde ra Jesús. 9 Nɛ nuꞌʉ i ꞌbɛtꞌo nɛꞌʉ bim ꞌbɛjua bi mbʉh na thuhu bʉya, bi ꞌyɛ̨na:
―Mixte thoho rá tsꞌɛdi rám bomꞌbɛto ra David. Nɛ xʉn ngu rán jąpi in ꞌyoui, nguetho bá ɛ̨hɛ nangue rá thuhu Oją, ra Hmu. Mixte thoho Oją mahɛ̨tsꞌi, bi ꞌyɛ̨nꞌʉ yʉ jąꞌi bʉ ní mba.
10 Nɛ nuꞌbʉ bi yʉrpʉ Jerusalén ra Jesús, gätho mi ꞌbʉpʉ ja ra hnini bi hyonya thoho, nɛ bi ꞌyänꞌndʉ mín ꞌyohʉ ra Jesús:
―Toꞌo nín ꞌyohʉ na, bi ꞌyɛ̨nꞌʉ.
11 ―Guehna ra pøngahyą, ra Jesús, ra mɛngu Nazaret bʉ ra häi Galilea, bi ꞌyɛ̨nꞌʉ bi tꞌänni.
Bi hyøn a thi ʉ mim pä bʉ ja ra niją ra Jesús
12 Nɛ nuꞌbʉ mi zøm bʉ Jerusalén a ra Jesús bi yʉrpʉ ja rá dąniją Oją, bi hyøn a thi gätho ʉ mím pä bʉ nɛꞌʉ mín täi bʉ. Nɛ bi ndønpa yʉ́ mɛxa ʉ midí päh yʉ mbɛti, nɛ bi bʉntpa yʉ́n thutsꞌi ʉ mi pä yʉ tsꞌąha, nɛ bi ꞌyɛ̨mpꞌʉ:
13 “Í thø a ma ngu ngue da mba nthąndegä bʉ,” i ɛ̨n Oją, i ɛ̨m bʉ ja rám hma. Pɛ nuꞌahʉ gá ꞌyørpadahʉ tenguꞌbʉ ra hyądo guepʉ nín ꞌyąnꞌʉ yʉ bɛ̨, bi ꞌyɛ̨nꞌa ra Jesús.
14 Nɛ nuꞌbʉ mí ꞌbʉpʉ ja ra dąniją, xø bi zøm bʉ miꞌda yʉ xädä, nɛꞌʉ mi dogua. Nu ra Jesús bi hocꞌʉ bʉya. 15 Pɛ nu yʉ hmumbäją nɛ yʉ xänbate niją him bi numanho yʉ́n tꞌøtꞌe bi ꞌyøtꞌa ra Jesús bʉ. Nɛ bin cuɛ ꞌbʉ mí ꞌyø a bi manꞌʉ yʉ tꞌʉhni ꞌbʉ mí ꞌyɛ̨na: “Mająpi rám bomꞌbɛto ra David,” bi tꞌɛ̨mpꞌa ra Jesús:
16 ―Ha hin guí øꞌa ꞌbɛꞌa man yʉ tꞌʉhni ngue i ɛ̨ꞌtsꞌi i, bi tꞌɛ̨mpꞌa ra Jesús.
―Dí øcä a i manꞌʉ, bi ꞌyɛ̨nꞌa. Pɛ xi ahʉ ha hin guím bɛ̨mhbʉ a i mam bʉ ja rám hma Oją ngue i ɛ̨na:
Gá japi bi bømanho a i man
ʉ yʉ tꞌʉhni ꞌbʉ i ɛ̨ꞌtsꞌi i,
bi tꞌɛ̨mpꞌa Oją ꞌbʉ mi tꞌɛ̨mbi,bi ꞌyɛ̨nꞌa ra Jesús.
17 Nɛ bi zotpʉ ʉ yʉ hmumbäją nɛ yʉ xänbate, dá mbäcähe a ra Jesús, bán oxähe bʉ ja ra hnini Betania.
Ra Jesús bi japi da ꞌyotꞌa nꞌda ra za
18 Nɛ nuꞌbʉ mí hyax bʉya, xø dá pengähe a ra Jesús bʉ Jerusalén. Nɛ bin tumanthuhu bʉ ꞌyu. 19 Nɛ bi nu nꞌda ra za bʉ ja ra ndenꞌyu, bi mba ɛ̨na da dʉcpa nꞌda rán dätꞌä. Pɛ høntꞌʉ yʉ́ paxi mi ja. Nɛ bi ꞌyɛ̨nꞌa ra Jesús:
―Nuya, njąmꞌbʉ din zʉh nin dätꞌä ya.
Nɛ ꞌbexgue bi ꞌyotꞌa ra za bʉya.
20 Nuꞌbʉ mán nuhe bi ꞌyotꞌa ra za, dá hyonya thohohe nɛ dá änhde ra Jesús:
―Hanja í ꞌyotꞌa nꞌdihi ra za, dá ɛ̨mfe.
21 Bi dąꞌa ra Jesús:
―Majuąni dí xi ahʉ, nuꞌbʉ gui ꞌyɛ̨cꞌyɛigahʉ xʉn ho, nɛ nꞌdatꞌa guim bɛ̨mhbʉ a rá tsꞌɛdi Oją, hinga høntꞌa dá øtꞌä sä gui ꞌyøthʉ, pɛ sä gui ꞌyøthʉ manꞌda xʉn hɛ̨i. Sä gui xihmbʉ nʉ ra tꞌøhø: “Dami ꞌuegue guin hyøzɛhɛ bʉ ja ra deją,” gui ꞌyɛ̨mfʉ, nɛ da ꞌueh pʉya. 22 Nɛ nu Oją di ꞌda ahʉ ꞌbɛꞌa gä guí äfʉ ꞌbʉ nꞌdatꞌa guím bɛ̨mhbʉ a rá tsꞌɛdi Oją, bi ꞌyɛ̨ngähe ra Jesús.
Bi tꞌänꞌna ra Jesús toꞌo bi un rán tꞌɛ̨di
23 Nɛ nuꞌbʉ má sømhbe bʉ Jerusalén, xø bin xänbate bʉ ja ra dąniją a ra Jesús. Nɛ xø bi mba bʉ yʉ hmumbäją nɛ miꞌda ma ngʉrpihe, nɛ bi ꞌyän mahønꞌa:
―Hanja gní ꞌyøtꞌa njabʉ. Toꞌo bi ꞌdaꞌa nin tꞌɛ̨di, bi ꞌyɛ̨nꞌʉ.
24-25 Bi ꞌyɛ̨nꞌa ra Jesús bʉya:
―Nɛcä ga änꞌnahʉ toꞌo bi un rán tꞌɛ̨di ra Xuua ngue bi ꞌyøtꞌ ran xixyą. Hague Oją uague yʉ jąꞌi. Nuꞌbʉ gui xijʉ, nɛcä ga xi ahʉ toꞌo bi ꞌdacä man tꞌɛ̨di bʉya, bi ꞌyɛ̨nꞌa ra Jesús.
Nɛ bin ꞌyɛ̨mzɛhɛ ʉ yʉ hmumbäją nɛ yʉ xänbate niją:
―"Bɛꞌa gue ga xihmbʉ, nguetho nuꞌbʉ ga ɛ̨mfʉ, “Oją bi un rán tꞌɛ̨di a ra Xuua,” nɛ da ꞌyɛ̨na: “Hanja hin gá ꞌyɛ̨cꞌyɛihʉ thą.” 26 Nɛ nuꞌbʉ ga ɛ̨mfʉ, “yʉ jąꞌi thoho bi un rán tꞌɛ̨di ra Xuua,” pɛ da zʉjʉ yʉ jąꞌi ꞌbʉ, nguetho im bɛ̨n ʉ ngue rá pøngahyą Oją a ra Xuua, bin ꞌyɛ̨mzɛhɛ ʉ.
27 Janangueꞌa bi ꞌyɛ̨mpꞌa ra Jesús:
―Hin dí pąhmbe, bi ꞌyɛ̨ntho ʉ.
Nu ra Jesús bʉya bi ꞌyɛ̨na:
―Xínga guecä ga xi ahʉ toꞌo bi ꞌdacä man tꞌɛ̨di ga øtꞌä a dí øtꞌä, bi tꞌɛ̨mpꞌʉ.
Ran tꞌuti a yoho yʉ tsꞌʉntꞌʉ bi sih ra ꞌbɛfi
28 Nɛ manꞌda bi man ra Jesús, bi ꞌyɛ̨na:
―Nu nꞌda ran ꞌyohʉ mí ꞌbʉ i yoho yʉ́ tsꞌʉntꞌʉ. Nɛ bi ꞌyɛ̨mpꞌa nꞌda rá tsꞌʉntꞌʉ: “Ní mba bʉ huąhi, bám pɛfi,” bi ꞌyɛ̨mbi. 29 Nɛ bi dąꞌa rá tsꞌʉntꞌʉ: “Hinꞌna, hin ga mba,” bi ꞌyɛ̨ntho. Pɛ mꞌbɛjua bin ꞌyomfɛ̨ni tsꞌʉ nɛ bi mba bim pɛfi. 30 Nɛꞌa manꞌda rá tsꞌʉntꞌʉ bi xifi da mba mahønꞌa. “Hąha, ga mba,” bi ꞌyɛ̨na. Pɛ him bi mba, bi ꞌyɛ̨nꞌa ra Jesús. 31 Nɛ xø bi ꞌyänꞌndʉ yʉ xänbate niją:
―Nuya, dami xiqui nangue ran tꞌuti dá xi ahʉ, ndaꞌa ní tsꞌʉntꞌʉ ngue njuąntho bi ꞌyøtꞌa rá pähä rá ta, bi ꞌyɛ̨nꞌa ra Jesús.
Nuꞌʉ bi dąti:
―Masque nuꞌa ra tsꞌʉntꞌʉ him mi nde da mba ꞌbʉ ra mbʉdi, gueꞌa njuąntho bi ꞌyøtꞌa rá pähä rá ta, bi ꞌyɛ̨nꞌʉ.
Nɛ nubʉya bi ꞌyɛ̨nꞌa ra Jesús:
―Guehma majuąni dí xi ahʉ, nu yʉ ziyate hyącahäi nɛ yʉ xisu ꞌyomtꞌɛ̨ni, manꞌda da yʉrpʉ di manda rá tsꞌɛdi Oją, pɛ nu ahʉ hin gui cʉthʉ bʉ. 32 Nguetho nuꞌbʉ mi xiꞌahʉ a ra Xuua Nxixyą, bi xänꞌnahʉ a ra ꞌyu xʉn ho, nɛ nu ahʉ hin gá ꞌyɛ̨cꞌyɛihʉ. Pɛ nu yʉ hyącahäi nɛ yʉ xisu i ꞌyomtꞌɛ̨ni,manꞌda go bi ꞌyɛ̨cꞌyɛi ʉ nɛ bi päh yʉ́ mbʉi. Nɛ nuꞌbʉ gmí nuhʉ ʉ, nɛ guextaꞌa hin gá nde gá päh ni mbʉihʉ, bi tꞌɛ̨mpꞌʉ yʉ hmumbäją nɛ yʉ xänbate niją.
Rán tꞌuti yʉ tsꞌomꞌbäi mbɛfi
33 Nɛ bi ꞌyɛ̨m mahønꞌa ra Jesús:
―ꞌYøhmbʉ tsꞌʉ manꞌda ran tꞌuti ga xi ahʉ. Mí ꞌbʉ a nꞌda ran ꞌyohʉ mi ja rán uąndätꞌä, nɛ bi føꞌtꞌe, nɛ bi hyø a nꞌda ra ngu guepʉ da thɛmpꞌ yʉ guindätꞌä. Nɛ bi mbäꞌma nꞌda ra jądo xʉn hɛ̨tsꞌi, da ndexꞌʉ da nu rá häi.
Nɛ nubʉya bi hmit yʉ́ häi ʉ ꞌda yʉ mbɛfi, nɛ bi nde bi mba nꞌdanni a ran ꞌyohʉ bʉya. 34 Nɛ nuꞌbʉ mi tsꞌʉtho din ja yʉn dätꞌä, bá pɛhnꞌi ꞌda yʉ́ ꞌyɛ̨hɛ da duspa ʉ yʉ́n dätꞌä, nguetho gueꞌa án yąhʉ a, ngue di unꞌni tsꞌʉ ꞌbɛꞌa da bøm bʉ. 35 Pɛ nuꞌʉ yʉ mbɛfi bi bɛntꞌʉ yʉ́m ꞌbɛhni a ra hmu. Nuꞌa nꞌda bi mbɛmthoho. Nuꞌa manꞌda bi hyotho. Nɛ nuꞌa manꞌda, bi hyøta dotho a. 36 Nɛ xø mahønꞌa, bá pɛhn miꞌda xʉn ngu yʉ́ ꞌyɛ̨hɛ ngue xtan duspa yʉ́n dätꞌä a rá mbɛti ran uąndätꞌä. Pɛ nuꞌʉ yʉ mbɛfi xø bi bɛnt mahønꞌa ꞌbʉ mi zøpʉ ʉ, nɛ ꞌdaꞌangu bi tꞌørpe tengu bi tꞌørpa ʉ mbʉdi bi zøpʉ.
37 Nɛ nubʉya bá pɛnꞌna rá tsꞌʉntꞌʉ zɛhɛ a rá mbɛti ra huąhi. Bi bɛ̨ni: “Masque da numansu na ma tsꞌʉntꞌʉ.” 38 Pɛ nuꞌbʉ mí nu ba ɛ̨pʉ rá tsꞌʉntꞌʉ, nu yʉ mbɛfi xø bi bɛ̨nꞌʉ: “Nuna, rá tsꞌʉntꞌʉ zɛhɛ, da gohmi ra häi na ꞌbʉ bi du rá ta. Pɛ mbähä ga hohʉ, janangue ga cosɛhʉ ra häi bʉya.” 39 Nɛ bi bɛnt bʉya, bi zixpʉ maꞌueni nɛ bi hyo, bi ꞌyɛ̨nꞌa ra Jesús.
40 Nu ra Jesús bi ꞌyänꞌndʉ mí ꞌbäpʉ:
―Xiꞌbʉ da mbasɛ na ra hmu, ꞌbɛꞌa da japꞌʉ yʉ́ mbɛfi ꞌbʉ, bi ꞌyɛ̨mpꞌʉ.
41 Bi dą ʉ bʉya:
―Masque da hyo ʉ yʉ́ mbɛfi, nguetho ɛ̨mmɛ yʉ tsꞌomꞌbäi ʉ, nɛ nu rá häi bʉya di hmitꞌʉ i pądi da guꞌtꞌa ra renta ꞌbʉ bi zøn ra pa da guꞌtꞌi, bi ꞌyɛ̨nꞌʉ.
42 Nɛ xø bi ꞌyɛ̨m bʉya:
―Ha njąmꞌbʉ gá nuhʉ bʉ ja rám hma Oją a ram hma i ɛ̨na:
Nuꞌa ra do bi bʉntꞌʉ yʉ gądo ꞌbʉ mi hyøh ra ngu,
gueꞌa ra do manꞌda mahyoni, tengu thoho yʉ guangu.
Gueꞌa bi zän Oją a,
nɛ gui hyonya thohohʉ,
i ɛ̨m bʉ rám hma Oją, bi ꞌyɛ̨nꞌa ra Jesús.
Nɛ gueꞌa i mam bʉ nangue a rá Thahni Oją ngue ra Cristo. 43 Janangueꞌa dí xi ahʉ, Oją him bi numanho a gá ꞌyøthʉ nɛ da thąnꞌnahʉ a ra ꞌbɛfi bʉ di manda rá tsꞌɛdi Oją, din tꞌunꞌdʉ miꞌda ngue da ꞌyøtꞌmanho a ra ꞌbɛfi gmí øthʉ. 44 Nɛ nuꞌa ra do bi mba ma bʉntꞌi, tenguꞌbʉ nꞌda ra xįndo i ti bʉ ja ra ꞌyu. Nɛ høntꞌa go toꞌo da dąng bʉ ja ra do, din tʉni, nɛ høntꞌa go toꞌo da zɛꞌma ra do, ꞌbexgue da ꞌyɛtꞌi, bi ꞌyɛ̨nꞌa ra Jesús.